بنیان مرصوص کی کامیابی پر عشائیہ، فیلڈ مارشل، صدر مملکت اور وزیراعظم شانہ بشانہ
اشاعت کی تاریخ: 26th, May 2025 GMT
اسلام آباد:جمعے کی رات سیاسی اور عسکری اشرافیہ نے اُس وقت باہمی احترام اور افہام و تفہیم کا ایک نادر مظاہرہ کیا جب اتحاد کے اظہار میں صدر مملکت آصف علی زرداری، وزیر اعظم شہباز شریف اور فیلڈ مارشل سید عاصم منیر ایک ساتھ شانہ بشانہ کھڑے نظر آئے۔ یہ تقریب ایک ہائی پروفائل عشائیہ تھی جسے بھارت کیخلاف حالیہ آپریشن بنیان مرصوص کی کامیابی کاجشن منانے کیلئے فیلڈ مارشل کی میزبانی میں منعقد کیا گیا تھا۔ تقریب کی ایک خاص بات جس نے وہاں موجود سبھی افراد کو متاثر کیا، یہ تھی کہ فیلڈ مارشل نے — حالانکہ اُنہوں نے ٹوپی نہیں پہنی تھی کیونکہ اس کی ضرورت نہیں تھی — صدر اور وزیرِاعظم کو اُن کی آمد پر اور پھر رخصتی پر سیلوٹ کیا۔ اس سیلوٹ کو اداروں کے مابین احترام اور ہم آہنگی کی علامت کے طور پر دیکھا گیا۔ تقریب میں ملک کے سینئر ترین عہدیداروں نے شرکت کی جن میں سینئر سیاسی شخصیات، تینوں مسلح افواج کے افسران اور آئینی اداروں کے سربراہان شامل تھے۔ اس قدر وسیع البنیاد سول ملٹری تقریب واقعی نایاب تھی اور اس موقع کی اہمیت کو اجاگر کرتی ہے۔ تقریب میں شریک ایک ذریعے نے تبصرہ کرتے ہوئے کہا کہ یہ وزیر اعظم کیلئے بھی ایک نایاب لمحہ تھا کیونکہ ادارہ جاتی ہم آہنگی کا ان کا سیاسی ویژن واضح طور پر سامنے آیا اور ان کے موقف کی تائید و توثیق ہوئی۔ انہوں نے کہا کہ وزیر اعظم کو فوجی حلقوں میں واضح پذیرائی حاصل رہی جو ایک محنتی منتظم، کارکردگی دکھانے والے اور کر دکھانے والے شخص کی حیثیت سے ان کے دیرینہ تشخص کی عکاس ہے۔ تقریب میں ایک موقع پر، وزیراعظم کیلئے ہال میں تالیوں کی گونج سنائی دی، جو ان کی ساکھ اور ان کے احترام کو اجاگر کرتی رہے۔ جس وقت صدر مملکت کو صحت کے مسائل کی وجہ سے تقریب میں بیشتر وقت ایک جگہ بیٹھے دیکھا گیا، وہیں وزیراعظم شہباز شریف غیر رسمی طور پر سینئر فوجی افسران کے ساتھ خوشگوار ماحول میں گپ شپ اور نیک تمناؤں کے اظہار کا تبادلہ کرتے نظر آئے۔ تقریب کے دوران، فیلڈ مارشل اور دیگر سینئر فوجی کمانڈرز کی جانب سے صدر مملکت، وزیر اعظم، چیئرمین سینیٹ، اسپیکر قومی اسمبلی اور دیگر اہم رہنماؤں کو یادگاری تحائف پیش کیے گئے جو کہ ستائش اور اتحاد کی علامت ہے۔ عشائیے کا اہتمام ملکی دفاعی تاریخ میں اہم سنگ میل کی حیثیت رکھنے والے آپریشن بنیان مرصوص میں کامیابی کی وجہ سے سیاسی قیادت بلکہ مسلح افواج کے ثابت قدم عزم اور پاکستان کے عوام کے ناقابل تسخیر جذبے کو خراج تحسین پیش کرنے کیلئے کیا گیا تھا۔ ذرائع کے مطابق شام کا اختتام سول اور عسکری قیادت کے اتحاد کے ساتھ نئے عزم کے اظہار کے ساتھ ہوا۔
انصار عباسی
ذریعہ: Daily Mumtaz
کلیدی لفظ: فیلڈ مارشل صدر مملکت
پڑھیں:
سابق گورنر سندھ کمال اظفر انتقال کر گئے نماز جنازہ کل ہو گی ‘ صدر‘ وزیر اعظم کا اظہار افسوس
اسلام آباد (نمائندہ خصوصی+خبر نگار خصوصی) سابق گورنر سندھ کمال الدین اظفر کراچی کے مقامی ہسپتال میں انتقال کر گئے۔ سینٹر وقار مہدی کے مطابق 95 سالہ کمال اظفر کافی عرصہ سے علیل تھے۔ نمازہ جنازہ کل بدھ بعد نماز عصر احاطہ مزار حضرت عبداللہ شاہ غازی میں ادا کی جائیگی ۔ صدر مملکت آصف علی زرداری نے سابق گورنر سندھ کمال الدین اظفر کے انتقال پر گہرے دکھ اور افسوس کا اظہار کیا ہے۔ صدر مملکت نے کمال الدین اظفر کے لواحقین کے ساتھ اظہار تعزیت کیا۔ صدر مملکت نے کمال الدین اظفر کی سیاسی خدمات کو خراج تحسین پیش کیا۔ صدر مملکت نے کہا کہ کمال الدین اظفر جیسے سیاستدان پاکستان پیپلز پارٹی کا اثاثہ ہیں۔ مرحوم نے صوبہ سندھ اور پاکستان پیپلز پارٹی کیلئے گراں قدر خدمات انجام دیں۔ صدر مملکت نے مرحوم کے لیے بلندی درجات، اہل خانہ کے لیے صبر جمیل کی دعا کی۔وزیراعظم محمد شہباز شریف نے سابق گورنر سندھ کمال اظفر کے انتقال پر افسوس اور ان کے اہلخانہ سے تعزیت کا اظہار کیا ہے۔ وزیراعظم آفس کے میڈیا ونگ سے جاری بیان کے مطابق انہوں نے کہا کہ کمال اظفر کی وفات سے پاکستان ایک مدبر اور بڑے سیاستدان سے محروم ہوگیا۔ انہوں نے دعا کی کہ اللہ تعالی کمال اظفر کی مغفرت فرمائے اور ان کے اہلخانہ کو صبر و استقامت دے۔
خضدار اسکول بس پر حملہ، بلوچستان میں اب کیا ہونے والا ہے؟