جنگ خونریزی، تباہی، بربادی یہ الفاظ ہمارے شعور میں یوں رچ بس گئے ہیں جیسے روزمرہ کے معمولات۔ کبھی غزہ میں آگ برستی ہے،کبھی یوکرین میں گولیوں کی گونج سنائی دیتی ہے تو کبھی ایران کی فضا میں جنگی طیاروں کی گرج سنائی دیتی ہے۔ ہم ایک ایسی دنیا میں سانس لے رہے ہیں جہاں زندگی کی قیمت دن بہ دن کم ہوتی جا رہی ہے اور موت کا کاروبار دن بہ دن پھیلتا جا رہا ہے۔
جنگیں کیوں ہوتی ہیں؟ کیا یہ مذہب کی جنگ ہے؟ کیا یہ زمین کے کسی چھوٹے سے ٹکڑے کی جنگ ہے؟ یا پھر یہ صرف چند طاقتور ریاستوں کے معاشی مفادات اسلحہ ساز اداروں کے منافع اور سامراجی طاقتوں کے پھیلاؤ کی ہوس کی علامت ہیں؟ ان سوالوں کے جواب تلاش کرتے ہوئے ہمیں تاریخ کے اوراق پلٹنے پڑتے ہیں جہاں جنگوں کا آغاز اکثر انھی قوتوں نے کیا جو خود کو مہذب دنیا کا رہنما کہتی ہیں۔
افریقہ سے لے کر ایشیا تک لاطینی امریکا سے مشرقِ وسطیٰ تک جہاں جہاں سامراج گیا وہاں اپنی طاقت کے بل بوتے پر انسانوں کو غلام بنایا، وسائل کی لوٹ مار کی اور پھر جب ان زمینوں کے باسیوں نے آواز اٹھائی تو ان پر دہشت گرد کا لیبل لگا کر ان کی بستیاں تباہ کر دی گئیں۔ برصغیر کی تقسیم ہو یا فلسطین کا زخم ،عراق کی جنگ ہو یا افغانستان کی ان سب کے پیچھے اگر کچھ ہے تو وہ سامراجی مفادات، سرمایہ دارانہ پالیسیوں کا تسلط اور اسلحے کا نہ ختم ہونے والا کاروبار ہے۔
ہم کب سکون سے جی سکیں گے؟ یہ سوال شاید کسی فلسطینی ماں کی آہ میں پوشیدہ ہو جو اپنے بچے کی لاش کو سینے سے لگائے سوچتی ہے کہ آخر یہ خون خرابہ کب رکے گا۔ شاید کسی یوکرینی بزرگ کے دل میں ہو جو اپنے اجڑے گھر کے سامنے بیٹھا ماضی کو یاد کر رہا ہو یا پھر شاید یہ سوال کسی ایرانی باپ کی آنکھ میں ہو جو اپنی بیٹی کے جنازے کو کندھا دے رہا ہو۔
ہم اس دنیا میں تب سکون سے جی سکیں گے جب جنگ کو صرف میدانِ جنگ میں ہونے والی لڑائی نہیں بلکہ ایک منصوبہ بند سرمایہ دارانہ جرم کے طور پر پہچانا جائے گا۔ جب ہم یہ مان لیں گے کہ کسی بھی انسان کو صرف اس لیے مار دینا کہ وہ کسی اور قوم مذہب یا رنگ سے تعلق رکھتا ہے، ایک ناقابلِ معافی جرم ہے۔
جب ہم یہ سمجھ لیں گے کہ دنیا کے سارے بچے ایک جیسے ہوتے ہیں، ان کا خون ایک جیسا سرخ ہوتا ہے، ان کی ہنسی ایک جیسی خوشبو رکھتی ہے۔لیکن اس سے پہلے ہمیں سچ کا سامنا کرنا ہوگا۔ ہمیں یہ ماننا ہوگا کہ آج کی عالمی سیاست اخلاقیات انسانیت یا انصاف پر نہیں بلکہ طاقت کے توازن تیل کی قیمتوں اور اسلحہ ساز کمپنیوں کے شیئرز پر مبنی ہے۔ امریکا ہو یا روس چین ہو یا اسرائیل ہر بڑی طاقت اپنے مفادات کی تکمیل کے لیے انسانوں کو مہرے بناتی ہے۔
ایک طرف وہ امن کی بات کرتے ہیں دوسری طرف اربوں ڈالر کے ہتھیار بیچتے ہیں۔اور ہم جو اس دنیا کے عام لوگ ہیں جو ہر روز زندگی کے لیے جدو جہد کرتے ہیں کب تک ان جنگوں کے ایندھن بنتے رہیں گے؟ کب تک ہمارے نوجوان فوجی بھرتیوں میں اپنی جانیں گروی رکھ کر کسی طاقتور کے مفادات کی جنگ لڑیں گے؟ کب تک ہماری عورتیں بیوہ ہوتی رہیں گی؟ کب تک ہمارے بچے یتیم ہوتے رہیں گے؟
ضرورت اس بات کی ہے کہ ہم ان قوتوں کو بے نقاب کریں جو جنگ کو ضرورت اور دفاع کا نام دے کر اصل حقیقت چھپاتی ہیں۔ ہمیں یہ سمجھنا ہو گا کہ کسی قوم کی بقا کسی سرحد کی حفاظت یا کسی عقیدے کی برتری کے نام پر جب انسانیت کا قتلِ عام ہوتا ہے تو اصل میں قاتل وہی ہیں جو دنیا کی معیشت اور سیاست کے مرکز میں بیٹھے ہیں۔
کیا ہم کبھی ایک دوسرے کو جینے کا حق دے سکیں گے؟ ہاں دے سکتے ہیں اگر ہم اپنی نفرتوں کو پہچانیں ان سازشوں کو سمجھیں جو ہمیں آپس میں لڑاتی ہیں، اگر ہم یہ مان لیں کہ مذہب، زبان، رنگ، قومیت انسان کو تقسیم کرنے کے ہتھیار بنائے گئے ہیں، اگر ہم یہ جان لیں کہ ہر جنگ سے پہلے جھوٹ گھڑا جاتا ہے، میڈیا کے ذریعے فضا تیارکی جاتی ہے اور پھر انسانوں کو مارنے کے لیے جائز بہانہ تراشا جاتا ہے۔
دنیا میں جینے کا حق سب کا ہے۔ کسی فلسطینی کا خون کسی یہودی کے خون سے کم قیمتی نہیں۔ کسی ایرانی کا دکھ کسی امریکی ماں کے آنسو سے کم نہیں۔ کسی افغانی بچے کی بھوک کسی یورپی بچے کی بھوک جتنی ہی تکلیف دہ ہے۔ فرق صرف اتنا ہے کہ ایک کی تصویر میڈیا پر آتی ہے اور دوسرے کی لاش ملبے تلے دفن ہو جاتی ہے۔
ہمیں وہ دن لانا ہو گا جب جنگ کو ناکامی سمجھا جائے گا فتح نہیں۔ جب امن کو صرف مذاکرات یا معاہدوں سے نہیں بلکہ انصاف سے جوڑا جائے گا۔ ہمیں یہ لڑائی قلم سے لڑنی ہو گی شعور سے علم سے بیداری سے۔ ہمیں اپنی نسلوں کو بتانا ہو گا کہ جنگیں انسانوں کا مقدر نہیں بلکہ مفادات کی سازش ہیں۔ ہمیں امن کے لیے کھڑا ہونا ہوگا، چاہے وہ امن فلسطین میں ہو، ایران میں بھارت میں پاکستان میں یا کسی افریقی ملک میں۔
دنیا سکون کا گھر بن سکتی ہے اگر ہم چاہیں۔ اگر ہم وہ دن لانا چاہیں جب بچے اسکول جائیں نہ کہ پناہ گاہوں میں چھپیں جب ماں کی آنکھ میں خواب ہوں آنسو نہیں جب باپ کے کندھے پر بیٹے کی لاش نہ ہو بلکہ اُس کا بستہ ہو۔کیا وہ دن کبھی آئے گا؟ شاید آئے اگر ہم سوال کرنا سیکھ لیں اگر ہم سچ بولنا سیکھ لیں اگر ہم انسان کو انسان سمجھنا سیکھ لیں۔ جب ہماری آواز قلم سب ظلم کے خلاف یکجا ہو جائیں گے۔ تب شاید وہ دن آئے گا اور ہاں وہ دن ضرور آئے گا جب ہم جنگ کے خلاف اور امن کے حق میں اپنی آخری سانس تک بات کریں گے لکھیں گے۔ اس خواب کو فیض صاحب نے کیا خوب لفظوں میں ڈھالا ہے۔
ہم دیکھیں گے
لازم ہے کہ ہم بھی دیکھیں گے
وہ دن کہ جس کا وعدہ ہے
جو لوحِ ازل میں لکھا ہے
جب ظلم و ستم کے کوہ گراں
روئی کی طرح اُڑ جائیں گے
ہم محکوموں کے پاؤں تلے
یہ دھرتی دھڑ دھڑ دھڑکے گی
اور اہلِ حکم کے سر اوپر
جب بجلی کڑ کڑ کڑکے گی
جب ارضِ خدا کے کعبے سے
سب بت اُٹھوائے جائیں گے
ہم اہلِ صفا مردودِ حرم
مسند پہ بٹھائے جائیں گے
سب تاج اچھالے جائیں گے
سب تخت گرائے جائیں گے
بس نام رہے گا اللہ کا
جو غائب بھی ہے حاضر بھی
جو ناظر بھی ہے منظر بھی
اٹھے گا أنا الحقّ کا نعرہ
جو میں بھی ہوں اور تم بھی ہو
اور راج کرے گی خلقِ خدا
جو میں بھی ہوں اور تم بھی ہو
.
ذریعہ
ذریعہ: Express News
کلیدی لفظ: نہیں بلکہ جائیں گے ا ئے گا کے لیے میں ہو کی جنگ اگر ہم بھی ہو
پڑھیں:
پنجاب حکومت کے دو پراجیکٹ ورلڈ سمٹ انفارمیشن سوسائٹی کی ٹاپ لسٹ میں شامل، دنیا میں پاکستان کا تشخص نمایاں ہوا: مریم نواز
لاہور (نوائے وقت رپورٹ+ نیوز رپورٹر) وزیراعلیٰ مریم نواز نے’’میرا پیارا‘‘ پراجیکٹ کو یو این گلوبل چیمپئن قرار دئیے جانے پر اظہار تشکر کیا ہے۔ تاریخ میں پہلی بار وزیراعلیٰ کے وژنری اقدامات کی بدولت پاکستان کے دو پراجیکٹس کواقوام متحدہ کی ورلڈ سمٹ انفارمیشن سوسائٹی نے ٹاپ لسٹ میں شامل کیا۔ مریم نواز کے ورچوئل سینٹر فار چائلڈ سیفٹی ’’میرا پیارا‘‘ پراجیکٹ کو دنیا کے ٹاپ فائیو میں شامل کیا گیا ہے۔ پنجاب کا ورچوئل ویمن پولیس سٹیشن بھی دنیا بھر کے ٹاپ 20 پراجیکٹس میں شارٹ لسٹ کیا گیا ہے۔ وزیراعلیٰ نے ’’میرا پیارا‘‘ پراجیکٹ کی ٹیم کو ڈبلیو ایس آئی ایس کی طرف سے گلوبل چیمپئن قرار دیئے جانے پر شاباش دی ہے۔ مریم نواز نے کہا کہ عوامی خدمات کے معتبر فورم اقوام متحدہ کے تحت (WSIS) پرائزز ڈیجیٹل گورننس پر پنجاب کے دو پروگرامز کا شامل کیا جانا اعزاز ہے۔ ورچوئل سینٹر فار چائلڈ سیفٹی ’’میرا پیارا‘‘ نے 1 لاکھ 45 ہزار سے زائد گمشدہ بچوں کے کیس کی مثال قائم کی۔ ’’میرا پیارا‘‘ پراجیکٹ کے تحت 54 ہزار سے زائد گمشدہ بچوں کے لئے مؤثر کارروائی قابل تحسین ہے۔ ’’میرا پنجاب‘‘ سے بچوں کے استحصال آن لائن ہراسگی اور دیگر معاملات میں معاونت کی گئی۔ ’’میرا پنجاب‘‘ کی عالمی سطح پر پذیرائی ٹیکنالوجی پر مبنی پبلک سروسز کی عالمی سطح پر اعتراف کا ثبوت ہے۔ گمشدہ افراد کے لئے میرا پیارا ایپ دنیا بھر میں پاکستان کا مثبت تشخص نمایاں ہوا۔ یہ امر قابل ذکر ہے کہ پنجاب کے پراجیکٹس کی بدولت پاکستان ڈبلیو ایس آئی ایس کیٹیگری میں دو شارٹ لسٹ شدہ پراجیکٹس کے ساتھ دنیا کا واحد ملک بن گیا۔ ورچوئل سینٹر فار چائلڈ سیفٹی (VCCS) کے ذریعے بچوں سے متعلق 1 لاکھ 45 ہزار سے زائد کیسز نمٹائے گئے۔ ورچوئل سینٹر فار چائلڈ سیفٹی کی بدولت 77 ہزار سے زائد گمشدہ بچے بازیاب کرایا گیا۔ مریم نواز کی قیادت میں پنجاب حکومت حکومت نے 3 ہزار سپیشل (معذور) بچوں کو بھی تلاش کر کے خاندانوں سے ملوایا۔ ڈبلیو ایس آئی ایس کی رپورٹ کے مطابق پراجیکٹ کے تحت گمشدہ یا اغوا ہونے والے بچوں کے 54 ہزار سے زائد کیسز پر کارروائی کی گئی۔ 77 ہزار سے زائد بچے خاندانوں سے ملوائے گئے جن میں تین ہزار سپیشل بچے بھی شامل ہیں۔ مربوط ڈیجیٹل رسپانس کے ذریعے بدسلوکی، آن لائن استحصال اور کمزور بچوں کے تحفظ کے ہزاروں کیسز حل کیے گئے۔ رپورٹ کے مطابق پنجاب بھر میں اب تک مختلف کیٹیگریز کے کل 1,45,772 کیسز رپورٹ، ریکارڈ 1,36,157کیسز کو کامیابی سے حل کر لیا گیا۔ رپورٹ ہونے والے مقدمات میں سے مجموعی طور پر 26,274 ایف آئی آرز رجسٹرڈ جبکہ 7,081 چالان عدالتوں میں جمع کروا دیے گئے۔ گمشدہ اور اغوا ہونے والے 54,741بچوں میں سے 53,811بچوں کو کامیابی سے تلاش کر کے اہلخانہ سے ملایا گیا۔ ریسکیو ٹیموں کی کارروائی کے نتیجے میں 22,989بچے ملے،جن میں سے 21,178 کو فوری طور پر خاندانوں کے حوالے کیا گیا۔ رپورٹ کے مطابق اس وقت سسٹم میں 930بچے لاپتہ اور1,811بچے تاحال غیر شناخت شدہ ہیں جن کے لیے روزانہ کی بنیاد پر فالو اپ جاری ہے۔ بچوں پر تشدد اور بدسلوکی کے 15,447 کیسز رپورٹ ہوئے، جن پر فوری کارروائی کرتے ہوئے 5,075ایف آئی آرز درج کی گئیں۔ چائلڈ بدسلوکی کیسز میں اب تک 3,830 ملزمان کو گرفتار کر کے 4,168مقدمات کے چالان عدالتوں میں جمع کروائے جا چکے ہیں۔ بچوں کے خلاف آن لائن اور ڈیجیٹل بد سلوکی کے 191کیسز سامنے آئے، جن پر 14 ایف آئی آرز درج اور 5 ملزموں کو گرفتار کیا گیا۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ