ترقیاتی بجٹ پر آئی ایم ایف کا سایہ منڈلانے لگا، وفاق کی اسکیموں میں بڑی کٹوتیاں
اشاعت کی تاریخ: 3rd, June 2025 GMT
اسلام آباد(نیوز ڈیسک) بین الاقوامی مالیاتی فنڈ (آئی ایم ایف) کی سخت نگرانی میں آئندہ مالی سال کے وفاقی ترقیاتی پروگرام میں تقریباً تمام شعبوں کے لیے فنڈز میں کٹوتی کی گئی ہے، تاہم سڑکوں کی تعمیر کے منصوبوں میں اضافے اور ارکان پارلیمنٹ کی اسکیموں میں کوئی تبدیلی نہیں ہوئی۔
نجی چینل کی رپورٹ کے مطابق اینول پلاننگ کوآرڈینیشن کمیٹی (اے پی سی سی) نے ریکارڈ 4 ہزار 83 ارب روپے مالیت کے قومی ترقیاتی پروگرام کی منظوری دی، یہ رقم پنجاب اور سندھ کی معاونت سے ممکن ہوئی، جن کے پاس مرکز کے مقابلے میں زیادہ مالی طاقت ہے، کیوں کہ مرکز مالیاتی خودمختاری، قرضوں کی ادائیگی اور سیکیورٹی ضروریات کی وجہ سے مالی مسائل کا شکار ہے۔
اس خرچ کی بنیاد پر حکومت نے آئندہ سال کے لیے شرح نمو کا ہدف 4.
وفاقی وزیر منصوبہ بندی اور ترقیات احسن اقبال کی زیر صدارت اجلاس میں مالی مشکلات پر کھل کر بات کی گئی، اور صوبائی نمائندوں سے کہا گیا کہ وہ اپنی قیادت کو قائل کریں کہ اب وفاقی فنڈز کا مطالبہ نہ کریں، کیوں کہ ان کے اپنے مالی وسائل خاصے بڑھ چکے ہیں۔
انہوں نے کہا کہ پاکستان کو آئی ایم ایف پروگرام کے تحت کچھ حدود کا سامنا ہے، لہٰذا اصل چیلنج یہ ہے کہ محدود وسائل سے زیادہ سے زیادہ نتائج حاصل کیے جائیں، تاکہ قومی اقتصادی تبدیلی کے منصوبے ”5Es“ پر مبنی 5 سالہ منصوبہ، اور ’اُڑان پاکستان پروگرام‘ کے اہداف پورے کیے جا سکیں۔
تاہم صوبوں نے عندیہ دیا کہ مرکز اور آئی ایم ایف کے ساتھ قومی مالیاتی معاہدے کے تحت وعدہ کیا گیا سرپلس ممکنہ طور پر فراہم نہیں کر سکیں گے، کیوں کہ فیڈرل بورڈ آف ریونیو (ایف بی آر) کی جانب سے 1 ہزار ارب روپے سے زائد کی ریونیو کمی سے ان کے حصے بھی متاثر ہوئے ہیں۔
ان مسائل کے پیش نظر اے پی سی سی نے فیصلہ کیا کہ آئی ایم ایف پروگرام کی تکمیل تک مختلف وزارتوں اور ڈویژنوں کی ڈپارٹمنٹل ڈیولپمنٹ ورکنگ پارٹیز (ڈی ڈی ڈبلیو پیز) کی جانب سے نئی ترقیاتی اسکیموں کی منظوری پر مکمل پابندی ہوگی۔
وزارت منصوبہ بندی نے کہا کہ پالیسی فیصلہ کیا گیا ہے کہ ڈی ڈی ڈبلیو پی سطح کی اسکیموں کی منظوری پر آئی ایم ایف پروگرام کی تکمیل تک پابندی ہو تاکہ توجہ قومی سطح کے بڑے اور غیرملکی امدادی منصوبوں پر مرکوز کی جا سکے، اس اقدام سے مالیاتی نظم و ضبط قائم رہے گا، مستقبل کی مالی ذمہ داریاں کم ہوں گی، اور پانی و ٹرانسپورٹ جیسے اہم شعبوں پر توجہ دی جا سکے گی۔
اجلاس میں کہا گیا کہ اسی لیے حکومت نے آئندہ مالی سال کے لیے پبلک سیکٹر ڈیولپمنٹ پروگرام (پی ایس ڈی پی) کے لیے 880 ارب روپے مختص کیے ہیں، جو رواں مالی سال کے نظرثانی شدہ ایک ہزار 100 ارب روپے کے مقابلے میں 20 فیصد اور اصل بجٹ ایک ہزار 400 ارب روپے کے مقابلے میں 37 فیصد کم ہے، تاہم حکومت نے پی ایس ڈی پی کا ہدف ایک ہزار ارب روپے رکھا ہے، جس میں وزیراعظم کی جانب سے گزشتہ ماہ نافذ کردہ پیٹرولیم لیوی سے بلوچستان میں این 25 ہائی وے کے لیے 120 ارب روپے بھی شامل کیے گئے ہیں۔
ارکان پارلیمنٹ کیلئے کم رقوم مختص کی گئیں
تمام مشکلات کے باوجود، حکومت نے ارکان پارلیمنٹ کی اسکیموں کے لیے 50 ارب روپے مختص کیے ہیں، جو رواں مالی سال کے برابر ہے، ضم شدہ اضلاع کے لیے بھی رقم 70 ارب روپے پر برقرار رکھی گئی ہے، صرف ٹرانسپورٹ اور مواصلات کے شعبے کے لیے رقم بڑھا کر 332 ارب روپے کر دی گئی، جو رواں مالی سال 268 ارب روپے تھی۔
دیگر تمام شعبوں، بشمول آزاد کشمیر اور گلگت بلتستان جیسے خصوصی علاقوں کے لیے فنڈز کم کیے گئے ہیں۔
انفرااسٹرکچر شعبے کو 644 ارب روپے ملیں گے، جو رواں سال کے 661 ارب سے کم ہیں، توانائی کے شعبے کی مختص رقم 169 ارب سے کم ہو کر 144 ارب روپے کر دی گئی، بھارت کی جارحانہ کارروائیوں کے باوجود پانی کے شعبے کے لیے فنڈز 135 ارب سے کم کرکے 109 ارب روپے کر دیے گئے۔
فزیکل پلاننگ اور ہاؤسنگ کی رقم 89 ارب سے کم کرکے 59 ارب (34 فیصد کم)، سماجی شعبے کو 200 ارب کے بجائے 150 ارب روپے ملیں گے (یعنی 25 فیصد کم) آزاد کشمیر اور گلگت بلتستان کے لیے مختص رقم 75 ارب سے کم کرکے 63 ارب روپے (16 فیصد کم) کردی گئی۔
اسی طرح سائنس و ٹیکنالوجی کے لیے 62 ارب کے بجائے 53 ارب روپے، گورننس سے متعلق منصوبے کے لیے 17 ارب سے کم ہوکر 9 ارب، پیداواری شعبوں کے لیے رقم 15 ارب سے کم کرکے 11 ارب کر دی گئی ہے، زرعی شعبے کی مختص رقم صرف 3 ارب رہ گئی ہے، جو گزشتہ سال 8 ارب تھی۔
صوبوں کے ترقیاتی منصوبے
چاروں صوبے مجموعی طور پر تقریباً 2 ہزار 795 ارب روپے خرچ کریں گے، جن میں پنجاب کا حصہ ایک ہزار 188 ارب، سندھ کا 888 ارب (جو بعد میں 1 ہزار ارب ہو سکتا ہے)، خیبر پختونخوا کا 440 ارب اور بلوچستان کا 280 ارب روپے ہے۔
وفاقی ادارے بھی مجموعی طور پر 288 ارب روپے کی سرمایہ کاری کریں گے، جس سے کل ترقیاتی اخراجات 4 ہزار 83 ارب روپے تک پہنچ جائیں گے، یہ پچھلے سال کے مقابلے میں تقریباً 21 فیصد زیادہ ہیں، لیکن اس کا بڑا حصہ صوبوں کے بڑھتے ہوئے بجٹ کی وجہ سے ہے۔
محدود مالی وسائل
وفاقی وزیرِ منصوبہ بندی احسن اقبال نے کہا کہ محدود مالی وسائل اور مسابقتی ترجیحات کے باوجود حکومت ترقیاتی رفتار کو برقرار رکھنے کے لیے وسائل کی اسٹرٹیجک تقسیم، کارکردگی پر مبنی منصوبہ بندی، اور صوبوں کے ساتھ تعاون بڑھانے پر زور دے رہی ہے، حکومت کا وژن ہے کہ پاکستان کو 2035 تک ایک ہزار ارب ڈالر اور 2047 تک 3 ہزار ارب ڈالر کی معیشت بنایا جائے۔
31 مئی تک ایک ہزار 36 ارب روپے کی منظوری دی گئی، جب کہ 596 ارب روپے خرچ کیے گئے، پی ایس ڈی پی میں شامل منصوبوں کی مجموعی منظوری شدہ لاگت 13 ہزار 427 ارب روپے ہے، جب کہ مستقبل کی مالی ذمہ داریاں 10 ہزار 216 ارب روپے ہیں، جس کی وجہ سے منصوبوں کو ترجیح دینے کا عمل روکنا ناگزیر ہو چکا ہے۔
ایک ہزار ارب روپے کے پی ایس ڈی پی میں 270 ارب روپے کی غیرملکی امداد شامل ہے، جس میں دیامر بھاشا ڈیم اور 26-2025 میں حیدرآباد–سکھر موٹروے کی تعمیر کو ترجیح دی گئی ہے۔
وفاقی وزیر احسن اقبال نے کم ترجیحی منصوبوں کے بارے میں کہا کہ حکومت نے ایک ہزار ارب روپے مالیت کے 118 منصوبوں کی نشاندہی کی ہے، جنہیں وسائل کی بچت کے لیے مؤخر یا ختم کیا جا سکتا ہے۔
یو اے ای کا ویزا کیسے حاصل کیا جائے؟ آسان نیا طریقہ سامنے آگیا
ذریعہ: Daily Ausaf
کلیدی لفظ: ارب سے کم کرکے ہزار ارب روپے کے مقابلے میں ایک ہزار ارب پی ایس ڈی پی آئی ایم ایف مالی سال کے کی اسکیموں کی منظوری حکومت نے صوبوں کے کے شعبے فیصد کم جو رواں کہا کہ گئی ہے کی گئی کے لیے
پڑھیں:
پنجاب میں جنگلی حیات کے غیرقانونی شکار پر جرمانے بھی بڑھا دیے گئے
لاہور:پنجاب حکومت نے صوبے میں جنگلی حیات کے تحفظ اور انسانی آبادیوں کو ممکنہ خطرات سے محفوظ رکھنے کے لیے جنگلی جانوروں کے نظم و نسق سے متعلق دو اہم اقدامات کیے ہیں۔
اس سلسلے میں ایک طرف ’’پنجاب وائلڈ لائف ہیزرڈ کنٹرول رولز 2025‘‘ نافذ کیا گیا ہے، تو دوسری جانب جنگلی حیات کے تحفظ سے متعلق قوانین میں کئی ترامیم منظور کی گئی ہیں، جن کے ذریعے صوبے میں تحفظِ ماحول اور حیاتیاتی تنوع کے نظام کو جدید خطوط پر استوار کیا جا رہا ہے۔
سرکاری اعلامیے کے مطابق نئے قواعد کا مقصد انسانوں اور جنگلی جانوروں کے درمیان تصادم یا خطرے کی صورت میں سائنسی، منظم اور فوری کارروائی کو ممکن بنانا ہے۔ اگر کوئی جنگلی جانور انسانی جان یا دیگر جانداروں کے لیے خطرہ بن جائے، یا کسی بیماری یا چوٹ کے باعث زندہ رہنے کے قابل نہ ہو، تو چیف وائلڈ لائف رینجر فیلڈ رپورٹ، سائنسی شواہد اور عوامی شکایات کی بنیاد پر کارروائی کا حکم دے سکتا ہے۔
ہنگامی حالات میں رینجر متعلقہ ماہرین سے مشورہ کرکے اس جانور کو قابو میں لانے، منتقل کرنے یا ہٹانے کا فیصلہ کر سکے گا۔
قواعد میں واضح کیا گیا ہے کہ ہر ایسی کارروائی سے قبل پنجاب کیپٹیو وائلڈ لائف مینجمنٹ کمیٹی اور ویٹرنری ماہرین سے مشاورت لازم ہوگی تاکہ تمام اقدامات انسانی اصولوں اور سائنسی معیار کے مطابق ہوں۔ اس کے ساتھ مستقبل میں ایسے خطرات سے بچاؤ کے لیے ایک جامع حکمتِ عملی بھی تیار کی گئی ہے، جس کے تحت کسی نوع کو نقصان دہ یا ’’پیسٹ‘‘ قرار دیا جا سکے گا۔
بعض علاقوں میں محدود مدت کے لیے شکار کے خصوصی اجازت نامے جاری کیے جا سکیں گے، جبکہ حساس مقامات کو ’’وائلڈ لائف ہیزرڈ زون‘‘ قرار دے کر وہاں جانوروں کو کھلانے یا پالنے پر پابندی عائد کی جا سکے گی۔
نئے قواعد میں غیر ملکی انواع کو ان کے آبائی علاقوں میں واپس بھیجنے اور مقامی انواع کو ان کے قدرتی مسکن میں دوبارہ متعارف کرانے کی گنجائش بھی شامل ہے۔ خطرناک جانوروں کی منتقلی یا قابو پانے میں معاونت کرنے والے افراد اور اداروں کو سرکاری شرح کے مطابق انعامات دیے جائیں گے۔
علاوہ ازیں، پنجاب حکومت نے جنگلی حیات کے تحفظ سے متعلق قوانین میں ترامیم کرتے ہوئے جرائم کے مالی جرمانوں میں نمایاں اضافہ کر دیا ہے۔ شاہین سمیت نایاب اور شکاری پرندوں کے غیر قانونی شکار یا قبضے پر مکمل پابندی عائد کر دی گئی ہے۔
وائلڈ لائف کے ترمیم شدہ قانون کے تحت فرسٹ شیڈول میں شامل بعض جنگلی پرندوں کے غیرقانونی شکار یا پکڑنے کا فی جانور معاوضہ 10 ہزار روپے ہوگا۔ باز، ہریڑ، لگر اور الو کا معاوضہ ایک لاکھ روپے، شیڈول دوئم اور سوئم میں شامل ممالیہ جانوروں کے غیر قانونی شکار یا پکڑنے کا محکمانہ معاوضہ ایک لاکھ روپے ہوگا۔ گیدڑ، سور، جنگلی سور کا محکمانہ معاضہ 25 ہزار روپے ہوگی۔
اسی طرح غیرقانونی شکار میں استعمال ہونے والے اسلحے کا جرمانہ شارٹ گن 25 ہزار، غیر ملکی شارٹ گن 50 ہزار، مقامی رائفلز 50 ہزار، غیر ملکی رائفل ایک لاکھ روپے، پی سی پی ائیر گن 50 روپے۔ غیرقانونی شکار میں استعمال ہونے والی جیپ، گاڑی کا جرمانہ 5 لاکھ روپے، موٹر سائیکل کا جرمانہ ایک لاکھ، سائیکل 25 ہزار، کشتی کا 25 ہزار، ٹیپ ریکارڈ اور دیگر برقی آلات کا جرمانہ 25 ہزار روپے ہوگا۔
نئی ترامیم کے تحت اعزازی گیم وارڈن کے عہدے ختم کر دیے گئے ہیں، جبکہ کمیونٹی بیسڈ کنزروینسی کے ارکان کو اب باقاعدہ قانونی اختیار حاصل ہوگا کہ وہ غیر قانونی شکار یا تجارت کی روک تھام میں مدد دے سکیں۔
شکار، بریڈنگ اور خرید و فروخت کے اجازت ناموں کی نیلامی کے لیے ڈیجیٹل پلیٹ فارم متعارف کرایا جائے گا۔ اسی طرح کتوں کی دوڑ کے مقابلوں میں زندہ خرگوشوں کے استعمال پر مکمل پابندی لگا دی گئی ہے اور صرف مشینی چارے کی اجازت دی گئی ہے۔
نئے قانون کے مطابق صوبے بھر میں خصوصی وائلڈ لائف پروٹیکشن سینٹرز قائم کیے جائیں گے جہاں عملہ جدید ہتھیاروں اور آلات سے لیس ہوگا۔ ان اہلکاروں کو وارنٹ کے بغیر تلاشی لینے اور گرفتاری کا اختیار بھی حاصل ہوگا تاکہ جنگلی حیات کے تحفظ سے متعلق قوانین پر مؤثر عمل درآمد یقینی بنایا جا سکے۔
محبت، بلیک میلنگ اور قتل، خوفناک واردات کی تفصیل سامنے آگئی