چیمپئنز ٹرافی کے لیے نیشنل اسٹیڈیم میں تیاریاں حتمی مراحلے میں داخل
اشاعت کی تاریخ: 17th, February 2025 GMT
بدھ سے شروع ہونے والی آئی سی سی چیمپئنز ٹرافی 2025 کے لیے نیشنل اسٹیڈیم میں تیاریاں حتمی مرحلے میں داخل ہو گئیں۔
پاکستان اور نیوزی لینڈ کے درمیان نیشنل اسٹیڈیم پر کھیلے جانے والے افتتاحی میچ کے سلسلے میں انتظامات کا سلسلہ آخری مراحل میں ہے۔ افتتاحی میچ سے قبل پاک فضائیہ کے طیاروں کا فلائٹ پاسٹ ہوگا۔ آئی سی سی کا ایونٹ ہونے کے ناطے نیشنل اسٹیڈیم میں قواعد و ضوابط کے تحت انتظامات کیے جارہے ہیں،پرانی اور نئی عمارت کے اطرافی شیشوں کو پوری طرح مختلف رنگوں سے ڈھانک دیا گیا ہے۔
چیمپئنز ٹرافی میں شریک تمام 8ٹیموں کے کپتانوں کی دیو ہیکل تصاویر پر مشتمل خوش آمدیدی بینرز آویزاں کر دیے گئے ہیں۔ پیر کو پاکستان شاہینز اور جنوبی افریقا کے درمیان ہونے والے وارم اپ میچ کے دوران اسٹیڈیم میں ویلڈنگ سمیت دیگر کاموں کا سلسلہ جاری رہا۔
پاکستان کرکٹ ٹیم نے دوسرے دن بھی اوول گراؤنڈ پر پریکٹس سیشن میں حصہ لیا۔ اس موقع پر قومی کرکٹرز نے بھرپور انداز میں مشقوں کا سلسلہ جاری رکھا، جسمانی ورزشوں سے اغاز کرنے کے بعد فیلڈنگ کی پریکٹس کی گئی اور بعد میں نیٹ پر بولنگ اور بیٹنگ میں خامیوں کو درست کرتے ہوئے بہتری لانے کی کوشش کی گئی۔
گزشتہ روز آرام کو ترجیح دینے والے قومی کپتان محمد رضوان اور اسپنر ابرار احمد نے بھی دیگر کھلاڑیوں کے ہمراہ مشقوں میں شرکت کی۔انجری کا شکار ہونے والے فاسٹ بولر حارث روف نے بھی انتہائی محتاط انداز میں بولنگ پریکٹس میں حصہ لیا۔
کراچی میں موجود نیوزی لینڈ اور افغانستان کی ٹیموں نے پیر کے روز آرام کرنے کو ترجیح دی۔
دوسری جانب نیشنل اسٹیڈیم میں انتظامات کا سلسلہ جاری رہا۔ دوسرے دن بھی آئی سی سی حکام پی سی بی کے ذمہ داران کے ساتھ مل کر انتظامات کرتے رہے۔
رابطے پر آئی سی سی کی ترجمان کا کہنا تھا کہ بدھ کو افتتاحی میچ سے قبل کسی باضابطہ تقریب کا انعقاد طے نہیں۔ تاہم، پی سی بی میچ سے پہلے اپنے تئیں پروگرام کرے گا۔
دریں اثنا چیمپینز ٹرافی کے انعقاد سے دو یوم قبل آئی سی سی کی جانب سے میڈیا کو ایکریڈیشن کارڈ جاری کر دیے گئے۔
تاہم رہ جانے والے ذرائع ابلاغ کے نمائندوں کو منگل کو ایکریڈیشن کارڈ دیے جانے کا امکان ہے، معلوم ہوا ہے کہ چیمپئنز ٹرافی کی کوریج کے لیے بھارتی صحافی بھی پاکستان آئیں گے،بھارت میں پاکستان ہائی کمشنر نے پاکستان آنے کے خواہشمند صحافیوں کو ویزے جاری کر دیے ہیں۔
.ذریعہ: Express News
کلیدی لفظ: چیمپئنز ٹرافی نیشنل اسٹیڈیم اسٹیڈیم میں کا سلسلہ
پڑھیں:
قدرت سے ربط رکھنے والے سرفہرست ممالک کون کون سے ہیں؟ فہرست جاری
لندن:سماجی، ثقافتی، معاشی اور جغرافیائی عوامل کے تحت قدرت سے قریبی ربط رکھنے والے دنیا کے سرفہرست ممالک کے نام جاری کردیے گئے ہیں، جس میں پاکستان کو شامل نہیں کیا گیا ہے۔
برطانوی اخبار دی گارڈین نے تحقیقی جریدے ایمبیو میں شائع رپورٹ کے حوالے سے ان ممالک کی فہرست جاری کی ہے، جن کو قدرت سے جڑے ہوئے ممالک قرار دیا گیا ہے، اور 61 ممالک میں نیپال کو دنیا کا سب سے زیادہ قدرت سے جڑا ہوا ملک قرار دیا گیا ہے۔
برطانیہ اور آسٹریا سے تعلق رکھنے والے ماہرین کی سربراہی میں تحقیقی ٹیم نے یہ فہرست ترتیب دی، تحقیق کرنے والی ٹیم میں یونیورسٹی آف ڈربی کے پروفیسر مائلز رچرڈسن بھی شامل تھے جو ’’قدرت سے وابستگی‘‘ کے ماہر سمجھے جاتے ہیں۔
تحقیق میں 61 ممالک کے57 ہزار افراد سے سروے کیا گیا اور تحقیق میں یہ دیکھا گیا کہ سماجی، ثقافتی، معاشی اور جغرافیائی عوامل کا فطرت سے جذباتی و ذہنی تعلق پر کیا اثر ہوتا ہے۔
رپورٹ میں بتایا گیا کہ اس منفرد تحقیق میں یہ نتیجہ سامنے آیا کہ روحانیت اور مذہبی عقیدہ قدرت سے مضبوط تعلق رکھنے کے سب سے بڑے عوامل ہیں۔
سروے میں نیپال کے بعد دوسرے نمبر پر ایران، تیسرے نمبر پر جنوبی افریقہ، بنگلادیش اور نائیجیریا بالترتیب چوتھے اور پانچویں نمبر پر ہیں، چلی چھٹے نمبر پر موجود ہے، سرفہرست 10 ممالک میں یورپ کے صرف دو ممالک کروشیا ساتویں اور بلغاریہ نویں نمبر شامل ہیں، گھانا کا نمبر 8 اور تیونس 10 ویں نمبر پر ہے، یورپ سے سرفہرست ممالک میں فرانس 19ویں نمبر پر ہے۔
برطانیہ بھی آخری ممالک میں شامل ہے اور 61 ممالک میں سے 55ویں نمبر پر ہے، نیدرلینڈز، کینیڈا، جرمنی، اسرائیل اور جاپان بھی فہرست کے نچلے حصے میں آئے۔
اس فہرست میں اسپین آخری نمبر پر رہا، نیدرلینڈز، کینیڈا، جرمنی، اسرائیل اور جاپان کے اسکور بھی برطانیہ سے کم تھے۔
تحقیق میں یہ بھی بتایا گیا کہ کاروبار میں آسانی یعنی ملک میں کاروبار کرنے کی سہولت جتنی زیادہ ہو، قدرت سے وابستگی کا احساس اتنا ہی کم ہو جاتا ہے یعنی وہ ممالک جہاں مارکیٹ اور کاروباری ماحول زیادہ مضبوط ہے، وہاں لوگ فطرت سے نسبتاً کم جڑے ہوئے ہوتے ہیں۔
پیپلز پارٹی کی وزیراعظم آزاد کشمیر کو استعفیٰ دینے کی مہلت