پی پی 52 ضمنی الیکشن؛ ووٹوں کی گنتی جاری، ابتدائی نتائج میں مسلم لیگ ن کو برتری
اشاعت کی تاریخ: 1st, June 2025 GMT
سیالکوٹ ( اُردو پوائنٹ اخبارتازہ ترین۔ 01 جون 2025ء ) پنجاب اسمبلی کے حلقہ پی پی 52 میں ہونے والے ضمنی الیکشن میں ووٹوں کی گنتی جاری ہے جہاں ابتدائی نتائج میں مسلم لیگ ن کو برتری حاصل ہے۔ تفصیلات کے مطابق پی پی 52 سمبڑیال کے ضمنی انتخاب کیلئے پولنگ صبح 8 بجے سے شام 5 بجے تک بلا تعطل جاری رہی، پولنگ کا وقت ختم ہونے کے بعد سے ووٹوں کی گنتی کا عمل جاری ہے جہاں 185میں سے 9 پولنگ سٹیشنز کے غیر حتمی غیر سرکاری نتائج میں مسلم لیگ ن کی امیدوار حنا ارشد وڑائچ 5 ہزار 868 ووٹوں کے ساتھ آگے ہیں، دوسرے نمبر پر موجود پی ٹی آئی کے امیدوار کو اب تک 3 ہزار 241 ووٹ ملے ہیں۔
بتایا گیا ہے کہ پولنگ کے دوران پیپلز پارٹی کی جانب سے مسلم لیگ ن پر دھاندلی اور غنڈہ گردی کے الزامات عائد کیے گئے، تاہم الیکشن کمیشن نے پیپلز پارٹی کے دھاندلی کے الزامات بے بنیاد اور انتظامیہ کی جانب سے مختلف پولنگ اسٹیشنز کو بند کرنے کی خبر کو سراسر جھوٹ قرار دیا۔(جاری ہے)
بتایا جارہا ہے کہ یہ نشست مسلم لیگ ن کے ایم پی اے ارشد جاوید وڑائچ کی وفات کے بعد خالی ہوئی تھی، ضمنی انتخاب میں پاکستان مسلم لیگ ن کی طرف سے حنا ارشد، پاکستان تحریک انصاف کی طرف سے فاخر نشاط، پاکستان پیپلز پارٹی کی جانب سے راحیل کامران چیمہ، تحریک لبیک پاکستان کی طرف سے محمد شفاقت اور دیگر آزاد امیدواران حصہ لے رہے ہیں، پی پی 52 میں ووٹرز کی مجموعی تعداد 2 لاکھ 97 ہزار 185ہے۔
ترجمان الیکشن کمیشن کا کہنا ہے کہ حلقے میں پولنگ کے عمل کو شفاف اور منظم بنانے کے لیے کل 1 ہزار 696 پولنگ اہلکاروں کی تعیناتی کی گئی، حلقے میں کل 185 پولنگ سٹیشنز قائم کیے گئے جن میں سے 11کو انتہائی حساس، 38 کو حساس اور 136کو نارمل قرار دیا گیا، امن وامان کی صورتحال کو برقرار رکھنے کے لیے پولنگ اسٹیشنز پر 2 ہزار سے زائد پولیس اہلکاروں نے ڈیوٹی کے فرائض سرانجام دیئے۔.ذریعہ: UrduPoint
کلیدی لفظ: تلاش کیجئے مسلم لیگ ن پی پی 52
پڑھیں:
سمبڑیال: پی پی 52 ضمنی الیکشن، (ن) لیگ کی حنا ارشد کامیاب، الیکشن کمشنر نے دھاندلی کے الزامات مسترد کر دیئے
لاہور (نوائے وقت رپورٹ) پنجاب اسمبلی کے حلقہ پی پی 52 سیالکوٹ سمبڑیال کے ضمنی الیکشن میں پولنگ کا آغاز صبح 8 بجے ہوا، شام 5 بجے تک جاری رہی۔تمام 185 پولنگ سٹیشنوں کے غیرحتمی اور غیر سرکاری نتیجے کے مطابق ن لیگ کی حنا ارشد وڑائچ 78419 ووٹ لے کر کامیاب رہیں۔ پی ٹی آئی کے حمایت یافتہ آزاد امیدوار فاخر نشاط گھمن ٰ40037 ووٹ لیکر دوسرے نمبر پر رہے۔ اسلام آباد میں پی ٹی آئی کے سیکرٹری اطلاعات شیخ وقاص اکرم نے پریس کانفرنس کرتے ہوئے کہا کہ دھاندلی کے لیے کل رات سے ہی آر او آفس کے باہر کنٹینرز کی دیواریں بنا دی گئی تھیں۔ انہوں نے الزام لگایا کہ سمبڑیال میں ہر جگہ پولنگ سٹیشنز سے ہمارے نمائندوں کو نکالا گیا، پی ٹی آئی کے پولنگ ایجنٹوں کو مارا گیا اور تشدد کیا گیا، پولنگ سٹیشن میں ن لیگ والے رہے، ہمارے ایجنٹس کو اندر جانے نہیں دیا جا رہا۔ چیف الیکشن کمشنر مدت مکمل ہونے کے باوجود بیٹھے ہیں تو کیا کر رہے ہیں؟ جو ہیلپ لائنز ان لوگوں نے بنائی ہیں وہ کل سے مصروف رکھی گئی ہیں، صبح سے کسی بھی سٹیشن پر کوئی چیک اینڈ بیلنس پالیسی نظر نہیں آئی۔ الیکشن کمشنر نے پی پی 52 سیالکوٹ میں ضمنی انتخاب کے دوران پیپلز پارٹی کے امیدوار کی جانب سے ویڈیو پیغام کے ذریعے لگائے گئے الزامات کا نوٹس لے لیا۔ متعلقہ ڈسٹرکٹ مانیٹرنگ آفیسر کو حقائق دریافت کر کے رپورٹ جمع کروانے کے احکامات جاری کر دئیے۔ ڈسٹرکٹ مانیٹرنگ آفیسر کے مطابق پیپلز پارٹی کے امیدوار کی جانب سے کوئی شکایت درج نہیں کروائی گئی۔ پیپلز پارٹی کے امیدوار نے الزامات سے متعلق کوئی شواہد بھی پیش نہیں کئے۔ ڈسٹرکٹ مانیٹرنگ آفیسر کے مطابق امیدوار کی جانب سے الزامات بے بنیاد ہیں۔ پیپلز پارٹی پنجاب کے جنرل سیکرٹری حسن مرتضیٰ نے کہا ہے کہ مسلم لیگ ن سرکاری مشینری کے بغیر کبھی الیکشن نہیں جیت سکتی۔ مسلم لیگ ن کے پاس کوئی ایجنڈا ہے اور نہ ہی کوئی حکمت عملی، مسلم لیگ ن والے فارم 47 تیار کرنے کے ماسٹر ہیں۔ وزیر دفاع خواجہ آصف نے سیالکوٹ میں کارکنوں سے خطاب میں کہا ہے کہ پنجاب بھر سے انتخابی مہم میں حصہ ڈالنے والوں کا شکریہ ادا کرتا ہوں۔ یہ جیت ان تمام کارکنوں کے نام جنہوںنے گلی محلے میں الیکشن مہم چلائی۔ وزیراعلیٰ پنجاب مریم نواز اور ان کی پوری ٹیم مبارکباد کی حقدار ہے۔ اسی طرح الیکشن لڑتے رہے تو کوئی طاقت ہمیں ہرا نہیں سکتی۔ بھارت سے فتح حاصل کی‘ جیت میں اس کا بہت بڑا ہاتھ ہے۔اس موقع پر کارکنوں نے جشن بھی منایا۔
کراچی: آئندہ تین روز موسم گرم اور مرطوب رہے گا، محکمہ موسمیات