Nawaiwaqt:

معاشی بحالی میں آرمی چیف کا کردار قابل ستائش :ریاست کیلئے سیاست قربان کردی ‘ وزیراعظم آج حقائق قوم کے سامنے رکھیں گے : عطاتارڑ 

اشاعت کی تاریخ: 4th, March 2025 GMT

 اسلام آباد( اپنے سٹا ف رپو رٹر سے ) وزیر اطلاعات، نشریات، قومی ورثہ و ثقافت عطااللہ تارڑ نے کہا ہے کہ حکومتی اقدامات کی بدولت آج مہنگائی 9 سال کی کم ترین سطح پر آ گئی ہے، ملکی معیشت میں بہتری کے ثمرات عوام تک پہنچ رہے ہیں، ہم نے ریاست کیلئے اپنی سیاست کی قربانی دی اور ملکی مفاد میں فیصلے کئے، عوام انتشار نہیں خوشحالی چاہتے ہیں، پاکستان کے ڈیفالٹ کی باتیں کرنے والے آج خود انتشار کا شکار ہیں، آج پوری قوم کے سامنے اپنی ایک سالہ کارکردگی رکھیں گے۔ پریس کانفرنس سے خطاب میں وزیر اطلاعات نے کہا کہ آج 4  مارچ 2024ء کو مسلم لیگ (ن) کی مخلوط حکومت کو ایک سال مکمل ہو جائے گا، گزشتہ برس 4 مارچ کو محمد شہباز شریف نے بطور وزیراعظم اپنے عہدے کا حلف اٹھایا تھا، قوم نے انہیں ایک بھاری ذمہ داری دی، اس حوالے سے بہت سی قیاس آرائیاں اور ابہام تھا کہ ملک کس سمت میں جا رہا ہے، آنے والے دنوں میں معیشت کے کیا حالات ہوں گے اور ملک کے اندر کس قسم کا نظام رائج ہوگا، بہت سے لوگوں نے شرطیں لگائیں کہ ملکی معیشت نہیں سنبھلے گی، ایک سیاسی جماعت کی طرف سے آئی ایم ایف کو لیٹر لکھے جا رہے تھے کہ آئی ایم ایف کا پروگرام نہ دیا جائے۔ وفاقی وزیر اطلاعات نے کہا کہ کچھ چیزیں سیاست سے بالاتر ہوتی ہیں، ہم نے سیاست کو قربان کرکے ریاست کو بچایا ہے، ملکی معیشت، استحکام، سلامتی، بین الاقوامی سطح پر ملکی ساکھ کو ملحوظ خاطر رکھتے ہوئے ہم نے سیاسی نہیں بلکہ ملک کے مفاد میں فیصلے کئے جو مشکل فیصلے تھے مگر اللہ تعالی کا شکر ادا کرتے ہیں کہ جب نیت صاف ہو تو راستے خود ہی بن جاتے ہیں۔ شہباز شریف کل ایک سال کی کارکردگی قوم کے سامنے رکھیں گے، وزیراعظم شہباز شریف ریفارم مائنڈڈ لیڈر ہیں۔ مہنگائی کم ترین سطح پر آ گئی ہے جو کسی معجزے سے کم نہیں، مہنگائی جو گزشتہ برس اسی ماہ 23.

1 فیصد پر تھی، کم ہو کر 1.5 فیصد پر آ گئی ہے، یہ 9 سال پانچ ماہ بعد کم ترین سطح ہے۔ شرح سود کم ہو کر 12 فیصد پر پہنچ گئی ہے، سٹاک ایکسچینج دن بدن اوپر جا رہی ہے، روز نیا ریکارڈ بنتا ہے۔ پی ٹی آئی کے دور حکومت میں پاکستان عالمی تنہائی کا شکار تھا، آج پاکستان کی عالمی سطح پر عزت اور وقار میں اضافہ ہوا ہے، شنگھائی تعاون تنظیم کے اجلاس میں 12 ممالک کے وزرا اعظم نے پاکستان کا دورہ کیا، ترکیہ کے صدر رجب طیب اردگان نے کامیاب دورہ کیا اور واپس ترکیہ جا کر انہوں نے پاکستان کے بارے میں جن جذبات کا اظہار کیا وہ پاکستان اور پاکستان کے عوام کے لئے باعث فخر ہیں۔ شہباز شریف کے ازبکستان کے حالیہ دورہ کے دوران ازبکستان میں پاکستان کا پرچم ہر شاہراہ پر نظر آیا۔ چیمپئنز ٹرافی کے میچز پاکستان میں منعقد ہو رہے ہیں، یہ میدان ویران تھے یہاں کوئی کھیلنے کو تیار نہیں تھا لیکن محنت ہوئی، نیک نیتی سے کام ہوا، اب سیمی فائنل بھی ہونے جا رہا ہے۔ اسی طرح اقوام متحدہ کی سلامتی کونسل کی رکنیت ملی، ریکارڈ ووٹ ملے، اس کے لئے وزیر خارجہ اسحاق ڈار نے بہت محنت کی، آج ہر ملک پاکستان کی تعریف کر رہا ہے اور پاکستان میں سرمایہ کاری کے مواقع دیکھ رہے ہیں۔ ابو ظہبی کے ولی عہد بھی پاکستان کے دورے پر آئے۔ یہاں کئی معاہدوں پر دستخط کئے، پاکستانی قیادت اور پاکستانی معیشت کی تعریف کی جبکہ آذربائیجان کے صدر نے پاکستان میں دو بلین ڈالر کی سرمایہ کاری کرنے کا اعلان کیا، ازبکستان کے صدر نے پاکستان کی منفرد حیثیت تسلیم کی اور کہا کہ پاکستان کی معیشت بہتر ہو رہی ہے۔ معاشی بحالی کے سفر میں محنت، ٹیم ورک اور خصوصی سرمایہ کاری سہولت کونسل (ایس آئی ایف سی) کا اہم کردار ہے، چیف آف آرمی سٹاف جنرل عاصم منیر کا معاشی بحالی کے سفر میں کردار قابل ستائش ہے، محنت، نیک نیتی اور ٹیم ورک کی وجہ سے آج ہم اس مقام پر پہنچے ہیں۔ انہوں نے کہا کہ وزیراعظم نے 20 ارب روپے کی خطیر رقم سے رمضان پیکیج کا اعلان کیا جو گزشتہ سال کے مقابلے میں تین گنا زیادہ ہے۔ معیشت کے حوالے سے شرطیں لگانے والے اور پاکستان کی تباہی کی دعائیں مانگنے والے آج خود تقسیم کا شکار ہیں، ان کی پارٹی آٹھ حصوں میں بٹ چکی ہے۔ مہنگائی میں واضح کمی کے اثرات عوام تک پہنچنا شروع ہوگئے ہیں، نو سال کا ریکارڈ ٹوٹا ہے جس پر اللہ کا شکر ادا کرتے ہیں۔ انہوں نے کہا کہ وزیراعظم نے ایک سال کی تکمیل پر کابینہ کا خصوصی پراگریس ریویو رکھا ہے جس میں صحافیوں کو بھی دعوت دی جائے گی۔ مجھے نہیں یاد کہ گزشتہ مرتبہ کب کرنٹ اکائونٹ خسارہ سرپلس میں گیا، اب چیزیں سرپلس میں جا رہی ہیں، ہماری برآمدات میں اضافہ ہوا ہے، آئی ٹی برآمدات میں 32 فیصد اضافہ ہوا ہے، یہ آسان کام نہیں تھا، معیشت کے تمام اشاریے مثبت ہیں۔ کھوکھلے نعرے لگانے والے لوگوں نے نہ لیپ ٹاپ دیئے، نہ ہسپتال بنائے، نہ کوئی ایجوکیشن کا نظام بنایا ،نہ انہوں نے ہیلتھ کا نظام بنایا، نہ انفراسٹرکچر ڈویلپمنٹ کی، انہوں نے بسیں بھی چلائیں تو وہ الٹی چل پڑیں، یہ مکافات عمل ہے، یہ لاہور کو جنگلہ بس کہتے تھے اور جب اپنے شہر میں بنائی تو الٹی بنا دی۔ پی ٹی آئی نے خیبرپی کے میں کیا کارکردگی دکھائی، اب یہ مریم نواز کی لیپ ٹاپ سکیم کی تقلید کر رہے ہیں، ہم اللہ تعالی کا شکر ادا کرتے ہیں کہ پاکستان ڈیفالٹ کے دھانے سے استحکام اور استحکام سے گروتھ کی طرف بڑھ رہا ہے، عالمی سطح پر پاکستان کی پذیرائی ہوئی، ایک سال کے اندر ہم نے مختلف اہداف حاصل کئے، وزیراعظم آج قوم کے سامنے حقائق پیش کریں گے، اعداد و شمار کبھی جھوٹ نہیں بولتے۔ کھوکھلے نعرے، جھوٹ، بہتان اور آپس کی لڑائیاں کوئی نہیں چاہتا، پاکستان کے عوام چاہتے ہیں کہ مہنگائی کیسے کم ہوگی اور آج نظر آ رہا ہے کہ مہنگائی کم ہو رہی ہے اور بہتری آ رہی ہے۔ گالی گلوچ، دھرنے اور جلائوگھیرائوکی سیاست سے لوگوں کی دلچسپی ختم ہوگئی ہے۔ وزیر اطلاعات نے کہا کہ خیبرپی کے حکومت کی کارکردگی کے حوالے سے وائٹ پیپر جاری کر چکے ہیں، پنکی، گوگی اور کپتان نے اپنی جیبیں بھریں، ایسے لوگ جو ملکی تعمیر و ترقی میں کردار ادا کرنے کی بجائے قوم کو گالی گلوچ، نفرت اور تقسیم پر اکسائیں، وہ تاریخ کے کوڑے دان میں پائے جاتے ہیں۔ ان لوگوں نے ایک پراجیکٹ تک نہیں لگایا، اربوں روپے کا غبن کیا، قوم کے پیسے لوٹے، آج اس کی سزا بھگت رہے ہیں۔ سوشل میڈیا کون استعمال کر رہا ہے؟ آرٹیکلز کون لکھ رہا ہے؟ لندن میں چند لوگ گاڑیوں کے پیچھے بھاگتے ہیں، یہ ذہنی طور پر بیمار لوگ ہیں جو قوم کو گمراہ کر رہے ہیں۔ جھوٹ اور بہتان کا بخار بھی آہستہ آہستہ کم ہو رہا ہے، ان کی سیاست اپنی موت آپ مرے گی، یہ کارکردگی نہیں دکھا سکے، یہ قوم کے سامنے بے نقاب ہو چکے ہیں اور اب ایک دوسرے کے گریبان پکڑ رہے ہیں۔ رمضان المبارک کے دوران گراں فروشی کسی صورت قابل قبول نہیں ہے، گرانفروشوں کے خلاف قانون کے مطابق کارروائی ہوگی۔ بجلی اور گیس کے بلوں پر سبسڈی دی گئی، ٹاسک فورس کام کر رہی ہے، ہم نے بڑے بڑے آئی پی پیز بند کئے، یہ آسان کام نہیں تھا، اس میں بڑے بڑے گروپس موجود تھے، اربوں روپے کی بچت کی جس کا کنزیومر تک فائدہ پہنچا ہے۔ ہم نے آتے ہی ٹی وی چینلز کو ادائیگیاں کیں، جب بھی مالکان سے میٹنگ ہوئی یہی درخواست کی کہ ایمپلائز کو پروٹیکشن دی جائے، ہم ہیلتھ انشورنس لے کر آئے، سیاسی استحکام کے حوالے سے مذاکرات میں پی ٹی آئی نے غیر سنجیدگی کا مظاہرہ کیا، اب ان سے بات کرنے کو کوئی تیار نہیں، یہ انتشار کی سیاست کرتے رہیں، مجھے نہیں لگتا کہ ان کی طرف سے معاملات آگے بڑھیں گے، پی ٹی آئی کے سائیڈ لائن ہونے سے چیزوں میں بہتری آئی ہے۔ گزشتہ سال کے مقابلے میں مہنگائی میں نمایاں کمی آئی ہے، پٹرول، آٹا سستا ہے اگلے چند دنوں میں بہتری نظر آئے گی، عوام کو ہر سہولت دینے کی کوشش کریں گے۔

ذریعہ: Nawaiwaqt

پڑھیں:

زباں فہمی251  ؛  بقرہ عید، بقر عید۔یا۔ بکرا عید

بفضلہ تعالیٰ ہر سال کی طرح اِمسال بھی ہم عیدالاضحٰی یا بقرعید کی خوشیاں منارہے ہیں اور تب تک مناتے رہیں گے جب تک اس دنیائے فانی میں موجود ہیں۔ ’’آخرت کی خبر، خُدا جانے‘‘ کے مصداق دوسرے جہان میں عید کے تصور پر کچھ نہیں کہا جاسکتا۔ راقم نے ماقبل اپنے سلسلہ زباں فہمی میں، متعدد بار عیدالاضحی یا بقرعید (عیدِ قرباں، بقرہ عید۔یا۔ بکرا عید) عُرف ’بڑی عید‘ کے موضوع پر خامہ فرسائی کی ہے ، مگر جس طر ح ہر سال، اس مقدس موقع پر قربانی ضروری ہے۔

 اسی طرح قربانی کے مسائل اور دیگر متعلقات پر ہر مرتبہ لکھا جانا اور دُہرایا جانا بھی ضروری ہے۔ ہم لوگ یوں بھی سال بھر میں ایک مرتبہ ’چھوٹی‘ اور ایک مرتبہ ’بڑی عید‘ مناتے ہیں تو یہ منظر بہت جگہوں پر دیکھنے کو ملتا ہے کہ نمازِعید میں کئی افراد ، ’تکبیراتِ واجب‘ کی تعدادوترتیب بھُول جاتے ہیں ۔اس موقع پر ایک بہت ہی پیاری شخصیت کی یاد تازہ کرتا چلوں۔ فیڈرل ’بی‘ ایریا کی جامع مسجد رضوان کے خطیب مولانا سراج مرحوم (اگر مجھے نام صحیح یاد ہے تو) ، اپنے بزرگ معاصر جناب احتشام الحق تھانوی کی پیروی میں بعینہٖ اُسی طرح میٹھے (بلکہ اُن سے بھی زیادہ مٹھاس بھرے) لہجے میں جمعہ وعیدین کے موقع پر وعظ فرماتے تھے۔

وہ اس حد تک مقبول تھے کہ لوگوں کی ایک بڑی تعداد اَپنی مساجد چھوڑ کر بطورِخاص اُن کی اقتداء میں نمازِعید پڑھنے جاتی تھی۔ مجھے بھی کئی مرتبہ اتفاق ہوا۔ {حضرت صلوٰۃ وسلام کے قائل اور شائق تھے۔ ہماری نوجوانی کے معروف بزرگ میلادخواں جناب مُسافر لودھی (والدِ سلیم لودھی گلوکار) کو خاص طور پر اپنے حُجرے میں بُلواکر سلام سُنا کرتے تھے، جبکہ مُسافر صاحب ( ایک مدت سے اُن کے متعلق کوئی خبر نہیں، اللہ اُن پر رحم کرے) ہماری جامع مسجد غفران (بلاک 16، فیڈرل ’بی ‘ ایریا، عُرف واٹرپمپ) سے منسلک اور اُسی علاقے کے مکین تھے جہاں خاکسار نے بھی عین نوجوانی میں بطور میلادخواں اور بانی ومنتظم بزم غفران نام کمایا}۔ آمدم برسرمطلب! حضرت بہت دل چسپ پیرائے میں فرمایا کرتے ;’بھئی اگر کوئی بھُول جائے تو پریشانی کی کوئی بات نہیں، آپ اپنے آگے والے نمازی کو دیکھیں، وہ اپنے آگے والے کو، اُس سے آگے والے، اپنے آگے والے کو (کہ رکوع کررہا ہے یا سجدہ) اور یوں شُدہ شُدہ سب امام کی صحیح اور بَروَقت تقلید کرلیں گے۔ بھئی اگر کوئی سہو بھی ہوجائے تو کوئی مسئلہ نہیں، آپ امام کے پیچھے کھڑے ہیں، یہ سب اُس کے ذمّے!

آج جب بقرعید پر لکھنے بلکہ کمپیوٹر پر ماؤس چلانے بیٹھا ہوں تو بہت سی نئی پُرانی باتیں سامنے آگئی ہیں۔ جی چاہا کہ حسبِ معمول عیدین پر ماقبل لکھے گئے اپنے ہی مضامین سے استفادے کی بجائے آغاز میں کوئی نئی چیز پیش کی جائے، سو اَپنے عالم دوست حافظ سلمان رضا صدیقی فریدی مصباحی، خطیب (مسقط ،عُمان ) کا ایک عمدہ کلام قارئین کی نذرکرتا ہوں۔ (حافظ صاحب بارہ بنکی، ہندوستان سے تعلق رکھنے والے زُودگو شاعر ہیں مگر اُن کے موضوعات فقط دینی ہوتے ہیں جن میں حالاتِ حاضرہ سے متعلق بعض مواد بھی شامل ہوتا ہے۔ کچھ عرصے سے رابطہ منقطع ہے، ویسے وہ میری ’بزم زباں فہمی‘ کے خاموش رُکن ہیں)۔ ملاحظہ فرمائیں کہ اُنھوں نے کس طرح بقرعید کے موقع پر اسلامی تعلیمات کا خلاصہ نظم کیا ہے:

ہم اپنی ساری غفلت کو چلو قربان کر ڈالیں

مزاجِ بے مُرَوَّت کو چلو قربان کر ڈالیں

نہ ہوں ہم مطمئن، بس جانور قربان کرنے سے

بدی کرنے کی عادت کو چلو قربان کر ڈالیں

بتاتی ہے ہمیں یہ ’’لَن یَّنَالَ اللّہ‘‘ کی آیت

غَرَض آلُود نِیّت کو چلو قربان کر ڈالیں

رضائے رب، رضائے مصطفٰی (ﷺ) سب سے مقدم ہو

یہاں ہم اپنی چاہت کو چلو قربان کر ڈالیں

 گَلا کاٹیں، اِسی قربانی میں اپنی ’’اَنَا‘‘ کا بھی

تکبر اور نَخوت کو چلو قربان کر ڈالیں

ہمارے واسطے یہ درس لے کر بقرعید آئی

کہ ہر دنیاوی رغبت کو چلو قربان کر ڈالیں

ہماری اپنی مرضی کا نہ کوئی دخل ہو اِس میں

شریعت پر طبیعت کو چلو قربان کرڈالیں

اگر چلنا ہے ابراہیمؑ و اسماعیلؑؑ کے رستے

زمانے کی ہر الفت کو چلو قربان کرڈا لیں

چلو ہم مُتّحِد ہوکر، کریں باطل کی سر کوبی

ہر اک شکوہ شکایت کو چلو قربان کر ڈالیں

کھڑے ہوں جرأتوں سے قوم وملت کی مدد کو ہم

خموشی اور دہشت کو چلو قربان کرڈالیں

دلیری اور خودداری میں پنہاں ہے وقار اپنا

تَمَلُّق اور لَجاجَت کو چلو قربان کرڈالیں

ہمارا ہر عمل، اخلاص ہی کے دائرے میں ہو

ریاکاری کی فطرت کو چلو قربان کرڈالیں

بَراہیمی صفت پیدا کریں کردار کے اندر

جہاں کی ہر محبت کو چلو قربان کر ڈالیں

ذبیحُ اللّہ سے سیکھیں اطاعت آشنائی ہم

کہ جان و دل کی ثَروت کو چلو قربان کر ڈالیں

ہمارا جینا مرنا، ہو فقط اللہ کی خاطر

ہر اک خواہش کو، لذت کو چلو قربان کر ڈالیں

فریدی! عشق پر اعمال کی بنیاد رکھ کر ہم

خِرَد کی ساری حُجَّت کو چلو قربان کر ڈالیں

(حافظ سلمان رضا صدیقی نے اس دل نشیں کلام میں ’دُنیاوی‘ لکھا ہے جو درحقیقت ’دُنیَوی ‘ ہے، مگر غالباً اُن کے پیش نظر غلط العام ہی ہوگا اور عروضی اعتبار سے سقم کا بھی خدشہ ہوگا)

عیدالاضحیٰ کے لسانی موضوعات متعدد ہیں جن پر یہ خاکسار خامہ فرسائی کرتا رہا ہے، مگر اعادہ بھی ضروری سمجھتا ہے۔ نکتہ وار عرض کرتا ہوں:

ا)۔ اس تہوار (اگر قبلہ مفتی اعظم پاکستان پروفیسر مفتی منیب الرحمٰن صاحب، اس لفظ کے استعمال پر بُرانہ مانیں تو) کا نام بھی بہت تنوع کے ساتھ مشہور ہے۔ ہرچندکہ یہ معروف معنیٰ میں تہوار (تیوہار) نہیں، مگر کیا کریں صاحبو! کوئی اور لفظ سُوجھتا بھی نہیں۔ خیر! تو جناب ہم اسے بقرہ عید کہہ کر گائے سے منسوب کرتے ہیں اور یوں بھی کم از کم پاکستان میں گائے کی قربانی کا رواج بوجوہ بہت زیادہ ہے۔ بقرہ کے نام پر سورۃ البقرہ ہے جو قرآن مجید کی دوسری سورت ہے اور احکام کے لحاظ سے بہت اہم بھی۔ پھر اِس کا ایک مختصر نام ’بقرعید‘ ہے ، لیکن یہ نام ’بکراعید‘ کیسے ہوا، اس بابت دوم مختلف ومتضاد آراء سامنے آتی ہیں۔ ایک تو یہ کہ اصل نام ’بقرہ عید‘ سے بگڑکر ’بکرا عید‘ بنا، (عوام تو بقرِید، بکرِید اور بخرِید بھی بولتے ہیں)، دوسری یہ کہ بقول بابائے اردو ڈاکٹر مولوی عبدالحق صاحب، یہ بکرے کی نسبت سے بکرا عید ہی ہے۔

راقم نے اس سے قبل بھی اس بارے میں اظہارِخیال کیا تھا۔ مجھے لگتا ہے کہ مولوی موصوف نے انگریز سرکار کے عہد میں، گائے کے ذبیحہ پر شروع کیے جانے والے، ہندومسلم فسادات کے بعد، گائے کی قربانی کے رجحان میں کمی اور پھر اس کے خاتمے ہی کا سارا منظرنامہ پیش نظر رکھا۔ حقیقت یہ ہے کہ مسلمان انگریز کی حکومت سے قبل، اپنی مرضی سے گائے کی قربانی کیا کرتے تھے، ہندوؤں کو کوئی اعتراض نہیں تھا، پھر جب انگریز نے ’لڑاؤ اور حکومت کرو‘ کے اصول کے تحت ان دو قوموں کو مذہب او ر زبان کی بنیاد پر ایک دوسرے کا دشمن بنادیا تو یہ مسئلہ اس قدر سنگین ہوگیا کہ ایک مرتبہ ایم اے او کالج، علی گڑھ میں مسلمان طلبہ نے چندہ کرکے ایک گائے خریدی کہ بقرعید پر قربان کریں گے۔ سرسید کو معلوم ہوا تو وہ اپنی بیماری کے باوجود، فوراً موقع پر پہنچے اور لڑکوں کو ڈانٹ پھٹکار کرکے گائے لے جاکر قسائی کو واپس کی اور آئندہ کے لیے سخت تنبیہ کی۔

’حیاتِ جاوید‘ میں مذکور اِس واقعے سے بخوبی اندازہ ہوتا ہے کہ سرسید ہر قیمت پر ہندومسلم یک جہتی چاہتے تھے، کیونکہ اُن کے نزدیک یہ دونوں ایک ہندوستانی قوم کے حصے تھے اور اُنھیں کسی صورت ہندوؤں کی دل آزاری گوارا نہ تھی، حالانکہ یہ مسئلہ مسلم عہداقتدار میں کبھی پیدا نہیں ہوا کہ مسلمان اپنی دینی تعلیمات پر عمل پیرا ہونے سے محض اس لیے گریز کریں کہ دوسرے مذہب کا مقلد ناراض ہوجائے گا۔ ہندومسلم فساد ات (درحقیقت مُسلم کُش فسادات) کا سلسلہ بھی انگریز ہی کے دور میں شروع ہوا۔    

ب)۔ عید کے موقع پر سب سے زیادہ استعمال ہونے والے الفاظ میں ’قسائی‘ شامل اور نمایاں ہے جسے سہواً قصائی لکھا جاتا ہے۔ اس بابت راقم اور سید اطہرعلی ہاشمی مرحوم نیز اُن کے شاگر درشید جناب احمد حاطب صدیقی کے کالم اور مضامین موجودہیں، انٹرنیٹ پر دیکھے جاسکتے ہیں، خلاصہ کلام یہ ہے کہ لسانی تحقیق کے مطابق یہ لفظ ’قصّاب‘ سے بگڑ کر ’قصائی‘ نہیں بنا بلکہ ’قساوت ‘ سے مشتق ہے، اس لیے قسائی صحیح ہے۔

اوروں کو چھوڑیں، نامور انگریز ماہرلغات فیلن S. W.Fallon] [ نے اس باب میں ٹھوکر کھائی ہے۔

[Fallon, S. W. A new Hindustani-English dictionary, with illustrations from Hindustani literature and folk-lore. Banaras, London: Printed at the Medical Hall Press; Trubner and Co., 1879].

یہاں اپنے پرانے مضمون (زباں فہمی نمبر 212بعنوان ’قصائی نہیں قسائی‘) کا اختتامی اقتباس نقل کرنا بھی ضروری سمجھتا ہوں:

قصائی اور قسائی کی بحث میں ایک دل چسپ اور ناقابل یقین انکشاف ہمارے ایک خُردمعاصر نے کیا۔ اُن کا خیال ہے کہ دِلّی والے ’’قصائی‘‘ کہتے اور لکھتے ہیں، جبکہ لکھنؤ والے ’’قسائی‘‘..... معلوم نہیں اُنھیں یہ اور ایسے ہی بعض دیگر نکات کس دلی والے یا لکھنؤ والے نے سُجھائے۔

اگر ایسا ہی ہوتا تو فرہنگ آصفیہ اور نوراللغات اس وضاحت سے خالی نہ ہوتیں۔ بات کی بات ہے کہ یہ صاحب کچھ سال پہلے تک محض شعبہ تشہیر سے بطور ’’اخترا ع نگار‘‘ منسلک تھے (Creative Copywriter کا یہ اردو ترجمہ خاکسار نے کچھ عرصہ قبل کیا اور اپنے کالم میں استعمال بھی کیا تھا)۔ یکایک وہ اصلاح زبان کے موضوع پر خالص علمی نوعیت کے مضامین لکھنے لگے، خیر کوئی بھی لکھ سکتا ہے، پابندی نہیں، مگر مقام حیرت یہ ہے کہ وہ اہل زبان نہیں، بہرحال کوئی بات اگر مع حوالہ وسند نقل کی جائے تو غیراہل زبان کی تحریر بھی مسترد نہیں کی جاسکتی۔

ج)۔ عیدالاضحٰی کے مسائل میں یہ بات بھی شامل ہے کہ ہم قربانی اس لیے کرتے ہیں کہ یہ اللّہ اور اُس کے رسول (ﷺ) کا حُکم ہے اور اِس میں بشرطِ استطاعت قربانی واجب ہے ;نصاب کا مسئلہ بھی بالکل واضح ہے۔ لادینیت، مذہبی بے راہ رَوی المعروف آزادخیالی یا Liberalismکے ماننے والے یہ کہہ کر لوگوں کو گمراہ کرتے ہیں کہ بے چارے جانوروں پر ظلم کرنے کی بجائے کسی غریب کی امداد کرنا بہتر ہے۔ یہاں مصلحتاً ایک بزرگ وکیل +سیاست داں کا ذکر بھی ناگزیر ہے جن کا ایک انٹرویو بہت مشہور ہوا تھا اور لوگ بغیر سوچے سمجھے اُن کی ہاں میں ہاں ملانے لگے تھے کہ ہمارے یہاں تو دادا کے وقت سے قربانی نہیں کی جاتی، بلکہ غریب کی مدد کرتے ہیں۔

پہلی بات تو یہ ہے کہ اُنھیں اور اُن کے اندھے مقلدوں کو اسلام کا پتا ہی نہیں، دوسری بات یہ کہ اُن کے پڑدادا نے ایک بے گناہ مسلمان کو قید اور پھانسی کی سزادِلواکر، انگریز سے انعام واکرام حاصل کیا تھا، ورنہ وہ معمولی حیثیت کے شخص تھے اور تیسری بات یہ کہ موصوف کا اسلام سے تعلق اس قدر کمزور ہے کہ اُنھیں سورۂ اخلاص بھی پڑھنی نہیں آتی، ہاں موئن جو دَڑو کی مشرکانہ تہذیب کو اَپنی تہذیب قرار دینے میں فخر محسوس کرتے ہیں۔ اے کمال افسوس ہے، تجھ پر کمال افسوس ہے! جملہ معترضہ یہ بھی ہوسکتا ہے کہ ایک مقدمے کی فیس ایک سے ڈیڑھ کروڑ روپے وصول کرنے والے ان صاحب نے کبھی کسی غریب کا مقدمہ بلامعاوضہ بھی لڑا ہے یا ساری ہمدردی محض بقرعید ہی پر یاد آتی ہے۔

د)۔ اگر بنظرِغائر جائزہ لیا جائے تو معلوم ہوگا کہ عیدالاضحٰی کے موقع پر قربانی کی مخالفت کے پیچھے بھی صہیونی یہود ی استعمار ہی کارفرما ہے۔ (یہ لفظ صہیونی ہے نہ کہ صیہونی، اس بارے میں بھی زباں فہمی کا ایک مکمل مضمون لکھ کر شائع کرواچکا ہوں، سوشل میڈیا پر پیغامات کے ذریعے بھی اس اہم سہو کی نشان دہی کئی بار کرچکا ہوں)۔ اس مخالفت کی ایک وجہ یہ بھی ہے کہ یہود کے نزدیک ’ذبیح اللّہ‘ حضرت اسمٰعیل (علیہ السلام) نہیں، بلکہ حضرت اسحٰق (علیہ السلام) تھے۔ یہ بات مُحَرّف (تحریف شُدہ ) تورات میں اس طرح لکھی گئی ہے:

’’ابراہیم تُو اپنے بیٹے کو قربان کردے! ان تمام باتوں کے بعد خدا نے ابراہیم کو آزمایا۔ خدا نے آواز دی:’ابراہیم! ’ابراہیم نے جواب دیا،’میں یہاں ہوں‘۔ تب خدا نے اُس سے کہا کہ تیرا بیٹا یعنی تیرا اکلوتا بیٹا اسحاق کو، جسے تو پیار کر تا ہے موریاہ علاقے میں لے جا۔ میں تجھے جس پہاڑ پر جانے کی نشاندہی کروں گا وہاں جاکر اپنے بیٹے کو قربان کر دینا۔ (پیدائش 22) ۔اس عبارت میں اردو ترجمے کی اغلاط کے ساتھ ساتھ تاریخ کی گڑبڑ بھی توجہ طلب ہے۔ [Torah: Genesis 22- https://www.biblegateway.com]۔ بات آگے چلتی ہے تو یہ اَمر بالکل واضح ہوجاتا ہے کہ وہ مسلمانوں اور اُن کے رسول (ﷺ) کے اس لیے بھی دشمن تھے یا ہیں کہ اُن کے خیال میں نبوت ورسالت کا سلسلہ بنی اسرائیل تک ہی محدود رہنا چاہیے تھا۔ {یہاں ایک اور دل چسپ انکشاف کرتا چلوں۔

دنیا بھر پر معاشی ومعاشرتی تسلط قائم کرنے کے لیے پیہم سرگرم عمل صہیونی درحقیقت مقامی (یعنی فِلَسطینی) ہیں نہ حقیقی یہودی۔ یہ ساری تحقیق اب انٹرنیٹ پر موجود ہے۔ آج بھی توحیدپرست یہودیوں کا ایک فرقہ صہیونیت اور اِسرائیل کا مخالف اور مظلوم فِلَسطینیوں کا حامی ہے}۔ قربانی کے سہ روزہ عمل میں جانور فروش، قصاب، ذرائع نقل وحمل سے متعلق لوگ یعنی ٹرانسپورٹرز، کھالوں کے بیوپاری، چمڑے کے بیوپاری اور ان سب سے ذیلی طور پر مستفید ہونے والے لاتعداد مسلمانوں کو معاشی فائد ہ پہنچتا ہے۔ اندرون وبیرون ِملک سے اس موقع پر رقوم کی ترسیل کا سلسلہ بھی منفعت بخش ہے۔ ان نکات نیز اِسلامی تعلیمات کے پیش نظر، عیدالاضحی کی قربانی کا مقصد بالکل واضح ہوجاتا ہے۔