ہم نے ایک خواب دیکھا ہے جو غریب تو نہیں لیکن عجیب بہت ہے کئی خواب شناسوں سے تعبیر پوچھی کوئی تسلی بخش تعبیر کسی نے نہیں بتائی۔
اس لیے اسے مشتہر کررہے ہیں کیونکہ ہمیں اچھی طرح معلوم ہے کہ پاکستان میں ایک سے بڑھ کر ایک بزرگ مہر، لقمان زمان اور سقراط بقراط زمان پڑا ہوا ہے۔جو اگرچہ آج کل ٹی وی چینلوں اور اخبارات و اشتہارات میں بہت زیادہ مصروف ہیں کیونکہ انھوں نے اس بگڑی ہوئی دنیا اور بگڑے ہوئے لوگوں کو راہ راست پر چلانے کے لیے کنٹریکٹ لیا ہوا ہے کیونکہ ان میں سے ہر ایک کا یہ خیال ہے کہ اس کے علاوہ باقی سارے لوگ بگڑچکے ہیں اور اگر ان کو راہ راست پر نہیں لایا گیا تو یہ دنیا غلط راہ چلتے چلتے کسی کنوئیں یا کھائی میں گرجائے گی۔ویسے ان دانا دانشوروں، سقراطوں، بقراطوں اور بزرگ مہروں کے خلوص اور بشری ہمدردی بلکہ ’’یک جہتی‘‘ کی داد نہ دینا شدید بے انصافی ہوگی کہ دوسروں کو سدھارنے کے جوش میں یہ خود کو بھی بھول جاتے ہیں، مطلب اپنی طرف ان کا دھیان ہی نہیں کیونکہ ساری توجہ دوسروں کو دیے ہوئے ہیں۔
اس لیے ہمیں تھوڑا ڈاؤٹ ہے کہ شاید وہ دنیا اور پاکستان اور پاکستان کے ہر فرد کو راہ راست دکھانے میں اتنے مصروف ہیں کہ شاید ہمارے خواب کے لیے وقت نہ نکال سکیں لیکن پھر بھی ہرچہ بادا باد کہتے ہوئے ہم اپنا خواب بیان کیے دیتے ہیں۔ہم نے خواب میں دیکھا کہ اچانک نہ جانے کہاں سے زمین سے،آسمان سے یا فضا سے یا عالم غیب سے سے ایک نہایت ہی لمبا چوڑا اونچے بلند وبالا ایک عجیب و غریب انسان کا ظہور ہوتا ہے۔جسم پر دنیا میں پیدا ہونے والا ہر اسلحہ سجائے ہوئے ہے، ہاتھ اتنے لمبے ہیں کہ ایک ہاتھ خیبر کے پہاڑ پر ہے اور دوسرا کراچی کے سمندر میں کچھ کررہا ہے، ایک پاؤں چترال میں ہے تو دوسرا بلوچستان میں سمندر کے کنارے ٹکا ہوا ہے۔
اس نے سب سے پہلے تو ایک ہاتھ بڑھاکر ساری سیاسی پارٹیوں کو خس وخاشاک کی طرح سمیٹا پھر اپنی دونوں ہتھیلیوں میں مسل کر کوفتہ بیختہ کرتے ہوئے کہا کہ جب تم ایک ہتھیلی کے چٹے بٹے ہو ایک پیڑ کی ٹہنیاں ہو پھر ایک ہی بدبو دار تالاب کا پانی ہو تو الگ الگ کیوں ہو، پھر ان کو یکجا کرکے جو پھینکا تو سب کے سب بحر مردار میں جاگرے۔پھر اس نے لیڈروں کو سمیٹ کر صحرائے اعظم میں الگ الگ پھینک دیا کہ خلق خدا کے دماغ اپنے بیانوں سے خراب کرنے کی بجائے اب یہاں دیتے رہو بیان، جتنے مرضی ہوں۔ پھر اس نے اپنی گرجدار اور فل شگاف آواز سے کہا کہ اب جب شر کے سارے کانٹے نکل گئے۔
کرسی کی کٹیا کے سوئیمر میں حصہ لینے والے فنا ہوگئے۔تو انصاف کا ترازو اٹھانے والے اور عدل کا بول بالا کرنے والے صرف اور صرف ان لوگوں کے مقدمات سنیں گے جو اس ملک کے اصلی مالک ہیں جن کے خون پسینے سے ان کی تنخوائیں آتی ہیں، جو انصاف، عدل اور قانون سے مکمل طور پر محروم کیے جاچکے ہیں۔
کیونکہ ان مقامات پر صرف سیاستدان قابض ہوچکے ہیں اور دن رات ہر طرف ہرجگہ ہر وقت صرف ’’کرسی‘‘ کے مقدمات چل رہے ہیں جو مقدمات ہیں ہی نہیں، ڈاکوؤں کے درمیان مال مسروقہ کی تقسیم کے جھگڑے ہیں اس کے بعد اس نے دونوں ہاتھ بڑھائے اور مختلف مقامات سے ناصحوں، واعظوں تلقین سازوں اور رہبر و رہنماؤں کو اکٹھا کر اپنے زانوں پر بٹھایا اور ان سے کہا کہ تم اچھے لوگ ہو تمہارے اندر اہل دل اور اہل درد بھی ہیں لیکن سب سے بڑی بات یہ ہے کہ تم شدید بیمار ہوں۔تمہاری دور کی آئی سائٹ تو بے پناہ ہے لیکن قریب کی بینائی صفر سے بھی بہت نیچے ہے۔اس لیے میں تمہیں سزا نہیں دوں گا بلکہ وہی کروں گا جو تم کرتے ہو یعنی تمہیں راہ راست دکھاوں گا۔
تسم کہ بہ کعبہ نہ رسیدی اے اعرابی
کیں راہ کہ تومی رومی بہ ترکستان است
میں تمہیں مشورہ دوں گا کہ’’دوربینی عینک‘‘ اتارو اور ’’خوردبینی عینک‘‘ لگاؤ۔دور دور کے لوگوں کے عیب دور کرنے کی بجائے اپنے عیب دور کرو۔اور اگر تم نے ایسا کردیا صرف ایک ایک آدمی یعنی خود کو سدھار لیا تو سمجھو ساری دنیا سدھر گئی لوگ تم کو دیکھ دیکھ کر بغیر کہے سنے سدھرتے چلے جائیں گے اور اگر تم خود کو چھوڑ کر دوسروں کو سدھارنے میں ساری عمر بھی صرف کرو تو ضروری نہیں کہ کسی ایک کو سدھار سکو۔اور اس طرح تم کم سے کم ایک کو یقینی طور پر سدھار لوگے۔خواب یہاں تک پہنچا تھا کہ ہمارے گاؤں کی ساری مساجد کے لاؤڈ اسپیکر جاگ اٹھے اور ہمیں بھی جگا دیا اب ہماری سمجھ میں نہیں آتا کہ
کس سے پوچھیں کہ وصل میں کیا ہے
ہجر میں کیا نہیں کہ تم سے کہیں
سب سمجھتے ہیں اور سب چپ ہیں
کوئی کہتا نہیں کہ تم سے کہیں
.ذریعہ: Express News
پڑھیں:
خطے کے استحکام کا سوال
ترجمان دفتر خارجہ کا کہنا ہے کہ پاکستان نے طورخم سرحد کو صرف افغان پناہ گزینوں کی واپسی کے لیے دوبارہ کھولا ہے، جب تک صورتحال میں بہتری نہیں آتی، سرحدی مقامات کارگو ٹرکوں اور عام مسافروں کے لیے بند رہیں گے۔
اس وقت سیکڑوں افغان پناہ گزیں طورخم امیگریشن سینٹر پہنچ گئے ہیں اور امیگریشن عملہ ضروری کارروائی کے بعد انھیں افغانستان جانے کی اجازت دے رہا ہے۔ دوسری جانب وزیرِ دفاع خواجہ آصف نے افغان طالبان کے ترجمان کے گمراہ کن اور بدنیتی پر مبنی بیانات پر شدید ردِ عمل دیتے ہوئے کہا ہے کہ پاکستان اور خصوصاً خیبر پختونخوا کے عوام افغان طالبان کی سرپرستی میں جاری بھارتی پراکسیوں کی دہشت گردی سے بخوبی واقف ہیں اور اس بارے میں کوئی ابہام نہیں۔
ہم اس حقیقت سے انکار نہیں کرسکتے کہ پاکستان اور افغانستان کے درمیان کشیدگی اپنے عروج پر ہے۔ دونوں ممالک کے درمیان امن مذاکرات بار بار ناکام ہو رہے ہیں۔ جنگ کے حالات اور بڑھتی ہوئی ہلاکتوں کے درمیان، پاکستان کی وزارت خارجہ نے 6 نومبرکو جنگ بندی کے مذاکرات کے لیے اپنی توقعات کا اظہارکیا ہے۔
پاکستان اور افغانستان کے درمیان چند روز قبل ترکیہ میں امن مذاکرات ہوئے تھے، تاہم یہ مذاکرات طالبان کی ہٹ دھرمی کے باعث بری طرح ناکام رہے تھے۔ قطر اور ترکیہ کی ثالثی میں استنبول میں چار روزہ مذاکرات ہوئے لیکن وہ بے نتیجہ رہے۔
بھارت کے بعد افغانستان نے جس طرح پاکستانی سرحدوں کو پامال کیا اور پاکستانی افواج نے جوابی حملہ کر کے طالبان اور فتنہ الخوارج اور ان کی سرحدی چوکیوں کو جس طرح تباہ کیا۔ اس سے انھیں حقیقت کا خاصا ادراک ہوگیا ہے لیکن بھارتی آشیر باد، فنڈنگ، سہولت کاری صورتحال کو نارمل ہونے میں حائل ہو رہی ہے۔ افغان انڈیا گٹھ جوڑ خطے میں امن کی بجائے بدامنی کا باعث بن رہا ہے، افغان ایک سیاہ تاریخ رقم کر رہے ہیں اور یہ تاریخ اوراقوام عالم میں احسان فراموش محسن کش کے طور پر یاد رکھے جائیں گے۔
پاکستان نے 40 سالوں تک افغان مہاجرین کو پناہ دے کر کاروبار تعلیم صحت کے مواقعے فراہم کر کے انھیں اپنے شہریوں کے برابر حقوق و سہولیات مہیا کیں اور وطن عزیز میں بطور مہمان رکھا مگر ہماری مہمان نوازی کے جواب میں یہ لوگ واپس جاتے جاتے، اپنے گھروں خیموں یہاں تک مساجد کو بھی شہید کرکے جا رہے ہیں جو کہ اسلام دشمنی اور احسان فراموشی کی بد ترین مثال ہے۔
افغانوں کے انخلاء کے بعد حکومت پاکستان کو اس بات پر بھی خاص نظر رکھنی ہوگی یہ لوگ دوبارہ پاکستان واپس نہ آجائیں تو اس کے لیے ان کا ڈیجٹیل ریکارڈ بھی رکھنا ضروری ہے۔ اب افغانستان کا چترال سے نکلنے والے دریائے کنہڑکے مقام پر ڈیم بنانے کا اعلان کرنا، بھارت کا کابل میں سفارتخانہ کھولنا، ہندو بنیے سے پیسے لے کر پاکستان کے خلاف اقدامات کرنا اور بھارت کے پیسوں سے پاکستان میں من پسند شریعت کے نفاذ کے دعوے، دین اسلام ،قرآن و سنت اور اللہ کے فرمان کے منافی سرگرمیاں ہیں۔
آج افغانوں کو اپنی منفی سرگرمیوں اور شرپسندی کے بھرپور جواب کے لیے تیار رہنا ہوگا اور اسی میں پاکستان کی بقا ہے۔ گو نئی کشمکش میں پاکستان کو فوجی برتری حاصل ہے۔ پاکستان کے پاس دنیا کی نویں بڑی فوج ہے، جو جدید فضائیہ اور جوہری ہتھیاروں سے لیس ہے، وہ افغانستان کے اندر گہرائی تک حملہ کرنے کی صلاحیت رکھتی ہے، حتیٰ کہ اعلیٰ طالبان رہنماؤں کو بھی نشانہ بنا سکتی ہے۔
سوویت افغان جنگ 1979سے لے کر 1989تک جاری رہی اور اس جنگ میں پاکستان نے افغان فوج کا مکمل ساتھ دیا اور تعاون جاری رکھا جب کہ نائن الیون کے بعد افغانستان میں امریکی فوج کی پسپائی میں بھی پاکستان نے اہم کردار ادا کیا مگر اس کے بعد پاکستان پر دہشت گردانہ حملے اور دراندازیوں کا آغاز ہو گیا جو آج تک جاری ہے جب کہ پاکستان نے سفارتی احتجاج کیے، دہشت گردی اور دراندازی کے ثبوت بھی فراہم کیے، وفود کی ملاقاتیں بھی ہوتی رہیں، مگر افغانستان کی طرف سے ہمیشہ منفی رویہ اپنایا گیا۔
پاک افغان جنگ بندی اچھا عمل ہے مگر تاریخ کے مطابق افغان حکومت پر اعتبار کرنا کسی طور پر بھی خوشگوار نتائج کا حامل نہیں ہوگا۔بلوم برگ کی رپورٹ کے مطابق پاکستان دنیا کی ابھرتی معیشتوں میں دوسرے نمبر پر ہے، اس کی وسطی ایشیائی ریاستوں سے تجارت2.41 ارب ڈالر تک پہنچ چکی ہے۔ پاکستان اس وقت سی پیک کے ثمرات سے مستفید ہونے کے لیے کوشاں ہے جب کہ یہی سی پیک دنیا کو 85.9 فیصد تجارتی راستوں سے جوڑتا ہے جو براہ راست چین، وسطی ایشیاء، مشرقی وسطی اور افریقہ تک پھیل سکتا ہے، یہ بات بہت یقین سے کہی جا سکتی ہے کہ پاکستان دنیا کے طاقت کے توازن کو بدل رہا ہے، ایسے میں ہمیں دشمنوں کے بچھائے جال میں الجھنے اور پھنسنے کی بجائے اپنی اسٹرٹیجک صورتحال اور میلوں پر پھیلے قیمتی معدنی ذخائر سے فائدہ اٹھانا چاہیے۔ ہمیں نئے دروازے کھولنے چاہیں اور پیچھے مڑ کر ماضی کی طرف نہیں دیکھنا چاہیے، ماضی کے بوجھ تلے دبے رہ کر دونوں برادر ہمسایہ ممالک کو کچھ بھی حاصل نہیں ہوگا دونوں کو بداعتمادی کی فضا ختم کرنا ہوگی۔ دانش مندانہ اور پائیدار حکمت عملی سے نئے، خود مختار اور محفوظ مستقبل کی بنیاد رکھی جا سکتی ہے۔
بھارت جو پاکستان کو نقصان پہنچانے کا کوئی موقع ہاتھ سے جانے نہیں دیتا وہ دونوں ممالک کے درمیان غلط فہمیوں اور ماضی کی رنجشوں کو ابھارے گا، جب کہ وہ افغانستان میں پاکستانی سرحد کے ساتھ قونصل خانے بھی کھولنے جا رہا ہے، دہلی اور کابل کے درمیان بڑھتی قربت پاکستان کے لیے نقصان دہ ہیں، پاکستان کے افغانستان پر سب سے زیادہ احسانات ہیں ،اس لیے اسے افغانستان کے ساتھ تعلقات میں جذباتیت کی بجائے توازن کو بھی پیش نظر رکھنا ہوگا تاکہ برادر ہمسایہ ملک جس کی غذائی ضروریات کا بڑا انحصار پاکستان پر ہے، اسے دشمن کی صفوں میں شامل ہونے سے ممکنہ حد تک روکا جا سکے تاکہ ملک کو جس دہشت گردی اور بدامنی کی لہر کا سامنا ہے اس میں خاطر خواہ کمی واقع ہو سکے۔
پاکستان چاہتا ہے کہ دونوں ملکوں کے فوجی اور انٹیلی جنس نمائندے ایک مشترکہ نظام کے تحت کارروائیوں کی نگرانی کریں تاکہ کسی حملے کی صورت میں فوری ردعمل ممکن ہو، مگر افغان فریق نے اسے ’’ غیر ملکی مداخلت‘‘ قرار دے کر رد کر دیا۔
سوال یہ ہے کہ اگر افغانستان کے پاس چھپانے کو کچھ نہیں تو پھر تصدیق کے نظام سے خوف کیوں؟ دراصل طالبان حکومت داخلی طور پر منقسم ہے۔ ایک طرف وہ بین الاقوامی شناخت چاہتی ہے، دوسری طرف ٹی ٹی پی اور القاعدہ سے روابط توڑنے کے لیے تیار نہیں۔ ترکیہ اور قطر نے ثالثی کے طور پر ایک سمجھوتے کی صورت تجویز کیا کہ پہلے تکنیکی سطح پر رابطے بحال کیے جائیں، بعد میں سیاسی معاملات طے کیے جائیں۔ یہ ایک قابل عمل تجویز تھی مگر کابل کے رویے نے اس کی راہ میں بھی رکاوٹ ڈال دی۔
مذاکرات کا ایک مثبت پہلو یہ ضرور ہے کہ دونوں فریقوں نے ’’تکنیکی سطح‘‘ پر رابطے برقرار رکھنے پر اتفاق کیا۔ یعنی دروازہ مکمل طور پر بند نہیں ہوا۔ مگر اعتماد کا فقدان اتنا گہرا ہے کہ کوئی پیش رفت تبھی ممکن ہے جب کابل اپنے وعدوں کو تحریری شکل دے۔ زبانی یقین دہانیوں اور مذہبی حوالوں سے اب کوئی مسئلہ حل نہیں ہوگا۔ افغانستان کو سمجھنا ہوگا کہ خود مختاری صرف ایک ملک کا حق نہیں، ایک ذمے داری بھی ہے۔ جب اس کے علاقوں سے پاکستان پر حملے ہوں تو وہ خودمختاری نہیں، لاپرواہی کہلاتی ہے۔
پاکستان نے اپنے عوام، فوج اور سفارت کاروں کی قربانیوں سے جو امن حاصل کیا ہے، اسے کسی دوسرے ملک کی کمزوریوں کے حوالے نہیں کیا جا سکتا۔ اس تنازع میں ترکیہ اور قطرکا کردار امید کی کرن ہے۔ دونوں ممالک نہ صرف اسلامی برادری میں معتبر حیثیت رکھتے ہیں بلکہ ان کے پاس ثالثی کا عملی تجربہ بھی ہے، اگر وہ ایک مشترکہ مانیٹرنگ کمیشن کے قیام میں کامیاب ہو گئے تو شاید مستقبل قریب میں کوئی پیش رفت ممکن ہو۔ آخر میں یہ کہنا بجا ہوگا کہ استنبول مذاکرات مشکلات کا شکار ضرور ہوئے مگر انھوں نے پاکستان کے اصولی اور حقیقت پسندانہ موقف کو بین الاقوامی سطح پر واضح کر دیا۔ اسلام آباد نے ثابت کیا کہ وہ جنگ نہیں، امن چاہتا ہے۔
مگر ایسا امن جو احترامِ خود مختاری، تصدیق شدہ عمل اور دہشت گردی سے پاک ہمسائیگی پر مبنی ہو۔ افغانستان کے حکمرانوں کو فیصلہ کرنا ہے کہ وہ ماضی کے خول میں بند رہنا چاہتے ہیں یا ایک ذمے دار ریاست کے طور پر اپنے ہمسایوں کے ساتھ نئے باب کا آغاز چاہتے ہیں۔
پاکستان کا دروازہ اب بھی کھلا ہے، مگر شرط وہی ہے ’’امن کے بدلے امن۔‘‘ جنگ کبھی مسائل کا حل نہیں ہوا کرتی، پاک افغان جنگ بندی معاہدہ اچھی پیشرفت ہے، یہ معاہدہ دونوں ملکوں کے مفاد میں ہے اگر اس معاہدے پر من و عن عملدرآمد ہوجاتا ہے تو پھر دونوں ملکوں کے عوام کو دہشت گردی سے چھٹکارا حاصل ہوگا اور امن و امان کے عوض سکھ کا سانس نصیب ہوگا اور خطے میں سیاسی و معاشی استحکام بھی آئے گا۔
افغانستان دہشت گردوں کو پاکستان پر حملوں سے نہیں روک سکتا تو کیسا بھائی چارہ، طاہر اشرفی