ٹرینوں کو حادثات سے بچانے والا ’’سیمو لیٹر‘‘ دو سال سے خراب، طالبعلم تربیت سے محروم
اشاعت کی تاریخ: 7th, July 2025 GMT
لاہور:
پاکستان ریلویز کے افسران اور ملازمین سمیت سیکڑوں زیر تعلیم ملکی و غیر ملکی طالب علموں کو جدید ترین ٹیکنالوجی سے آراستہ کرنے والا ’’سیمو لیٹر‘‘ دو سال سے زائد عرصہ سے خراب ہے۔
سیمو لیٹر کا سافٹ ویئر خراب ہونے سے ریلوے کے ڈرائیور اور نہ انجینئرز تربیت حاصل کر پا رہے ہیں، یہی وجہ ہے کہ ریلوے کے حادثات میں کئی گنا اضافہ ہوگیا۔ آئے روز لاہور سمیت ملک بھر میں چلنے والی ریل گاڑیوں کے پٹڑی سے اترنے کے درجنوں واقعات ہو چکے ہیں۔
وفاقی وزیر ریلوے حنیف عباسی کے حکم کے باوجود سیمو لیٹر ٹھیک نہ ہو سکا۔
پاکستان ریلویز ذرائع سے ملنے والی معلومات کے مطابق پاکستان ریلویز اکیڈمی والٹن لاہور میں واقع جدید ترین ٹیکنالوجی سے آراستہ تربیت فراہم کرنے والا ’’سیمو لیٹر‘‘ ڈھائی سال سے خراب پڑا ہے۔ سیمو لیٹر خراب ہونے سے سب سے زیادہ نقصان پاکستان ریلویز کے زیر تربیت حاضر سروس ڈرائیورز اور زیر تعلیم سیکڑوں طالب علموں کو ہو رہا ہے۔
ٹرین کس طرح چلائی جاتی ہے، ایمرجنسی کی صورتحال میں کیسے کنٹرول کیا جاتا ہے، لائن تبدیل کیسے ہوتی ہے اور اگر کوئی حادثہ پیش آ جائے تو اس کے بعد کی صورتحال پر کیسے قابو پایا جاتا ہے، یہ سب سیمو لیٹر کے ذریعے سیکھا جاتا ہے جبکہ افسران کو ریسرچ اور ریفریش کورسز بھی کروائے جاتے ہیں۔
ڈھائی سال قبل سیمو لیٹر کے سافٹ ویئر میں کچھ خرابی ہوئی، جس کو مقامی سافٹ ویئر انجینئر بھی ٹھیک کر سکتا ہے مگر ریلوے انتظامیہ مقامی سافٹ ایئر انجینیئر کے بجائے غیر ملکی سافٹ ویئر انجینئر سے ٹھیک کروانا چاہتے ہیں جس پر لاگت ڈالرز میں آئے گی جبکہ مقامی سافٹ وئیر انجینئرز چند لاکھ میں سیمو لیٹر کی خرابی کو دور کر سکتے ہیں۔ ریلوے انتظامیہ اس بات کی اجازت نہیں دے رہی۔
ریلوے اکیڈمی والٹن میں زیر تعلیم طالب علموں نے اپنا نام نہ ظاہر کرنے پر بتایا کہ ہمارا تعلیمی سال مکمل ہونے کو ہے مگر ہم سیکڑوں طالب علم اس جدید ترین ٹیکنالوجی سے فائدہ نہیں اٹھا سکے اور اسکے بغیر ہی تعلیم مکمل کرنے پر مجبور ہو چکے ہیں۔
والٹن اکیڈمی ریلوے میں سری لنکا، افغانستان، تنزانیہ اور گھانا سمیت دیگر افریقی ممالک کے درجنوں طالب علم زیر تعلیم ہیں۔ والٹن اکیڈمی سے سالانہ 1500 سے لیکر دو ہزار کے قریب طالب علم آتے ہیں۔
اس سلسلے میں وفاقی وزیر ریلوے حنیف عباسی سے بات کی تو انہوں نے چیف ایگزیکٹو آفیسر ریلوے عامر علی بلوچ سے اس بارے میں پوچھا تو جواب ملا خراب ہے اور جلد ٹھیک ہو جائے گا، جس غیر ملکی کمپنی سے یہ سیمو لیٹرز خریدا گیا ہے اسی کمپنی سے بات چیت چل رہی ہے، جلد اس سمیو لیٹر کی خرابی کو دور کر لیا جائے گا۔
.ذریعہ: Express News
کلیدی لفظ: پاکستان ریلویز زیر تعلیم سیمو لیٹر سافٹ ویئر
پڑھیں:
لاکھوں نوجوانوں کو اے آئی کی مفت تربیت کیلئے سعودیہ بھجوائیں گے: وزیراعظم
اسلام آباد (خبر نگار خصوصی+ نوائے وقت رپورٹ) وزیراعظم محمد شہباز شریف نے ہونہار طلبہ وطالبات کے لئے لیپ ٹاپ سکیم 2025ء کا افتتاح کرتے ہوئے کہا ہے کہ آج اے آئی، آئی ٹی، جدید مہارت اور ٹیکنالوجیز دنیا میں اپنا لوہا منوا رہی ہیں۔ سعودی عرب نے پاکستان کے نوجوانوں کو اے آئی اور آئی ٹی میں مفت تربیت فراہم کرنے کی پیشکش کی ہے۔ سعودی ویژن 2030ء اور فیفا ورلڈ کپ کے لیے تربیت یافتہ افرادی قوت سعودی عرب بھجوائیں گے۔ سعودی عرب کے معاشی پیکج پر عملدرآمد سے پاکستان کی معیشت ترقی کرے گی۔ طلبہ وطالبات کے لیے جتنے بھی وسائل خرچ کرنا پڑے کریں گے۔ قوم کے عظیم بیٹوں اور بیٹیوں کی تعلیم، ہنر اور ان کو عظیم پاکستانی بنانے کے لیے 50 ارب تو کیا 500 ارب بھی خرچ ہو جائیں تو کوئی پرواہ نہیں۔ انہوں نے ان خیالات کا اظہار جمعرات کو پرائم منسٹر یوتھ لیپ ٹاپ سکیم 2025ء کی افتتاحی تقریب سے خطاب کرتے ہوئے کیا۔ وزیر اعظم نے کہا کہ میرے لیے یہ خوشی کا دن ہے کہ ایک مرتبہ پھر اللہ تعالیٰ نے مجھے موقع دیا ہے کہ قوم کے انتہائی قابل اور ہونہار بچوں کے سامنے کھڑا ہوں جو والدین اور اساتذہ کرام کی محنت اور دعاؤں کے نتیجے میں قوم کے عظیم معمار بن رہے ہیں۔ اپنی طرف سے اور اپنی حکومت کی طرف سے بلکہ پوری قوم کی طرف سے انہیں سلام پیش کرتا ہوں۔ وزیراعظم نے کہا کہ لیپ ٹاپ کے پروگرام میں کچھ تاخیر ہو گئی ہے کیونکہ جب یہ لیپ ٹاپ پاکستان پہنچے تو ان کے اوپر جو لوگو لگا ہوا تھا وہ کسی حوالے سے ذاتی تشہیر کے مترادف تھا تو میں نے کہا کہ اس کے اوپر لگا لوگو مناسب نہیں ہے، لوگو تبدیل کرنا چاہئے۔ ملک کے یہ نوجوان، یہ بیٹیاں لیپ ٹاپ لے کر پاکستان کو عظیم بنائیں گی۔ یہ میرٹ اور شبانہ روز محنت کا امتحان ہے۔ پورے ملک میں ایک لاکھ لیپ ٹاپ میرٹ پر تقسیم کیے جا رہے ہیں۔ وزیر اعظم نے کہا کہ 2011ء سے یہ پروگرام شروع ہوا۔ اگر مجموعی قیمت لگائی جائے تو تقریبا 40، 50 ارب روپے خرچ ہو چکے ہوں گے۔ 50 ارب کیا 500 ارب بھی خرچ ہو جائیں تو کوئی پرواہ نہیں۔ سعودی عرب اے آئی اور انفارمیشن ٹیکنالوجی پر اربوں ڈالر خرچ کر رہا ہے اور اس نے اربوں ڈالر کا روڈ میپ اور انفراسٹرکچر بنایا ہے۔ سعودی عرب نے پاکستانی نوجوانوں کو اے آئی اور آئی ٹی میں مفت تربیت فراہم کرنے کی پیشکش کی ہے، ایک نیا راستہ کھلا ہے۔ انہوں نے پاکستان کے لیے معاشی پیکج دینے پر سعودی ولی عہد و وزیراعظم شہزادہ محمد بن سلمان کا ایک مرتبہ پھر شکریہ ادا کیا۔ مجھے پوری امید ہے جب ہم سب مل کر اس پر عمل پیرا ہوں گے تو زراعت، معدنیات،کانکنی اور آئی ٹی سمیت پاکستان کی معیشت ترقی کرے گی۔ سعودی عرب میں 2030ء میں ایک بین الاقوامی نمائش ہونے جا رہی ہے۔ وہاں پر 2034ء میں فیفا کپ کا انعقاد ہونے جا رہا ہے۔ اس کے لیے سعودی عرب کو نہ صرف اربوں ڈالر کی تعمیرات کرنی ہیں بلکہ ان کو ہزاروں لاکھوں انتہائی مہارت کی حامل افرادی قوت کی ضرورت ہے۔ پوری کوشش ہوگی اور ایڑی چوٹی کا زور لگا کر ہزاروں لاکھوں ہنر مند بچے اور بچیوں کو سعودی عرب بھجوائیں گے اور پاکستان کو عظیم بنائیں گے۔ لیپ ٹاپ وصول کرنے والے طلباء و طالبات نے دن رات محنت کر کے یہ مقام حاصل کیا ہے۔ نوجوان ذاکر اللہ نے بہت خوبصورت اردو اور عربی میں بات کی۔ میں عربی بولنے میں اس کا مقابلہ نہیں کر سکتا۔ یہاں پر قوم کے ایک شہید کے بیٹے سٹیج پہ آئے، ان کے والد نے قوم کے بچوں اور بچیوں کو یتیم ہونے سے بچانے کیلئے اپنا خون پاکستان کو دیا اور جام شہادت نوش کیا۔ شہید نے اپنے بیٹے کو یتیم کر دیا لیکن قوم کے لاکھوں کروڑوں بیٹوں اور بیٹیوں کو یتیم ہونے سے بچایا۔ وزیراعظم نے لیپ ٹاپ سکیم کی تقریب کو کامیاب بنانے پر وزیراعظم یوتھ پروگرام کے چیئرمین رانا مشہود احمد خان اور وفاقی وزیر اطلاعات و نشریات عطاء اللہ تارڑ اور ان کی پوری ٹیم کو سراہا۔ وزیراعظم لیپ ٹاپ سکیم کے بارے میں نوجوانوں نے اپنے تاثرات کا اظہار کیا اور وزیراعظم لیپ ٹاپ سکیم کو سراہا۔ بین الاقوامی اسلامی یونیورسٹی سے ایم فل کرنے والے طالب علم ذاکر اللہ نے کہا کہ یہ لیپ ٹاپ میرے لیے کافی معاون ثابت ہوا ہے۔ بلوچستان کے ضلع نصیر آباد سے تعلق رکھنے والے طالب علم کامران خان نے کہا کہ ہم سات بہن بھائی ہیں اور الحمدللہ سب تعلیم حاصل کر رہے ہیں۔ لیپ ٹاپ سکیم کا پہنچنا کسی معجزے سے کم نہیں۔ 2024ء میں لیپ ٹاپ حاصل کرنے والے محمد رفیق آفریدی نے کہا کہ مجھے فخر ہے کہ میں ایک شہید کا بیٹا ہوں۔ شہید والد کے مشن کو پورا کرنے میں وزیراعظم شہباز شریف نے میرا ساتھ دیا ہے۔ لیپ ٹاپ سکیم نے تعلیم کے حصول میں سہولت فراہم کی۔ یونیورسٹی آف انجنیئرنگ اینڈ ٹیکنالوجی ٹیکسلا کی طالبات سمیہ ضیاء اور عائشہ ضیاء نے بھی وزیراعظم لیپ ٹاپ سکیم کی تعریف کی اور اسے ہونہار طلبہ و طالبات کے لئے تاریخی اقدام قرار دیا۔ تقریب میں وزیراعظم محمد شہباز شریف نے ہونہار طلباء و طلبات میں لیپ ٹاپ بھی تقسیم کئے۔ علاوہ ازیں وزیراعظم شہبازشریف نے صدر آصف زرداری سے ملاقات کی جس میں سیاسی امور اور پاک افغان کشیدگی پر تفصیلی بات چیت کی گئی۔ ذرائع کے مطابق وزیراعظم شہبازشریف اور صدر آصف علی زرداری کی ملاقات ایوان صدر میں ہوئی۔ ملاقات میں بلاول بھٹو زرداری، وزیر داخلہ محسن نقوی، راجہ پرویز اشرف، طارق فضل چوہدری، فاروق ایچ نائیک اور شیری رحمان، رانا ثناء اللہ، اعظم نذیرتارڑ نے بھی شرکت کی جبکہ نائب وزیراعظم اسحاق ڈار ویڈیولنک پر ملاقات میں شریک ہوئے۔ ذرائع کا کہنا ہے کہ وزیراعظم شہبازشریف نے صدر مملکت کو دورہ سعودی عرب کے حوالے سے اعتماد میں لیا۔ ملاقات میں آزاد کشمیر کی موجودہ سیاسی صورتحال پر تبادلہ خیال کیا گیا۔ ذرائع کے مطابق ملاقات میں نئے وزیراعظم آزاد کشمیرکے نام اور حکومت سازی پر بھی بات چیت کی گئی۔ دریں اثنا وزیراعظم نے ایف بی آر میں اصلاحات کے حوالے سے جائزہ اجلاس کی صدارت کی۔ 2018ء میں ہونے والے سیلز ٹیکس فراڈ میں ملوث افراد کیخلاف 3 ہفتوں میں رپورٹ طلب کر لی۔ شہبازشریف نے ہدایت کی کہ پرال کے نظام کا انٹرنیشنل فرم سے فرانزک کرایا جائے۔ اجلاس میں ورلڈ بنک کانفرنس میں شمولیت کے حوالے سے وزیراعظم کو بریفنگ دی گئی۔ وزیراعظم نے ماضی میں سیلز ٹیکس میں کئے گئے فراڈ پر برہمی کا اظہار کیا۔ فراڈ اداروں، کمپنیوں اور افراد کی شناخت کے لئے تحقیقات کی ہدایت کی۔ دریں اثناء وزیراعظم شہبازشریف سے وزیر داخلہ محسن نقوی نے ملاقات کی جس میں باہمی دلچسپی کے امور پر بات چیت کی گئی۔ محسن نقوی نے اپنے حالیہ دورہ ایران اور عمان سے متعلق آگاہ کیا۔ علاوہ ازیں وزیراعظم سے بلوچستان کے ممبر قومی اسمبلی میاں خان بگٹی بھی ملے۔ ملاقات کے دوران حلقے کے مسائل اور دیگر امور پر گفتگو کی گئی۔
رواں سال کا طاقتور ترین طوفان کیریبین جزائر پر اثر انداز ہونا شروع، اب تک 3 افراد ہلاک