2024ء ملکی و بین الاقوامی سطح پر بھونچالوں کی زد میں رہا۔ ہمارے ہاں سیاسی چپقلش، ہر سطح پر عدم برداشت، الجھاؤ، تناؤ قومی فطرتِ ثانیہ بن گئی لگتی ہے۔ نفسا نفسی، انانیت، مقابلہ بازی نے ڈیرے جمارکھے ہیں۔ ایک وقت تھا کہ شہر میں ایک آدھ ہی ماہرِ نفسیات ڈاکٹر ہوتا تھا۔ مسجد، سجدے، بزرگوں کی دعائیں کافی ہو جایا کر تی تھیں۔ اب ہر کس وناکس سوشل میڈیا پر سر کھپائی، تجارت پیشہ موٹیویشنل سپیکرز، وی لاگرز (الا ماشاء اللہ) اور بالآخر ماہرینِ نفسیات، کونسلنگ کے پھیر میں رہتے ہیں۔ شخصیت و کردار سازی،صبر و تحمل، سادگی، ایثار سب ساتھ چھوڑ گئے۔زندگی کے ہر دائرے میں سطحیت یا پھر نرگسیت کا دور دورہ ہے۔کتنی جوانیاں یورپ جانے کے خواب دکھا کر سمندروں کی نظر کر دیں۔ یا غیر قانونی سرحد عبور کرتے گولیاں کھا کر اپنے ساتھ خاندانوں کو بھی ویران کر دیا۔ پیسہ الگ برباد ہوا۔ نیا شمسی سال ملک وملت کے لیے خیر کی خبر لائے۔ پروردگار اپنی شانِ کریمی سے ہی ہمیںاپنی رہنمائی سے نواز کر ہمارے سارے چاک رفو کردے!
پورا سال غزہ کے غم نے اعصاب شل کیے رکھے۔ ہولو کاسٹ اگر کچھ ہے تو وہ ہم نے بہ چشمِ سر دنیا کے وسط غزہ میں درندگی، بے رحمی کی انتہا پر دیکھ لیا۔ تاآنکہ اب اسرائیلی اپوزیشن لیڈر بائیڈن کا شکریہ ادا کر رہا ہے کہ اس نے جاتے جاتے 8 ارب ڈالر اضافی فوجی امداد دی اور اپنی حمایت سے نواز کر غزہ جنگ لڑنے کے قابل بنایا۔ (70 تا 80 فی صد اسلحہ بھی امریکہ نے فراہم کیا۔ 85 ہزار ٹن بارود غزہ پر گرایا جا چکا۔) اب بمباری 2025 ء کے نئے ریکارڈ بنانے کو جاری وساری ہے۔ تازہ ترین بمباری پر فلسطینی کا سوال تھا، کہ یہ 15 ٹینٹوں کی بستی پر حملہ کیا معنی رکھتا ہے جبکہ اس میں عورتیں، بچے اور بوڑھے تھے اور ہماری کل متاع پھٹے ٹینٹوں (بارش میںٹپکتے) کے سوا کچھ بھی تو نہیں! اسرائیلیوں، امریکیوں (وائٹ ہاؤس، پینٹاگون) کے سینوں میں دم ہے دل نہیں ہے! یا جیسے اللہ نے فرمایا:’پتھر کی طرح (سخت) بلکہ اس سے بھی زیادہ قساوتِ قلبی! یا جانوروں کی طرح، بلکہ ان سے بھی گئے گزرے!
یہ ارشاد ملاحظہ ہو امریکی سفیر برائے اسرائیل جیکب لیؤ کا۔ جب ’فیوز نیٹ‘ ادارے نے رپورٹ دی کہ ’ اسرائیل کی طرف سے خوراک اور انسانی ضروریات کی غزہ کے لیے بندش پر بھوک سے اموات اگلے ماہ تک فاقہ زدگی (Famine) کی سطح پار کر جائے گی۔‘ اس پر امریکی سفیر نے سفاک ڈھٹائی سے کہا کہ یہ درست نہیں کہ ان پر جبری بھوک مسلط کی گئی ہے (اموات دینے کو۔) کیونکہ غزہ میں نسلی صفایا (Ethnic Cleansing) پہلے ہی تقریباً مکمل ہو چکا ہے۔ اس کے باوجود آج بھی بمباری جاری ہے؟ نسلی صفایا سے مراد 23 لاکھ (قبل از 7 اکتوبر 2023ئ) فلسطینی آبادی کیا ختم کی جا چکی ہے؟ جبکہ رائٹر، AFP کی 5 جنوری 2025 ء رپورٹ میں 45,805 فلسطینی اسرائیل نے اب تک قتل کیے ہیں (بمباریوں اور بھوک سے) اعدادو شمار کا کیا ہیر پھیر ہے کہ سال بھر بلا تعطل بمباریوں کے باوجود ایک لاکھ سے بھی کم؟ باقی فلسطینی کہاں گئے!
یہ سرزمینِ شام (جو خلافت عثمانیہ کے تحت یا اسلامی اصطلاح بلاد الشام کی رو سے لبنان، شام، اردن، فلسطین پر مشتمل ہے۔) میں غزہ فتح کرنے میں سال بھر جتے رہے۔ مگر نہ کر سکے! غزہ نے سبھی اسلحے کے انبار مغرب کی مہذب دنیا کے، اپنے سینے پر سہہ کر بھی سر بلندی ، عزیمت اور استقامت کی عجب تاریخ اپنے لہوسے رقم کی ہے۔ امریکہ اسرائیل ناکام و نامراد، خائب و خاسر روسیاہ ہے آج بھی۔
غزہ سے نمٹے نہ تھے، افغانستان میں شرمناک شکست کا داغ دھلا نہ تھا کہ شام نے مزید چر کے لگا دیئے۔ 54 سال کا قرضہ11دن میں چکا دیا! گھگھی بندھی شامی فوج یونیفارم اتار کر بھاگ نکلی۔ بشار الاسد روس فرار ہو گیا۔ امریکہ بشار کو نکالنا نہ چاہتا تھا۔ اوباما، ٹرمپ، بائیڈن سبھی چاہتے تھے کہ خانہ جنگی چلتی رہے۔ کھلی فتح کسی کو نہ ملے۔ ایک کمزور شام اسرائیل کے حق میں بہتر تھا۔ (امریکہ ہر مسلم ملک میں انتشار،
خانہ جنگی کو ترجیح بلکہ ہوا دیتا ہے تاکہ اندر سے کھوکھلے ہو جائیں۔ عراق، سوڈان، لیبیا، یمن، لبنان اور اب پاکستان۔ بلوچوں کی پشت پناہ غیر ملکی قوتیں ہیں۔) اب جو یہ اچانک یلغار ادلب سے نکلی اور دمشق جا پہنچی! اتنی مہلت مغرب کونہ ملی کہ اسرائیل، لبنان، ایران، یوکرین، غزہ گھڑمس میں ان پر کیا لیبل لگائیں۔ رد کیونکر کریں۔ ’القاعدہ‘ ہوتی تو بمباریاں کر کے سرخرو ہو جاتے۔ یہ نئے نام سے اٹھے ہیں۔ نہ اگلے بن پڑے نہ نگلے۔ سفید کلمے والے جھنڈے نے سٹی گم کر دی۔ اموی مسجد پر سانس رکنے لگی، بازی ہرتی لگی۔ اچانک اٹھنے والے اس لشکر کی بھرپور پذیرائی شامی عوام نے کی اور دنیا بھر میں اسے ’آزادی‘ قرار دے کر ایسے جشن منائے کہ امریکہ منہ تکتارہ گیا! جو کسر رہ گئی تھی وہ احمد الشرع اور وزراء سبھی ٹائی سوٹ پہن کر، دو خواتین مناصب پر بٹھا کر مغرب کے ’انتہا پسندی‘ کے لیبل کو غیر موثر کر گئے۔ جرمنی، فرانس نے اپنے وفد میں دو خواتین نامناسب لباس والی بھیج کر بھی ٹسٹ کر لیا – احمد الشرع نے نگاہ بچاتے ہوئے خاتون کا بڑھا ہوا (مصافحے کو) ہاتھ نظر انداز کر کے ساتھ کھڑے مرد سے ہاتھ ملا لیا! (مغربیے اس نوجوان پاکیزہ نفسی کو کیا جانیں۔
نہایت زیرک ہے احمد الشرع، بہت دانشمندی سے کام لے رہا ہے۔ یہ اس نے رات بھر میں نہیں سیکھا۔ اس کے پیچھے تربیت اور تیاری ہے۔احمد الشرع سے لڑکیوں کی تعلیم بارے سوال اٹھایا اسے الجھانے کو افغانستان کی مثال دے کر، تو اس نے شام کے معاشرے کی مختلف اٹھان کا حوالہ دے کر بات سمیٹ دی۔ اگرچہ اب بی بی سی رپورٹ میں اس تکلیف کا پورا اظہار ہے جو عبوری حکومت نظام تعلیم میں تبدیلی کر رہی ہے۔ وزارت تعلیم کے نصاب میں واضح جھکاؤ اسلام کی طرف ہے۔سائنس سے ڈارون کا نظریہ ارتقاء اور بگ بینگ تھیوریاں نکال دینے کی بات۔ اسد دور کی شان بڑھانے والی بے راہ رو شاعری و دیگر مواد نکال دیا ۔ رومن دور کی ہیروئن ملکہ ذنوبیا نکال دی۔ اسلامی تعلیمات کی غلطیاں دور کیں۔ جس پر اب مغرب کی پروردہ سیکولر سول سوسائٹی متحرکین (پاکستان کی طرح!) کو خطرے کی گھنٹیاں بجتی لگ رہی ہیں۔ چنانچہ یورپ وغیرہ سے یہ شام لوٹنے والی سول سوسائٹی اب اپنی واویلے کی ڈیوٹی سنبھالنے کو ہے۔ حالانکہ عبوری حکومت فاتحین کی ہے جنھوں نے ادلب میں سالہا سال قربانیاں دیں، بے دخلیاں، بمباریاں، غزہ جیسے حالات سہے۔ ایران، روس، امریکہ، بشار سبھی کی دشمنی جھیلی۔ فیصلے کرنے، پالیسی سازی کو یورپ میں نوکریاں کرتے، یورو سمیٹتے جمہوری حق اور مشمولیات (Inclusive) کی رٹ لگاتے آن پہنچے۔ یہ سارے مشمولیے ، 54سال کہاں تھے جب اقلیتی صدور اکثریت کا صیدنایا جیل میں قیمہ بنا کر قبریں بھر رہے تھے؟ ملک بھر کھنڈر ، ملبہ بنا دیا تھا؟
ادھر مصر بھی مخمصے میں رہا۔ آخر تک تو سیسی بشار کو تھپک رہا تھا۔ اپنے ملک میں اخوان کی مقبول جمہوری حکومت، امریکہ کی مدد اور ایماء پر اسرائیل کے تحفظ کی خاطر الٹا کر حکومت کرنے والا سیسی بھی سسک ٹھٹھک کر رہ گیا۔ خصوصاً حماۃ فتح کر کے فاتح لشکر کے کمانڈر نے کہا کہ ہم نے اخوان (کے خون )کا بدلہ لے لیا۔ (1982 ء میں حافظ الاسد نے 3دن وحشیانہ بمباری اور قتل عام سے حماۃ کی اخوان کچل کر رکھ دی تھی!) بہر طور شامی حکومت احتیاط اور تدبر سے کامیابی کی راہ پر تیزی سے گامزن ہے۔ عرب دنیا نے تیز رفتار قبولیت دی ہے نئی شامی حکومت کو۔ امدادی سامان، وفود، وزرائے خارجہ آ جا رہے ہیں۔ فرقہ واریت، اقلیت کے مسئلے کو ہوا دینے کی کوشش موثر حکمت عملی سے ناکام کر دی ہیں۔ مصر نے بھی پس وپیش کے بعد خیر سگالی رابطہ کیا اور طبی ریلیف کا سامان بھی بھیجا۔ (جولائی 2020 ء میں ادلب پر مصر نے ایران کے ساتھ شراکت میں حملے کو فوج بھی بھیجی تھی!) سواب اگرچہ چیلنج تو در پیش ہیں کھنڈر بنے ملک کی بحالی اور مظلوم، دکھی، لٹے پٹے خاندان، لاپتگان کی اذیت سمیت۔ اللہ کی مدد، اخلاص و ایمان کے بل پر منزلیں اللہ سر کروا دے گا۔ ٹرمپ بھی آرہاہے۔ اس سے پہلے واشنگٹن سمیت مشرقی امریکہ بدترین برفانی طوفان کی زد میںہے۔اور کیلی فورنیا غیر معمولی آگ سے بھسم ہو رہا ہے۔ آگے آگے دیکھئے ہوتا ہے کیا۔ ہم امت کی خیرکے لیے دست بہ دعا ہیں!
.ذریعہ: Nai Baat
کلیدی لفظ: احمد الشرع
پڑھیں:
ایران اور امریکا کے درمیان مصالحت کیوں ممکن نہیں؟
اسلام ٹائمز: ایرانی قوم نے ایران اور امریکہ کے درمیان عدم مفاہمت کیوجہ کو صحیح طور پر سمجھ لیا ہے اور اسی بنیاد پر اپنے قومی مفادات کے تحفظ کیلئے اس ملک کی زیادتیوں کیخلاف مزاحمت اور جدوجہد کی پالیسی اور نقطہ نظر کا انتخاب کیا ہے۔ قومی اتحاد اور سماجی یکجہتی کی روشنی میں رہبر معظم انقلاب اسلامی کی رہنمائی میں ملک کی ترقی کیلئے ہر ممکن کوشش اور محنت سے ایک مضبوط ایران کی تعمیر سے تمام مسائل پر قابو پانا ممکن ہے۔ اس راستے پر ایمان اور روحانیت کی طاقت پر بھروسہ نیز اللہ تعالیٰ کی مدد پر اعتماد کرتے ہوئے آگے بڑھا جا سکتا ہے۔ تحریر: یداللہ جوانی
بین الاقوامی تعلقات میں کوئی بھی دوستی یا دشمنی مستقل نہیں ہوتی۔ دوستی دشمنی میں اور دشمنی دوستی میں کسی بھی وقت بدل سکتی ہے۔ اس فارمولے کی بنیاد پر ایران میں رہنے والے بعض افراد نے اس بات پر زور دیا ہے کہ امریکہ کے ساتھ اختلافات کو ختم کیا جانا چاہیئے اور اس ملک کے ساتھ بات چیت اور مذاکرات کے ذریعے ملک کے مسائل کے حل کے لیے ایک جامع معاہدہ ہونا چاہیئے۔ اس نظریہ اور مفروضے کے برعکس ایک اور قول یہ ہے کہ بعض وجوہات کی بنا پر ایران اور امریکہ کے درمیان مصالحت ممکن نہیں ہے۔ اس نظریئے میں سب سے آگے امام خمینی رحمۃ اللہ علیہ ہیں۔ مسئلہ کی اہمیت کے پیش نظر اسے سیاسی اور گروہی نظریات سے بالاتر ہو کر سمجھنا چاہیئے کہ کون سا نقطہ نظر درست ہے اور کون سا غلط ہے۔؟
اس معاملے کی اہمیت اس وقت مزید واضح ہو جاتی ہے، جب قومی مفادات کے تناظر میں ہر فریق کے اسباب اور نکات پر غور کیا جائے۔ مثال کے طور پر پہلا نظریہ رکھنے والوں کا کہنا ہے کہ اسلامی جمہوریہ ایران پر امریکہ کے ہر طرح کے دباؤ اور پابندیوں کی وجہ سے ایران کے لیے ترقی کا راستہ بند ہوگیا ہے اور اس ملک کی ترقی کا واحد راستہ امریکہ کے ساتھ تعلقات ہیں۔ دوسری طرف رہبر انقلاب اسلامی نے امریکہ کے بارے میں امام خمینی (رح) کے اسی نقطہ نظر کے ساتھ تاکید کی ہے کہ ایران کی حقیقی ترقی کی شرط یہ ہے کہ امریکہ آگے نہ آئےو کیونکہ امریکہ ایران کی ترقی کا سخت مخالف ہے۔ سیاسی عقلیت کی کسوٹی پر اور قومی مفادات کے اشاریہ کی بنیاد پر ان دو آراء کا جائزہ لیا جا سکتا ہے۔
رہبر معظم کے نقطہ نظر سے، امام خمینی رحمۃ اللہ علیہ کا مکتب، روحانیت، انصاف اور عقلیت کی تین جہتوں کا حامل ہے۔ درحقیقت امریکہ کے بارے میں امام کا نظریہ جو یہ کہتا ہے کہ امریکہ بڑا شیطان ہے اور ہم امریکہ سے تعلقات نہیں چاہتے ہیں، ایک مضبوط دلیل پر مبنی ہے۔ امام کا استدلال یہ ہے کہ بین الاقوامی تعلقات میں ہر ملک دوسرے ممالک کے ساتھ تعلقات استوار کرکے اپنے قومی مفادات کی حفاظت کرتا ہے۔ امام کا خیال تھا کہ امریکہ کے ساتھ تعلقات نہ صرف ایرانی قوم کے لیے فائدہ مند نہیں ہیں، بلکہ یہ تعلق ہمارے ملک کے لیے نقصان دہ ہوگا۔ رہبر معظم انقلاب اسلامی نے ایک مثال کے ساتھ واضح کیا کہ اس تعلق سے ایران کو کتنا نقصان پہنچا ہے۔ ان کا کہنا ہے یہ رشتہ بھیڑیئے اور بھیڑ کا رشتہ ہے۔ یہ بالکل واضح ہے کہ بھیڑ کے بھیڑیئے کے قریب آتے ہی کیا ہوگا اور کس کو فائدہ ہوگا اور کس کو نقصان ہوگا۔ یہ مثال عقلی دلیل پر مبنی ہے۔ بھیڑیئے کی دلچسپی بھیڑوں کی جان لینے میں ہے۔
امریکہ ایک متکبر مزاج ملک ہے اور وہ دوسروں پر اپنی برتری قائم کرنے کے لیے ہر طرح کا حربہ استعمال کرتا ہے۔ امریکہ دنیا کی غالب طاقت بن کر دوسروں کو زیر کرنا چاہتا ہے۔ اس ملک کے قائدین پوری ڈھٹائی کے ساتھ ایران کو دنیا پر امریکہ کے تسلط کی راہ میں سب سے بڑی رکاوٹ قرار دیتے ہیں۔ ایسے حالات میں ایرانی قوم کے اہم مفادات اور فطری حقوق جیسے سیاسی آزادی، قومی وقار، علاقائی سالمیت کا تحفظ اور امریکہ کے غلبہ اور تسلط پسندانہ مفادات کے درمیان مفادات کا ٹکراؤ پیدا ہو جاتا ہے۔ مفادات کا یہ تصادم حکمت عملی کی نوعیت کا نہیں ہے، جسے دونوں فریقین کے درمیان بات چیت کے ذریعے حل کیا جائے۔ دونوں ممالک کے درمیان اختلافات سٹریٹجک اور متضاد مفادات کی سطح پر فطری ہیں۔
گذشتہ 46 سالوں کے دوران امریکہ نے ثابت کیا ہے کہ وہ ایرانی قوم کے امریکہ کے سامنے ہتھیار ڈالنے سے کم کسی چیز پر مطمئن نہیں ہوگا۔ 12 روزہ جنگ کے پہلے ہی دن ٹرمپ نے اس جنگ میں فتح کا تصور کرتے ہوئے واضح طور پر اعلان کیا کہ ایران کو غیر مشروط طور پر ہتھیار ڈالنا ہوں گے۔ بنیادی طور پر امریکہ ایران جیسے ثقافتی اور تہذیبی پس منظر کے حامل ایک آزاد ملک کو برداشت نہیں کرتا، وہ بھی ایسا ملک جس کا ترقی پذیر جغرافیائی محل وقوع اتنا اہم اور اسٹریٹجک ہو۔ ایرانی قوم کے ساتھ امریکہ کی دشمنی کی تمام تر وجوہات میں سب سے اہم اسلامی انقلاب سے اس کی دشمنی ہے۔ یہ دشمنی امریکہ کی زیادتیوں میں پنہاں ہے۔ ایسے حالات میں ایرانی قوم کو طاقت کے حصول کی راہ پر ہوشیاری کے ساتھ آگے بڑھنا چاہیئے۔ ایک مضبوط ایران کی تعمیر کا نظریہ، جس پر کئی سالوں سے رہبر انقلاب اسلامی نے زور دیا اور تاکید کی ہے، اسی مقصد کے لیے ہے۔
ایرانی قوم کا روشن مستقبل ایرانی قوم کی مضبوطی پر منحصر ہے۔ ایران اور ایرانیوں کے پاس اس کے سوا کوئی چارہ نہیں ہے کہ وہ تسلط پسند امریکہ کے خلاف مضبوط اور ہمہ گیر پیشرفت کریں۔ امریکہ کی غنڈہ گردی اور جبر کا مقابلہ، مضبوط ہونے سے ہی ممکن ہے۔ ملک کے مسائل مذاکرات، مفاہمت اور امریکہ کے ساتھ تعلقات کے ذریعے حل کرنے کی سوچ ایک سراب سے زیادہ کچھ نہیں۔ ایرانی قوم عقلیت سے کام لیتی ہے اور خارجہ پالیسی میں قومی مفادات کے اشاریہ کے ساتھ عقلیت اور حساب کتاب کی بنیاد پر اپنے طرز عمل کو منظم کرتی ہے اور اس سلسلے میں بہت سے تاریخی تجربات سے سبق حاصل کرنے کا بھی خیال رکھتی ہے۔ انگلستان کے شر سے چھٹکارا پانے کے لیے مصدق کا امریکہ سے رابطہ کرنے کا تجربہ، جس کی وجہ سے بالآخر اینگلو امریکن بغاوت کے ذریعے ڈاکٹر محمد مصدق کی قومی حکومت کا تختہ الٹ دیا گیا۔ یہ تجربہ ایرانی قوم کے سامنے ہے۔
یا کرنل قذافی کے دور میں لیبیا کا تجربہ، جس نے مغرب اور امریکیوں پر بھروسہ کرکے ملک کو زوال اور تباہی کے راستے پر ڈال دیا۔ سوڈان اور عمر البشیر کے امریکہ کے قریب پہنچنے میں غلط حساب کتاب کا تجربہ، جس کا نتیجہ سوڈان کی تقسیم اور تباہ کن خانہ جنگیوں کی صورت میں نکلا۔ ایرانی قوم نے ایران اور امریکہ کے درمیان عدم مفاہمت کی وجہ کو صحیح طور پر سمجھ لیا ہے اور اسی بنیاد پر اپنے قومی مفادات کے تحفظ کے لیے اس ملک کی زیادتیوں کے خلاف مزاحمت اور جدوجہد کی پالیسی اور نقطہ نظر کا انتخاب کیا ہے۔ قومی اتحاد اور سماجی یکجہتی کی روشنی میں رہبر معظم انقلاب اسلامی کی رہنمائی میں ملک کی ترقی کے لیے ہر ممکن کوشش اور محنت سے ایک مضبوط ایران کی تعمیر سے تمام مسائل پر قابو پانا ممکن ہے۔ اس راستے پر ایمان اور روحانیت کی طاقت پر بھروسہ نیز اللہ تعالیٰ کی مدد پر اعتماد کرتے ہوئے آگے بڑھا جا سکتا ہے۔ یہ خدا کا کلام ہے، جو مومنوں کو سکون بخشتا ہے: "ولا تهنوا و لا تحزنوا و انتم الاعلون ان کنتم مؤمنین"
ڈھائی لاکھ افغانوں کے جعلی پاکستانی شناختی کارڈ بنوانے کا انکشاف، نادرا نے بلاک کرنا شروع کردیے