آزاد کشمیر: دریاوں میں طغیانی، کار بہہ گئی، سیاحوں کو بچا لیا گیا
اشاعت کی تاریخ: 14th, August 2025 GMT
تصویر سوشل میڈیا۔
آزاد کشمیر کے مختلف علاقوں میں بارش سے ندی نالوں میں طغیانی آ گئی، باغ کے برساتی نالے میں سیاحوں کی گاڑی بہہ گئی، مقامی لوگوں نے کار میں سوار چاروں سیاحوں کو بچا لیا۔
آزاد کشمیر کے مختلف شہروں میں بارش، نالوں اور دریاوں میں پانی کی سطح میں اضافہ ہوا ہے، وادیٔ نیلم میں موسلا دھار بارش ہوئی ہے اور رتی گلی جھیل کی سڑک سیلابی ریلے میں بہہ گئی۔
ایس ڈی ایم اے کے مطابق اٹھ مقام میں ریلے میں کئی سیاح پھنس گئے جنہیں رسیکیو کر لیا گیا، وادیٔ نیلم اور مچھیارہ نالے میں طغیانی سے پُل، 2 مکانات اور پن چکی کو نقصان پہنچا۔
کھریگام دوسٹ، تہجیاں اور جاگران نالوں میں بھی طغیانی آئی ہے، مچھیارہ کے مقام ڈنہ دلیاڑ میں پہاڑ سے پتھر گرنے سے خاتون جاں بحق ہو گئی۔
سماہنی میں نالہ بھمبر میں اونچے درجے کا سیلاب آیا ہے، جہلم ویلی میں شدید بارش سے ندی نالوں میں پانی کے بہاؤ میں غیر معمولی اضافہ ہو گیا، ہٹیاں بالا اور وادیٔ نیلم میں بھی ندی نالوں میں طغیانی ہے۔
باغ کے نالہ مالوانی میں طغیانی سے لاری اڈے کے لیے لگائی گئی حفاظتی دیوار ٹوٹ گئی۔
ضلعی انتظامیہ کےمطابق طغیانی سے شہری آبادی اور لاری اڈہ متاثر ہونے کا خدشہ ہے، شرقی باغ کے برساتی نالے میں سیاحوں کی گاڑی بہہ گئی، گاڑی میں پھنسے تمام افراد کو ریسکیو کر لیا گیا۔
ہٹیاں بالا میں مختلف ندی نالوں میں طغیانی ہے، طغیانی سے شاہراہ سرینگر اور بین الاضلاعی سڑکوں پر پتھر آ گئے، جس سے سڑکیں جزوی طور پر متاثر ہوئی ہیں، نالے بپھرنے سے متعدد دکانیں بھی متاثر ہوئیں۔
ضلع جہلم ویلی میں شدید بارش سے ندی نالوں میں پانی کے بہاؤ میں غیر معمولی اضافہ ہو گیا ہے۔
نکیال میں نالہ مجہان، نالہ میرہ، نالہ بان میں پانی کی سطح بلند ہو گئی، مختلف علاقوں میں لینڈ سلائیڈنگ بھی ہوئی ہے۔
بھمبر نالے میں بھی اونچے درجے کا سیلاب ہے، سماہنی و گرد و نواح میں موسلا دھار بارش سے ندی نالوں میں طغیانی ہے۔
.
ذریعہ
ذریعہ: Jang News
کلیدی لفظ: بارش سے ندی نالوں میں ندی نالوں میں طغیانی طغیانی سے میں پانی نالے میں بہہ گئی
پڑھیں:
مون سون کا طاقتور سپیل جاری، مختلف علاقوں میں آج بھی بارشوں کی پیشگوئی
صوبائی دارالحکومت سمیت پنجاب کے مختلف اضلاع میں مون سون کا طاقتور سپیل جاری ہے، جبکہ محکمہ موسمیات نے آج بھی وقفے وقفے سے بارش کی پیش گوئی کردی، مون سون بارشوں کے باعث حبس اور گرمی کی شدت میں نمایاں کمی آ گئی ہے۔محکمہ موسمیات کے مطابق آئندہ 24 گھنٹوں کے دوران کم سے کم درجہ حرارت 27 اور زیادہ سے زیادہ 32 ڈگری سینٹی گریڈ رہنے کا امکان ہے، شہر کا موجودہ درجہ حرارت 28 ڈگری سینٹی گریڈ ریکارڈ کیا گیا، جبکہ ہوا کی رفتار 11 کلومیٹر فی گھنٹہ اور ہوا میں نمی کا تناسب 83 فیصد رہا۔محکمہ موسمیات نے آج جمعہ کے روز پنجاب، اسلام آباد، خیبرپختونخوا، شمال مشرقی بلوچستان، آزاد کشمیر اور گلگت بلتستان کے مختلف علاقوں میں گرج چمک کے ساتھ بارش اور چند مقامات پر موسلادھار بارش کی پیش گوئی کی ہے۔محکمہ موسمیات کے مطابق بحیرہ عرب اور خلیج بنگال سے آنے والی مون سون ہوائیں ملک کے بالائی علاقوں پر اثرانداز ہیں، جبکہ مغربی ہواؤں کا ایک سلسلہ بھی موسم کو متاثر کر رہا ہے، اس کے باعث بالائی اور وسطی علاقوں میں بارشوں کا امکان برقرار رہے گا۔پیشگوئی کے مطابق اسلام آباد، راولپنڈی، لاہور، گوجرانوالہ، سیالکوٹ، نارووال، شیخوپورہ، فیصل آباد، سرگودھا، مری، گلیات، جہلم، اٹک اور چکوال سمیت پنجاب کے مختلف اضلاع میں وقفے وقفے سے بارش متوقع ہے، خیبرپختونخوا کے پشاور، مردان، صوابی، نوشہرہ، ایبٹ آباد، مانسہرہ، سوات، دیر، چترال، کوہستان اور دیگر بالائی علاقوں میں بھی گرج چمک کے ساتھ بارش کا امکان ظاہر کیا گیا ہے۔آزاد کشمیر اور گلگت بلتستان میں بھی بارش کا سلسلہ جاری رہنے کی توقع ہے، جبکہ شمال مشرقی بلوچستان کے کوئٹہ، زیارت، ژوب، موسیٰ خیل، بارکھان اور ملحقہ علاقوں میں کہیں کہیں بارش ہو سکتی ہے، سندھ کے بالائی اور جنوب مشرقی علاقوں میں چند مقامات پر بارش کا امکان ہے، تاہم صوبے کے بیشتر علاقوں میں موسم گرم اور مرطوب رہے گا۔محکمہ موسمیات نے خبردار کیا ہے کہ بعض علاقوں میں شدید بارش کے باعث شہری علاقوں میں اربن فلڈنگ، برساتی ندی نالوں میں طغیانی اور پہاڑی علاقوں میں لینڈ سلائیڈنگ کا خطرہ موجود ہے۔ متعلقہ اداروں کو پیشگی اقدامات کرنے جبکہ شہریوں، بالخصوص سیاحوں اور پہاڑی علاقوں کا سفر کرنے والوں کو احتیاط برتنے کی ہدایت کی گئی ہے۔ادھر قومی و صوبائی ڈیزاسٹر مینجمنٹ اداروں نے بھی مقامی انتظامیہ کو الرٹ رہنے کی ہدایت کی ہے تاکہ کسی بھی ہنگامی صورتحال سے بروقت نمٹا جا سکے۔ شہریوں سے کہا گیا ہے کہ تیز بارش، آندھی یا گرج چمک کے دوران غیر ضروری سفر سے گریز کریں اور موسم سے متعلق سرکاری ہدایات پر عمل کریں۔
بھارت سے جنگ اور افغانستان میں کارروائی خارج ازامکان نہیں، وزیردفاع