مچل اسٹارک ’ماڈرن۔ ڈے گریٹ‘ ہیں، وسیم اکرم
اشاعت کی تاریخ: 12th, July 2025 GMT
اسلام آباد (اُردو پوائنٹ ۔ DW اردو۔ 12 جولائی 2025ء) پاکستان کے فاسٹ بولنگ لیجنڈ وسیم اکرم نے آسٹریلیا کے مایہ ناز کھلاڑی مچل اسٹارک کو 100 ٹیسٹ میچز مکمل کرنے پر ''جدید دور کا عظیم باؤلر‘‘ قرار دے دیا ہے۔
'کنگ آف سونگ‘ وسیم اکرم نے ہفتے کے دن کہا کہ آج کل کی کرکٹ میں کسی کھلاڑی کا سو ٹیسٹ میچ کھیلنا کوئی آسان کام نہیں بالخصوص فاسٹ بولر کے لیے۔
اسٹارک کا موازنہ اکثر وسیم اکرم سے کیا جاتا ہے۔ دونوں ہی بائیں ہاتھ سے تیز بولنگ کرانے والے اسٹار کھلاڑیوں میں شمار کیے جاتے ہیں۔ تاہم کرکٹ ناقدین کا کہنا ہے کہ بائیں ہاتھ سے گیند کرانے والے فاسٹ بولرز میں وسیم اکرم جیسا گیند باز تاریخ میں نہیں آیا ہے۔
مچل اسٹارک ہفتے کے روز سے ویسٹ انڈیز میں شروع ہونے والے ایک ٹیسٹ میچ میں یہ سنگ میل عبور کر رہے ہیں۔
(جاری ہے)
آسٹریلیا کی قومی کرکٹ ٹیم تین ٹیسٹ میچوں کی سیریز کے لیے کیریبین میں موجود ہے، جہاں اس سیریز کا آخری میچ جیمکا میں کھیلا جا رہا ہے۔انسٹھ سالہ وسیم اکرم نے اے ایف پی سے گفتگو کرتے ہوئے کہا، ''آج کے دور میں 100 ٹیسٹ میچز کھیلنا بہت بڑی بات ہے، میں اسٹارک کو مبارکباد پیش کرتا ہوں۔ اس (تسلسل) سے ان کی صلاحیت اور عزم کا پتا چلتا ہے۔
‘‘ کتنے کھلاڑی سو ٹیسٹ میچ کھیل چکے ہیں؟35 سالہ اسٹارک یہ سنگ میل عبور کرنے والے دنیا کے 83 ویں اور آسٹریلیا کے 16ویں کھلاڑی بنیں گے جبکہ آسٹریلیا کی جانب سے یہ کارنامہ انجام دینے والے وہ صرف دوسرے فاسٹ باؤلر ہیں۔ اسٹارک سے قبل گلین میکگرا یہ اعزاز حاصل کر چکے ہیں۔
وسیم اکرم نے مزید کہا، ''100 ٹیسٹ کھیلنا ثابت کرتا ہے کہ اسٹارک کتنا مستقل مزاج رہا ہے اور یہ بھی کہ اس کی ترجیحات کیا ہیں یعنی ریڈ بال کرکٹ۔
‘‘وسیم اکرم کے بقول اسٹارک نے ٹی ٹوئنٹی اور لیگ کرکٹ بھی کھیلی ہے، مگر ان کی اصل پہچان ٹیسٹ کرکٹ ہے اور ان نزدیک وہ ''جدید دور کے عظیم باؤلر‘‘ ہیں۔
اسٹارک اب تک 395 ٹیسٹ وکٹیں حاصل کر چکے ہیں اور امکان ہے کہ وہ اپنے 100ویں ٹیسٹ میں 400 وکٹوں کا سنگ میل بھی عبور کر لیں گے۔ ان کا اسٹرائیک ریٹ وسیم اکرم کے قریب ہی ہے۔
سن 2002 میں ریٹائرمنٹ لینے والے وسیم اکرم نے 104 ٹیسٹ میچز میں414 وکٹیں حاصل کی تھیں۔
وسیم اکرم نے کہا کہ اپنے کیریئر میں انہوں نے اور اسٹارک دونوں نے ہی ''جسم کے ہر جوڑ اور ہر حصے میں چوٹیں برداشت کی ہیں‘‘۔
سابق ٹیسٹ کپتان وسیم اکرم کا کہنا تھا، ''لوگ اکثر ہمارا (وسیم اکرم اور مچل اسٹارک کا) تقابلی جائزہ کرتے ہیں، مگر ہم مختلف ادوار میں کھیلے ہیں۔ ان (اسٹارک) کے پاس رفتار بھی ہے، سوئنگ بھی ہے اور خاص طور پر نئی گیند سے وہ نئے بلے بازوں کے خلاف بڑی ذہانت سے بولنگ کر رہے ہیں۔
ادارت: عاصم سلیم
.
ذریعہ
ذریعہ: UrduPoint
کلیدی لفظ: تلاش کیجئے وسیم اکرم نے مچل اسٹارک ٹیسٹ میچ
پڑھیں:
ایشین گیمز 2026 :کرکٹ مقابلوں کے شیڈول اور گروپس کا اعلان
لاہور(نیوز ڈیسک)ایشین گیمز 2026 کے مردوں اور خواتین کے کرکٹ مقابلوں کے لیے ڈراز اور گروپس کا اعلان کر دیا گیا ہے، جس کے تحت پاکستان، بھارت، بنگلا دیش اور سری لنکا کی مردوں کی ٹیموں نے براہِ راست ناک آؤٹ مرحلے کے لیے کوالیفائی کر لیا ہے۔
ایشین گیمز 2026 کے کرکٹ مقابلوں کے ڈراز کا باضابطہ اعلان کر دیا گیا ہے، جس میں مردوں اور خواتین دونوں ایونٹس کے شیڈول، گروپس اور ناک آؤٹ مرحلے کی تفصیلات سامنے آ گئی ہیں۔
مردوں کے ایونٹ میں مجموعی طور پر 10 ٹیمیں حصہ لیں گی، جبکہ خواتین کے مقابلوں میں 8 ٹیمیں ٹائٹل کے لیے مدمقابل ہوں گی۔ مردوں کے مقابلوں میں پاکستان، بھارت، بنگلا دیش اور سری لنکا کو عالمی درجہ بندی کی بنیاد پر براہِ راست ناک آؤٹ مرحلے میں جگہ دی گئی ہے۔
دوسری جانب افغانستان، ہانگ کانگ، جاپان، ملائیشیا، نیپال اور عمان ابتدائی مرحلے میں ایک دوسرے کے خلاف کھیلیں گے، جہاں سے چار بہترین ٹیمیں ناک آؤٹ مرحلے میں پہنچ کر پاکستان، بھارت، بنگلہ دیش اور سری لنکا کا مقابلہ کریں گی۔
ابتدائی مرحلے میں گروپ اے میں افغانستان، جاپان اور نیپال شامل ہیں، جبکہ گروپ بی میں ہانگ کانگ، ملائیشیا اور عمان کو رکھا گیا ہے۔ دونوں گروپس سے ٹاپ دو ٹیمیں اگلے مرحلے کے لیے کوالیفائی کریں گی۔
خواتین کے ایونٹ کا آغاز براہِ راست کوارٹر فائنلز سے ہوگا۔ پہلے کوارٹر فائنل میں بھارت کا مقابلہ جاپان سے ہوگا، جبکہ بنگلا دیش کا سامنا چین سے ہوگا۔ سری لنکا اور ملائیشیا بھی آمنے سامنے آئیں گے، جبکہ پاکستان کی خواتین ٹیم تھائی لینڈ کے خلاف میدان میں اترے گی۔
خواتین کے کرکٹ مقابلے 17 سے 22 ستمبر تک جاری رہیں گے، جبکہ مردوں کے میچز 24 ستمبر سے یکم اکتوبر تک کھیلے جائیں گے۔
تمام میچز جاپان کے شہر ناگویا میں منعقد ہوں گے اور ٹورنامنٹ ٹی20 فارمیٹ میں کھیلا جائے گا۔
واضح رہے کہ ایشین گیمز 2023 میں بھارت نے مردوں اور خواتین دونوں کیٹیگریز میں سونے کے تمغے اپنے نام کیے تھے۔ مردوں کے فائنل میں افغانستان نے پہلے بیٹنگ کرتے ہوئے 18.2 اوورز کھیلے تھے کہ بارش کے باعث مقابلہ مکمل نہ ہو سکا، جس کے بعد بہتر عالمی درجہ بندی کی بنیاد پر بھارت کو گولڈ میڈل دے دیا گیا۔
اسی طرح خواتین کے فائنل میں بھارت نے سری لنکا کو 19 رنز سے شکست دے کر چیمپئن بننے کا اعزاز حاصل کیا۔ ایشین گیمز 2026 میں بھی بھارتی ٹیمیں اپنے اعزاز کا دفاع کرنے کی کوشش کریں گی، جبکہ پاکستان سمیت دیگر ایشیائی ٹیمیں ٹائٹل کے حصول کے لیے بھرپور مقابلہ کریں گی۔
مزید پڑھیں۔سوناہزاروں روپے سستا، ایک دن کی بڑی کمی نے مارکیٹ ہلا دی
بھارت سے جنگ اور افغانستان میں کارروائی خارج ازامکان نہیں، وزیردفاع