فلسطینیوں کی حمایت! ترک کھلاڑی نے گولڈ میڈل دریا ئے نیل میں پھینک دیا
اشاعت کی تاریخ: 31st, May 2025 GMT
لاہور(سپورٹس رپورٹر)ترک کنگ فو چیمپئن نے اسرائیل کی غزہ میں جارحیت کے خلاف اور فلسطینی عوام سے یکجہتی کے طور پر احتجاجاً اپنا یورپی چیمپئن شپ میں جیتا ہوا سونے کا تمغہ دریائے نیل میں پھینک دیا۔رپورٹ کے مطابق ترکیہ کے معروف کنگ فو فائٹر نجم الدین اربکان آکیوز نے فلسطین میں اسرائیلی نسل کشی پر یورپی چیمپئن شپ کی جانب سے حمایت پر شدید احتجاج کرتے ہوئے اپنا طلائی تمغہ مصر میں دریائے نیل میں پھینک دیا۔2023 ء کی یورپی چیمپئن شپ میں ترک کھلاڑی نے کنگ فو ٹائٹل اپنے نام کیا تھا اور جیت کے بعد انہوں نے تقریب میں فلسطینی عوام کے حق میں آواز بلند کرتے ہوئے فلسطین کا جھنڈا لہرا کر جشن منایا تھا۔ان کا یہ عمل حکام کو پسند نہ آیا جس کے بعد ان کیخلاف تحقیقات کا آغاز کیا گیا اور ان کا ٹائٹل بھی معطل کردیا تھا لیکن وہ اپنے مؤقف پر قائم رہے۔تاہم26 مئی کو احتجاجاً ترک کنگ فو فائٹر نے ایکس پر ایک ویڈیو اپ لوڈ کی جس میں انہوں نے کہا کہ اْن کی کوئی بھی کامیابی مظلوم فلسطینیوں کے خون کے ایک قطرے سے زیادہ قیمتی نہیں اور ساتھ ہی انہوں نے اپنا سونے کا تمغہ دریائے نیل میں پھینک دیا۔ترک کھلاڑی نے اسرائیل کو شدید تنقید کا نشانہ بناتے ہوئے کہا کہ میں نے یورپی چیمپئن شپ میں اپنی محنت سے پہلی پوزیشن حاصل کی تھی، جسے یہودیوں نے مجھ پر کسی احسان کی طرح دکھایا۔
.ذریعہ: Nawaiwaqt
کلیدی لفظ: یورپی چیمپئن شپ کنگ فو
پڑھیں:
ایشین ایتھلیٹکس: پاکستان نے نصف صدی بعد گولڈ میڈل جیت لیا
اسلام آباد (اُردو پوائنٹ ۔ DW اردو۔ 31 مئی 2025ء) پاکستانی ایتھلیٹ ارشد ندیم نے نیزہ بازی کے میدان میں اپنی شاندار کار کردگی برقرار رکھتے ہوئے جنوبی کوریا میں جاری ایشین ایتھلیٹکس چیمپیئن شپ میں 86.40 میٹر کی تھرو کے ساتھ طلائی تمغہ جیت لیا۔ یہ پاکستان کی جانب سے اس چیمپیئن شپ میں گزشتہ 50 برسوں میں پہلا گولڈ میڈل ہے۔
ارشد ندیم نے مقابلے کی ابتدا قدرے سست انداز میں کی، ان کی پہلی دو تھروز بالترتیب 75.64 میٹر اور 76.80 میٹر رہیں۔
تاہم تیسرے راؤنڈ میں انہوں نے 85.57 میٹر کی شاندار تھرو کے ساتھ سب پر سبقت حاصل کر لی۔ اس کے بعد ان کی اگلی دو تھروز 83.99 میٹر اور 83.44 میٹر رہیں، لیکن چھٹی اور آخری تھرو میں انہوں نے 86.40 میٹر کی شاندار کارکردگی دکھاتے ہوئے سبقت برقرار رکھی اور گولڈ میڈل اپنے نام کیا۔(جاری ہے)
ارشد ندیم ایشین چیمپیئن شپ کا 86.72 میٹر کا ریکارڈ تو نہ توڑ سکے لیکن ان کی کارکردگی نےمداحوں کو خوب متاثر کیا۔
یاد رہے کہ ارشد ندیم پیرس 2024 اولمپکس میں 92.97 میٹر کی تھرو کے ساتھ اولمپک ریکارڈ بنا چکے ہیں۔ اس مقابلے کے بعد پاکستانی میڈیا گروپ ڈان کے ساتھ ے گفتگو کرتے ہوئے ارشد ندیم کے کوچ سلمان بٹ نے کہا، ''یہ ایک اچھی کارکردگی تھی، خاص طور پر اس لیے کہ یہ سیزن کا ان کا پہلا مقابلہ تھا۔‘‘میدان میں ارشد ندیم کی پہلی تھرو کے وقت شائقین کی نظریں ان پر مرکوز تھیں اور پاکستانی پرچم لہرا رہے تھے۔
اس دوران اسٹیڈیم میں 'دل دل پاکستان‘ کی گونج بھی سنائی دی۔ واضح رہے کہ یہ ارشد ندیم کا گزشتہ سال کی پیرس اولمپکس کے بعد پہلا بین الاقوامی مقابلہ تھا۔ دیگر نمایاں کھلاڑیوں میں بھارت کے یش ویر سنگھ نے 82.57 میٹر کے ذاتی بہترین تھرو کے ساتھ پانچویں، چین کے ہو ہاوران نے 80.93 میٹر کی سیزن کی بہترین تھرو کے ساتھ چھٹی، سری لنکا کے سمیڈھا جگتھ رانا سنگھے نے 79.81 میٹر کے ساتھ ساتویں جبکہ پاکستان کے محمد یاسر نے 75.39 میٹر کی تھرو کے ساتھ آٹھویں پوزیشن حاصل کی۔ ارشد ندیم کی فتح، قومی پرچم کی شان میں اضافہ قرارایشین ایتھلیٹکس چیمپیئن شپ میں سونے کا تمغہ جیتنے پر قوم کے ہیرو ارشد ندیم کو صدر مملکت آصف علی زرداری اور وزیر اعظم شہباز شریف نے خراج تحسین پیش کیا ہے۔ وزیراعظم شہباز شریف نے ایکس پر اپنے پیغام میں کہا کہ ارشد ندیم کی ''محنت، لگن اور شاندار کامیابی نوجوان کھلاڑیوں کے لیے قابلِ تقلید مثال ہے‘‘۔
انہوں نے مزید کہا کہ ''ارشد کی غیر معمولی کارکردگی کے بعد ہلالی پرچم کی شان میں مزید اضافہ ہوا ہے‘‘۔
صدر آصف علی زرداری نے بھی ارشد ندیم کو مبارکباد دیتے ہوئے کہا کہ ''ارشد ندیم نے ایک بار پھر پاکستان کا نام روشن کیا ہے‘‘۔ پاکستان پیپلز پارٹی کی جانب سے ایکس پر جاری بیان کے مطابق صدر زرداری نے کہا، ''چیمپیئن شپ کے دوران، خصوصاً فائنل میں، ارشد کی کارکردگی شاندار رہی‘‘۔
انہوں نے کہا: ''میں پوری قوم کو اس جیت پر مبارکباد دیتا ہوں اور ارشد ندیم کی مستقبل میں مزید کامیابیوں کے لیے دعاگو ہوں۔‘‘
گولڈ میڈل جیتنے کے بعد ارشد ندیم نے حسب روایت سجدہ ریز ہو کر شکر ادا کیا — 28 سالہ ایتھلیٹ کی یہی عاجزی ان کے مداحوں کے دلوں کو جیت لیتی ہے، اور اب وہ ایک اور اعزاز اپنے نام کر چکے ہیں۔
شکور رحیم
ادارت: عرفان آفتاب
غزہ میں اسرائیلی حملوں کا خونریز دن: 52 فلسطینی شہید