بھارت کی پراکسیز اور پاکستان کا عزم
اشاعت کی تاریخ: 30th, June 2025 GMT
شمالی وزیرستان میں فتنتہ الخوارج کے دہشت گردوں نے پاک فورسز کے قافلے پر بزدلانہ حملہ کیا جس کے نتیجے میں 13 جوان شہید ہوگئے جب کہ شدید فائرنگ کے تبادلے میں 14فتنتہ الخوارج کو جہنم واصل کردیا گیا۔ میر علی میں خود کش حملہ آور نے بارود سے بھری گاڑی سیکیورٹی فورسز کے قافلے سے ٹکرانے کی کوشش کی، تاہم قافلے کے آگے موجود دستے نے بروقت کارروائی کرتے ہوئے حملے کو ناکام بنایا۔
آپریشن بنیان مرصوص میں ہزیمت اٹھانے کے بعد بھارتی اسپانسرڈ پراکسیز پاکستان میں دہشت گردی پھیلانے لگی ہیں۔ مودی حکومت بھارتی عوام کی اپنی شکست سے توجہ ہٹانے کے لیے پراکسیز کے ذریعے پاکستان میں دہشت گردی پھیلا رہی ہے۔ بھارت، جو میدانِ جنگ میں پاکستان کی عسکری صلاحیتوں کے سامنے بے بس ہو چکا ہے، اب بچوں، خواتین اور عام شہریوں پر حملوں کے ذریعے اپنی شکست کا بدلہ لے رہا ہے۔
یہ بات کئی بار ثبوتوں کے ذریعے واضح ہو چکی ہے کہ پاکستان میں ہونے والی دہشت گردی کے پیچھے بھارت ہی ہے۔ بھارت تحریک طالبان پاکستان اور بلوچستان لبریشن آرمی جیسے کالعدم دہشت گروہوں کی مالی و لاجسٹک معاونت کر رہا ہے۔ افغانستان کے علاقے ان کارروائیوں کا مرکز ہے۔
فتنتہ الہندوستان کے ساتھ ’’ فتنتہالخوارج‘‘ کا اتحاد ایک اور خطرناک پہلو ہے، جو اس بات کی نشاندہی کرتا ہے کہ دہشت گرد عناصر صرف سرحد پار سے نہیں بلکہ مقامی سطح پر بھی متحرک اور منظم ہیں۔ بھارتی سرپرستی میں کام کرنے والے یہ نیٹ ورکس سوشل میڈیا پر ڈس انفولیب جیسے منصوبوں کے ذریعے فکری انتشار پھیلاتے ہیں اور مذہبی و نسلی اختلافات کو ہوا دیتے ہیں۔
پاکستان میں جاری دہشت گردی کی نئی لہر اور اس کے پیچھے مبینہ بھارتی سرپرستی نے ایک بار پھر خطے کی سلامتی، داخلی استحکام اور علاقائی طاقتوں کی پراکسی وار پر سنجیدہ سوالات اٹھا دیے ہیں۔ پاکستان اور دیگر متاثرہ ممالک کی جانب سے بارہا بین الاقوامی سطح پر بھارت کی مداخلت اور تخریبی کردار کے شواہد پیش کیے جا چکے ہیں، پاکستان ان چند ممالک میں شامل ہے، جو اس بھارتی رویے سے سب سے زیادہ متاثر ہوئے ہیں، خصوصاً گزشتہ دو دہائیوں کے دوران جاری بھارتی خفیہ دہشت گردی کی مہم عالمی امن کے لیے شدید خطرہ بن چکی ہے۔
پاکستان کا ہمیشہ سے دوٹوک مؤقف رہا ہے کہ وہ ہر قسم کی دہشت گردی کے خلاف زیرو ٹالرنس پالیسی رکھتا ہے۔ پاکستان خود دہشت گردی کا شکار رہا ہے اور حالیہ دہشت گردی کی لہر، جس کے پیچھے بھارتی خفیہ ایجنسی را اور اس کے علاقائی سہولت کاروں کا ہاتھ ہے، کا بھرپور انداز میں مقابلہ کیا جا رہا ہے۔ ’’فتنتہ الہندوستان‘‘ صرف ایک گروہ نہیں بلکہ ایک سوچ ہے جس کا مقابلہ صرف گولی سے نہیں، سچ، حکمت، اور قومی یکجہتی سے کیا جا سکتا ہے۔ دشمن کے ہر وار کا جواب صرف بندوق سے نہیں بلکہ ترقی، تعلیم، اور امن کے بیانیے سے دینا ہو گا۔
2009میں مصر کے شہر شرم الشیخ میں ہونے والی دو طرفہ بات چیت کے دوران پاکستان نے پہلی بار باضابطہ طور پر بلوچستان میں بھارتی مداخلت کا معاملہ اٹھایا، 2010میں وکی لیکس کے انکشافات سے بھی اس بات کی تصدیق ہوئی کہ بین الاقوامی مبصرین پاکستان میں بھارتی خفیہ سرگرمیوں، خاص طور پر بلوچستان میں بدامنی سے متعلق کارروائیوں سے بخوبی آگاہ تھے۔2015میں پاکستان نے بھارتی دہشت گردی کے ثبوتوں پر مشتمل ایک جامع ڈوزیئر اقوامِ متحدہ کو پیش کیا، جس میں بھارتی انٹیلی جنس اداروں کے کردار کو بے نقاب کیا گیا۔
2016میں بھارتی نیوی کے حاضر سروس افسر کلبھوشن یادیو کی گرفتاری نے ان شواہد کو عملی شکل دے دی، کلبھوشن نے پاکستان میں تخریب کاری، خاص طور پر بلوچستان میں کارروائیوں کا اعتراف کیا۔ پاکستان نے 2019 اور پھر 2023 میں اقوام متحدہ کو مزید ڈوزیئرز فراہم کیے ۔ یہی وہ فضا ہے جس میں پاکستان کے ترقیاتی منصوبے، خصوصاً سی پیک، کو سبوتاژ کرنے کی منظم کوششیں کی جا رہی ہیں۔ ہر حملہ ایک ہی مقصد کے تحت کیا گیا کہ پاکستان کو معاشی طور پر کمزور کرنا، عوام میں خوف پھیلانا اور عالمی سطح پر غیر یقینی فضا قائم کرنا۔ بی ایل اے محض ایک گروہ نہیں بلکہ دہلی کا تیار کردہ ہتھیار ہے جو پاکستانی سرزمین پر بھارت کی ناپاک جنگ لڑ رہا ہے۔
بی ایل اے کو تربیت، فنڈنگ، اسلحہ اور اہداف سب کچھ دہلی سے فراہم کیا جاتا ہے۔بھارتی میڈیا بھی اس پراکسی بیانیے کا حصہ بن چکا ہے۔ بھارتی میڈیا ان دہشت گردوں کو پلیٹ فارم فراہم کرتا ہے بلکہ ان کے بیانیے کو ’’علیحدگی پسندی‘‘ کے رنگ میں چھپا کر پیش کرتا ہے ۔ یہ وہی بھارت ہے جو انسانی حقوق کے نام پر دنیا بھر میں لیکچر دیتا ہے، مگر خود بچوں پر حملے کرواتا ہے اور قاتلوں کو مائیک تھما دیتا ہے۔
بھارت کی خفیہ کارروائیوں اور دہشت گردی سے متعلق سرگرمیوں میں سرحدوں سے باہر ملوث ہونے کے الزامات اب عالمی سطح پر کوئی ڈھکی چھپی بات نہیں رہی۔ جو ملک کبھی صرف داخلی سیکیورٹی چیلنجز کا سامنا کرنے والا ایک علاقائی طاقت سمجھا جاتا تھا، اب اس پر ریاستی سرپرستی میں غیر ملکی سرزمین پر ایسی کارروائیاں کرنے کے الزامات لگ رہے ہیں جو بین الاقوامی قوانین کی خلاف ورزی اور سفارتی تعلقات کو نقصان پہنچانے کا سبب بن رہے ہیں۔ یہ بیانیہ اب صرف پاکستان جیسے روایتی مخالف ممالک تک محدود نہیں رہا بلکہ کینیڈا اور امریکا جیسے ممالک بھی بھارت کی خفیہ ایجنسیوں کی کارروائیوں پر سوالات اٹھا رہے ہیں۔
بھارت کے خلاف سب سے پرانے اور مسلسل الزامات پاکستان کی طرف سے آتے رہے ہیں، جس نے کئی بار بھارتی مداخلت اور دہشت گرد سرگرمیوں کے شواہد پیش کیے ہیں۔ ان الزامات کو عالمی حیثیت اس وقت حاصل ہوئی جب 18 ستمبر 2023 کو کینیڈا کے وزیر اعظم جسٹن ٹروڈو نے ہاؤس آف کامنز میں بیان دیا کہ بھارتی ایجنٹوں کا ہاتھ کینیڈین شہری اور خالصتان حامی رہنما ہردیپ سنگھ نجار کے قتل میں ملوث ہے۔
نجار کو 18 جون 2023 کو برٹش کولمبیا کے شہر سرے میں ایک گردوارے کے باہر گولی مار کر قتل کیا گیا۔ کینیڈا نے ایک سینئر بھارتی سفارتکار کو ملک بدر کیا جس پر بھارت نے جوابی اقدام کے تحت کینیڈین سفارتکار کو ملک چھوڑنے کا حکم دیا۔ یہ پہلا موقع تھا کہ کسی مغربی جمہوریت نے بھارت پر براہ راست غیر ملکی سرزمین پر ٹارگٹ کلنگ کا الزام عائد کیا،ایسا رویہ جو عموماً آمریت پسند ریاستوں سے منسوب ہوتا ہے۔ ان الزامات کو مزید تقویت اس وقت ملی جب 29 نومبر 2023 کو امریکی محکمہ انصاف نے ایک بھارتی شہری کے خلاف فرد جرم جاری کی، جس میں اسے خالصتانی امریکی شہری کے قتل کی سازش میں ملوث قرار دیا گیا۔
فردِ جرم میں خفیہ رابطے، مالی لین دین اور نگرانی کے شواہد شامل تھے، جنھوں نے بھارتی ریاستی کردار کو واضح کیا۔ یہ پیش رفت نہ صرف بھارت کے روایتی مخالفین بلکہ اس کے اتحادیوں کے اندر بھی تشویش کا باعث بنی۔ انسانی حقوق کی عالمی تنظیمیں بھی بھارت کے ان اقدامات پر تنقید کر چکی ہیں۔ ہیومن رائٹس واچ اور ایمنسٹی انٹرنیشنل نے ان الزامات کو سنگین قرار دیا ہے۔ایک جمہوری ریاست کا یہ طرزِ عمل بین الاقوامی قوانین، ریاستی خودمختاری اور قانون کی حکمرانی جیسے عالمی اصولوں پر سنگین سوالات اٹھاتا ہے، اگر کوئی ریاست جمہوری ممالک میں اپنے مخالفین یا شہریوں کو قتل کرتی ہے تو یہ ایک خطرناک مثال قائم کرتی ہے۔
جنوبی ایشیا کے تناظر میں بھی یہ اقدامات عدم استحکام کو جنم دیتے ہیں۔ پاکستان میں بھارتی سرپرستی میں دہشت گردی کا موضوع نیا نہیں۔ 2014 کے آرمی پبلک اسکول پشاور کے سانحے میں 149 افراد، جن میں 132 بچے شامل تھے، شہید کیے گئے۔ پاکستانی حکام نے اس حملے کو ان گروہوں سے جوڑا جو مبینہ طور پر بھارت کی افغان سرزمین سے حمایت حاصل کرتے تھے۔ پاکستان نے ان الزامات پر بین الاقوامی تحقیقات اور اقوام متحدہ و او آئی سی میں شواہد پیش کرنے کی بارہا کوشش کی۔
پاکستان نے دہشت گردی کے خلاف جنگ میں 83,000 سے زائد جانوں کی قربانی دی ہے۔ پاکستان امن، ترقی اور خودمختاری کے راستے پر چل رہا ہے، اور ہر بار جب ملک آگے بڑھتا ہے، دشمن اپنے بزدلانہ ہتھکنڈے دہراتا ہے، لیکن اب وقت آ چکا ہے کہ شہدا کا حساب لیا جائے۔
دشمن کے ہر ایجنٹ، ہر سہولت کار، اور ہر سازشی کو قانون کے کٹہرے میں لایا جائے گا۔مختلف ممالک سے سامنے آنے والے ان شواہد، انٹیلیجنس شیئرنگ اور قانونی اقدامات سے یہ بات واضح ہوتی ہے کہ بھارت پر لگنے والے الزامات محض مفروضے نہیں۔ اگر یہ الزامات درست ثابت ہوتے ہیں تو بھارت کو دیگر ریاستوں کی طرح بین الاقوامی قانون کے مطابق جوابدہ ٹھہرایا جانا چاہیے۔ عالمی امن و انصاف کو برقرار رکھنے کے لیے کسی بھی ریاست کو استثنیٰ نہیں دیا جا سکتا۔
.ذریعہ: Express News
کلیدی لفظ: بین الاقوامی دہشت گردی کے پاکستان میں پاکستان نے میں بھارتی ان الزامات نہیں بلکہ پر بھارت بھارت کی کے ذریعے رہے ہیں کے خلاف رہا ہے
پڑھیں:
پاکستان دہشت گردی کے خلاف جنگ میں کامیابی کے قریب ہے،فیلڈمارشل
فیلڈ مارشل سید عاصم منیر نے کہاہے کہ جب تک مسئلہ کشمیر کا منصفانہ حل نہیں نکلتا، جنوبی ایشیا میں پائیدار امن ممکن نہیں، ہمارادشمن متکبرانہ اور جارحانہ رویے کامسلسل مظاہرہ کررہاہے ،دشمن اگرسمجھتاہے کہ ملکی خودمختاری پر حملے کو برداشت کریںگے تو یہ اس کی غلط فہمی ہوگی،پاکستان دہشت گردی کے خلاف جنگ میں کامیابی کے قریب ہے۔
پاکستان نیول اکیڈمی میں 123ویں مڈشپ مین اور 31ویں شارٹ سروس کمیشن کورس کی شاندار کمیشننگ پریڈ سے خطاب انہوں نے کہا کہ میری ٹائم واریئرز کی یہ پروقار پریڈ پاکستان نیول اکیڈمی کے اعلیٰ تربیتی معیار کا عملی مظہر ہے۔
فیلڈ مارشل نے کامیاب کیڈیٹس کو مبارکباد دیتے ہوئے کہا کہ ان کے پُراعتماد انداز میں قوم کی امیدیں سمٹ آئی ہیں۔ انہوں نے دوست ممالک — ترکی، بحرین، عراق، فلسطین اور جبوتی — کے کیڈیٹس کو بھی تربیت مکمل کرنے پر خصوصی مبارکباد پیش کی۔
آرمی چیف نے امیدظاہرکی کہ پاک بحریہ کا حصہ بننے والے افسران اعلیٰ عسکری اخلاقیات اور غیرمعمولی مہارت کے امین ہوں گے اور ان کی ذمہ داری ہے کہ وہ اپنی آپریشنل صلاحیتوں کو مزید بہتر کریں کیونکہ بحری جنگ کا منظرنامہ تیزی سے تبدیل ہو رہا ہے۔
انہوں نے بھارت کو تنبیہ کرتے ہوئے کہا کہ دشمن اپنی فوجی طاقت، قوم پرستی اور جعلی اسٹریٹجک بیانیے سے خطے میں عدم استحکام پیدا کرنا چاہتا ہے۔ بھارت نے گزشتہ برسوں میں دہشت گردی کے بہانے دو بار پاکستان پر بلاوجہ حملے کیے، تاہم پاکستان کے مؤثر جواب سے بڑے تنازعے کو ٹالا گیا۔
فیلڈ مارشل نے کہا کہ اگر دشمن سمجھتا ہے کہ پاکستان آئندہ بھی اپنی خودمختاری پر حملے کو برداشت کرے گا، تو یہ خطرناک غلط فہمی ہوگی۔ پاکستان اپنی خودمختاری اور قومی مفادات کے دفاع میں کوئی جھجک نہیں دکھائے گا۔
انہوں نے سورہ بقرہ کی آیت 249 کا حوالہ دیتے ہوئے کہا ’’کتنی ہی بار ایسا ہوا کہ تھوڑی سی تعداد نے اللہ کے حکم سے بڑی تعداد کو شکست دی، اور اللہ صبر کرنے والوں کے ساتھ ہے۔‘‘
فیلڈ مارشل عاصم منیر نے کہا کہ جب پاکستان دہشت گردی کے خلاف اپنی جنگ میں کامیابی کے قریب ہے، بھارت جان بوجھ کر خطے میں کشیدگی بڑھا رہا ہے، پاکستان یہ جنگ مکمل کامیابی تک جاری رکھے گا۔
انہوں نے مقبوضہ کشمیر کے عوام کو خراجِ تحسین پیش کرتے ہوئے کہا کہ بھارت جسے دہشت گردی کہتا ہے، وہ کشمیریوں کی جائز آزادی کی جدوجہد ہے۔ پاکستان کشمیری عوام کی سیاسی، اخلاقی اور سفارتی حمایت جاری رکھے گا۔
آرمی چیف نے سورہ آلِ عمران کی آیت 54 کا حوالہ دیتے ہوئے کہا’’ انہوں نے چالیں چلیں اور اللہ نے بھی تدبیر کی، اور بہترین تدبیر کرنے والا اللہ ہے‘‘۔
انہوں نے کہا کہ جب تک مسئلہ کشمیر کا منصفانہ حل نہیں نکلتا، جنوبی ایشیا میں پائیدار امن ممکن نہیں۔
خطاب کے اختتام پر آرمی چیف نے کہا کہ پاکستان ایک روشن مستقبل کی طرف گامزن ہے اور دشمن کی تمام رکاوٹوں کے باوجود ہمارا ترقی کا سفر جاری رہے گا۔
اس سے پہلے پاکستان نیول اکیڈمی پی این ایس رہبر میں پاسنگ آؤٹ پریڈ کی پروقار پاسنگ آؤٹ پریڈ تقریب میں فیلڈ مارشل عاصم منیر کو پاک بحریہ کے چاق و چوبند دستے نے سلامی پیش کی۔
پاسنگ آوٹ پریڈ کے موقع پر فیلڈ مارشل نے پریڈ کا معائنہ کیا اور بعد ازاں123ویں مڈ شپ مین اور 31ویں شارٹ سروس کمیشن کورس میں نمایاں کارکردگی دکھانے والے کیڈٹس میں انعامات بھی تقسیم کئے۔
تقریب میں پاک بحریہ کے اعلیٰ افسران اورفارغ التحصیل کیڈٹس کے اہل خانہ نے بھی شرکت کی۔ تقریب میں اہم شخصیات کے علاوہ غیر ملکی سفارت کار بھی شریک ہوئے۔
پاسنگ آؤٹ پریڈ میں فارغ التحصیل کیڈٹس سے ذمہ داریوں کا حلف لیا گیا جب کہ تقریب میں مہمان خصوصی نے نمایاں کارکردگی دکھانے والے کیڈٹس کو اعزازات سے نوازا جبکہ پاس آؤٹ ہونے والے کیڈٹ عبدالرحمٰن کو اعزازی شمشیر سے نوازا گیا۔
پیپلز پارٹی کا بجٹ میں متنازع شقوں میں ترمیم کا مطالبہ، کابینہ آج نظر ثانی شدہ بجٹ کی منظوری دے گی