خواب دیکھنے والے کہاں ہیں؟
اشاعت کی تاریخ: 9th, November 2025 GMT
data-id="863a0a8" data-element_type="widget" data-widget_type="theme-post-content.default">
251109-03-7
شاہنواز فاروقی
آپ کا کیا خیال ہے دنیا خواب سے بنتی ہے یا حقیقت سے؟ اس سے پہلے کہ آپ اس سوال کا جواب دیں ہمارا ایک شعر سن لیجیے۔ عرض کیا ہے۔
دنیا یہ حقیقت سے بنی ہے نہ بنے گی
دوچار سہی خواب بھی ہوں گے اسے درکار
یہ شعر بتا رہا ہے کہ دنیا حقیقت سے نہیں خواب سے بنتی ہے۔ خواب کا ایک نام ’’مثالیہ‘‘ ہے۔ خواب کا ایک نام ’’Ideal‘‘ ہے۔ اس دنیا میں جتنی خوبصورتی ہے جتنی معنویت ہے جتنی گہرائی ہے وہ خواب کا حاصل ہے۔ مثالیے کا کرشمہ ہے، Ideal کا نتیجہ ہے ان باتوں سے یہاں ہمیں بھارت کی سابق وزیراعظم اندرا گاندھی کا ایک انٹرویو یاد آگیا۔ انٹرویو کرنے والے نے اندرا گاندھی سے پوچھا کہ آپ کے اور آپ کے والد پنڈت جواہر لعل نہرو میں کیا فرق ہے۔ اندرا گاندھی نے اس کا خوبصورت مگر مختصر جواب دیا۔ انہوں نے کہا میرے والد ایک خواب دیکھنے والے تھے جبکہ میں ایک حقیقت پسند شخصیت ہوں۔ اندرا گاندھی کی بات بالکل درست تھی نہرو واقعتا خواب دیکھنے والے تھے۔ نہرو کا خواب یہ تھا کہ بھارت ایک بڑی صنعتی و معاشی طاقت بن کر اُبھرے۔ چنانچہ انہوں نے اپنے اقتدار کے 17 برسوں میں بھارت میں بھاری صنعتوں کا جال بچھادیا۔ اور آج ہم دیکھ رہے ہیں بھارتی معیشت دنیا کی پانچویں بڑی معیشت بن چکی ہے۔ پنڈت جواہر لعل نہرو کی خواب پسندی کا ایک ثبوت یہ ہے کہ وہ ہندو ہونے کے باوجود اردو سے محبت کرتے تھے۔ وہ ہندی کے بجائے اردو میں تقریر کرتے تھے۔ لوگوں نے کہا کہ ہندوئوں کی زبان ہندی ہے آپ ہندی میں تقریر کیا کریں۔ نہرو نے کچھ دن ایسا کیا مگر جلد ہی اس سلسلے کو ترک کرکے دوبارہ اردو کی طرف آگئے۔ وہ اردو کو ’’ہند اسلامی تہذیب‘‘ کے ملاپ کا حاصل سمجھتے تھے۔ بھارت کا آئین بنا تو آئینی ساز افراد اس کا مسودہ لے کر نہرو کی خدمت میں حاضر ہوئے۔ آئین کے مسودے میں بھارت کی قومی زبانوں کی ایک فہرست تھی۔ نہرو نے دیکھا اس فہرست میں اردو کا نام نہیں ہے۔ نہرو نے آئین سازوں سے اس کی وجہ پوچھی تو انہوں نے کہا کہ ہم میں سے کسی کی مادری زبان اردو نہیں ہے۔ نہرو نے کہا میری مادری زبان اردو ہے۔ چنانچہ آئین سازوں کو بھارتی زبانوں میں اردو کو شامل کرنا پڑا۔ پاکستان میں اکثر لوگ یہ سمجھتے ہیں کہ مسئلہ کشمیر کو اقوام متحدہ میں پاکستان لے کر گیا۔ ایسا نہیں ہے۔ مسئلہ کشمیر کو نہرو اقوام متحدہ میں لے کر گئے۔ یہ نہرو تھے جنہوں نے ہندوستان اور پاکستان میں مذہبی اقلیتوں کے تحفظ کے لیے لیاقت علی خان کے ساتھ مل کر ’’نہرو لیاقت پیکٹ‘‘ پر دستخط کیے۔ بی جے پی کا کوئی اور رہنما ہوتا تو وہ ان تمام کاموں میں ایک کام بھی نہ کرتا۔ اس لیے کہ بی جے پی اور اس کی پشت پر موجود آر ایس ایس ’’خواب پرست‘‘ نہیں بلکہ ’’حقیقت پسند‘‘ ہیں۔
قائداعظم کی پوری سوانحی تاریخ بتاتی ہے کہ وہ بھی ایک خواب دیکھنے والے تھے۔ ایک زمانے میں ’’ہندو مسلم اتحاد‘‘ یا ایک قومی نظریہ ان کا خواب تھا، مگر جلد ہی ان پر اس خواب کی معنویت آشکار ہوگئی۔ چنانچہ انہوں نے دو قومی نظریے کا پرچم تھام لیا۔ انہوں نے جب پاکستان کا نعرہ فضا میں بلند کیا تو پاکستان اس وقت صرف ایک ’’خواب‘‘ تھا، صرف ایک امکان، صرف ایک مثالیہ، صرف ایک Ideal مگر قائداعظم نے اس خواب کے پودے کو اپنے خون دل سے سینچا اور دیکھتے ہی دیکھتے اسے تناور درخت بنادیا۔ قائداعظم کے سوانح نگار اسٹیلنے ولپرٹ نے لکھا ہے کہ تاریخ میں ایسے لوگ کم ہوئے ہیں جنہوں نے تاریخ کے دھارے کا رُخ بدلا ہے۔ اس سے بھی کم لوگ وہ ہوئے ہیں جنہوں نے جغرافیہ تبدیل کیا ہے اور ایسا تو شاید کوئی بھی نہیں ہوا جس نے قومی ریاست تخلیق کی ہو۔ قائداعظم نے بیک وقت یہ تینوں کام کیے۔ یہاں کہنے کی اصل بات یہ ہے کہ اگر قائداعظم خواب دیکھنے والے نہ ہوتے تو وہ ان میں ایک کام بھی نہیں کرسکتے تھے۔
بلاشبہ اقبال بیسویں صدی کے ایک بڑے خواب دیکھنے والے تھے۔ اقبال کا مردِ مومن ایک خواب ہے۔ ایک مثالیہ ہے۔ ایک Ideal ہے۔ اقبال کا شاہین ایک خواب ہے۔ ایک مثالیہ ہے ایک Ideal ہے۔ اقبال کا تصور خودی ایک خواب ہے، ایک مثالیہ ہے، ایک Ideal ہے۔ ذرا دیکھیے تو اقبال مومن کے بارے میں کیا فرما گئے ہیں۔
ہر لحظہ ہے مومن کی نئی آن نئی شان
گفتار میں کردار میں اللہ کی برہان
قہاری و غفاری و قدوسی و جبرت
یہ چار عناصر ہوں تو بنتا ہے مسلمان
ہمسایۂ جبریلِ امیں بندئہ خاکی
ہے اس کا نشیمن نہ بخارا نہ بدخشان
یہ راز کسی کو نہیں معلوم کہ مومن
قاری نظر آتا ہے، حقیقت میں ہے قرآن
جس سے جگر لالہ میں ٹھنڈک ہو وہ شبنم
دریائوں کے دل جس سے دہل جائیں وہ طوفان
٭٭
تقدیر کے پابند جمادات و نباتات
مومن فقط احکامِ الٰہی کا ہے پابند
٭٭
کافر کی یہ پہچان کہ آفاق میں گم ہے
مومن کی یہ پہچان کہ گم اس میں ہے آفاق
٭٭
کافر ہے تو شمشیر پہ کرتا ہے بھروسہ
مومن ہے تو بے تیغ بھی لڑتا ہے سپاہی
اقبال نے شاہین کے حوالے سے فرمایا ہے۔
ترا جوہر ہے نْوری، پاک ہے تْو
فروغِ دیدۂ افلاک ہے تْو
ترے صیدِ زبوں افرشتہ و حْور
کہ شاہینِ شہِ لولاکؐ ہے تْو!
٭٭
پرواز ہے دونوں کی اسی ایک فضا میں
شاہیں کا جہاں اور ہے کرگس کا جہاں اور
اقبال نے خودی کے سلسلے میں فرمایا ہے۔
خودی سے اس طلسمِ رنگ و بُو کو توڑ سکتے ہیں
یہی توحید تھی جس کو نہ تو سمجھا نہ میں سمجھا
٭٭
یہ پیام دے گئی ہے مجھے بادِ صبح گاہی
کہ خودی کے عارفوں کا ہے مقام پادشاہی
٭٭
خودی کو کر بلند اتنا کہ ہر تقدیر سے پہلے
خدا بندے سے خود پوچھے بتا تیری رضا کیا ہے
مولانا مودودی بھی بیسویں صدی کے بڑے خواب دیکھنے والوں میں سے تھے۔ انہوں نے ایک طرف اسلام کے عالمگیر غلبے کا خواب دیکھا۔ اور دوسری طرف انہوں نے باطل نظاموں کی شکست وریخت کا خواب دیکھا۔ انہوں نے فرمایا ایک وقت آئے گا کہ سوشلزم کو ماسکو میں پناہ نہیں ملے گی اور ایک وقت آئے گا جب لبرل ازم لندن اور پیرس میں لرزہ براندام ہوگا۔ ان پیشگوئیوں میں سے مولانا کی ایک پیشگوئی صحیح ثابت ہوچکی ہے اور دوسری پیشگوئی بھی ان شاء اللہ آج نہیں تو کل صحیح ثابت ہوگی۔ مولانا سے پہلے علما کی عظیم اکثریت اس بات پر ایمان لے آئی تھی کہ بلاشبہ اسلام حق ہے مگر اب ریاست و سیاست اور معیشت اور آرٹ سے اس کا کوئی تعلق نہ ہوگا۔ مولانا نے اس کے مقابلے پر اس خیال کو عام کیا کہ اسلام ایک مکمل ضابطہ ٔ حیات ہے، آج مسلم دنیا کے لوگوں کی عظیم اکثریت مولانا کے خیال پر ایمان لے آئی ہے اور اب ساری دنیا کے مسلمان اسلام کو ایک مکمل ضابطہ ٔ حیات سمجھتے ہیں۔ مولانا کے غلبہ اسلام کے خواب نے مولانا سے 100 سے زائد کتب تحریر کروائیں ان سے قرآن کی تفسیر لکھوائی۔
بلاشبہ سوشلزم ایک باطل نظریہ تھا۔ مگر ’’سوشلسٹ انقلاب‘‘ بھی ایک خواب تھا جسے لینن نے روس میں حقیقت بنا کر دکھادیا۔ سوشلسٹ انقلاب کا خواب روس تک محدود نہ رہا۔ اس نے دیکھتے ہی دیکھتے آدھی دنیا کو اپنی گرفت میں لے لیا۔ بلاشبہ سوشلسٹ انقلاب کا خواب ایک مادی خواب تھا چنانچہ اس خواب نے آدھی دنیا میں انقلاب برپا کردیا۔ بادشاہتیں منہدم ہوگئیں، جاگیرداری ماضی کا حصہ بن گئیں، کروڑوں لوگوں کے لیے تعلیم اور علاج معالجے کی سہولتیں مفت ہوگئیں۔ سوشلسٹ ریاستوں میں کوئی بیروزگار تھا نہ بے گھر تھا، ان ریاستوں میں خواندگی کی شرح سو فی صد تھی۔ چنانچہ سوشلسٹ ریاستیں مطالعہ کرنے والے انسانوں کی ریاستیں تھیں۔ چین میں مائوزے تنگ نے چینی قوم کو سوشلسٹ انقلاب کا خواب دکھایا اور انقلاب برپا کردیا۔ انقلاب سے پہلے چینی قوم افیون کھانے والی قوم تھی۔ اس کی صنعتی ترقی صفر تھی۔ معاشی ترقی نہ ہونے کے برابر تھی مگر چین کی انقلابی قیادت نے گزشتہ 40 سال میں 80 کروڑ لوگوں کو غربت سے نکالا ہے۔ آج چین دنیا کی دوسری بڑی معیشت ہے۔ چین عسکری اعتبار سے دنیا کی تین بڑی طاقتوں میں سے ایک ہے۔
بدقسمتی سے آج ہماری دنیا میں خواب دیکھنے والوں کا کال پڑا ہوا ہے۔ قائداعظم، علامہ اقبال اور مولانا مودودی کے پاکستان میں کُندذہن جرنیلوں اور ان کے پیدا کردہ سیاست دانوں کا قبضہ ہے۔ اس پاکستان میں نہ اقبال کا مرد مومن موجود ہے نہ اقبال کے شاہین کی کوئی اہمیت ہے۔ جرنیلوں اور ان کے پیدا کردہ سیاست دانوں نے ملک اور معاشرے پر ایسا جبر مسلط کیا ہوا ہے کہ انفرادی اور اجتماعی خودی کی نشوونما ممکن ہی نہیں رہی۔ نہرو کے ہندوستان پر آر ایس ایس اور بی جے پی کا غلبہ ہے۔ اس غلبے نے 25 کروڑ مسلمانوں اور 40 کروڑ شوردوں اور دلتوں کی زندگی کو جہنم بنایا ہوا ہے۔ مغربی دنیا کے سب سے طاقتور ملک امریکا پر ٹرمپ کا قبضہ ہے جسے خواب کے معنی بھی معلوم نہیں ہیں۔ ساحر لدھیانوی یاد آگئے جنہوں نے کہا ہے۔
یہ دنیا ہے مُردہ پرستوں کی بستی
یہاں پر تو جیون سے ہے موت سستی
یہ دنیا اگر مل بھی جائے تو کیا ہے
ذریعہ: Jasarat News
کلیدی لفظ: سوشلسٹ انقلاب اندرا گاندھی پاکستان میں ایک مثالیہ انہوں نے چنانچہ ا اقبال کا جنہوں نے ایک خواب کا خواب صرف ایک ایک Ideal نے کہا کیا ہے کا ایک
پڑھیں:
کیا اب بھی اقوام متحدہ کی ضرورت ہے؟
آج دنیا میں ہر طرف ظلم و جبر انتہا پسندی اور ممالک کے درمیان تنازعات کا دور دورہ ہے، سکون اور اطمینان کیسا؟ یہ نعمتیں تو انسانوں سے کوسوں میل دور ہو گئی ہیں یا کہیں کھو گئی ہیں۔
انسان امن کی تلاش میں ہے مگر بعض طاقتیں امن کی ایسی دشمن بن گئی ہیں کہ وہ دنیا کو جہنم بنانے کی تگ و دو میں ہمہ وقت مصروف ہیں۔ پہلی جنگ عظیم کے بعد دنیا کو جنگوں کی ہولناکیوں سے بچانے کے لیے ’’ اقوام متحدہ‘‘ کا ادارہ قائم کیا گیا تھا۔
اس سے قبل ان ہی مقاصد کے حصول کے لیے ’’ لیگ آف نیشن‘‘ کا قیام عمل میں لایا گیا تھا مگر یہ ادارہ اقوام عالم کے درمیان باہمی تنازعات کو حل کرنے میں قطعی ناکام رہا اور بدقسمتی سے اس کی موجودگی میں ہی دوسری جنگ عظیم کا سانحہ رونما ہوا جس میں کروڑوں انسان لقمہ اجل بن گئے۔ کئی ملک برباد ہوگئے اورکئی کا تو نام و نشان ہی مٹ گیا۔
یہ تباہی بربادی اتنی خوفناک اور وسیع تھی کہ دنیا ہل کر رہ گئی اور ہر ذی شعور انسان یہ سوچنے پر مجبور ہوگیا کہ دنیا کو تباہی و بربادی سے بہرصورت بچایا جائے۔ تمام ممالک کو اپنے اختلافات بھلا کر یکجا ہونا ہوگا اور مستقبل کو پرامن بنانے کے لیے ایک مضبوط اور پائیدار عالمی ادارہ قائم کرنا ہوگا جو انسانیت کو آیندہ جنگوں کی ہولناکیوں سے بچا سکے، ساتھ ہی دنیا میں پائیدار امن، ترقی اور خوشحالی کا ضامن بن سکے۔
یوں 24 اکتوبر 1945 کو اقوام متحدہ کا ادارہ وجود میں آ گیا۔ اس کے قیام میں تمام ہی ممالک کی مرضی شامل تھی۔ اس ادارے سے یہ بھی امید وابستہ کی گئی تھی کہ آیندہ دنیا کے تمام ممالک ایک دوسرے کا احترام کریں گے اور تنازعات کی صورت میں اقوام متحدہ کے آئین کے مطابق اپنے مسائل حل کریں گے۔
اس ادارے کے قیام میں غریب ممالک سے لے کر دنیا کے متمول ممالک بھی شریک تھے، طاقتور ممالک کو متفقہ طور پر یہ اختیار دیا گیا کہ ان کا ووٹ کسی بھی مسئلے کے حل کے سلسلے میں حتمی قرار دیا جائے گا۔ یہی ویٹو پاور ہے جو دنیا کے پانچ ممتاز ممالک کو تفویض کیا گیا تھا۔
ان ممالک میں امریکا، سوویت یونین، فرانس، برطانیہ اور چین کی جگہ تائیوان شامل تھا۔ اس وقت تک امریکا اور یورپی ممالک نے چین کو تسلیم نہیں کیا تھا مگر بعد میں چین کے اقوام متحدہ کا ممبر بننے کے بعد تائیوان کے بجائے چین کو ویٹو پاور سے نواز دیا گیا۔
افسوس کہ ویٹو پاورکا اکثر ممالک نے غلط استعمال کیا، امریکا نے سب سے زیادہ مرتبہ استعمال کیا مگر اکثر اس سے منفی اثرات مرتب ہوئے۔ دنیا میں تنازعات پہلے بھی تھے مگر اب تنازعات کی تعداد بہت بڑھ چکی ہے جس کی وجہ بدقسمتی سے اقوام متحدہ کے ویٹو پاور کے حامل مستقل ممبران ہیں۔
ان ممالک نے اپنے حلیف ممالک کے حق میں بے جا طورپر ویٹو پاور کا استعمال کیا جس کی وجہ سے دنیا میں مسائل بھی بڑھ رہے ہیں اور عالمی سطح پر بے چینی میں بھی اضافہ ہو رہا ہے۔
اس وقت دنیا کے کئی ممالک باہمی تنازعات میں گھرے ہوئے ہیں۔ وہ اپنے مفاد کے لیے اپنے حریف ملک سے چھیڑ چھاڑ سے بڑھ کر جنگ تک کرنے پر تل جاتے ہیں۔
اقوام متحدہ ایسے مسائل کو حل کرنے کے لیے بہترین پلیٹ فارم ہے مگر ویٹو پاورکے حامل ممالک ان مسائل میں خود کو ڈال کر انھیں ایسا الجھا دیتے ہیں کہ پھر یہ برسوں حل نہیں ہو پاتے جیسے مسئلہ کشمیر اور فلسطین ہیں۔ یہ مسائل پانچ دہائیوں سے اقوام متحدہ میں حل طلب ہیں مگر ان کے حل کی کوئی امید نظر نہیں آتی۔
اقوام متحدہ ان جیسے کئی مسائل میں لاچار اور مجبور دکھائی دیتی ہے۔ روانڈا اور بوسنیا میں ایک عرصے تک انسانوں کا قتل عام ہوتا رہا مگر اقوام متحدہ کا ادارہ مفلوج رہا اور پھر غزہ کے قتل عام کو روکنے میں بھی قطعی ناکام رہا ہے۔
دنیا میں حق خود اختیاری کے حصول کے لیے جو اقوام مسلسل جدوجہد کر رہی ہیں، اقوام متحدہ ان کی کوئی مدد نہیں کر پا رہی ہے، شاید اس لیے کہ ان مسائل میں بعض بڑے ممالک دلچسپی نہیں لے رہے کیونکہ وہ حق خود اختیاری کے غاصب ممالک کے ہمنوا بنے ہوئے ہیں۔
یہ صورت حال انتہائی پریشان کن ہے جس سے ممبر ممالک کے درمیان اقوام متحدہ کی قدر و قیمت باقی نہیں رہی ہے۔ اس وقت حالات اس نہج پر پہنچ چکے ہیں کہ ایسا لگتا ہے کہ اقوام متحدہ کا کردار ہی ختم ہو گیا ہے۔
اس کے مفلوج ہونے کی ایک وجہ یہ بھی ہے کہ بڑے ممالک نے جو ویٹو پاور کے حامل ہیں خود اپنے اثر و نفوذ دے عالمی تنازعات کے حل کو اپنے ہاتھوں میں لے لیا ہے۔ وہ دو ممالک کے درمیان تنازعے کے سلسلے میں اپنے فیورٹ یا پسندیدہ ملک کی پشت پناہی کرتے ہوئے اس کے حق میں فیصلہ کر دیتے ہیں جب کہ دوسرا فریق ملک جوکہ حق پر بھی ہوتا ہے، اسے پیچھے ہٹنا پڑتا ہے اور پھر کوئی اس کی نہیں سنتا۔
اس وقت عالمی تنازعات کے حل کے سلسلے میں اقوام متحدہ کی جگہ امریکا کے صدر ٹرمپ نے لے لی ہے، وہ تنازعات حل کرانے کے علاوہ ملکوں پر پابندیاں بھی لگا رہے ہیں اور کوئی ان سے باز پرس بھی نہیں کر سکتا، اس لیے کہ وہ دنیا کی سب سے بڑی طاقت کے صدر ہیں۔
انھوں نے کئی ممالک کے باہمی تنازعات کو حل کرا بھی دیا ہے۔ پاکستان اور بھارت کے مابین حالیہ جنگ تھی تو بہت مختصر مگر وہ ایٹمی ہتھیاروں کے استعمال تک بھی جا سکتی تھی۔ صدر ٹرمپ کا دعویٰ ہے کہ اسے انھوں نے رکوا دیا، صرف دونوں ممالک کو تجارت کی آفر دے کر۔ انھوں نے اس کامیابی پر نوبل انعام دیے جانے کا مطالبہ کیا تھا۔
مگر چونکہ اسے دیے جانے کا طریقہ کار مختلف ہے، اس لیے اس سال کا نوبل انعام انھیں نہیں مل سکا۔ ٹرمپ نے یہ بھی دعویٰ کیا ہے کہ انھوں نے تھائی لینڈ اور کمبوڈیا کے درمیان بھی جنگ رکوا دی ہے اور صلح کرا دی ہے۔ اب اگر ممبر ممالک کے درمیان تنازعات کو حل کرانے کا یہی شخصی طریقہ قائم رہا تو اقوام متحدہ کی ضرورت ہی باقی نہیں رہے گی۔
حقیقت یہ ہے کہ لیگ آف نیشن بھی دنیا کی بڑی طاقتوں کی مداخلت کی وجہ سے ہی ناکام ہوگئی تھی اور اسی وجہ سے دوسری عالمی جنگ کا سانحہ پیش آیا تھا۔ بدقسمتی سے اس وقت اقوام متحدہ کے کاموں میں بڑی طاقتیں کھل کر مداخلت کر رہی ہیں اور اسے ایک ناکام اور لاچار ادارہ بنانے پر تلی ہوئی ہیں تو پھر دنیا کا خدا ہی حافظ۔
اقوام متحدہ کی عدم فعالیت کی وجہ سے ہی کئی طاقتور ممالک کمزور ممالک پر حملہ آور ہو رہے ہیں کیونکہ اب انھیں روکنے والا کوئی نہیں ہے۔ اس صورت حال کا بھارت اور اسرائیل سب سے زیادہ فائدہ اٹھا رہے ہیں۔
بھارت کا کوئی بھی پڑوسی اس کے توسیع پسندانہ رجحان سے محفوظ نہیں ہے۔ نیپال، بھوٹان، مالدیپ اور بنگلہ دیش تمام ہی اس سے خوفزدہ ہیں، ادھر وہ پاکستان کو کمزور کرنے کے لیے ایک طرف دہشت گردی کا سہارا لے رہا ہے۔
دوسری طرف خود بھی بلاجواز حملے کرتا رہتا ہے حال ہی میں وہ پلوامہ کے بہانے پاکستان پر پوری قوت سے حملہ کر چکا ہے مگر خوش قسمتی سے اس میں اسے تاریخی شکست اور حزیمت کا سامنا کرنا پڑا ہے اب وہ اس شکست کا بدلہ لینے کے لیے نئے نئے حربے استعمال کر رہا ہے۔
دراصل مودی پاکستان پر ان حملوں کے ذریعے سیاسی فائدے حاصل کرتا ہے وہ اپنے ہاں ہونے والے ریاستی اور وفاقی انتخابات میں کامیابیاں سمیٹتا رہتا ہے مگر اس دفعہ وہ اپنے آپریشن سندور میں ناکام ہونے کے بعد اب مشکل ہی سے بہار میں ہونے والے انتخابات میں کامیابی حاصل کر پائے گا۔
سیاسی منظرنامے میں ہلچل! سلمان اکرم راجہ کی شاہ محمود قریشی سے اہم ملاقات، پی ٹی آئی قیادت کے درمیان سیاسی رابطے تیز