ایسا رویہ ناقابلِ برداشت ہے، منیب بٹ شادیوں میں کھانا ضائع کرنے والے مہمانوں پر برس پڑے
اشاعت کی تاریخ: 5th, May 2025 GMT
کراچی(شوبز ڈیسک)اداکار منیب بٹ نے حال ہی میں اپنے برادرِ نسبتی معاذ خان کی شادی میں شرکت کی جہاں وہ نہ صرف قریبی عزیز کی حیثیت سے موجود تھے بلکہ بطور ”بڑے سالے“ تمام انتظامی ذمہ داریاں بھی بخوبی نبھاتے نظر آئے۔
تقریبات میں رنگ، خوشیاں اور محبت کا بھرپور سماں رہا، لیکن منیب بٹ نے اپنی روایت کے مطابق ایک وی لاگ کے ذریعے مداحوں کو پسِ پردہ لمحات میں جھانکنے کا موقع بھی دیا۔ تاہم اس وی لاگ میں ایک ایسا لمحہ بھی سامنے آیا جس نے سوشل میڈیا پر بحث چھیڑ دی۔
منیب بٹ شادی میں کھانے کے ضیاع پر خاصے برہم نظر آئے۔ ویڈیو میں دیکھا جا سکتا ہے کہ وہ شادی کے کھانے کے شعبے کی نگرانی کر رہے تھے، اور بار بار کچن کا چکر لگاتے ہوئے انہوں نے نوٹ کیا کہ مہمان اپنی پلیٹیں بھر کر کھانے کو ضائع کر رہے ہیں۔
اداکار نے وی لاگ میں پلیٹوں کی طرف اشارہ کرتے ہوئے کہا:
”میں نے تین بار کچن کا دورہ کیا ہے، کھانا کبھی ختم نہیں ہوتا، ختم تب ہوتا ہے جب مہمان اسے ضائع کرتے ہیں۔“
انہوں نے بچا ہوا کھانا کیمرے پر دکھاتے ہوئے کہا کہ یہ سب ضائع ہو گیا ہے اور یہ رویہ قابل افسوس ہے۔ منیب کا کہنا تھا کہ صرف شادی میں مہمان بن جانا اس بات کی اجازت نہیں دیتا کہ آپ اپنی پلیٹ میں ضرورت سے زیادہ کھانا ڈال کر اسے ضائع کریں۔
اس وی لاگ کا وہ کلپ تیزی سے سوشل میڈیا پر وائرل ہو چکا ہے، جہاں صارفین نے منیب بٹ کے مؤقف کی حمایت کی ہے۔ ایک صارف نے تبصرہ کیا،
”بالکل ایسا ہی ہماری فیملی میں بھی دیکھا ہے، شکریہ کہ آپ نے یہ بات کھل کر کی۔“
ایک اور صارف نے لکھا،
”جتنا کھا سکتے ہیں، اتنا ہی لینا چاہیے، یہ بہت سادہ اصول ہے!“
جبکہ ایک فالوور کا کہنا تھا،
”ہمارے معاشرے میں لالچ بہت ہے، اور یہی اس طرح کے ضیاع کی وجہ بنتا ہے۔“
منیب بٹ کا یہ قدم جہاں ایک عام سی شادی کی ویڈیو لگ رہی تھی، وہیں معاشرتی اصلاح کی ایک مثبت کوشش بھی بن گیا ہے، جسے عوام کی بڑی تعداد سراہ رہی ہے۔
مزیدپڑھیں:’قرآن میرے سرہانے رہتا ہے، روحانی سکون کا ذریعہ ہے‘، ہالی ووڈ اداکار کا انکشاف
ذریعہ: Daily Ausaf
پڑھیں:
علیمہ خان کے 8 ویں مرتبہ ناقابل ضمانت وارنٹ گرفتاری جاری
انسداد دہشت گردی عدالت نے علیمہ خانم کے تھانہ صادق اباد مقدمہ میں مسلسل غیر حاضری پر 8 ویں ناقابل ضمانت وارنٹ گرفتاری جاری کر دئیے۔
انسداد دہشتگردی راولپنڈی ڈویژن کی خصوصی عدالت کےجج امجد علی شاہ نے علیمہ خانم کی وارنٹ تعمیل کے باوجود پیش نہ ہونے پر ایکبار پھر ناقابل وارنٹ گرفتاری جاری کردیئے سماعت کے موقع پر علیمہ خانم کے بینک اکاؤنٹس منجمد کرنے کے حوالے سے رپورٹ عدالت پیش کر دی گئی۔
جس میں بتایا گیا کہ مجموعی طور پر علیمہ خانم کے 12 بینک اکاؤنٹس منجمد کیے جا چکے ہیں بینک الفلاح اور ایم سی بی نے اکاؤنٹس منجمد کیئے گئے ہیں ایم سی بی اکاؤنٹ میں 1کروڑ 24لاکھ روپے کابیلنس موجود ہے۔
عدالت نےعدالتی نوٹس کے باوجودرپورٹ عدالت پیش نہ کرنے پریو بی ایل کے مینجر ہیڈ آفس کراچی اورحبیب میٹرو بینک کے منیجرسید منصور حسین کے بھی وارنٹ گرفتاری جاری کر دئیے جبکہ بینک افسران خود بھی عدالت پیش نہ ہوئے سنہری بینک اور بینک اف پنجاب نے بھی رپورٹ پیش نہ کر سکے۔
دونوں کو توہین عدالت کے نوٹس جاری کر دیئے گئے پراسیکیوٹرنے عدالت کو بتایا کہ ملزمہ علیمہ خانم دیدہ دانستہ طور پر عدالتی کاروائی کا مذاق بنا رہی ہیں۔
ملزمہ کھلےعام عدالتی احکامات کی خلاف ورزی کر رہی ہےملزمہ کے رویہ کے باعث فوجداری نظام عدل کا مذاق بنا دیا گیا،جان بوجھ کر مقدمے کا ٹرائل روک دیا گیا ہے، ملزمہ کی منقولہ اور غیرمنقولہ جائیدارکی تفصیلات حاصل کی جائیں تاکہ اگلے مرحلے میں ملزمہ کی منقولہ اور غیر منقولہ جائیداد کو ضبط کیا جا سکے۔
عدالت نے ملزمہ کی پراپرٹیز تفصیلات فراہم کرنے کا حکم دیا ہے عدالت نے چیئرمین سی ڈی اے کمشنر اسلام آباد کو بھی ملزمہ کی جائیداد کی تفصیلات فراہم کرنے اور چیئرمین ایس ایچ سی پی کو بھی ملزمہ کے نام پر رجسٹر کمپنی یا شیئرزکی تفصیلات فراہم کرنے کا حکم دے دیا۔
ملزمہ اور وکلاء صفائی کی عدم حاضری کے باعث گواہان کی شہادت ریکارڈ نہ کی جا سکی۔
کراچی: ٹریفک کیمروں کی نگرانی کے دوران وائرل تصویروں پر ڈی آئی جی ٹریفک کا بیان آگیا