پاک بھارت کشیدہ تعلقات کے دوران 67 پاکستانی قیدی رہا، برسوں بعد وطن واپسی
اشاعت کی تاریخ: 9th, September 2025 GMT
بھارت نے کشیدہ سیاسی ماحول کے باوجود انسانی ہمدردی کے تحت 67 پاکستانی قیدی رہا کر دیے جنہیں واہگہ بارڈر کے ذریعے پاکستانی حکام کے حوالے کیا گیا۔ ان قیدیوں میں 53 ماہی گیر اور 14 عام شہری شامل ہیں، جو کئی برسوں سے بھارتی جیلوں میں قید تھے۔
کئی سال بعد گھر کی دہلیز پر واپسی
واپس آنیوالے قیدیوں میں زیادہ تر کا تعلق کراچی اور سندھ کے دیگر ساحلی علاقوں سے ہے۔ یہ ماہی گیر معمول کے مطابق سمندر میں مچھلی پکڑنے گئے تھے، مگر بدقسمتی سے سمندری حدود کی مبینہ خلاف ورزی پر بھارتی فورسز نے گرفتار کر لیا تھا۔
ایک نوجوان ماہی گیر، جسے 19 برس کی عمر میں گرفتار کیا گیا تھا، 15 برس بعد اپنے والد سمیت واپس وطن پہنچا ہے۔ ان کے ساتھ گرفتار 15 میں سے 2 ساتھی بھارتی جیلوں میں ہی جان کی بازی ہار گئے، جبکہ باقی تاحال قید ہیں۔
ہائی کمیشن کی معاونت، قیدیوں کی جلد واپسی کی امید
پاکستانی ہائی کمیشن نئی دہلی نے ایکس (سابقہ ٹوئٹر) پر جاری بیان میں کہا کہ 7 پاکستانی شہری، جن میں 48 ماہی گیر اور 19 سول قیدی شامل ہیں، اٹاری-واہگہ بارڈر کے ذریعے پاکستان پہنچے۔ دہلی میں پاکستانی مشن کے افسران قیدیوں کی واپسی کے عمل کی نگرانی اور معاونت کے لیے خود موقع پر موجود تھے۔
بیان میں مزید کہا گیا کہ حکومت پاکستان بھارتی جیلوں میں قید تمام پاکستانیوں کی رہائی کے لیے کوششیں جاری رکھے گی۔
واپسی کے بعد کلیئرنس اور گھروں کو روانگی
سکیورٹی حکام کے مطابق واہگہ بارڈر پر ضروری تفتیش اور سیکیورٹی کلیئرنس کے بعد تمام قیدیوں کو ان کے گھروں کو بھیج دیا جائے گا تاکہ وہ برسوں بعد اپنے اہل خانہ سے دوبارہ مل سکیں۔
قیدیوں کی فہرست کا تبادلہ بھی ہوا
یہ رہائی ایک ایسے وقت میں عمل میں آئی ہے جب دونوں ممالک کے تعلقات کشیدگی کا شکار ہیں۔ تاہم، یکم جولائی 2025 کو پاکستان اور بھارت نے قیدیوں کی تازہ فہرست کا تبادلہ کیا تھا۔
بھارت کی جانب سے پاکستان کو دی گئی فہرست کے مطابق 463 پاکستانی قیدی بھارتی جیلوں میں موجود ہیں، جن میں 382 عام شہری 81 ماہی گیر شامل ہیں جبکہ پاکستان میں موجود 246 بھارتی قیدیوں میں 53 سول قیدی ہیں
ذریعہ: Daily Mumtaz
کلیدی لفظ: بھارتی جیلوں میں قیدیوں کی ماہی گیر
پڑھیں:
پاکستانی ٹیم سے ہاتھ نہ ملانے پر بھارتی بورڈ کا موقف سامنے آگیا
ایشیا کپ کے میچ میں بھارتی کھلاڑیوں کی جانب سے پاکستانی ٹیم سے ہاتھ نہ ملانے کے معاملے پر انڈین بورڈ کا موقف سامنے آگیا۔
بھارتی کرکٹ بورڈ (بی سی سی آئی) کے ایک سینئر عہدیدار کا کہنا ہے کہ کرکٹ میچ کے بعد مخالف ٹیم سے مصافحہ محض نیک خواہشات کے اظہار کا ایک طریقہ ہے، کوئی لازمی قانون نہیں۔
بی سی سی آئی عہدیدار نے خبر رساں ایجنسی پی ٹی آئی سے گفتگو میں کہا کہ اگر آپ رول بُک پڑھیں تو اس میں کہیں نہیں لکھا کہ مخالف ٹیم سے مصافحہ لازمی ہے۔ یہ محض ایک روایت ہے کوئی قانون نہیں۔"
انہوں نے مزید کہا کہ بھارت اور پاکستان کے درمیان کشیدہ تعلقات کے پیش نظر کھلاڑیوں کو مصافحہ پر مجبور نہیں کیا جا سکتا۔
واضح رہے کہ اتوار کو پاکستان اور انڈیا کے درمیان کھیلے گئے ایشیا کپ کے میچ میں ٹاس کے بعد بھارتی کپتان اور میچ کے بعد بھارتی کرکٹرز نے پاکستانی کھلاڑیوں سے ہاتھ ملانے سے گریز کیا تھا، بھارتی کرکٹرز کا رویہ اسپورٹس مین اسپرٹ کے شدید منافی تھا۔
یہ بھی پڑھیں: ایشیا کپ؛ بھارتی ٹیم کے رویے کیخلاف اے سی سی کا سخت ایکشن لینے پر غور
بھارتی ٹیم کے غیر منساب رویے پر پاکستان کرکٹ ٹیم کے مینیجر نوید اکرم چیمہ نے بھی شدید احتجاج کیا تھا جبکہ انہوں نے میچ ریفری کے رویے پر بھی اعتراض کیا جو کپتانوں سے ٹاس کے دوران ہاتھ نہ ملانے کی درخواست کر رہے تھے۔
پاکستان کرکٹ بورڈ نے اس معاملے پر آئی سی سی کو خط لکھ کر میچ ریفری کی تبدیلی کا بھی مطالبہ کیا، ذرائع نے کہا کہ پی سی بی کے مطالبے پر اگر آئی سی سی نے میچ ریفری کو تبدیل نہ کیا تو پاکستان ٹیم ایشیا کپ کے مزید کسی میچ میں حصہ نہیں لے گی۔
پاکستان کا موقف ہے کہ بھارتی کھلاڑیوں نے دانستہ طور پر پاکستانی پلیئرز سے ہاتھ نہ ملا کر کھیل کی ساکھ کو نقصان پہنچایا، میچ ریفری نے جان بوجھ کر کپتانوں کو ہاتھ ملانے سے روکا۔
پی سی بی نے میچ ریفری اینڈی پائیکرافٹ کو فوری طور پر ہٹانے کا مطالبہ کرتے ہوئے کہا ہے کہ انہوں نے آئی سی سی کوڈ آف کنڈکٹ اور "اسپرٹ آف کرکٹ" کے قوانین کی خلاف ورزی کی۔
بھارتی بورڈ کی دولت میں 5برس کے دوران کروڑوں روپے کا اضافہ