علی امین گنڈاپور دہشتگردوں کی مکمل سہولت کاری پر تیار نہ تھے، اس لیے ہٹادیا گیا ، عطاء تارڑ
اشاعت کی تاریخ: 9th, October 2025 GMT
اسلام آباد: وزیر اطلاعات عطاء اللہ تارڑ نے کہاہے کہ علی امین گنڈاپور کووزیراعلیٰ کے عہدے سے اس لیے ہٹایا گیا کیونکہ وہ دہشت گردوں کی مکمل سہولت کاری پر تیار نہیں تھے، اور پی ٹی آئی نے بھگوڑے مراد سعید کے قریبی ساتھی کو وزارتِ اعلیٰ سونپنے کا فیصلہ کیا ہے، جیل میں بیٹھے شخص کے دور میں دہشت گردوں کو واپس لایا گیا، جس سے ملک کو نقصان پہنچا۔ تحریک انصاف کا انتشاری ٹولہ دہشت گردوں کا سہولت کار ہے۔
عطاء تارڑنے نیوز کانفرنس سے خطاب کرتے ہوئے وطن پر جان نچھاور کرنے والے شہداء کو زبردست خراج تحسین پیش کیا اور ریاست دشمن عناصر کو واضح پیغام دیا کہ ملک میں عدم استحکام پیدا کرنے کی کسی کوشش کو کامیاب نہیں ہونے دیا جائے گا۔
وزیر اطلاعات کا کہنا تھا کہ “شہدائے وطن کو پوری قوم سلام پیش کرتی ہے، مادر وطن کا دفاع کرنے والے نڈر سپوت ہمارے فخر ہیں۔” انہوں نے کہا کہ وزیراعظم اور فیلڈ مارشل اورکزئی میں شہید ہونے والے جوانوں کی نماز جنازہ میں شرکت ریاست کی جانب سے ان قربانیوں کا اعتراف ہے۔
عطاء اللہ تارڑ نے پاک سرزمین کے بہادر سپوتوں کے عزم اور جذبے کو سلام پیش کرتے ہوئے کہا کہ جب تک ایسے جان نثار جوان موجود ہیں، ملک خداداد کو کوئی نقصان نہیں پہنچا سکتا۔ “ہمارے شہداء کے لواحقین اپنے عظیم مرتبے پر فخر محسوس کرتے ہیں”، انہوں نے مزید کہا۔
وزیر اطلاعات نے دہشت گردوں اور ان کے مبینہ سہولت کاروں پر سخت تنقید کی۔ ان کا کہنا تھا کہ “جیل میں بیٹھے شخص کے دور میں دہشت گردوں کو واپس لایا گیا، جس سے ملک کو نقصان پہنچا۔ تحریک انصاف کا انتشاری ٹولہ دہشت گردوں کا سہولت کار ہے۔
انہوں نے الزام عائد کیا کہ علی امین گنڈاپور کو اس لیے ہٹایا گیا کیونکہ وہ دہشت گردوں کی مکمل سہولت کاری پر تیار نہیں تھے، اور پی ٹی آئی نے بھگوڑے مراد سعید کے قریبی ساتھی کو وزارتِ اعلیٰ سونپنے کا فیصلہ کیا ہے۔
عطاء اللہ تارڑ نے زور دے کر کہا کہ پاکستان کی سیکیورٹی پالیسی اسلام آباد میں بنتی ہے، کابل میں نہیں، اور نہ ہی کسی کو یہ اختیار دیا جائے گا کہ وہ ریاستی پالیسیوں پر بیرونی اثر ڈالے۔
انہوں نے خبردار کیا کہ سہیل آفریدی جیسے افراد کے ذریعے دہشت گردوں کو سہولت فراہم کرنے کی اجازت نہیں دی جائے گی، اور ریاست تمام سازشوں کو ناکام بنائے گی۔
لندن کی عدالت کے حالیہ فیصلے کا حوالہ دیتے ہوئے وزیر اطلاعات نے کہا کہ اس فیصلے سے پاکستان کی عزت و وقار میں اضافہ ہوا ہے اور یہ فیصلہ شرپسند عناصر کے منہ پر زوردار طمانچہ ہے۔
عطاء اللہ تارڑ نے کہا کہ ریاست اور قومی اداروں کے خلاف بیانیہ اور پروپیگنڈا ناکام ہوگا، ہم اپنے شہداء کو سلام پیش کرتے ہیں کہ وہ آج بھی دہشت گردوں کو اپنے مذموم مقاصد میں کامیاب نہیں ہونے دے رہے۔
ذریعہ
ذریعہ: Daily Mumtaz
کلیدی لفظ: عطاء اللہ تارڑ نے دہشت گردوں کو وزیر اطلاعات انہوں نے نے کہا کہا کہ
پڑھیں:
کوئٹہ، سرکاری دفاتر میں ایجنٹس کیخلاف ایف آئی اے کی کارروائی، 14 افراد گرفتار
ڈائریکٹر ایف آئی اے بلوچستان کے مطابق ملزمان مبینہ طور پر برتھ سرٹیفکیٹس، قومی شناختی کارڈز، پاسپورٹس اور دیگر سرکاری دستاویزات کے حصول کیلئے غیر قانونی طریقے سے سہولت فراہم کرتے اور شہریوں سے رقوم وصول کرتے تھے۔ اسلام ٹائمز۔ وفاقی تحقیقات ادارے ایف آئی ای نے کوئٹہ شہر میں مختلف وفاقی اداروں کے مبینہ ایجنٹس کے خلاف بڑے پیمانے پر کریک ڈاؤن کرتے ہوئے 14 افراد کو گرفتار کرلیا ہے۔ ڈائریکٹر ایف آئی اے بلوچستان بہرام مندوخیل کے مطابق کارروائی کے دوران نادرا، سوئی سدرن گیس کمپنی، پاسپورٹ آفس اور میٹروپولیٹن کارپوریشن سے متعلق مبینہ ایجنٹس کو حراست میں لیا گیا ہے، جو شہریوں کو مختلف سرکاری امور میں غیر قانونی سہولت کاری فراہم کرنے میں ملوث تھے۔ انہوں نے بتایا کہ گرفتار ملزمان مبینہ طور پر برتھ سرٹیفکیٹس، قومی شناختی کارڈز، پاسپورٹس اور دیگر سرکاری دستاویزات کے حصول کے لئے غیر قانونی طریقے سے سہولت فراہم کرتے اور شہریوں سے رقوم وصول کرتے تھے۔
ڈائریکٹر ایف آئی اے نے کہا کہ گرفتار ملزمان سے تفتیش جاری ہے اور ابتدائی تحقیقات کی روشنی میں ان کے نیٹ ورک میں شامل دیگر افراد کی نشاندہی کی جا رہی ہے۔ امید ہے کہ مزید گرفتاریاں بھی عمل میں آئیں گی۔ بہرام مندوخیل نے کہا کہ ایف آئی اے سرکاری اداروں میں بدعنوانی، جعلسازی اور غیر قانونی سہولت کاری کے خاتمے کے لئے کارروائیاں جاری رکھے گی اور قانون شکنی میں ملوث عناصر کے خلاف بلاامتیاز کارروائی کی جائے گی۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار