اسرائیل فلسطین تنازعہ کے دو ریاستی حل کے لیے ’نیو یارک اعلامیہ‘ جاری
اشاعت کی تاریخ: 31st, July 2025 GMT
اسلام آباد (اُردو پوائنٹ ۔ UN اردو۔ 31 جولائی 2025ء) فلسطینی مسئلے کے دو ریاستی حل سے متعلق بین الاقوامی کانفرنس کے شرکا نے غزہ میں جنگ کے خاتمے، اسرائیل فلسطین تنازع کے منصفانہ، پُرامن اور دیرپا حل کے لیے متحد ہو کر کام کرنے اور دونوں فریقین سمیت خطے بھر کے لوگوں کے لیے بہتر مستقبل کی تعمیر میں تعاون پر اتفاق کیا ہے۔
اقوام متحدہ کے ہیڈکوارٹر میں فرانس اور سعودی عرب کی مشترکہ میزبانی میں منعقد ہونے والی سہ روزہ کانفرنس کے آخری روز 'نیویارک اعلامیہ' جاری کیا گیا جس میں اسرائیل اور فلسطین کے مابین آٹھ دہائیوں سے جاری تنازع اور غزہ کی جنگ کو ختم کرنے کا مرحلہ وار مںصوبہ پیش کیا گیا ہے۔
اس میں کہا گیا ہے کہ مسئلے کا پائیدار حل ایک آزاد اور غیرعسکری فلسطینی ریاست کا تقاضا کرتا ہے جو اسرائیل کے ساتھ پرامن بقائے باہمی سے رہے۔
(جاری ہے)
'فلسطینی مسئلے کے پر امن تصفیے اور اس کے دو ریاستی حل پر عملدرآمد' کے موضوع پر ہونے والی اس کانفرنس کا مقصد فلسطینی علاقوں پر اسرائیلی قبضے کا خاتمہ اور آزاد و خودمختار فلسطینی ریاست کا قیام ممکن بنانا تھا۔
دلیرانہ اقدامات کی ضرورتسعودی عرب، فرانس اور کانفرنس کے موضوع سے متعلقہ ورکنگ گروپس میں شامل ممالک* کی جانب سے سعودی وزیر خارجہ فیصل بن فرحان نے 'نیویارک اعلامیہ' اور اس سے ملحقہ دستاویز کی توثیق کی۔
اس موقع پر ان کا کہنا تھا کہ کانفرنس کے نتائج سیاسی، انسانی، معاشی، قانونی، امدادی اور تزویراتی حوالے سے جامع تجاویز کی عکاسی کرتے ہیں اور ان سے ایک ایسا مربوط اور قابل عمل فریم ورک طے پاتا ہے جس کے ذریعے دو ریاستی حل پر عملدرآمد اور خطے بھر کے لیے امن و سلامتی کا حصول ممکن ہے۔
انہوں نے تمام رکن ممالک پر زور دیا کہ وہ ستمبر میں اقوام متحدہ کی جنرل اسمبلی کے 79ویں اجلاس کے اختتام سے قبل کانفرنس کی حتمی دستاویز کی منظوری دیں۔
کانفرنس کے پہلے روز اقوام متحدہ کے سیکرٹری جنرل انتونیو گوتیرش نے خبردار کیا تھا کہ اسرائیل۔فلسطین تنازع نازک موڑ پر پہنچ چکا ہے۔ دو ریاستی حل کو بچانے اور امن کو سبوتاژ کرنے کی منطم کوششوں کو روکنے کے لیے دلیرانہ سیاسی اقدامات کی ضرورت ہے۔
نیویارک اعلامیہ کے اہم نکاتکانفرنس کے اختتام پر جاری ہونے والی حتمی دستاویز میں ہر فریق کی جانب سے شہریوں کے خلاف ہر طرح کے حملوں کی مذمت کی گئی ہے جن میں دہشت گردی کے تمام واقعات، اندھا دھند حملے، شہری تنصیبات کے خلاف ہر طرح کی کارروائیاں، اشتعال انگیزی، تشدد کی ترغیب اور تباہی شامل ہیں۔
اس میں کہا گیا ہے کہ شہریوں کو یرغمال بنانا بین الاقوامی قانون کے تحت ممنوع ہے۔
علاوہ ازیں، اس میں لوگوں کو ان کے علاقوں سے بیدخل کیے جانے سمیت فلسطینیوں کے علاقوں یا آبادی میں تبدیلیوں کے مقصد سے اٹھائے جانے والے تمام اقدامات کو مسترد کیا گیا ہے جو بین الاقوامی انسانی قانون کی کھلی پامالی کے زمرے میں آتے ہیں۔اعلامیے میں حماس کی جانب سے 7 اکتوبر کو اسرائیلی شہریوں کے خلاف حملوں اور اسرائیل کی جانب سے غزہ میں شہریوں اور شہری تنصیبات کو نشانہ بنائے جانے اور انسانی امداد کی فراہمی پر پابندیوں کی مذمت کی گئی ہے جس کے نتیجے میں غزہ کے لوگوں کو تباہ کن انسانی بحران درپیش ہے۔
اس میں کہا گیا ہے کہ جنگ، قبضہ، دہشت گردی اور جبری گمشدگیاں امن و سلامتی نہیں لا سکتیں اور اس کا حصول صرف سیاسی طریقہ کار کے ذریعے ہی ممکن ہے۔
اعلامیہ کے مطابق، اسرائیل۔فلسطین تنازع کا خاتمہ اور دو ریاستی حل پر عملدرآمد ہی فلسطینیوں کی جائز خواہشات کی تکمیل کا واحد راستہ ہے۔ ہر طرح کے تشدد اور غیرریاستی عناصر کے تخریبی کرداروں کا خاتمہ، دہشت گردی کی روک تھام اسی کے ذریعے ہی ممکن ہے اور یہی راستہ دونوں طرف کے لوگوں کو سلامتی اور دونوں ریاستوں کو خودمختاری، امن، خوشحالی اور خطے کے ممالک سے بہتر تعلقات کی ضمانت دیتا ہے۔
اعلامیے میں فلسطینی مسئلے کو پر امن طور سے طے کرنے اور دو ریاستی حل پر عملدرآمد کے لیے ٹھوس، مخصوص وقت میں اور ناقابل واپسی اقدامات اور موثر طریقوں سے جلد از جلد ایک پرامن، آزاد، جمہوری، خودمختار اور معاشی اعتبار سے قابل عمل فلسطینی ریاست کے قیام کے لیے کوششوں کا عزم کیا گیا ہے۔
*ورکنگ گروپ کے ارکان میں برازیل، مصر، انڈونیشیا، آئرلینڈ، جاپان، اٹلی، اردن، میکسیکو، ناروے، قطر، سینیگال، سپین، ترکی، برطانیہ، یورپی یونین اور عرب لیگ کے ممالک شامل ہیں۔
.ذریعہ: UrduPoint
کلیدی لفظ: تلاش کیجئے دو ریاستی حل پر عملدرآمد اسرائیل فلسطین تنازع کانفرنس کے کی جانب سے کیا گیا اور دو گیا ہے کے لیے اور اس
پڑھیں:
2 ریاستی حل کے حامی، اسرائیل کو تسلیم کرنے کا منصوبہ نہیں: اسحاق ڈار
نیو یارک+اسلام آباد (این این آئی+خبر نگار خصوصی) نائب وزیراعظم اور وزیر خارجہ اسحاق ڈار نے کہا ہے کہ اسرائیل کو تسلیم کرنے کا کوئی منصوبہ نہیں‘وقت آگیا ہے فلسطینی ریاست کواقوام متحدہ کی مکمل رکنیت دی جائے‘پاکستان دو ریاستی حل کی حمایت کرتا ہے، فلسطینی سرزمین پر اسرائیلی قبضہ فوری ختم ہونا چاہیے‘ بھارت جب بھی کمپوزٹ ڈائیلاگ کرنا چاہے گا ہم تیار ہیں‘ بھارت سندھ طاس معاہدے کو یک طرفہ طور پر ختم نہیں کرسکتا، تین دریاؤں پر ہمارا حق ہے۔اقوام متحدہ میں اسرائیل اور فلسطین کیلئے دو ریاستی حل سے متعلق کانفرنس سے خطاب اور بعدازاں پریس کانفرنس کرتے ہوئے نائب وزیراعظم اسحاق ڈار نے کہا کہ یو این کانفرنس میں پاکستان کی جانب سے بھرپور بیان دیا ہے، ہم نے فلسطین کے ساتھ کشمیر کے مسئلے کو اجاگر کیا۔ انہوں نے کہا کہ پاکستان دو ریاستی حل کی حمایت کرتا ہے، فلسطینی سرزمین پر اسرائیلی قبضہ فوری ختم ہونا چاہیے۔ غزہ میں فوری طور پر جنگ بندی ہونی چاہیے۔وزیر خارجہ کا کہنا ہے کہ امریکی وزیر خارجہ سے ملاقات بہت مفید رہی، ہم نے باور کرایا کہ مذاکرات کے بغیر خطے میں امن ممکن نہیں، بھارت کے ساتھ جنگ بندی کی پیش کش میں ڈائیلاگ کی بھی بات ہوئی تھی۔اسحاق ڈار نے کہا کہ بھارت کے ساتھ ڈائیلاگ ہوگا تو جامع ڈائیلاگ ہوگا، بھارت جب بھی کمپوزٹ ڈائیلاگ کرنا چاہے گا ہم تیار ہیں۔انہوں نے مزید کہا کہ بھارت سندھ طاس معاہدے کو یک طرفہ طور پر ختم نہیں کرسکتا، تین دریاؤں پر ہمارا حق ہے۔ پانی کا رخ موڑ دیا گیا تو ہم قبول نہیں کریں گے۔نائب وزیراعظم کا کہنا ہے کہ او آئی سی 57 ممالک کی تنظیم ہے جس کے ہم بانی ممبر ہیں، اسلاموفوبیا پر او آئی سی کا مستقبل مندوب مقرر کروایا ہے۔ان کا کہنا ہے کہ ہم نے تجارت اور ٹیرف سے متعلق بھی بات کی، مارکو روبیو سے آج بھی ٹیلی فون پر بات ہوئی، ٹیرف پر معاہدے کے لیے وزیر خزانہ محمد اورنگزیب جلد امریکا پہنچیں گے۔اسحاق ڈار نے مزید کہا کہ امریکا کا دورہ ہر حوالے سے کامیاب رہا ہے، امریکا سے دو طرفہ اور علاقائی امور پر کھل کر بات ہوئی۔انہوں نے کہا کہ امریکا میں سعودی عرب، برطانیہ، بنگلادیش، کویت، فلسطین کے ساتھ دو طرفہ میٹنگز ہوئیں، یو این اجلاس کے سائیڈ لائنز پر 8 دو طرفہ ملاقاتیں ہوئی ہیں۔اسرائیل اور فلسطین کیلئے دو ریاستی حل سے متعلق کانفرنس سے خطاب میں نائب وزیراعظم اسحاق ڈار نے کہا ہے کہ اب وقت آگیا ہے کہ فلسطینی ریاست کو اقوام متحدہ کی مکمل رکنیت دی جائے۔ انہوں نے کہا کہ غزہ میں مستقل جنگ بندی، خوراک کی فراہمی، جنگی جرائم پر قرار واقعی سزا اور انسانیت کیخلاف جرائم کا سلسلہ بند کرایا جائے۔انہوں نے کہا کہ مسئلہ فلسطین 75 سال سے زائد عرصے سے حل طلب ہے، فلسطین کا مسئلہ حل نہ ہونا صرف سیاسی ناکامی نہیں، اس کی اور بھی وجوہات ہیں۔انسانی جان کا قتل بین الاقوامی قوانین کی خلاف ورزی ہے۔اپنے خطاب میں وزیر خارجہ اسحاق ڈار نے کہا کہ پاکستان فلسطین کے حق خودارادیت کی حمایت جاری رکھے گا۔قبل ازیں نائب وزیراعظم و وزیر خارجہ سینیٹر اسحاق ڈار نے کویت کے وزیر خارجہ عبداللہ الیحیی سے ملاقات کی۔دفتر خارجہ کے مطابق اقوام متحدہ میں 2 ریاستی حل سے متعلق بین الاقوامی کانفرنس کے موقع پر دونوں رہنماں کے درمیان ملاقات ہوئی جس میں پاکستان اور کویت کے درمیان دوطرفہ تعلقات کو مزید مضبوط بنانے کے طریقوں پر تبادلہ خیال ہوا۔دونوں رہنماں نے تجارت، سرمایہ کاری، توانائی، غذائی تحفظ اور دفاع کے شعبوں میں تعاون بڑھانے پر زور دیا۔اسحاق ڈار اور کویتی وزیر خارجہ نے اقوام متحدہ اور او آئی سی سمیت کثیرالجہتی فورمز پر قریبی تعاون جاری رکھنے کے عزم کا اعادہ کیا، دونوں رہنماں نے اعلی سطحی تبادلوں کے جلد انعقاد پر اتفاق کیا تاکہ دوطرفہ روابط کو مزید گہرا کیا جا سکے۔ملاقات کے دوران غزہ میں اسرائیلی جارحیت اور بگڑتی انسانی صورت حال پر گہری تشویش کا اظہار کرتے ہوئے دونوں وزرائے خارجہ نے مسئلہ فلسطین کے منصفانہ اور دیرپا حل کی ضرورت پر زور دیا۔اس موقع پر امید ظاہر کی گئی کہ نیویارک کانفرنس کے نتائج 2 ریاستی حل کے عملی نفاذ میں مددگار ثابت ہوں گے۔ علاوہ ازیں اسحاق ڈار نے امریکی وزیر خارجہ مارکو روبیو سے ٹیلی فون پر بات کی۔ دونوں رہنماؤں نے واشنگٹن میں گزشتہ جمعہ کو ہونیوالی ملاقات کی پیش رفت کا جائزہ لیا۔ باہمی تعلقات کے اہم امور بشمول ٹیرف‘ باہمی دلچسپی کے علاقائی اور عالمی مسائل پر تبادلہ خیال کیا۔ دریں اثناء اسحاق ڈار سے بنگلہ دیش کے وزیر خارجہ کے مشیر محمد توحید حسین نے ملاقات کی۔ اسرائیلی جارحیت اور انسانی بحران پر گہری تشویش کا اظہار کیا۔ یہ ملاقات نیویارک میں اقوام متحدہ کے تحت دو ریاستی حل پر منعقدہ بین الاقوامی کانفرنس کے موقع پر ہوئی۔نائب وزیراعظم اسحاق ڈار امریکہ اور اقوام متحدہ دورہ مکمل کر کے وطن واپس رورانہ ہو گئے۔ انہوں نے دورے کے دوران امریکی وزیر خارجہ، سعودیہ، مصر سمیت آٹھ ممالک کے وزرائے خارجہ سے دو طرفہ ملاقاتیں کیں۔ سلامتی کونسل اجلاس کی تین بار صدارت کی اسحاق ڈار کی زیر صدارت پاکستان کی پیش کردہ قرارداد سلامتی کونسل سے منظور ہوئی۔
شاہینوں کا پلٹ کا وار، بنگلہ دیش کو 74 رنز سے شکست دیدی