Nai Baat:

آرٹیکل 200 اور سیاسی ہنگامہ

اشاعت کی تاریخ: 10th, February 2025 GMT

رواں ماہ صدر مملکت کی منظوری کے بعد لاہور، بلوچستان، سندھ ہائیکورٹس سے تین ججز جن میں جسٹس محمد سرفراز ڈوگر، جسٹس خادم حسین سومرو اور جسٹس محمد آصف کا اسلام آباد ہائی کورٹ تبادلہ کر دیا گیا۔ ہائیکورٹ ججز کی دوسری ہائیکورٹ ٹرانسفر پر ہیجانی کیفیت پیدا ہو چکی ہے اور اس امر کو غیر آئینی و غیر قانونی قرار دیا جا رہا ہے۔ مضحکہ خیز بات یہ ہے کہ خود اسلام آباد ہائیکورٹ کے ججز نے اس اقدام کو غیر قانونی اور آئین سے فراڈ قرار دیا۔ کہیں چند وکلاء اور چند وکلاء تنظیمیں حکومتی اقدام کی مذمت کر رہی ہیں تو کہیں ججز کی عاشق معشوق خط و کتابت میڈیا کی زینت بن رہی ہے۔ اسلام آباد کے ایک جج اور نئے نویلے خط لکھنے والے سپریم کورٹ کے چار ججوں نے تو یہاں تک کہہ دیا ہے کہ ٹرانسفر ہونے والے ججوں کے لیے دوبارہ سے حلف اُٹھانا لازم ہے۔ یاد رہے کہ آئینی عہدیداران و اداروں کی جانب سے جاری کردہ کسی بھی نوٹیفیکیشن/ حکم نامہ/ہدایت نامہ کے ساتھ آئینی و قانونی شق کا حوالہ دینا لازم قرار پاتا ہے۔ اب ہائیکورٹ ججز تبادلوں کے نوٹیفکیشن کا مطالعہ کیا جائے تو واضح طور پر درج ہے کہ صدر مملکت نے آئین پاکستان کے آرٹیکل 200 کے تابع ججز کا تبادلہ کیا ہے۔ یہاں سوال پیدا ہوتا کہ کیا آئین میں آرٹیکل 200 کا اضافہ یا اس آرٹیکل میں ترامیم 26 ویں آئینی ترمیم کی بدولت ہوئی ہیں۔ یا پھر یہ آرٹیکل 1973 ہی سے آئین کا حصہ ہے؟ اسکا سادہ اور آسان سا جواب یہی ہے کہ آرٹیکل 200 اسی دن سے آئین کا حصہ ہے جس دن سے آئین نافذ العمل ہوا۔ آرٹیکل 200 کیا ہے؟ آرٹیکل 200 کے مطابق: صدر، ہائیکورٹ کے کسی جج کو ایک ہائیکورٹ سے دوسری ہائیکورٹ میں منتقل کر سکتا ہے، لیکن کسی جج کو اس کی رضامندی کے بغیر اور صدر کی طرف سے چیف جسٹس آف پاکستان اور دونوں ہائی کورٹس کے چیف جسٹس کے ساتھ مشاورت کے بغیر تبدیل نہیں کیا جائے گا۔ اس آرٹیکل میں، جج سے مراد ہائیکورٹ کا جج جبکہ چیف جسٹس (ہائیکورٹ) نہیں ہے مگر ہائیکورٹ کا ایسا جج جو قائم مقام چیف جسٹس ہائیکورٹ کے طور ذمہ داریاں ادا کر رہا ہو۔ جہاں کسی جج کو ہائی کورٹ کی پرنسپل سیٹ کے علاوہ کسی اور جگہ پر جج کے علاوہ کسی اور عہدے پر تعینات کیا جاتا ہے، تو وہ اس مدت کے دوران جس کے لیے وہ ہائی کورٹ کے جج کے طور پر کام کرتا ہے جس میں اس کا تبادلہ ہوا ہے، یا اس طرح کے دوسرے عہدے پر فائز ہے، اس کی تنخواہ کے علاوہ الاؤنسز اور مراعات کا حقدار ہو گا جسکا تعین صدارتی حکم نامے کے ذریعہ کیا جائے گا۔ اس آرٹیکل میں ہائی کورٹ سے مراد ہائی کورٹ کا کوئی بھی بینچ ہے۔
محترم قارئین! اُمید ہے آرٹیکل 200 کے مطالعہ سے یہ بات تو طے ہو چکی ہو گی کہ حال ہی میں ہائیکورٹ ججز تبادلوں کا عمل کسی طور پر غیرآئینی و غیر قانونی یا فراڈ نہیں ہے۔ بلکہ یہ اقدام عین آئین کے مطابق ہے۔ اب یہاں پھر اک سوال پیدا ہوتا ہے کہ کیا تاریخ میں اس سے پہلے بھی کبھی ہائیکورٹ ججز کے تبادلے ہوئے ہیں۔ جی بالکل تاریخ میں ایسی کئی مثالیں ملتی ہیں۔ جیسا کہ اسلام آباد ہائی کورٹ کے تین سابق چیف جسٹس صاحبان، جن میں جسٹس سردار محمد اسلم سال 2003 تا فروری 2008 تک لاہور ہائیکورٹ میں بطور جج فرائض انجام دیتے رہے پھر 9 فروری 2008 اسلام آباد ہائیکورٹ کے چیف جسٹس بنا دیئے گئے۔ جسٹس اقبال حمید الرحمان 2006 لاہور ہائیکورٹ میں جج تعینات ہوئے اور جنوری 2011 میں اسلام آباد ہائیکورٹ کے چیف جسٹس تعینات ہوئے۔ اسی طرح جسٹس بلال خان بھی 2008 تک لاہور ہائیکورٹ میں بطور جج فرائض سرانجام دیتے رہے اسکے بعد اسلام آباد ہائیکورٹ میں تعینات کیے گئے۔
یہاں اک اور سوال پیدا ہوتا ہے کہ کیا اسلام آباد ہائیکورٹ میں جج تعینات ہونے کے لیے جج کا اسلام آباد کا ڈومیسائل ہونا لازم ہے؟ اسکا جواب اسلام آباد ایکٹ، 2010 کے سیکشن 3 میں موجود ہے: جسکے مطابق اسلام آباد ہائی کورٹ ایک چیف جسٹس اور دیگر ججوں پر مشتمل ہو گی جو آئین کے مطابق پاکستان کے صوبوں اور دیگر علاقوں سے مقرر کیے جائیں گے۔

ججز تبادلوں پر معترض حلقوں کی جانب سے یہ سوال اُٹھایا جا رہا ہے کہ آئین و قانون میں ٹرانسفر کی اجازت تو ہے مگر چونکہ اسلام آباد ہائیکورٹ میں ججز کو ٹرانسفر کرنے کا اقدام حکومت کی بدنیتی یعنی موجودہ ججز کو کنٹرول کرنا ہے تو اسکا سادہ سا جواب یہی بنتا ہے کہ جب ججز آئین و قانون میں درج اپنے دائرہ اختیار سے باہر نکل کر سیاست کرنا شروع کریں گے تو پھر سیاستدانوں کے پاس سوائے سیاست کرنے کے کوئی چارہ نہیں ہو گا کیونکہ سیاست کرنا تو پھر سیاستدانوں کا ہی کام ہے نا کہ معزز جج صاحبان کا۔

بحیثیت قانون و سیاست کے طالب علم، میں اس بات پر پختہ یقین رکھتا ہوں کہ کسی بھی معاملے پر میں نہ مانوں والی سیاست و بیان بازی اور خط و کتابت سے پہلے آئین و قانون میں درج شقوں کا مطالعہ کرنا بہت ہی ضروری ہے۔ اور یہ بات کہتے ہوئے کوئی ہچکچاہٹ محسوس نہیں ہو رہی کہ معزز جج صاحبان کو خط و کتابت اور بیان بازی کرنے سے پہلے آئین پاکستان کا ازسر نو مطالعہ کرنے کی اشد ضرورت ہے۔

.

ذریعہ: Nai Baat

کلیدی لفظ: اسلام ا باد ہائیکورٹ اسلام ا باد ہائی ہائیکورٹ ججز ہائیکورٹ میں ہائیکورٹ کے ہائی کورٹ ا رٹیکل 200 کے مطابق چیف جسٹس کورٹ کے پیدا ہو

پڑھیں:

ایک افریقی سیاسی راک اسٹار کی تقریر (حصہ دوم)

گزشتہ بار افریقی نوجوانوں میں مقبول گنی بساؤ کے صدر کیپٹن ابراہیم ترورے کی سوشل میڈیا پر وائرل تقریر کا پہلا حصہ پیش کیا گیا۔یہ دوسرا حصہ پڑھیے اور اگلی بار تیسرا اور آخری حصہ۔

میرے افریقیو ،

گھانا تا زیمبیا اور سینیگال تا کینیا ایک ہی ڈرامہ چل رہا ہے۔حکومتوں کو پانی کی نجکاری پر مجبور کیا جاتا ہے تاکہ غیر ملکی کمپنیاں منافع کما سکیں۔سستی درآمدات کے ذریعے کسانوں کو نقصان پہنچایا جاتا ہے۔مقامی صنعتوں پر پھلنے سے پہلے ہی قاتلانہ حملہ ہو جاتا ہے۔مشورہ دیا جاتا ہے کہ بجٹ کو متوازن بنانے کے لیے ترقیاتی بجٹ کم کریں تاکہ غیر ملکی قرضوں کی ادائی بروقت ہو سکے۔

عجیب بات ہے کہ یہ ادائی وقت کے ساتھ ساتھ کم ہونے کے بجائے بڑھتی جا رہی ہے۔اگر ہم اس کے خلاف مزاحمت کی جرات کریں ، آپ کے تجویز کردہ نسخوں پر سوال اٹھائیں یا تجاویز نہ مانیں تو ہم بلیک لسٹ ہو جاتے ہیں ، ہماری کریڈٹ ریٹنگ نیچے آ جاتی ہے ، ہماری کرنسی کی قدر پر حملہ ہوتا ہے اور ہمارے رہنماؤں کو نام نہاد بین الاقوامی میڈیا انتہا پسند ، سنکی اور پاپولسٹ قرار دے کر مطعون کرتا ہے۔

اس سے بڑی انتہاپسندی کیا ہوگی کہ ایک ملک کو مجبور کیا جائے کہ وہ اپنے عوام کا پیٹ بھرنے سے پہلے قرض کا سود چکانے کی فکر کرے۔ چنانچہ ہماری نئی نسل کا اپنے روزگاری مستقبل اور سیاست پر سے ایمان اٹھتا جا رہا ہے کیونکہ ان کی قیادت عوام کو جواب دینے سے پہلے بینکوں کو جوابدہ ہے۔

سچی بات یہ ہے کہ آپ ہمارے خوابوں کو بھی ویٹو کرتے ہو۔آپ افریقی پالیسی بنانے والے غیر منتخب گورنر ہو۔ ہم کب تک برداشت کریں کہ ہمیں ہی دیے گئے قرضوں سے بھاری مشاہرہ پانے والے بین الاقوامی مشیر ہماری پالیسیاں بنائیں جب کہ ہمارے اساتذہ کو تنخواہ کے لالے پڑے ہوں۔ہم ان اداروں کے آگے مزید کیوں جھکیں جو ہمارے شہریوں کے بجائے اپنے شیئر ہولڈرز کو جوابدہ ہوں۔

میں آئی ایم ایف سے صاف صاف کہنا چاہتا ہوں کہ ہم اپنا اقتدارِ اعلیٰ واپس لینا چاہتے ہیں بھلے اس کا مطلب آپ کے قرضوں کے بغیر ہماری شرح ترقی میں سست رفتار اضافہ کی کیوں نہ ہو۔مگر تب یہ ہماری شرحِ ترقی ہو گی۔وقتی تکلیف تو ہو گی مگر یہ آزاد ہونے کا درد ہو گا۔افریقہ کو آقا نہیں شراکت دار چاہئیں۔

ہم اس نظام میں پیدا ہوئے ہیں جو ہم نے نہیں بنایا۔یہ نظام معاہدوں ، من مانے قوانین اور اداروں کا جال ہے۔جب نوآبادکار رخصت ہوئے تو اپنے پیچھے شفافیت کے بجائے ایسا نظام چھوڑ گئے جو انھیں مسلسل فائدہ پہنچاتا رہے۔

مسئلہ صرف آئی ایم ایف میں اصلاحات کا نہیں بلکہ تجارتی ، مالیاتی ، قرضہ جاتی قوانین کے ڈھانچے میں سدھار کا ہے۔موجودہ مالیاتی ڈھانچہ خدائی یا فطری منصوبہ نہیں بلکہ طاقتور انسانوں کا مسلط کردہ ہے۔ وہی طاقت ور تعین کرتے ہیں کہ کس شے کی کیا قیمت ہو اور کسے ملنی چاہیے۔

کیا میں پوچھ سکتا ہوں کہ ایسا براعظم جس کی ساٹھ فیصد زمین زرخیز ہے اب تک خوراک میں خود کفیل کیوں نہیں ؟ ہم سونے ، ہیروں ، تیل اور لیتھیم کے ذخائر پر بیٹھنے کے باوجود بھی محتاج کیوں ہیں ؟ کیونکہ کھیل کبھی شفاف نہیں تھا۔

ہمیں صنعتی مصنوعات بنانے کے بجائے خام مال پیدا کرنے والے خطے میں تبدیل کر دیا گیا۔ہمیں عالمی معیشت میں ایک مخصوص کردار دیا گیا جیسے کسی المیہ کھیل میں اداکار کو دیا جاتا ہے۔یعنی تم صرف اگاؤ گے ، پروسیسنگ ہم کریں گے ، تم ہاتھ پھیلاؤ گے ہم قرضہ دیں گے۔جب بھی ہم اس کھیل کا اسکرپٹ دوبارہ لکھنے کی کوشش کرتے ہیں تو جرمانہ بھرنا پڑتا ہے ، کریڈٹ ایجنسیز ہماری ریٹنگز گھٹا دیتی ہیں ، ملٹی نیشنل کمپنیوں کی لابی پابندیوں کی دھمکی دیتی ہے ، ہائی ٹیک کمپنیاں اپنا سرمایہ نکال لیتی ہیں۔آپ کا میڈیا ہمیں پاگل کہتا ہے۔

مگر اس سے زیادہ غیر مستحکم دنیا اور کیا ہو گی کہ ایک اعشاریہ چار ارب انسانوں کا براعظم ماحولیات کی ابتری میں سب سے کم اور اس کے نقصانات میں سب سے زیادہ حصہ دار ہے۔اس سے زیادہ غیر منطقی کیا ہو گا کہ پوری دنیا کے لیے کوکا اگانے والے کسان خود اپنے بچوں کے لیے چاکلیٹ خریدنے کی سکت نہیں رکھتے۔اس سے بڑی ناانصافی کیا ہو گی کہ جن ممالک نے ہمیں ماضی میں نوآبادی بنایا آج وہی ہمیں گڈ گورننس کا لیکچر دے رہے ہیں اور دوسری جانب افریقی اشرافیہ کی چرائی ہوئی دولت بنا کوئی سوال پوچھے اپنے بینکوں میں رکھ رہے ہیں۔اور وہ اس نظام کو میریٹوکریسی بھی کہتے ہیں۔

وہ ہم سے کہتے ہیں محنت کرو ، شفاف بنو اور مزید سرمایہ کاری کے مواقع بڑھاؤ۔مگر وہ یہ نہیں بتاتے کہ عالمی تجارتی قوانین کبھی بھی شفاف نہیں رہے۔ عالمی ادارہِ تجارت ( ڈبلیو ٹی او ) عالمی بینک اور آئی ایم ایف جیسے ریفریز انھیں ٹیموں کے طرف دار ہیں جو ہمیشہ جیتتی ہیں۔

مثلاً جب ہم نے اپنے کسانوں کو سبسڈی دینے کی کوشش کی تو ہمیں کہا گیا کہ اس سے کھلی مارکیٹ پر منفی اثر پڑے گا۔مگر امریکا اور یورپ اپنے کسانوں کو اربوں ڈالر کی سبسڈی دے رہے ہیں اور اسے تحفظ کا نام دیتے ہیں۔جب ہم نے روزگار پیدا کرنے کے لیے سرکاری شعبے میں صنعتیں لگانے کی کوشش کی تو ہمیں بتایا گیا کہ اس سے معاشی جمود بڑھے گا۔جب کہ ان کی امیر ترین نجی کارپوریشنز سرکاری پیسے سے چلنے والے ناسا ، سرکاری جنگوں ، سرکاری ٹھیکوں اور سرکاری ریسرچ اداروں کی تحقیق سے پورا تجارتی فائدہ اٹھا رہی ہیں۔جب ہم کانکنی کے استحصالی معاہدوں پر نظرِ ثانی کی بات کرتے ہیں تو کہا جاتا ہے کہ ہم کاروبار دشمن ہیں۔مگر اس سے بڑی دشمنی کیا ہو گی کہ آپ سو ڈالر مالیت کی معدنیات نکالیں اور ہمیں تین ڈالر رائلٹی دے کر چلتے بنیں۔

افریقہ آپ سے رحم کھانے کو نہیں کہہ رہا۔ہم صرف شفافیت کا مطالبہ کر رہے ہیں۔ہم خیراتی اترن نہیں برابری چاہتے ہیں۔ہم اس کرہِ ارض کا سب سے توانا براعظم ہیں۔مگر عالمی معیشت ہم سے ایسا سلوک کر رہی ہے جیسے ہمارے پاس دینے کو کچھ نہیں۔ ہمارے مزدور ، ہماری زمین ، ہماری اقدار ناقص نہیں بلکہ نظام ناقص ہے۔ہم آپ سے تعلق نہیں توڑنا چاہتے مگر مزید زنجیریں پہننے کو تیار نہیں۔

ہم سنکارا ، نکروما ، لوممبا اور منڈیلا کے بچے ہیں۔ محض زندہ رہنا نہیں چاہتے بلکہ اپنے پاؤں پر کھڑا ہونا چاہتے ہیں۔۔اس کے لیے اب ہمیں کسی کی اجازت اور افریقہ کو اب کوئی نیا نجات دھندہ یا تازہ لیکچر یا جکڑبند قرضہ نہیں چاہیے۔ہم خود کو تمہارے برابر تسلیم کروانے کے لیے خوشامد نہیں کریں گے۔ہم شراکت داری کے خلاف نہیں مگر ہم اس کی شرائط ازسرِنو ترتیب دینا چاہتے ہیں۔

کوئی ملک بااختیار نہیں کہلا سکتا اگر اپنے لوگوں کا پیٹ نہ بھر سکے۔ہم کیسے آزاد کہلا سکتے ہیں جب کسی جگہ پڑنے والا قحط ہماری روٹی کی قیمت طے کرے۔نوآبادیاتی نظام نے جو سب سے خطرناک ترکہ چھوڑا وہ بندوق نہیں بلکہ سلیبس ہے۔ایسا نصاب جو ہمیں غیر ملکی بادشاہوں کے بارے میں تو خوب بتاتا ہے مگر ہمارے ہیروز کو نظرانداز کرتا ہے۔نصاب میں غیر ملکی فلسفیوں کی تعریف ہے مگر افریقی دانش کا ذکر غائب ہے۔

ہمیں تعلیمی سلیبس دوبارہ مرتب کرنے کی ضرورت ہے تاکہ ہمارے بچے اپنی قدر و قیمت سے آگاہ ہو سکیں۔اپنی تاریخ پر فخر کر سکیں اور اعتماد کے ساتھ تخلیقی قوت استعمال کر سکیں۔بچوں کو کوڈنگ ضرور سکھائیں مگر علمِ زراعت بھی پڑھائیں۔ہمارے اسکول آزادی کی لیبارٹری ہونے چاہئیں۔ تعلیم محض امتحان میں کامیابی تک محدود نہ ہو بلکہ اپنی قسمت خود تعمیر کرنے کے قابل بنا سکے۔

ہمارا جو خام مال باہر جاتا ہے وہی خام مال کھلی تیار مصنوعات کی شکل میں دس گنا قیمت پر ہمیں لوٹایا جاتا ہے۔ہمیں مقامی صنعت کاری اور ایجاد پسندی کی جانب آنا ہو گا۔صرف معدنیات کی ملکیت کافی نہیں۔منافع کمانے کے لیے ہمیں دھاتوں کی ریفائننگ اور پیکیجنگ کی اپنی صنعت چاہیے۔ہمیں افریقی سرمایہ کاری اور نوزائیدہ صنعتوں کو تحفظ دینا ہو گا اور غیرضروری اشیا کی درآمدی عادت کو کم کرنا ہو گا۔یہی ایک طریقہ ہے روزگار پیدا کرنے اور افریقہ کی دولت افریقیوں کے لیے استعمال کرنے کا۔

منقسم افریقہ ہمیشہ کمزور رہے گا۔ہم چون ممالک الگ الگ آوازوں کی شکل میں دنیا سے اجتماعی سودے بازی نہیں کر سکتے۔ہمیں سیاسی ، اقتصادی ، دفاعی اور سائنسی تعاون کے لیے متحد ہونا پڑے گا۔اس کے لیے بین ال افریقہ ادارہ سازی کرنا ہو گی۔ہم تب تک آزاد نہیں ہو سکتے جب تک مقامی دانش پر بھروسہ کرنا نہیں سیکھیں گے۔  (جاری ہے)

(وسعت اللہ خان کے دیگر کالم اور مضامین پڑھنے کے لیے bbcurdu.com اورTweeter @WusatUllahKhan.پر کلک کیجیے)