عشرہ ذوالحجہ: فضیلت و اہمیت
اشاعت کی تاریخ: 30th, May 2025 GMT
ماہِ ذوالحجہ اسلامی سال کا بارہواں اور آخری مہینہ ہے۔ اس ماہ کی بعض عبادات و اعمال کے ساتھ خاص ہونے کی بناء پر اسے اہمیت و فضیلت اور امتیازی مقام حاصل ہے۔ نیز اس کا شمار بارہ مہینوں میں سے چار حرمت و عظمت اور احترام کے حامل مہینوں میں ہوتا ہے، اور انھیں ’’اشھر حرم‘‘ بھی کہا جاتا ہے۔ جیسا کہ صحیح بخاری میں ہے، حضور ﷺ نے حجتہ الوداع کے موقع پر ارشاد فرمایا، مفہوم:
’’زمانہ اپنی اسی ہئیت اور شکل میں آگیا ہے جوا س وقت تھی جب اﷲ تعالیٰ نے آسمان اور زمین کو پیدا فرمایا تھا۔ سال بارہ مہینوں کا ہوتا ہے، ان میں سے چار مہینے حرمت کے حامل ہیں۔ تین تو مسلسل ہیں یعنی ذوالقعدہ، ذوالحجہ اور محرم اور چوتھا مہینہ رجب ہے جو جمادی الثانی اور شعبان کے درمیان ہے۔‘‘ (بخاری)
لیکن ان چار میں سے ذوالحجہ کا مقام اعلیٰ ہے۔ جیسا کہ آپ ﷺ نے ارشاد فرمایا، مفہوم: ’’ماہ رمضان تمام مہینوں کا سردار ہے اور ان میں سے سب سے زیادہ محترم و مکرم ذوالحجہ ہے۔‘‘ (شعب الایمان)
لہٰذا اس کی عزت و احترام کا تقاضا ہے کہ اس مہینے میں اﷲ کی فرماں برداری و عبادت کی طرف متوجہ ہوں اور گناہوں سے اجتناب کا اہتمام کریں۔ اس کی عظمت و فضیلت کی درج ذیل وجوہات ہیں:
٭ حج جیسی عظیم الشان عبادت اسی مہینے میں ادا کی جاتی ہے۔
٭ سنّت ابراہیمی (قربانی) کی ادائیگی اسی ماہِ مکرم میں کی جاتی ہے۔
٭ اس ماہ کے کچھ ایام میں تکبیراتِ تشریق کا ہر فرض نماز کے بعد اہتمام کیا جاتا ہے۔
٭ ماہِ ذوالحجہ میں اﷲ تعالیٰ نے عیدالاضحی جیسا پیارا اسلامی تہوار بھی رکھا ہے۔
ان امتیازات و اوصاف کی وجہ سے اگرچہ یہ پورا مہینہ عظمت و فضیلت کا حامل ہے۔ مگر اس کے ابتدائی دس دن جنہیں عشرۂ ذوالحجہ کے نام سے تعبیر کیا جاتا ہے، دیگر ایام کی نسبت زیادہ فضیلت و اہمیت رکھتے ہیں۔ قرآن مجید میں سورہ الفجر کی ابتداء میں اﷲ تعالیٰ نے قسم کھاتے ہوئے فرمایا ہے، مفہوم:
’’قسم ہے فجر کی! اور دس راتوں کی اور جفت کی اور طاق کی۔‘‘ ان تین آیات میں اﷲ تعالیٰ نے چار چیزوں کی قسم کھائی ہے۔ ان میں سے پہلی قسم فجر کی کھائی گئی ہے اور ایک قول کے مطابق اس سے مراد عیدالاضحی کے دن کی فجر ہے۔ (معارف القرآن) دوسری قسم دس راتوں کی کھائی ہے، ان سے مراد ماہ ذوالحجہ کی ابتدائی دس راتیں ہیں۔ تیسری اور چوتھی قسم جفت و طاق کی کھائی ہے، جفت سے مراد عیدالاضحی کا دن جب کہ طاق سے مراد یوم عرفہ یعنی نو ذوالحجہ ہے۔ (مسند احمد)
اﷲ تعالیٰ جب کسی چیز کی قسم کھاتے ہیں تو اس سے اس چیز کی اہمیت، عظمت و عزت کی طرف اشارہ ہوتا ہے۔ جس سے عشرہ ذوالحجہ کے ان تعلقات کی عظمت عیاں ہوتی ہے۔ اسی لیے ایک حدیث میں ان دنوں میں کیے گئے نیک اعمال کی عظمت و اہمیت کو یوں بیان کیا ہے، حضور ﷺ نے فرمایا، مفہوم: ’’اﷲ تعالیٰ کے نزدیک (ماہ ذوالحجہ کے) ان دس دنوں میں کیا گیا نیک عمل دیگر ایام میں کیے گئے نیک عمل کے مقابلے میں زیادہ پاکیزہ و عظمت والا ہے۔
صحابہؓ نے عرض کیا: اے اﷲ کے رسول ﷺ! کیا دیگر دنوں میں جہاد کرنا بھی ان دس دنوں کے نیک عمل سے افضل نہیں ؟ تو آپ ﷺ نے فرمایا: جی ہاں! دیگر دنوں کا جہاد بھی ان دس دنوں کے عمل سے افضل نہیں ہے۔ البتہ وہ شخص جو اپنی جان اور مال لے کر جہاد میں چلا جائے اور جان و مال کو اﷲ کی راہ میں قربان کردے اور ان میں سے کچھ بھی واپس نہ لوٹے۔‘‘ (تو اس شخص کا جہاد ان دس دنوں کے نیک عمل سے افضل ہوجاتا ہے) (ابوداؤد)
راوی کہتے ہیں کہ حضرت سعید بن جبیرؓ ان دس دنوں میں عبادات میں بہت زیادہ جدوجہد فرماتے حتیٰ کہ یہ ان کے لیے مشکل ہوجاتی۔ ایک حدیث مبارکہ میں ان دنوں کے نیک اعمال کی وضاحت بھی کی گئی ہے۔ حضور نبی کریم ﷺ نے ارشاد فرمایا، مفہوم: ’’اﷲ تعالیٰ کے نزدیک ان دس دنوں میں کیا گیا نیک عمل دیگر دنوں کی بہ نسبت زیادہ محبوب و عظمت والا ہے۔ اس لیے ان ایام میں تہلیل (لاالہ الااﷲ) تحمید (الحمدﷲ) اور تکبیر (اﷲ اکبر) کی کثرت کیا کرو۔‘‘ (مسند احمد) سنن ترمذی کی روایت میں ہے، مفہوم: ’’ذوالحجہ کے ان دس دنوں میں سے ہر دن (سوائے ایام عید کے) کے روزے کا اجر ایک سال کے روزوں کے برابر ہے۔ جب کہ ہر رات کی عبادت کا اجر شب قدر کی عبادت کے برابر ہے۔‘‘ (ترمذی) اس روایت پر کلام کے باوجود اہل علم نے اسے فضائل کے باب میں قبول کیا ہے۔
ماہِ ذوالحجہ کے ان دس ایام میں نو ذوالحجہ یعنی یوم عرفہ کو خاص فضیلت و اہمیت حاصل ہے، اسی دن حجاج کرام حج کا عظیم رکن وقوف عرفہ ادا فرماتے ہیں۔
صحیح مسلم ہی کی روایت میں ہے کہ حضور اکرم ﷺ سے یوم عرفہ کے روزے کی فضیلت کے بارے میں پوچھا گیا تو حضور ﷺ نے فرمایا، مفہوم: ’’اس سے اگلے اور پچھلے ایک ایک سال کے (صغیرہ) گناہ معاف ہوجاتے ہیں۔‘‘ (صحیح مسلم) بعض روایات میں ہے کہ یوم عرفہ کے روزے کا اجر دو سال کے روزوں کے برابر ہے۔ (المعجم الکبیر) واضح رہے کہ ہر ملک میں یوم عرفہ اسی دن ہوگا جس دن وہاں ذوالحجہ کی نو تاریخ ہوگی۔ اس تفصیل سے واضح ہوتا ہے کہ ماہِ ذوالحجہ میں نوافل، ذکر، تسبیحات، تلاوت، روزے، صدقات اور دیگر عبادات کا اہتمام کرنا چاہیے۔ البتہ یہ یاد رہے کہ عشرہ ذوالحجہ میں روزے یوم عرفہ تک ہیں، عیدالاضحی اور اس کے بعد کے تین دن روزہ رکھنا جائز نہیں ہے۔
(دارِقطنی) ان ایام میں ذوالحجہ کا چاند نظر آنے کے بعد سے قربانی کرنے تک اپنے بال اور ناخن نہ کاٹنا مستحب ہے۔ (ردالمحتار و صحیح مسلم) عیدالاضحی کی رات بھی فضیلت و برکت سے معمور نعمت ہے۔ جیسا کہ حضرت ابوامامہ ؓ کی روایت میں ہے، مفہوم: ’’جو شخص عیدین (عیدالفطر و عیدالاضحی) کی راتوں میں ثواب کی نیّت سے عبادت کے لیے قیام کرے، اس کا دل اس دن مردہ نہ ہوگا جس دن بہت سے دل مردہ ہوجائیں گے۔‘‘
(سنن ابن ماجہ) اس کا مطلب محدثین نے یہ بھی بیان کیا ہے کہ اﷲ تعالیٰ اسے بُری موت سے محفوظ رکھیں گے اور ایمان کی موت عطا کریں گے۔ نیز حضرت معاذ بن جبلؓ سے مروی ہے۔ مفہوم: آپ ﷺ نے فرمایا: ’’جو شخص چار راتوں کو عبادت کے ذریعے زندہ رکھے اس کے لیے جنت واجب ہوگئی ترویہ کی رات، عرفہ کی رات، قربانی (عیدالاضحی) کی رات اور عیدالفطر کی رات۔‘‘ (الترغیب و الترہیب) ان چار میں سے تین راتیں عشرہ ذوالحجہ میں پائی جاتی ہیں۔ یعنی آٹھویں، نویں اور دسویں جن کی عبادت پر جنّت کی بشارت سرور دو جہاں ﷺ کی زبان اطہر سے منقول ہے۔
اس ماہِ مکرم میں حج و قربانی جیسی عظیم عبادات کے ساتھ ایک اہم عبادت تکبیرات تشریق بھی ہے، جس سے اﷲ تعالیٰ کی عظمت اور بڑائی کا بہ خوبی اظہار ہوتا ہے۔ اور اﷲ تعالیٰ کی کبریائی و محبّت بھی دلوں میں اجاگر ہوتی ہے۔ لہٰذا ہر فرض نما ز کے بعد اس کے یہ الفاظ پڑھے جاتے ہیں: ’’اﷲاکبر، اﷲاکبر، لاالہ الااﷲ و اﷲاکبر، اﷲ اکبر و ﷲالحمد۔‘‘ (مصنف ابن ابی شیبہ) مرد حضرات ایک مرتبہ بلند آواز سے جب کہ خواتین آہستہ آواز سے پڑھیں گی۔ (فتاویٰ عالمگیری) یہ نو ذوالحجہ کی فجر سے شروع ہوتی ہیں اور تیرہ ذوالحجہ کی عصر تک پڑھی جائیں گی۔
عیدالاضحی کے دن کا خاص و مہتم بالشان عمل قربانی کرنا ہے۔ جس کے متعلق سنن ترمذی میں ارشاد ہے، مفہوم: ’’ قربانی کے دن اﷲ تعالیٰ کے نزدیک آدمی کا کوئی بھی عمل قربانی کا خون بہانے سے زیادہ پسندیدہ نہیں، قیامت کے دن قربانی کا جانور اپنے بالوں، سینگوں اور کھروں کو لے کر آئے گا۔ اور قربانی کا خون زمین پر گرنے سے پہلے یہ اﷲ کے ہاں مقبول ہوجاتی ہے۔ اس لیے تم خوشی خوشی قربانی کیا کرو۔‘‘ (سنن ترمذی)
ان فضائل و برکات سے اس ماہ کی عظمت اور عشرۂ ذوالحجہ کی فضیلت واضح ہوتی ہے۔ لہٰذا رضائیِ رب کریم کے حصول اور آخرت کی نعمتوں کو سمیٹنے کی غرض سے ان ایام میں رجوع الیٰ اﷲ خوش بختی کا سامان ہے۔
اﷲ تعالیٰ ہم سب کو اس ماہِ مکرم کی برکات سے بھرپور استفادہ کی توفیق عطا فرمائے۔ آمین
.ذریعہ: Express News
کلیدی لفظ: عشرہ ذوالحجہ ﷺ نے فرمایا ذوالحجہ میں ذوالحجہ کے ذوالحجہ کی اﷲ تعالی ایام میں یوم عرفہ دنوں کے ہوتا ہے نیک عمل کی عظمت کی رات میں ہے میں کی کے بعد اس ماہ
پڑھیں:
میری ٹائم ایکسپو اینڈ کانفرنس نہایت اہمیت کی حامل ہے: وائس ایڈمرل فیصل عباسی
پاکستان انٹرنیشنل میری ٹائم ایکسپو اینڈ کانفرنس 2025 کی میڈیا بریف کراچی ایکسپو سینٹر میں منعقد ہوئی۔ اس موقع پر کمانڈر کراچی وائس ایڈمرل محمد فیصل عباسی نے میڈیا کو ایونٹ کی تفصیلات سے آگاہ کیا۔
میڈیا سے گفتگو کرتے ہوئے کمانڈر کراچی وائس ایڈمرل محمد فیصل عباسی نے بتایا کہ پاکستان انٹرنیشنل میری ٹائم ایکسپو اینڈ کانفرنس کا دوسرا ایڈیشن 3 سے 6 نومبر 2025 تک کراچی ایکسپو سینٹر میں منعقد ہوگا۔
یہ بھی پڑھیں: میری ٹائم شعبے میں بے پناہ مواقع موجود ہیں، ہمیں ان سے فائدہ اٹھانا چاہیے، وزیر اعظم
انہوں نے کہا کہ یہ نمائش پاکستان کی بلیو اکانومی کے فروغ میں سنگِ میل کی حیثیت رکھتی ہے، اور اس ایونٹ میں دنیا کے قریباً تمام خطوں کے نمائندے شریک ہوں گے۔
وائس ایڈمرل محمد فیصل عباسی نے مزید بتایا کہ نمائش میں دنیا بھر سے 178 نمائش کنندگان حصہ لیں گے، جن میں 28 بین الاقوامی ادارے اور 150 مقامی ادارے شامل ہیں۔ مزید برآں، یورپ، ایشیا، شمالی و جنوبی امریکا اور مشرق بعید سے تعلق رکھنے والے 133 بین الاقوامی وفود بھی اس تقریب میں شرکت کریں گے۔
انہوں نے بتایا کہ ان وفود میں برطانیہ، اٹلی، ایران، تُرکیہ، سعودیہ، آسٹریلیا، مصر اور چین سمیت 44 ممالک کے نمائندے شامل ہیں ۔
انہوں نے اس بات پر بھی روشنی ڈالی کہ مقامی نمائش کنندگان کے ساتھ ساتھ صوبہ سندھ اور بلوچستان کی حکومتوں کے پویلین بھی نمائش میں موجود ہوں گے جن کا مقصد ملکی بحری شعبے میں سرمایہ کاری کو فروغ دینا ہے۔
کمانڈر کراچی نے میڈیا کے کردار کو سراہتے ہوئے اس اعتماد کا اظہار کیاکہ میڈیا حسبِ روایت اس اہم قومی ایونٹ کی بھرپور تشہیر میں اپنا مؤثر کردار ادا کرے گا۔
انہوں نے بتایا کہ پاکستان انٹرنیشنل میری ٹائم ایکسپو اینڈ کانفرنس 25 میں میری ٹائم کے مختلف شعبوں کی نمائش کے ساتھ ساتھ بی ٹو بی اور بی ٹو جی ملاقاتیں، اور مفاہمتی یادداشتوں پر دستخط شامل ہوں گے۔
ان کا کہنا تھا کہ ان اعلیٰ سطحی ملاقاتوں کا مقصد غیر ملکی مندوبین، سرکاری حکام، اور بحری صنعت سے وابستہ اسٹیک ہولڈرز کے مابین تعاون کو فروغ دینا اور بندرگاہوں، شپنگ، ماہی گیری، اور ساحلی ترقی جیسے اہم شعبوں میں شراکت داری کو مضبوط بنانا ہے۔
کمانڈر کراچی نے مزید کہاکہ نمائش کے ساتھ ساتھ انٹرنیشنل میری ٹائم کانفرنس بھی منعقد کی جائے گی، جو 4 تا 5 نومبر 2025 تک دو روزہ پروگرام کے طور پر نیشنل انسٹیٹیوٹ آف میری ٹائم افیئرز کے زیرِ انتظام منعقد کی جائے گی۔
مزید پڑھیں: پاکستانی بندرگاہوں پرمیری ٹائم سیکیورٹی ہائی الرٹ
’اس کانفرنس کا موضوع ’پائیدار ترقی کے لیے بلیو اکانومی کی صلاحیتوں سے استفادہ‘ ہے، جس میں چار سیشنز کے دوران ممتاز قومی و بین الاقوامی ماہرین اور اسکالرز کی جانب سے 14 تحقیقی مقالے پیش کیے جائیں گے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
wenews پریس بریفنگ میری ٹائم ایکسپو وائس ایڈمرل فیصل عباسی وی نیوز
ترکیہ برطانیہ سے 20 یورو فائٹر طیارے خریدے گا، معاہدے طے