بارشوں اور سیلاب سے جاں بحق افراد کی تعداد تقریباً 350، پی ڈی ایم اے نے مزید بارشوں کیپیشگوئی کردی
اشاعت کی تاریخ: 16th, August 2025 GMT
اسلام آباد: نیشنل ڈیزاسٹر منیجمنٹ اتھارٹی (این ڈی ایم اے) کے مطابق گزشتہ 48 گھنٹوں کے دوران ملک بھر میں بارشوں اور سیلاب سے مختلف حادثات میں 344 افراد جاں بحق اور 148 زخمی ہوئے ہیں۔
رپورٹ کے مطابق صرف 6 گھنٹوں میں 151 افراد جاں بحق اور 154 زخمی ہوئے، جن میں سے سب سے زیادہ اموات خیبر پختونخوا میں ہوئیں۔ صوبے میں 145 ہلاکتیں اور 137 زخمی رپورٹ ہوئے۔ مرنے والوں میں 124 مرد، 16 خواتین اور 11 بچے شامل ہیں، جب کہ زخمیوں میں 107 مرد، 20 خواتین اور 10 بچے شامل ہیں۔
این ڈی ایم اے کے مطابق گلگت بلتستان میں 4 افراد جاں بحق اور 17 زخمی، جب کہ آزاد کشمیر میں 2 افراد جان کی بازی ہار گئے۔
ادارے نے خبردار کیا ہے کہ شمالی علاقہ جات میں بارشوں کے تسلسل کے باعث لینڈ سلائیڈنگ کے مزید واقعات پیش آسکتے ہیں، جبکہ شہریوں اور سیاحوں کو اگلے 5 سے 6 دن شمالی علاقوں کا سفر نہ کرنے کی ہدایت کی گئی ہے۔
امدادی سرگرمیاں
پاک فوج اور ریسکیو ادارے سیلاب سے متاثرہ اضلاع میں امدادی کارروائیوں میں مصروف ہیں۔ ہیلی کاپٹروں کے ذریعے متاثرین تک راشن اور سامان پہنچایا جارہا ہے جبکہ لوگوں کو محفوظ مقامات پر منتقل کیا جا رہا ہے۔ این ڈی ایم اے کے مطابق تمام متعلقہ سول و عسکری ادارے مکمل رابطے میں ہیں۔
خیبر پختونخوا کی صورتحال
پروونشل ڈیزاسٹر منیجمنٹ اتھارٹی (پی ڈی ایم اے) کے مطابق صوبے کے مختلف اضلاع میں 74 گھروں کو نقصان پہنچا، جن میں سے 63 جزوی اور 11 مکمل طور پر تباہ ہوگئے۔ سوات، بونیر، باجوڑ، تورغر، مانسہرہ، شانگلہ اور بٹگرام متاثرہ اضلاع میں شامل ہیں۔
پی ڈی ایم اے کے مطابق متاثرہ اضلاع کے لیے مجموعی طور پر 50 کروڑ روپے جاری کیے گئے ہیں۔ بونیر کے لیے 15 کروڑ، باجوڑ، بٹگرام اور مانسہرہ کے لیے 10، 10 کروڑ اور سوات کے لیے 5 کروڑ روپے فراہم کیے گئے ہیں۔
مشیر اطلاعات خیبر پختونخوا بیرسٹر محمد علی سیف کے مطابق صوبے کے 11 اضلاع کلاؤڈ برسٹ اور سیلاب سے متاثر ہوئے ہیں، اور متاثرہ افراد کی مجموعی تعداد 3 ہزار 817 ہے۔ ان کے مطابق 32 افراد تاحال لاپتا ہیں، جبکہ 545 ریسکیو اہلکار، 90 گاڑیاں اور کشتیاں امدادی کارروائیوں میں حصہ لے رہی ہیں۔
بیرسٹر سیف نے بتایا کہ سب سے زیادہ جانی نقصان بونیر میں ہوا، جہاں 159 افراد جاں بحق اور 100 سے زائد افراد کو زندہ بچا لیا گیا۔ باجوڑ میں 20 افراد جاں بحق اور ایک لاپتا، جبکہ بٹگرام میں 11 افراد کی لاشیں ملی ہیں اور 10 افراد اب بھی لاپتا ہیں۔
گلگت بلتستان کی صورتحال
وزیر داخلہ گلگت بلتستان شمس لون کے مطابق صوبے کے تقریباً تمام اضلاع حالیہ مہینوں میں سیلاب سے متاثر ہوئے ہیں۔ حالیہ بارشوں میں 7 افراد جاں بحق، 11 زخمی اور 4 لاپتا ہیں۔ جی بی میں 318 گھر مکمل طور پر تباہ اور 674 کو جزوی نقصان پہنچا ہے۔
اسی دوران، پنجاب میں شدید بارشوں کی پیشگوئی بھی کی گئی ہے۔ پروونشل ڈیزاسٹر مینجمنٹ اتھارٹی (پی ڈی ایم اے) پنجاب کے مطابق مون سون کا ساتواں اسپیل زیادہ مضبوط ہے اور آئندہ 24 گھنٹوں کے دوران بالائی پنجاب میں طوفانی بارشوں اور کلاؤڈ برسٹ کے خدشات ہیں۔
پی ڈی ایم اے نے شہریوں کو ہدایت کی ہے کہ احتیاطی تدابیر اختیار کریں اور غیر ضروری سفر سے گریز کریں، جبکہ شمالی علاقہ جات میں سیاحوں کو اگلے 5 سے 6 دن کے دوران سفر نہ کرنے کی ہدایت کی گئی ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
.
ذریعہ
ذریعہ: WE News
کلیدی لفظ: افراد جاں بحق اور پی ڈی ایم اے سیلاب سے کے مطابق کے لیے
پڑھیں:
کراچی، شہر کے مختلف علاقوں میں حادثات کے نتیجے میں 3 افراد جاں بحق
کراچی:شہر قائد کے مختلف علاقوں میں پیش آنے والے افسوسناک حادثات کے نتیجے میں تین افراد جان کی بازی ہار گئے جبکہ لاشوں کو قانونی کارروائی کے لیے اسپتال منتقل کر دیا گیا۔
ریسکیو ذرائع کے مطابق بلوچ کالونی کے علاقے کشمیر کالونی نالے والے روڈ پر نامعلوم گاڑی کی ٹکر سے ایک 20 سالہ راہگیر جاں بحق ہوگیا۔
اطلاع ملنے پر چھیپا کے رضاکار موقع پر پہنچے اور لاش کو جناح اسپتال منتقل کیا جہاں متوفی کی شناخت کے لیے کوششیں جاری ہیں۔
دوسرا واقعہ ایف سی ایریا کے ایک اپارٹمنٹ میں پیش آیا جہاں کرنٹ لگنے سے ایک شخص جاں بحق ہوگیا۔
چھیپا حکام کے مطابق متوفی کی لاش عباسی شہید اسپتال منتقل کی گئی جہاں اس کی شناخت 40 سالہ اظہر احمد کے نام سے ہوئی۔
ادھر قیوم آباد میں جام صادق پل پر تیز رفتار ٹریلر کی ٹکر سے موٹرسائیکل سوار موقع پر ہی دم توڑ گیا۔
ریسکیو اہلکاروں نے لاش کو جناح اسپتال منتقل کیا جہاں متوفی کی شناخت 40 سالہ شکیل کے نام سے کی گئی۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ