مشرقی پاکستان کی واپسی
اشاعت کی تاریخ: 23rd, February 2025 GMT
یہ 22 فروری 1974 تھا پورا عالم اسلام دوسری اسلامی سربراہ کانفرنس کے لیے جمع تھا کشادہ چیئرنگ کراس لاہور، ہال کے اندر اسلامی قیادت جمع ہے اور ہال کے باہر سڑکوں پر اہل پاکستان کا ایک جم غفیر نعرے لگائے جارہے تھے کہ بنگلا دیش نہ منظور اور ہال کے اندر کا منظر یہ تھا کہ بھٹو اور مجیب، ہاتھوں میں ہاتھ ڈالے بنگلا دیش منظور کی قرارداد کے لیے بے چین اور بے قرار تھے اس روز لاہور میں دو پاکستان تھے ایک بنگلا دیش منظور کرانے والے اور دوسرے نامنظور کہنے والے، نامنظور کہنے والے محب وطن عام لوگ تھے۔ ڈاکٹر نذیر شہید بھی اسی قافلے میں شامل تھے۔ متحدہ پاکستان کے شیدائی اور اس کے لیے کٹ مرنے والے تھے تاہم یہ بے اختیار تھے مگر ان کے دائیں ہاتھ میں متحدہ پاکستان کا نعرہ اور سبز ہلالی پرچم تھا تاہم کمزور تھے اختیار ان کے پاس تھا جن کے بائیں ہاتھ میں سیاہ سیاسی اعمال نامہ تھا جس میں بنگلا دیش منظور کی قرارداد لکھی ہوئی تھی۔ جس روز یہ قرارداد پاس ہوئی اس روز بلک بلک کر پورا پاکستان رویا۔ قیام پاکستان کے وقت اپنی آنکھوں کے سامنے مائوں، بہنوں، بیٹیوں جوان مرد، بزرگوں کو قتل ہوتے ہوئے دیکھ کر بھی نہیں رویا تھا۔ سچ یہی ہے کہ اس وجہ سے کوئی نہیں رویا تھا کیونکہ وہ اپنی منزل پاکستان کے لیے قربان ہو رہے تھے۔ بلاشہ پاکستان کی بنیاد اس روز رکھ دی گئی تھی جب برصغیر میں پہلا مسلمان پیدا ہوا تھا مسلم لیگ تو بہت بعد میں بنی، قیام پاکستان کا یہ سفر کس قدر طویل تھا اس کا کسی کو اندازہ ہی نہیں۔ ہاں مسلم لیگ کو یہ موقع ضرور ملا کہ اس کی قیادت میں عالم اسلام کو ایک اسلامی مملکت پاکستان ملا لیکن اسے توڑا کس نے؟ یہ دھبا بھی مسلم لیگ کے ماتھے پر ہی لگا۔ وہ عوامی مسلم لیگ تھی یہ غالباً قیام پاکستان کے چند ماہ بعد کی بات ہے۔ ملک میں چینی اور کوئلے کی شدید قلت ہوگئی، چینی کا متبادل تو گڑ تھا لہٰذا گزارا ہوگیا اب کوئلے کا متبادل کہاں سے لایا جاتا وزارت تجارت جو آئی آئی چندریگر کی سربراہی میں کام کر رہی تھی اسے کوئلہ درآمد کرنے کا ٹاسک ملا کہ کہیں کوئلے سے چلنے والی ریل گاڑیاں ہی نہ بند ہوجائیں۔ ایسا ہوتا تو پا کستان کا سارا سرکاری نظام ہی معطل ہوجاتا۔ بہر حال یہ انتظام کرلیا گیا یوں ایک بحران سے ملک بچ گیا۔ کچھ عرصہ کے بعد سرکاری دفاتر کے لیے سامان منگوانے کا فیصلہ ہوا جس میں سینیٹری کا سامان بھی شامل تھا اس کے لیے وزیر خزانہ کی سربراہی میں وزیروں کی ایک سب کمیٹی کا اجلاس بلایا گیا جس میں اس وقت کے وزیر اطلاعات مولوی فضل الرحمن بھی شریک تھے ان کے پاس تعلیم اور داخلہ کا بھی قلم دان تھا انہوں نے تجویز دی کہ سینیٹری کا سامان منگوایا جارہا ہے تو اس میں سے کچھ سامان مشرقی پاکستان کے لیے منگوا لیا جائے۔ اس تجویز کا مذاق اڑایا گیا۔ یہ تک کہا گیا کہ مشرقی پاکستان والوں کو اس سامان کی کیا ضرورت ہے۔ وہ تو کیلوں کے درختوں کی اوٹ میں جاتے ہیں۔ مورخ لکھتے ہیں کہ گویا بنگلا دیش کے قیام کی پہلی اینٹ اسی میٹنگ میں رکھ دی گئی تھی۔
ہماری سیاسی تاریخ میں بائیس فروری 1974 کا دن ایک لمحے میں نہیں آن پہنچا تھا اس کے لیے دانستہ یا نادانستہ بلنڈر کیے گئے۔ ایوب خان کا دور بھی ہماری سیاسی تاریخ میںگزرا ہے۔ یہ 1962 کی بات ہے ایوب خان ملک کے حکمران اور اس وقت جسٹس(ر) منیر ملک کے وزیر قانون تھے، ایوب خان نے ایک تجویز دے کر انہیں ڈھاکا بھیجا، تجویز کیا تھی وہ وہاں جائیں اور مشرقی پاکستان کی سیاسی قیادت کو اس بات پر قائل کریں کہ وہ مغربی پاکستان سے الگ ہونے کی تگ و دو کریں، منیر یہ تجویز لے کر گئے لیکن مشرقی پاکستان کی سیاسی لیڈر شپ نے مسترد کردیا اور جواب دیا کہ ہم یہ کام نہیں کر سکتے آپ کو کرنا ہے تو خود یہ کام کریں۔ دیکھیے ہلکی ہلکی آنچ پر جب کوئی ہنڈیا رکھی جائے گی تو ایک دن تو اس میں اُبال آہی جاتا ہے ناں، بس یہی کچھ مشرقی پاکستان کے ساتھ بھی ہوا اس کے بعد ہی شیخ مجیب الرحمن کے چھے نکات آئے‘ ان میں ملک ٹوٹنے کی بو سب سے پہلے سید مودودی نے محسوس کی۔ 18 فروری 1966 میں ان کا بیان ریکارڈ پر ہے کہ چھے نکات میں ملک توڑنے کی سازش کی بو آرہی ہے۔
سید مودودی نے تو پہچان لیا مگر اس وقت کی آمریت چھے نکات کو نہ پہچان سکی اس وقت ملک میں جمہوریت نہیں آمریت کا دور تھا جس نے بنیادی جمہوریت کے ذریعے عوامی رنگ خودپر چڑھا رکھا تھا آج ہم بائیس فروری 2025 میں ہیں۔ اکیاون سال بعد ہم کیسے ہیں اور کہاں کھڑے ہیں؟ وہ مشرقی پاکستان ہمارے ہاتھ سے جاچکا تھا اب پانچ اگست 2024 سے واپس آنے لگا ہے اب وہاں شیخ مجیب کا نام و نشان تک مٹا دیا گیا ہے۔ اب وہاں نظام تعلیم اور نصاب تعلیم بھی بدل دیاگیا ہے۔ بھارت بھی بنگلا دیش بنانے میں پیش پیش تھا اسے ابھی سبق سکھانا باقی ہے۔ پرویز مشرف کے دور میں ہمیں ایک نائن الیون سے واسطہ پڑا تھا اور ہم پر ایک ایسا نظام مسلط ہوا کہ ہمارا نظام تعلیم ہی بدل گیا، ہمارا نصاب ہی بدل کر رکھ دیا گیا، مگر ہم نصاب تعلیم واپس
لائیں گے۔ مشرف کے نصاب تعلیم کے باعث ہی کشمیر کی تحریک آزادی نائن الیون کے اثرات کی نذر ہو ئی تھی اور ہم اب ایک ایسا وکیل ہیں جس کے پاس کوئی دلیل نہیں رہی یہ کشمیر کی کہانی ہے دوسری جانب ہم افغانستان کے ساتھ الجھے ہوئے ہیں وہاں بھارت اپنا مکمل کام دکھا رہا ہے۔ اب ہماری یہ سرحد بھی محفوظ نہیں رہی، ایک جانب بھارت مشرقی سرحد پر اور دوسری جانب وہ افغانستان میں ہمارے لیے مسائل کھڑے کر رہا ہے اور ہم بحیثیت قوم بے فکری کی نیند سو رہے ہیں۔ ہمارے خلاف ایک عالمی ایجنڈا متحرک ہے۔ جس کے نتیجے میں پوری قوم تقسیم ہے۔ ہماری پارلیمنٹ کو آگے بڑھ کر ایک کردار ادا کرنا ہے مگر انہیں تو اپنی تنخواہوں میں اضافے کی فکر تھی سو یہ کام کر لیا گیا۔ عوام کو روٹی ملے نہ ملے اس کی کسی کو پروا ہی نہیں ہے۔ آخر کیا وجہ ہے کہ اس ملک میں ان لوگوں کے لیے کوئی سزا نہیں، کوئی علامتی سزا بھی نہیں جنہوں نے ملک توڑا، اس کے لیے منصوبہ بندی کی، ماحول بنایا اور ایسے لوگوں کو تو عدالت عظمیٰ بھی کہہ دیتی ہے کہ انہیں انصاف نہیں ملا، بھٹو صاحب کے لیے عدلیہ بول پڑی، ڈاکٹر نذیر شہید کے لیے عدلیہ کب بولے گی؟ ان کے لیے عدلیہ کب بیدار ہوگی؟ ہمارے ملک کے ساتھ کس نے کب کیا کھلواڑ کیا۔ ایک بہت بڑے کالم نگار ایک ٹی وی پروگرام میں کہہ رہے تھے قیام پاکستان کے بعد مرکزی کابینہ میں متعدد وزیر غیر مسلم تھے۔ ان سے نام پوچھا تو سب سے پہلے انہوں نے آئی آئی چندری گر کا نام لیا۔ جب اس ملک میں ایسے کالم نگار ہوں گے اور تجزیہ کار ہوں گے تو ملک میں پیکا جیسے قانون تو آئیں گے۔
.ذریعہ: Jasarat News
کلیدی لفظ: مشرقی پاکستان قیام پاکستان پاکستان کے پاکستان کی بنگلا دیش اس کے لیے مسلم لیگ ملک میں تھا اس
پڑھیں:
خطے کے استحکام کا سوال
ترجمان دفتر خارجہ کا کہنا ہے کہ پاکستان نے طورخم سرحد کو صرف افغان پناہ گزینوں کی واپسی کے لیے دوبارہ کھولا ہے، جب تک صورتحال میں بہتری نہیں آتی، سرحدی مقامات کارگو ٹرکوں اور عام مسافروں کے لیے بند رہیں گے۔
اس وقت سیکڑوں افغان پناہ گزیں طورخم امیگریشن سینٹر پہنچ گئے ہیں اور امیگریشن عملہ ضروری کارروائی کے بعد انھیں افغانستان جانے کی اجازت دے رہا ہے۔ دوسری جانب وزیرِ دفاع خواجہ آصف نے افغان طالبان کے ترجمان کے گمراہ کن اور بدنیتی پر مبنی بیانات پر شدید ردِ عمل دیتے ہوئے کہا ہے کہ پاکستان اور خصوصاً خیبر پختونخوا کے عوام افغان طالبان کی سرپرستی میں جاری بھارتی پراکسیوں کی دہشت گردی سے بخوبی واقف ہیں اور اس بارے میں کوئی ابہام نہیں۔
ہم اس حقیقت سے انکار نہیں کرسکتے کہ پاکستان اور افغانستان کے درمیان کشیدگی اپنے عروج پر ہے۔ دونوں ممالک کے درمیان امن مذاکرات بار بار ناکام ہو رہے ہیں۔ جنگ کے حالات اور بڑھتی ہوئی ہلاکتوں کے درمیان، پاکستان کی وزارت خارجہ نے 6 نومبرکو جنگ بندی کے مذاکرات کے لیے اپنی توقعات کا اظہارکیا ہے۔
پاکستان اور افغانستان کے درمیان چند روز قبل ترکیہ میں امن مذاکرات ہوئے تھے، تاہم یہ مذاکرات طالبان کی ہٹ دھرمی کے باعث بری طرح ناکام رہے تھے۔ قطر اور ترکیہ کی ثالثی میں استنبول میں چار روزہ مذاکرات ہوئے لیکن وہ بے نتیجہ رہے۔
بھارت کے بعد افغانستان نے جس طرح پاکستانی سرحدوں کو پامال کیا اور پاکستانی افواج نے جوابی حملہ کر کے طالبان اور فتنہ الخوارج اور ان کی سرحدی چوکیوں کو جس طرح تباہ کیا۔ اس سے انھیں حقیقت کا خاصا ادراک ہوگیا ہے لیکن بھارتی آشیر باد، فنڈنگ، سہولت کاری صورتحال کو نارمل ہونے میں حائل ہو رہی ہے۔ افغان انڈیا گٹھ جوڑ خطے میں امن کی بجائے بدامنی کا باعث بن رہا ہے، افغان ایک سیاہ تاریخ رقم کر رہے ہیں اور یہ تاریخ اوراقوام عالم میں احسان فراموش محسن کش کے طور پر یاد رکھے جائیں گے۔
پاکستان نے 40 سالوں تک افغان مہاجرین کو پناہ دے کر کاروبار تعلیم صحت کے مواقعے فراہم کر کے انھیں اپنے شہریوں کے برابر حقوق و سہولیات مہیا کیں اور وطن عزیز میں بطور مہمان رکھا مگر ہماری مہمان نوازی کے جواب میں یہ لوگ واپس جاتے جاتے، اپنے گھروں خیموں یہاں تک مساجد کو بھی شہید کرکے جا رہے ہیں جو کہ اسلام دشمنی اور احسان فراموشی کی بد ترین مثال ہے۔
افغانوں کے انخلاء کے بعد حکومت پاکستان کو اس بات پر بھی خاص نظر رکھنی ہوگی یہ لوگ دوبارہ پاکستان واپس نہ آجائیں تو اس کے لیے ان کا ڈیجٹیل ریکارڈ بھی رکھنا ضروری ہے۔ اب افغانستان کا چترال سے نکلنے والے دریائے کنہڑکے مقام پر ڈیم بنانے کا اعلان کرنا، بھارت کا کابل میں سفارتخانہ کھولنا، ہندو بنیے سے پیسے لے کر پاکستان کے خلاف اقدامات کرنا اور بھارت کے پیسوں سے پاکستان میں من پسند شریعت کے نفاذ کے دعوے، دین اسلام ،قرآن و سنت اور اللہ کے فرمان کے منافی سرگرمیاں ہیں۔
آج افغانوں کو اپنی منفی سرگرمیوں اور شرپسندی کے بھرپور جواب کے لیے تیار رہنا ہوگا اور اسی میں پاکستان کی بقا ہے۔ گو نئی کشمکش میں پاکستان کو فوجی برتری حاصل ہے۔ پاکستان کے پاس دنیا کی نویں بڑی فوج ہے، جو جدید فضائیہ اور جوہری ہتھیاروں سے لیس ہے، وہ افغانستان کے اندر گہرائی تک حملہ کرنے کی صلاحیت رکھتی ہے، حتیٰ کہ اعلیٰ طالبان رہنماؤں کو بھی نشانہ بنا سکتی ہے۔
سوویت افغان جنگ 1979سے لے کر 1989تک جاری رہی اور اس جنگ میں پاکستان نے افغان فوج کا مکمل ساتھ دیا اور تعاون جاری رکھا جب کہ نائن الیون کے بعد افغانستان میں امریکی فوج کی پسپائی میں بھی پاکستان نے اہم کردار ادا کیا مگر اس کے بعد پاکستان پر دہشت گردانہ حملے اور دراندازیوں کا آغاز ہو گیا جو آج تک جاری ہے جب کہ پاکستان نے سفارتی احتجاج کیے، دہشت گردی اور دراندازی کے ثبوت بھی فراہم کیے، وفود کی ملاقاتیں بھی ہوتی رہیں، مگر افغانستان کی طرف سے ہمیشہ منفی رویہ اپنایا گیا۔
پاک افغان جنگ بندی اچھا عمل ہے مگر تاریخ کے مطابق افغان حکومت پر اعتبار کرنا کسی طور پر بھی خوشگوار نتائج کا حامل نہیں ہوگا۔بلوم برگ کی رپورٹ کے مطابق پاکستان دنیا کی ابھرتی معیشتوں میں دوسرے نمبر پر ہے، اس کی وسطی ایشیائی ریاستوں سے تجارت2.41 ارب ڈالر تک پہنچ چکی ہے۔ پاکستان اس وقت سی پیک کے ثمرات سے مستفید ہونے کے لیے کوشاں ہے جب کہ یہی سی پیک دنیا کو 85.9 فیصد تجارتی راستوں سے جوڑتا ہے جو براہ راست چین، وسطی ایشیاء، مشرقی وسطی اور افریقہ تک پھیل سکتا ہے، یہ بات بہت یقین سے کہی جا سکتی ہے کہ پاکستان دنیا کے طاقت کے توازن کو بدل رہا ہے، ایسے میں ہمیں دشمنوں کے بچھائے جال میں الجھنے اور پھنسنے کی بجائے اپنی اسٹرٹیجک صورتحال اور میلوں پر پھیلے قیمتی معدنی ذخائر سے فائدہ اٹھانا چاہیے۔ ہمیں نئے دروازے کھولنے چاہیں اور پیچھے مڑ کر ماضی کی طرف نہیں دیکھنا چاہیے، ماضی کے بوجھ تلے دبے رہ کر دونوں برادر ہمسایہ ممالک کو کچھ بھی حاصل نہیں ہوگا دونوں کو بداعتمادی کی فضا ختم کرنا ہوگی۔ دانش مندانہ اور پائیدار حکمت عملی سے نئے، خود مختار اور محفوظ مستقبل کی بنیاد رکھی جا سکتی ہے۔
بھارت جو پاکستان کو نقصان پہنچانے کا کوئی موقع ہاتھ سے جانے نہیں دیتا وہ دونوں ممالک کے درمیان غلط فہمیوں اور ماضی کی رنجشوں کو ابھارے گا، جب کہ وہ افغانستان میں پاکستانی سرحد کے ساتھ قونصل خانے بھی کھولنے جا رہا ہے، دہلی اور کابل کے درمیان بڑھتی قربت پاکستان کے لیے نقصان دہ ہیں، پاکستان کے افغانستان پر سب سے زیادہ احسانات ہیں ،اس لیے اسے افغانستان کے ساتھ تعلقات میں جذباتیت کی بجائے توازن کو بھی پیش نظر رکھنا ہوگا تاکہ برادر ہمسایہ ملک جس کی غذائی ضروریات کا بڑا انحصار پاکستان پر ہے، اسے دشمن کی صفوں میں شامل ہونے سے ممکنہ حد تک روکا جا سکے تاکہ ملک کو جس دہشت گردی اور بدامنی کی لہر کا سامنا ہے اس میں خاطر خواہ کمی واقع ہو سکے۔
پاکستان چاہتا ہے کہ دونوں ملکوں کے فوجی اور انٹیلی جنس نمائندے ایک مشترکہ نظام کے تحت کارروائیوں کی نگرانی کریں تاکہ کسی حملے کی صورت میں فوری ردعمل ممکن ہو، مگر افغان فریق نے اسے ’’ غیر ملکی مداخلت‘‘ قرار دے کر رد کر دیا۔
سوال یہ ہے کہ اگر افغانستان کے پاس چھپانے کو کچھ نہیں تو پھر تصدیق کے نظام سے خوف کیوں؟ دراصل طالبان حکومت داخلی طور پر منقسم ہے۔ ایک طرف وہ بین الاقوامی شناخت چاہتی ہے، دوسری طرف ٹی ٹی پی اور القاعدہ سے روابط توڑنے کے لیے تیار نہیں۔ ترکیہ اور قطر نے ثالثی کے طور پر ایک سمجھوتے کی صورت تجویز کیا کہ پہلے تکنیکی سطح پر رابطے بحال کیے جائیں، بعد میں سیاسی معاملات طے کیے جائیں۔ یہ ایک قابل عمل تجویز تھی مگر کابل کے رویے نے اس کی راہ میں بھی رکاوٹ ڈال دی۔
مذاکرات کا ایک مثبت پہلو یہ ضرور ہے کہ دونوں فریقوں نے ’’تکنیکی سطح‘‘ پر رابطے برقرار رکھنے پر اتفاق کیا۔ یعنی دروازہ مکمل طور پر بند نہیں ہوا۔ مگر اعتماد کا فقدان اتنا گہرا ہے کہ کوئی پیش رفت تبھی ممکن ہے جب کابل اپنے وعدوں کو تحریری شکل دے۔ زبانی یقین دہانیوں اور مذہبی حوالوں سے اب کوئی مسئلہ حل نہیں ہوگا۔ افغانستان کو سمجھنا ہوگا کہ خود مختاری صرف ایک ملک کا حق نہیں، ایک ذمے داری بھی ہے۔ جب اس کے علاقوں سے پاکستان پر حملے ہوں تو وہ خودمختاری نہیں، لاپرواہی کہلاتی ہے۔
پاکستان نے اپنے عوام، فوج اور سفارت کاروں کی قربانیوں سے جو امن حاصل کیا ہے، اسے کسی دوسرے ملک کی کمزوریوں کے حوالے نہیں کیا جا سکتا۔ اس تنازع میں ترکیہ اور قطرکا کردار امید کی کرن ہے۔ دونوں ممالک نہ صرف اسلامی برادری میں معتبر حیثیت رکھتے ہیں بلکہ ان کے پاس ثالثی کا عملی تجربہ بھی ہے، اگر وہ ایک مشترکہ مانیٹرنگ کمیشن کے قیام میں کامیاب ہو گئے تو شاید مستقبل قریب میں کوئی پیش رفت ممکن ہو۔ آخر میں یہ کہنا بجا ہوگا کہ استنبول مذاکرات مشکلات کا شکار ضرور ہوئے مگر انھوں نے پاکستان کے اصولی اور حقیقت پسندانہ موقف کو بین الاقوامی سطح پر واضح کر دیا۔ اسلام آباد نے ثابت کیا کہ وہ جنگ نہیں، امن چاہتا ہے۔
مگر ایسا امن جو احترامِ خود مختاری، تصدیق شدہ عمل اور دہشت گردی سے پاک ہمسائیگی پر مبنی ہو۔ افغانستان کے حکمرانوں کو فیصلہ کرنا ہے کہ وہ ماضی کے خول میں بند رہنا چاہتے ہیں یا ایک ذمے دار ریاست کے طور پر اپنے ہمسایوں کے ساتھ نئے باب کا آغاز چاہتے ہیں۔
پاکستان کا دروازہ اب بھی کھلا ہے، مگر شرط وہی ہے ’’امن کے بدلے امن۔‘‘ جنگ کبھی مسائل کا حل نہیں ہوا کرتی، پاک افغان جنگ بندی معاہدہ اچھی پیشرفت ہے، یہ معاہدہ دونوں ملکوں کے مفاد میں ہے اگر اس معاہدے پر من و عن عملدرآمد ہوجاتا ہے تو پھر دونوں ملکوں کے عوام کو دہشت گردی سے چھٹکارا حاصل ہوگا اور امن و امان کے عوض سکھ کا سانس نصیب ہوگا اور خطے میں سیاسی و معاشی استحکام بھی آئے گا۔
الیکشن کمیشن کے پاس بغیر ریفرنس کسی سینیٹر کو نا اہل کرنے کا اختیار نہیں‘ بیرسٹر گوہر