بارش، ژالہ باری اور آسمانی بجلی، بلوچستان میں چار افراد اور سینکڑوں مویشی ہلاک
اشاعت کی تاریخ: 5th, May 2025 GMT
بلوچستان کے مختلف علاقوں میں موسلا دھار بارش، ژالہ باری اور آسمانی بجلی گرنے کے نتیجے میں کم از کم چار افراد جان کی بازی ہار گئے جبکہ سینکڑوں مویشی بھی ہلاک ہو گئے۔ حکام کے مطابق کئی علاقوں میں شدید ژالہ باری سے فصلوں کو بھی نقصان پہنچا ہے۔
محکمہ موسمیات کا کہنا ہے کہ گزشتہ دو دنوں کے دوران شیرانی، ژوب، قلعہ سیف اللہ، بارکھان، موسیٰ خیل، کوہلو، ڈیرہ بگٹی، خضدار، نصیرآباد، جعفرآباد، صحبت پور، جھل مگسی اور اوستہ محمد سمیت متعدد علاقوں میں تیز ہواؤں، گرج چمک، بارش اور ژالہ باری ہوئی ہے اور کچھ علاقوں میں اب بھی وقفے وقفے سے بارش کا سلسلہ جاری ہے۔
ان بارشوں سے جہاں گرمی کی شدت اور خشک سالی کے اثرات میں کمی آئی ہے وہیں شدید ژالہ باری نے کئی مقامات پر کھڑی فصلوں کو بھی نقصان پہنچایا ۔
قدرتی آفات سے نمٹنے والے صوبائی ادارے پی ڈی ایم اے کے مطابق ژوب، موسیٰ خیل، بارکھان، خضدار اور کوہلو میں آسمانی بجلی گرنے کے متعدد واقعات رپورٹ ہوئے ہیں۔ پی ڈی ایم اے کے مطابق خضدار کے علاقے سارونہ میں آسمانی بجلی گرنے سے کم از کم 140 جبکہ موسیٰ خیل میں 50 سے 60 اور کوہلو میں 40 سے 50 مویشی ہلاک ہوئے۔
موسیٰ خیل لیویز کے مطابق موضع زور میرن میں آسمانی بجلی گرنے سے ایک شخص روزالدین ہلاک ہوا۔ جبکہ یونین کونسل راڑہ شم میں ایک بچہ ریلے میں ڈوب کر ہلاک ہو گیا۔ اسی طرح موضع اولمئی میں اختر ملیزئی کے 30 دنبے آسمانی بجلی کی زد میں آ کر مر گئے۔
بارکھان میں شدید ژالہ باری کے نتیجے میں گندم کی کھڑی فصلوں کو نقصان پہنچا۔ پی ڈی ایم اے کے مطابق بارکھان کے علاقے حیسنی میں آسمانی بجلی گرنے سے ایک شخص زخمی ہوا جبکہ دو گائیں ہلاک ہوئیں۔ ادھر جھل مگسی کے گاؤں گزکھڑ میں تیز آندھی کے باعث مکان کی چھت گرنے سے محمد اشرف مگسی کی 30 بکریاں مر گئیں۔
لیویز نے ژوب کے علاقے کلی تورہ درگہ میں 10 سالہ خان باز کی آسمانی بجلی گرنے سے ہلاکت کی تصدیق کی ہے۔ ژوب کے مختلف علاقوں میں شدید ژالہ باری سے فصلوں کو نقصان پہنچنے کی بھی اطلاعات ہیں۔
ژوب کے رہائشی محمد عاطف نے بتایا کہ اولے اتنے بڑے تھے کہ ان کے نیچے کھڑا ہونا مشکل تھا۔ کئی منٹ تک مسلسل جاری رہنے والی ژالہ باری نے زمین پر سفید چادر بچھا دی اس دوران سولر پینلز اور کھڑی فصلوں کو بھی شدید نقصان پہنچایا۔
ادھر خضدار کی تحصیل کرخ میں ایک بچہ واٹر چینل میں ڈوب کر ہلاک ہوا ہے۔ خضدار کے علاقے سارونہ میں آسمانی بجلی گرنے سے درجنوں مویشی ہلاک ہوئے ہیں۔ متاثرہ افراد نے حکومت سے نقصان کے ازالے کی اپیل کی ہے۔
تیز ہواؤں اور بارش کے باعث کوہلو اور اوستہ محمد میں بجلی کی فراہمی متاثر ہوئی ہے جبکہ صحبت پور کے گوٹھ اسماعیل خان میں آسمانی بجلی گرنے سے کھیت میں آگ بھڑک اٹھی جس سے فصل کو نقصان پہنچا۔
محکمہ موسمیات کے مطابق گذشتہ 24 گھنٹوں کے دوران مسلم باغ میں 15 ملی میٹر، اوستہ محمد میں 10، بارکھان میں 6 اور ژوب میں 1 ملی میٹر بارش ریکارڈ کی گئی۔ سب سے زیادہ درجہ حرارت تربت میں 45.
محکمہ موسمیات نے پیشنگوئی کی ہے کہ منگل کو بلوچستان کے بیشتر اضلاع میں موسم گرم، جزوی طور پر ابرآلود رہے گا اور تیز ہوائیں چلنے کا امکان ہے تاہم خضدار، کچھی، سوراب، کوئٹہ، پشین، قلعہ عبداللہ، ڈیرہ بگٹی، لسبیلہ، زیارت، قلات، ہرنائی، لورالائی، قلعہ سیف اللہ، ژوب، موسیٰ خیل، بارکھان اور کوہلو میں مزید بارش کا امکان ظاہر کیا گیا ہے۔ Post Views: 1
ذریعہ
ذریعہ: Daily Mumtaz
کلیدی لفظ: میں ا سمانی بجلی گرنے سے شدید ژالہ باری علاقوں میں کے علاقے فصلوں کو کے مطابق
پڑھیں:
ملک کے مختلف علاقوں میں بارش، گرمی اور گلیشیائی جھیلوں کے پھٹنے کے خطرات کی پیشگوئی
ملک بھر میں شدید گرمی کی لہر جاری ہے، جہاں بلوچستان کے شہر نوکنڈی اور سبی 48 ڈگری سینٹی گریڈ کے ساتھ سب سے گرم مقامات رہے۔
محکمہ موسمیات نے کوئٹہ سمیت مختلف علاقوں میں درجہ حرارت میں اضافے کی پیشگوئی کی ہے، جبکہ این ڈی ایم اے نے آئندہ دنوں کے لیے بارش، گرمی اور ممکنہ خطرناک موسمی صورتحال کے حوالے سے الرٹ جاری کر دیا ہے۔
بلوچستان کے شہر نوکنڈی اور سبی گزشتہ روز ملک کے گرم ترین شہر رہے، جہاں درجہ حرارت 48 ڈگری سینٹی گریڈ ریکارڈ کیا گیا۔
محکمہ موسمیات کے مطابق گزشتہ روز دالبندین میں زیادہ سے زیادہ درجہ حرارت 47 ڈگری سینٹی گریڈ ریکارڈ کیا گیا، جبکہ صوبائی دارالحکومت کوئٹہ میں رواں موسم کی اب تک کی سب سے زیادہ گرمی دیکھی گئی، جہاں پارہ 39 ڈگری سینٹی گریڈ تک پہنچ گیا۔
محکمہ موسمیات نے پیشگوئی کی ہے کہ کوئٹہ میں آج زیادہ سے زیادہ درجہ حرارت 37 سے 39 ڈگری سینٹی گریڈ کے درمیان رہنے کا امکان ہے۔
دوسری جانب قومی آفات سے نمٹنے کے ادارے این ڈی ایم اے نے 7 جون تک ملک کے مختلف علاقوں میں ممکنہ موسمی صورتحال کے حوالے سے تفصیلی جائزہ رپورٹ جاری کر دی ہے۔
رپورٹ کے مطابق آئندہ ہفتے کے دوران ملک کے جنوبی اور مشرقی علاقوں میں ہواؤں کے دو الگ سلسلے داخل ہوں گے۔ ایک طرف کمزور مرطوب ہوائیں جنوبی اور مشرقی علاقوں کو متاثر کریں گی، جبکہ دوسری جانب مغربی ہواؤں کا سلسلہ ملک کے شمالی حصوں پر اثر انداز ہوگا۔
رپورٹ میں بتایا گیا ہے کہ شمالی بلوچستان کے علاقوں بارکھان اور کوہلو میں بارش کا امکان ہے۔
این ڈی ایم اے کے مطابق 3 اور 4 جون کے دوران شمالی بلوچستان، جنوبی پنجاب اور شمالی علاقوں میں موسم ابر آلود رہنے کا امکان ہے۔ اسی دوران بلوچستان، سندھ اور جنوبی پنجاب میں گرمی کی شدت میں مزید اضافہ متوقع ہے۔
مزید بتایا گیا ہے کہ بالائی خیبرپختونخوا، کشمیر، خطہ پوٹھوہار اور مشرقی پنجاب میں 5 سے 7 جون کے دوران گرج چمک کے ساتھ بارش ہو سکتی ہے۔
الرٹ میں خبردار کیا گیا ہے کہ شمالی علاقوں میں لینڈ سلائیڈنگ اور ندی نالوں میں پانی کے بہاؤ میں اضافے کا خدشہ موجود ہے۔ گلگت بلتستان اور بالائی خیبرپختونخوا میں گلیشیائی جھیلوں کے پھٹنے (گلاف) کا خطرہ بھی برقرار ہے۔
شسپر، گلکن، درکوٹ، ریشن اور بدسوات سمیت مختلف گلیشیائی علاقوں کو حساس قرار دیا گیا ہے۔ بالائی علاقوں میں بارشوں کے باعث مقامی ندی نالوں میں طغیانی اور سفر کے دوران مشکلات پیدا ہونے کا بھی امکان ظاہر کیا گیا ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
این ڈی ایم اے پاکستان کا موسم
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ