پیپلز پارٹی سینیٹرز کا پنجاب کی طرح سندھ میں موٹرویز نہ بنائے جانے پر شدید برہمی کا اظہار
اشاعت کی تاریخ: 8th, April 2025 GMT
سینیٹ کی قائمہ کمیٹی برائے منصوبہ بندی کے اجلاس میں پاکستان پیپلز پارٹی کے سینیٹرز نے پنجاب کی طرح سندھ میں موٹرویز نہ بنائے جانے پر شدید برہمی کا اظہار کیا۔قائمہ کمیٹی کا اجلاس چیئرمین قرۃ العین مری کی زیرِ صدارت ہوا جس میں سندھ میں موٹرویز کی تعمیر کا معاملہ زیر غور آیا تو پیپلز پارٹی کے سینیٹرز شدید برہم ہوئے۔
پیپلز پارٹی کے سینیٹر شہادت اعوان نے اظہارِ خیال کیا کہ پنجاب کے ہر علاقے میں موٹرویز پہنچا دی گئی ہیں لیکن سندھ میں ان کی تعمیر میں تاخیر کی جا رہی ہے۔سینیٹر جام سیف اللہ خان نے کہا کہ عالمی مالیاتی فنڈ (آئی ایم ایف) نے بھی صرف قومی نوعیت کے منصوبوں کی تعمیر کا کہا ہے، بہتر تو یہ ہوتا کہ موٹرویز سے تمام صوبوں کو منسلک کیا جاتا، سندھ کو ایم 9 موٹروے کا لالی پوپ دے دیا گیا ہے جبکہ ایم 9 کسی صورت موٹروے نہیں۔
اس پر سینیٹر قرۃ العین مری نے کہا کہ نیشنل ہائی وے اتھارٹی کو ختم کر دیا جائے کیونکہ یہ صرف پنجاب کے شاہراہوں کیلیے کام کر رہی ہے، نیشنل ہائی وے اتھارٹی اس وقت ’پنجاب ہائی وے اتھارٹی‘ بنا ہوا ہے، صوبوں کو رقم فراہم کر دیں وہ خود موٹرویز بنا لیں گے۔اجلاس میں سیکرٹری منصوبہ بندی نے بتایا کہ ایکنک نے لاہور ساہیوال بہاولپور موٹروے کی منظوری نہیں دی۔ اس پر جام سیف اللہ خان نے کہا کہ سنا ہے نئی موٹروے چولستان کی زمینوں کیلیے بنائی جا رہی ہے، وفاقی وزیر منصوبہ بندی کیوں اجلاس میں نہیں ہیں۔
اس پر سیکرٹری نے بتایا کہ آذربائیجان کے تعاون سے ایم 6 اور 9 کی تعمیر سے متعلق اجلاس جاری ہے، احسن اقبال اہم اجلاس میں شرکت کر کے کمیٹی اجلاس میں آئیں گے۔مسلم لیگ (ن) کے سینیٹر افنان اللہ نے کہا کہ آذربائیجان پاکستان میں 2 ارب ڈالر کی سرمایہ کاری کرنا چاہتا ہے، جبکہ متحدہ قومی موومنٹ (ایم کیو ایم) کے سینیٹر فیصل سبزواری نے کہا کہ سندھ میں حیدرآباد سکھر موٹروے کی اشد ضرورت ہے۔
این ایچ اے حکام نے بتایا کہ سکھر حیدرآباد اور حیدرآباد کراچی موٹرویز پر کام کیا جا رہا ہے۔ اس پر فیصل سبزواری نے کہا کہ موٹروے کو بندرگاہ سے شروع ہونا چاہیے تھا 30 سال ضائع کر دیے، کراچی پورٹ پورے خطے کو منسلک کرتی ہے موٹرویز نہ بنا کر اس کو روکا گیا۔
این ایچ اے حکام نے بتایا کہ آذربائیجان کی طرف سے رقم ملنے کے بعد ایم 9 کی فیزبیلیٹی بنائے جائے گی۔ اس پر قرۃ العین مری نے کہا کہ قائمہ کمیٹی کو ٹرک کی بتی کے پیچھے نہ لگایا جائے بلکہ حقائق بتائے جائیں، گزشتہ مالی سال لالی پوپ دیا گیا کہ چین ان موٹرویز کو بنائے گا۔
این ایچ اے حکام نے کہا کہ امن و امان صورتحال پر چین سرمایہ کاری اور تعمیر سے پیچھے ہٹ گیا۔ اس پر چیئرمین قائمہ کمیٹی نے سوال اٹھایا کہ اگر آذربائیجان کے ساتھ معاملات طے نہ ہوئے تو کیا ہوگا؟ حکام نے جواب دیا کہ اسلامی ترقیاتی بینک سے سرمایہ کاری حاصل کرنے کی کوشش کی جا رہی ہے۔قرۃ العین مری نے کہا کہ سندھ کی موٹرویز نہیں بن رہیں کہ پیسے نہیں ہیں، لاہور ساہیوال بہاولپور موٹروے کیلیے تو کوششیں کی جا رہی ہیں۔
.
ذریعہ
ذریعہ: Daily Ausaf
کلیدی لفظ: قرۃ العین مری پیپلز پارٹی میں موٹرویز قائمہ کمیٹی نے بتایا کہ موٹرویز نہ کے سینیٹر اجلاس میں نے کہا کہ کی تعمیر حکام نے رہی ہے جا رہی
پڑھیں:
پی ڈی ایم اے پنجاب کا شدید بارشوں کا الرٹ، اربن فلڈنگ کا خدشہ
پراونشل ڈیزاسٹر مینجمنٹ اتھارٹی (پی ڈی ایم اے) پنجاب نے صوبہ میں موسلادھار بارشوں، گرج چمک اور تیز ہواؤں کی پیشگوئی کرتے ہوئے متعلقہ اداروں کو ہائی الرٹ رہنے کی ہدایت جاری کر دی۔پی ڈی ایم اے کے مطابق 24 سے 27 جولائی تک لاہور سمیت جنوبی اور وسطی پنجاب کے مختلف اضلاع میں شدید بارش اور آندھی کا امکان ہے جبکہ لاہور، گوجرانوالہ اور دیگر شہروں میں اربن فلڈنگ کا خدشہ بھی ظاہر کیا گیا ہے۔ترجمان کے مطابق بہاولپور، ملتان، سیالکوٹ، فیصل آباد اور رحیم یار خان میں بھی شدید بارشوں کی پیشگوئی کی گئی ہے جبکہ راولپنڈی، مری، گلیات، اٹک اور گجرات میں 24 سے26جولائی کے دوران وقفے وقفے سے بارش متوقع ہے۔پی ڈی ایم اے نے خبردار کیا ہے کہ تیز ہواؤں اور آسمانی بجلی کے باعث کمزور ڈھانچوں، سولر پینلز اور بجلی کے کھمبوں کو نقصان پہنچ سکتا ہے، اس لیے شہری احتیاطی تدابیر اختیار کریں۔ادارے نے سیاحوں اور مسافروں کو غیر ضروری سفر سے گریز کرنے، جبکہ کسانوں کو فصلوں اور مویشیوں کے تحفظ کے لیے پیشگی اقدامات کرنے کی ہدایت کی ہے۔پی ڈی ایم اے نے تمام ضلعی انتظامیہ، ریسکیو 1122 اور متعلقہ اداروں کو ہائی الرٹ رہنے، پیشگی انتظامات مکمل کرنے، ڈرینوں کی صفائی، بھاری مشینری کی دستیابی اور مؤثر ایمرجنسی رسپانس یقینی بنانے کی ہدایت بھی جاری کر دی ہے۔
بھارت سے جنگ اور افغانستان میں کارروائی خارج ازامکان نہیں، وزیردفاع