کیا ہانیہ عامر کو ’’سردار جی 3‘‘ سے مصنوعی ذہانت سے ہٹایا جائے گا؟
اشاعت کی تاریخ: 25th, June 2025 GMT
بھارتی فلم انڈسٹری کی تازہ بحث کا مرکز بننے والی فلم سردار جی 3 ایک نئے تنازعے کی زد میں ہے، جہاں پاکستانی اداکارہ ہانیہ عامر کو مبینہ طور پر آرٹیفیشل انٹیلیجنس (AI) سے تبدیل کرنے کی اطلاعات نے شائقین کو چونکا دیا ہے۔
بھارت میں پاکستانی فنکاروں پر پابندی کے بعد یہ خبر ایک افواہ کے طور پر سامنے آئی، لیکن تیزی سے آن لائن فضا میں پھیلتی چلی گئی۔
فلم کے ہیرو دلجیت دوسانجھ، جو اپنی نرم مزاجی اور فنکارانہ صلاحیتوں کے باعث دونوں ملکوں میں خاصے مقبول تھے، اس وقت بھارت میں تنقید کی زد پر ہیں۔ جس کی وجہ پاکستان سے اُن کی قربت، خصوصاً ہانیہ عامر کے ساتھ اُن کا کام ہے۔ جہاں پاکستان میں دلجیت کو ہیرو سمجھا جا رہا ہے، وہیں بھارت میں ان کے خلاف نفرت انگیز مہم چل رہی ہے۔
بھارتی حکومت کی جانب سے پاکستانی فنکاروں پر کام کرنے کی پابندی کے بعد رواں برس متعدد فلموں کو روک دیا گیا، جن میں سب سے پہلے فواد خان کی فلم عبیر گلال کو شیلف کر دیا گیا۔ توقع کی جا رہی تھی کہ سردار جی 3 کا انجام بھی یہی ہو گا، لیکن 22 جون کو جب فلم کا ٹریلر ریلیز ہوا تو ان تمام قیاس آرائیوں کو جھٹلا دیا گیا۔ ٹریلر میں نہ صرف ہانیہ عامر کے سینز شامل تھے، بلکہ وہ مرکزی کرداروں میں نمایاں نظر آئیں۔
دلجیت دوسانجھ نے دباؤ کے باوجود فلم کو اوورسیز میں ریلیز کرنے کا فیصلہ کیا، لیکن بھارت میں ان کی حمایت کرنے والے ساتھی فنکاروں نے مکمل خاموشی اختیار کر لی۔ نہ کسی نے ٹریلر شیئر کیا، نہ کوئی تبصرہ سامنے آیا۔ اس سے اندازہ لگایا جا سکتا ہے کہ دلجیت اس وقت انڈسٹری میں تنہا کھڑے ہیں۔
دلجیت کی اس ’جرأت‘ پر بھارتی سوشل میڈیا دو حصوں میں بٹ چکا ہے۔ ایک طرف میکا سنگھ اور بی پراک جیسے نامور فنکار تنقید کر رہے ہیں، تو دوسری جانب فلم اور دلجیت کے بائیکاٹ کی مہم بھی زور پکڑ رہی ہے۔
سب سے دلچسپ موڑ وہ ہے جہاں بھارتی میڈیا نے دعویٰ کیا کہ ہانیہ کے سینز کسی بھارتی اداکارہ سے دوبارہ شوٹ کرائے جائیں گے۔ جب ٹریلر میں ہانیہ کی موجودگی نے اس دعوے کو غلط ثابت کیا، تو اب نئی چہ مگوئیاں جنم لے رہی ہیں: کیا ہانیہ کو AI کے ذریعے فلم میں برقرار رکھا جائے گا؟ یعنی ان کے چہرے پر کسی اور کا چہرہ لگا دیا جائے گا تاکہ فلم بھارت میں ریلیز کی جا سکے۔
یہ قیاس آرائیاں اپنی جگہ، لیکن فلم کے پروڈیوسرز اور دلجیت دوسانجھ کی جانب سے ابھی تک کوئی تصدیق یا تردید سامنے نہیں آئی۔ ایسے میں سچ کیا ہے اور افواہ کیا، یہ جاننے کے لیے شاید مداحوں کو فلم کی ریلیز تک انتظار کرنا پڑے گا۔
یاد رہے کہ سردار جی 3 کو 27 جون کو اوورسیز شائقین کے لیے ریلیز کیا جا رہا ہے، اور ہانیہ عامر کے پاکستانی فینز اس لمحے کے لیے خاصے پُرجوش ہیں۔
Post Views: 5.ذریعہ: Daily Mumtaz
کلیدی لفظ: ہانیہ عامر بھارت میں
پڑھیں:
مصنوعی میٹھے سے یادداشت اور توجہ کو لاحق پوشیدہ خطرات
ایک حالیہ تحقیق کے مطابق ڈائٹ مشروبات اور شوگر فری گم میں پائی جانے والی کم یا زیرو کیلوری مٹھاس کے زیادہ استعمال سے یادداشت اور ذہنی صلاحیتوں میں تیزی سے کمی ہو سکتی ہے، جس سے طویل مدت میں اس کے اثرات پر سوالات پیدا ہونا شروع ہو گئے ہیں۔یہ تحقیق برازیل کی سائو پالو یونیورسٹی (Sao Paulo University)کے سائنسدانوں نے کی، جس میں آٹھ سال کے دوران 12 ہزار سے زائد بالغ افراد پر تحقیق کی گئی، یہ ایک وسیع تحقیقی منصوبہ ''برازیلی لمبی مدت بالغ صحت کا مطالعہ ''کے تحت ہوا، اور اسے علمی جریدے Neurology میں شائع کیا گیا۔
محققین نے تمام شرکاء، جو کم از کم 35 سال کے تھے، ان سے ان کی غذائی عادات کے بارے میں تفصیلی سوالات کیے اور ان کے سات مختلف قسم کے مصنوعی مٹھاس، جیسے اسپارٹیم (Aspartame)، سکیرین (Saccharin)، ایریٹھرٹول (Erythritol)، زائیلٹول (Xylitol) اور دیگر کے استعمال کی مقدار معلوم کی۔شرکاء کا روزانہ ان مصنوعی مٹھاس کا اوسط استعمال تقریباً 92 ملی گرام تھا۔ تحقیق سے معلوم ہوا کہ 60 سال سے کم عمر افراد میں مصنوعی مٹھاس کے زیادہ استعمال سے دماغی افعال، خاص طور پر زبانی روانی اور عمومی ادراکی صلاحیتوں (یادداشت، توجہ اور مسئلہ حل کرنے کی صلاحیت) میں تیزی سے کمی واقع ہوتی ہے۔جبکہ بڑی عمر کے افراد (60 سال اور اس سے زائد) میں، مصنوعی مٹھاس کے استعمال اور دماغی صلاحیتوں میں وقت کے ساتھ تبدیلی کے درمیان کوئی واضح تعلق ظاہر نہیں ہوا۔چاہے ذیابیطس کے مریض ہوں یا نہ ہوں، ایسا لگتا ہے کہ مصنوعی مٹھاس کے زیادہ استعمال سے یادداشت اور سوچنے کی صلاحیت میں تیزی سے کمی ہوتی ہے۔سب سے زیادہ دماغی صلاحیتوں میں کمی کے ساتھ منسلک مصنوعی مٹھاس میں اسپارٹیم (Aspartame)، سکیرین (Saccharin)، ایسسلفیم کے (Acesulfame K)، ایریتھرٹول (Erythritol)، سوربٹول (Sorbitol) اور زائیلٹول (Xylitol) شامل ہیں، جو عام طور پر ڈائٹ سافٹ ڈرنکس، شوگر فری مٹھائی، گم، پروٹین بارز اور بعض ادویات میں استعمال ہوتے ہیں۔تحقیق میں شریک ڈاکٹر کلاڈیا کیمیا سُوئیموٹو (Dr Claudia Kemia Suemoto) نے بتایا کہ یہ متبادل عموماً اُن لوگوں کے لیے صحت مند آپشن کے طور پر فروخت کیے جاتے ہیں جو وزن یا خون میں شوگر کی سطح کو کنٹرول کرنا چاہتے ہیں، لیکن تحقیق کے نتائج ظاہر کرتے ہیں کہ یہ دماغ کی صحت پر غیر متوقع منفی اثرات بھی ڈال سکتے ہیں۔انہوں نے مزید کہا: عام طور پر کم یا صفر کیلوری والی مٹھاس کو شکر کے صحت مند متبادل کے طور پر دیکھا جاتا ہے، لیکن ہمارے نتائج بتاتے ہیں کہ وقت کے ساتھ کچھ مٹھاس کے دماغ کی صحت پر منفی اثرات بھی ہو سکتے ہیں۔تحقیق کی شریک محققہ نے کہا کہ یہ مطالعہ مشاہداتی نوعیت کا تھا، اس لیے یہ براہِ راست یہ ثابت نہیں کرتا کہ مصنوعی مٹھاس دماغی صلاحیتیں کم کرتی ہے، کیونکہ غذائی عادات، ورزش یا صحت جیسے دیگر عوامل بھی اثرانداز ہو سکتے ہیں۔تاہم، وہ سمجھتی ہیں کہ نتائج مزید تحقیقات کے لیے کافی ہیں اور لوگوں کو خبردار کرنے کے لیے بھی کہ وہ ان مصنوعی مٹھاس کی زیادہ مقدار استعمال کرنے میں احتیاط کریں، خاص طور پر نوجوانوں میں جو انہیں روزانہ اور کئی سال تک استعمال کر سکتے ہیں۔اس کے علاوہ، تحقیق سے نتیجہ اخذ کیا گیا کہ یہ مصنوعی مٹھاس کے صحت پر اثرات کے بارے میں بڑھتی ہوئی تشویش میں ایک نیا اضافہ ہے، جو نہ صرف وزن یا خون میں شوگر کی سطح پر بلکہ دماغ پر بھی اثر ڈال سکتی ہے۔جب تک واضح معلومات دستیاب نہیں ہو جاتیں، یہ سمجھداری ہوگی کہ ان مصنوعات کے استعمال کو محدود کیا جائے اور جہاں ممکن ہو قدرتی اور غیر مصنوعی غذا پر توجہ دی جائے۔
پاکستان اورسعودی عرب کا دفاعی معاہدہ کسی ملک کیخلاف نہیں ،خواجہ آصف