ایم ڈبلیو ایم جعفرآباد کا اجلاس، صوبائی و ضلعی رہنماؤں کی شرکت
اشاعت کی تاریخ: 17th, November 2025 GMT
اجلاس کے دوران تحصیل اور ضلعی سطح کے انتخابات منعقد ہوئے، جن میں شہزادہ خان دشتی کو تین سال کیلیے تحصیل صدر اور سید اسرار شاہ دوپاسی کو صدر ضلع جعفر آباد منتخب کیا گیا۔ اسلام ٹائمز۔ مجلس وحدت مسلمین ضلع جعفر آباد کی ضلعی شوریٰ کا اہم اجلاس ورکنگ کمیٹی کے آرگنائزر علامہ سید ظفر عباس شمسی اور رکنِ ورکنگ کمیٹی علامہ سہیل اکبر شیرازی کی زیرِ صدارت منعقد ہوا۔ اجلاس میں تحصیل روجھان، تحصیل جھٹ پٹ کے یونٹس اور ضلعی کابینہ کے ذمہ داران نے بھرپور شرکت کی۔ اجلاس کے دوران تحصیل اور ضلعی سطح کے انتخابات منعقد ہوئے، جن میں شہزادہ خان دشتی کو تین سال کے لیے تحصیل صدر اور سید اسرار شاہ دوپاسی کو آئندہ تین سال کے لیے صدر ضلع جعفر آباد منتخب کیا گیا۔ اس موقع پر مجلس علماء مکتب اہلبیت بلوچستان کے صدر مولانا زوالفقار علی سعیدی اور ضلعی رہنماء سید فضل شاہ نے خصوصی شرکت کی۔ نو منتخب صدور سے ایم ڈبلیو ایم بلوچستان کی ورکنگ کمیٹی کے آرگنائزر علامہ سید ظفر عباس شمسی نے حلف لیا۔
اس موقع پر خطاب کرتے ہوئے علامہ سید ظفر عباس شمسی نے کہا کہ مجلس وحدت مسلمین پاکستان آج کے دور میں ملت جعفریہ کی وہ مضبوط دینی، سیاسی اور سماجی قوت بن چکی ہے، جو ملک میں امن، استحکام اور باوقار نمائندگی کے لیے ناگزیر ہے۔ انہوں نے مزید کہا کہ مؤمنین برسوں سے مختلف چیلنجز اور محرومیوں کا سامنا کرتے رہے ہیں، لیکن ایم ڈبلیو ایم نے پہلی بار اس قوم کی آواز کو منظم، باوقار اور مؤثر انداز میں قومی سطح پر پیش کیا۔ انہوں نے امید ظاہر کی کہ نو منتخب ضلعی و تحصیل صدور اپنی ذمہ داریاں بھرپور فعالیت اور منظم حکمتِ عملی کے ساتھ انجام دیں گے۔ مجلس علماء مکتب اہلبت کے رہنماء مولانا ذوالفقار علی سیعدی نے خطاب کرتے ہوئے کہا کہ مجلس وحدت مسلمین کی بنیاد اتحاد، ہم آہنگی اور امن پر رکھی گئی ہے۔ یہ وہ واحد قومی پلیٹ فارم ہے جو ہر سطح پر فرقہ واریت کے خاتمے اور اُمتِ مسلمہ کے باہمی اتحاد کی بات کرتا ہے۔
انہوں نے کہا کہ ایم ڈبلیو ایم نے ہمیشہ آئینی و قانونی دائرے میں رہتے ہوئے ملت جعفریہ کے حقوق، مذہبی آزادیوں، قومی معاملات میں نمائندگی اور دہشت گردی و ٹارگٹ کلنگ کے خلاف اپنا بھرپور کردار ادا کیا ہے۔ ایم ڈبلیو ایم رہنماء علامہ سہیل اکبر شیرازی نے خطاب کرتے ہوئے کہا کہ مجلسِ وحدت مسلمین پاکستان اب محض ایک تنظیم نہیں، بلکہ ملت جعفریہ کی اجتماعی ڈھال، قومی وحدت کی علامت اور ظلم کے خلاف ایک جرأت مند آواز بن چکی ہے۔ انہوں نے کہا کہ ایسی جماعت کا مضبوط، فعال اور منظم رہنا وقت کی سب سے اہم ضرورت ہے۔ انہوں نے نو منتخب صدور سے امید ظاہر کی کہ وہ تنظیمی فعالیت، عوامی رابطے اور تنظیمی نظم و ضبط کو مزید بہتر انداز میں آگے بڑھائیں گے۔
ذریعہ: Islam Times
کلیدی لفظ: ایم ڈبلیو ایم اور ضلعی انہوں نے کہا کہ
پڑھیں:
حب، ایم ڈبلیو ایم کے ضلعی انتخابات، نئے صدر کی حلف برداری
بیان کے مطابق ایم ڈبلیو ایم ضلع حب کے انتخابات میں سید قربان علی رضوی کو بھاری اکثریت سے ایک مرتبہ پھر ضلعی صدر منتخب کیا گیا۔ اسلام ٹائمز۔ مجلس وحدت مسلمین حب کے ضلعی انتخابات مسجد و مرکزی امام بارگاہ حسینی، جام یوسف کالونی حب میں منعقد ہوئے۔ جس کی نگرانی پارٹی کے الیکشن کمشنر اور صوبائی ورکنگ کمیٹی بلوچستان کے ممبر مولانا برکت علی مطہری نے کی، جبکہ کمیشن کے دیگر ممبران گل محمد سیلرو اور حضور بخش جاموٹ اور ایم ڈبلیو ایم کے تحصیل صدر سمیت دیگر ذمہ داران بھی موجود تھے۔ ایم ڈبلیو ایم حب کے جاری بیان میں کہا گیا کہ دستوری اصولوں کے مطابق ضلع بھر کے پانچ یونٹس اور ضلعی کابینہ کے اراکین نے اپنا ووٹ کاسٹ کیا۔ انتخابات کے بعد سابق ضلعی صدر سید قربان علی رضوی کو بھاری اکثریت سے ایک مرتبہ پھر ضلعی صدر منتخب کیا گیا۔ بیان میں کہا گیا کہ دستور کے مطابق الیکشن کے انعقاد سے قبل سید قربان علی رضوی نے بطور صدر اپنا استعفیٰ الیکشن کمشنر مولانا برکت مطہری کے سپرد کیا، جسے منظور کرلیا گیا۔ استعفیٰ کے بعد ضلعی شوریٰ نے نئے انتخاب کے لیے نام پیش کیے۔ بعد ازاں ضلعی شوریٰ کی جانب سے پیش کردہ ناموں میں سے سید قربان علی رضوی ایک مرتبہ پھر ضلعی صدر منتخب ہوئے۔
آئین کو مسخ کر کے چند افراد کو نواز دیا گیا، اب ہم خاموش نہیں بیٹھیں گے: اپوزیشن رہنماؤں کی تنقید