شمالی وزیرستان میں ڈرون حملہ: چار بچوں کی ہلاکت پر احتجاج
اشاعت کی تاریخ: 20th, May 2025 GMT
اسلام آباد (اُردو پوائنٹ ۔ DW اردو۔ 20 مئی 2025ء) شمالی وزیرستان کے علاقے میر علی میں ایک مبینہ ڈرون حملے کے نتیجے میں چار بچوں کی ہلاکت کی اطلاع ہے۔ پشاور سے خبر رساں ایجنسی اے پی کی طرف سے موصولہ اطلاعات کے مطابق مقامی اکابرین نے منگل کو بتایا کہ شمالی وزیرستان کے ضلع میر علی میں ایک مبینہ ڈرون حملے میں چار بچے لقمہ اجل بن گئے۔
اس واقع کی شدید مذمت کرتے ہوئے ہزاروں مقامی افراد سڑکوں پر نکل آئے۔ یہ مظاہرین ہلاک ہونے والے بچوں کی لاشوں کو ایک مرکزی شاہراہ پر رکھ کر انصاف کا تقاضہ کر رہے ہیں۔ابھی تک یہ واضح نہیں ہو سکا ہے کہ پیر کو میر علی میں ہونے والے ڈرون حملے کے پیچھے کس کا ہاتھ ہے۔ میر علی کو پاکستانی طالبان کا گڑھ سمجھا جاتا ہے۔
(جاری ہے)
پیر کے اس ہولناک واقعے کے بعد پاکستانی فوج کا کوئی بیان اب تک سامنے نہیں آیا ہے۔
مقامی باشندے کیا کہہ رہے ہیں؟
ایک مقامی قبائلی مفتی بیت اللہ نے ایک بیان میں کہا،''ہم کسی پر الزام نہیں لگا رہے ہیں، لیکن ہم انصاف کا تقاضا کرتے ہیں اور حکومت کو ہمیں بتانا چاہیے کہ ہمارے بچوں کو کس نے مارا ہے۔‘‘
مفتی بیت اللہ نے خبر دار کیا ہے کہ یہ احتجاج جو مقامی باشندے کر رہے فی الحال ایک علاقے کی ایک سڑک بلاک کر کے کیا جا رہا ہے تاہم اگر حکام نے عوام کے سوالات کا جواب نہیں دیا تو یہ آگ پھیل سکتی ہے۔
ان کا مزید کہنا تھا،'' ہم لاشوں کو اس وقت تک دفن نہیں کریں گے جب تک ہمیں یہ نہیں بتایا جاتا کہ ہمارے معصوم بچوں کو کس نے مارا ان کی ہلاکتوں کا ذمہ دار کون ہے۔‘‘ اس موقع پر تمام مقامی مظاہرین ''ہمیں انصاف چاہیے‘‘ کے نعرے لگا رہے تھے۔حالیہ برسوں میں شہری ہلاکتیں
پاکستان کے بعض علاقوں خاص طور پر شورش زدہ صوبوں خیبر پختونخوا اور بلوچستان میں حالیہ برسوں میں ہونے والی فوجی کارروائیوں اور فوجی حملوں میں بہت سے عام شہری مارے گئے ہیں۔
مارچ کے مہینے میں شمال مغربی شہر مردان میں خواتین اور بچوں سمیت 11 افراد اُس وقت ہلاک ہوئے تھے، جب ایک رہائشی مکان کو ڈرون حملوں کا نشانہ بنایا گیا تھا۔ تب صوبائی حکومت کے ایک بیان میں صرف اتنا کہا گیا تھا، ''ایک دور دراز گاؤں میں عسکریت پسندوں کو نشانہ بنانے کے لیے کیے گئے ایک آپریشن میں یہ 'کولیٹرل ڈیمیج‘ ہوا ہے۔
‘‘مارچ کے اس واقعے کے بعد بھی رہائشیوں نے حکومت کی طرف سے متاثرہ خاندانوں کو معاوضہ دینے پر راضی ہونے تک احتجاجی ریلیوں کا سلسلہ جاری رکھا تھا۔
عسکریت پسندرں کا ہدف کون؟
پاکستان انسٹی ٹیوٹ فار کانفلیکٹ اینڈ سکیورٹی اسٹڈیز نامی ایک تھنک ٹینک کے منیجنگ ڈائریکٹر عبداللہ خان کا کہنا ہے کہ عسکریت پسند فوجیوں کو نشانہ بنانے کے لیے کواڈ کاپٹر بھی استعمال کرتے رہے ہیں، لیکن میر علی میں ڈرون حملے کا ذمہ دار کون تھا، یہ ابھی تک غیر واضح ہے۔
تازہ ترین شہری ہلاکتیں در اصل پاکستانی فوج کی کالعدم تحریک طالبان پاکستان (ٹی ٹی پی)کے خلاف جاری کارروائیوں کے دوران ہوئیں۔ میر علی ان طالبان عسکریت پسندوں کا ایک اہم گڑھ سمجھا جاتا ہے، جہاں ان کی موجودگی کافی مظبوط ہے۔ ٹی ٹی پی افغان طالبان سے الگ گروپ ہے، جو اکثر پاکستانی میں سکیورٹی اداروں کے اہلکاروں کو نشانہ بناتا ہے۔
دریں اثناء ایک صوبائی وزیر نائیک محمد داوڑ نے منگل کو ایک بیان میں حملے کی مذمت کرتے ہوئے کہا کہ پیر کے واقع کی تحقیقات جاری ہیں۔ میر علی اور قریبی اضلاع جو افغانستان سے قریب ہیں، پاکستانی طالبان اور دیگر عسکریت پسند گروپوں کا اڈہ ہیں۔ اس علاقے میں حالیہ مہینوں میں ٹی ٹی پی نے اپنے حملوں میں اضافہ کیا ہے۔
ادارت: شکور رحیم
.ذریعہ: UrduPoint
کلیدی لفظ: تلاش کیجئے میر علی میں ڈرون حملے رہے ہیں
پڑھیں:
آج والدین اپنے بچوں کو مار نہیں سکتے: عدنان صدیقی
پاکستانی شوبز انڈسٹری کے معروف اداکار عدنان صدیقی کا کہنا ہے کہ ہمارے وقت میں والدین بچوں کو مارا کرتے تھے لیکن آج والدین اپنے بچوں کو مار نہیں سکتے۔
حال ہی میں اداکار نے ایک پوڈکاسٹ میں بطور مہمان شرکت کی، جہاں انہوں نے اپنے بچپن کی یادیں تازہ کیں اور بچوں کی تربیت کے حوالے سے اپنے خیالات کا اظہار بھی کیا۔
انٹرویو کے دوران ایک سوال کا جواب دیتے ہوئے انہوں نے اپنی چند عادتوں کا ذکر کیا جو بچوں کی تربیت کرتے ہوئے انہوں نے اپنے والد سے اپنائیں۔
انہوں نے کہا کہ میں چاہتا ہوں کہ بچے وقت پر سو جایا کریں، باہر کا کھانا نہ کھائیں یا کم کھائیں۔ ایک وقت تھا میرے والد بھی مجھے ان چیزوں سے روکا کرتے تھے اور اب میں اپنے بچوں کو منع کرتا ہوں تاکہ ان میں نظم و ضبط قائم رہے۔
انہوں نے بتایا کہ ہمارے والد صرف منع نہیں کرتے تھے بلکہ مارتے بھی تھے، ہمارے وقتوں میں والدین بچوں کو مارا کرتے تھے لیکن آج ایسا نہیں ہے، آج آپ اپنے بچوں کو مار نہیں سکتے اور مارنا چاہیے بھی نہیں کیونکہ آج کے بچے برداشت نہیں کرسکتے۔
عدنان صدیقی کا کہنا ہے کہ بچوں کو سکھانے کے لیے ایک یا دو تھپڑ تو ٹھیک ہیں لیکن مارنا نہیں چاہیے۔ بچوں کو یہ معلوم ہونا چاہیے کہ اگر وہ کسی چیز کو لے کر والدین سے جھوٹ کہہ رہے ہیں تو وہ غلط کام کر رہے ہیں، والدین سے چیزوں کو نہ چھپائیں۔
انہوں نے یہ بھی کہا کہ ہمارے وقتوں میں بچوں اور والدین کے درمیان فاصلہ ہوا کرتا تھا بات نہیں ہوتی تھی لیکن آج کے بچے والدین سے کھل کر بات کرتے ہیں اور ہم بھی یہ وقت کے ساتھ ساتھ سیکھ گئے ہیں کہ مارنے کے بجائے بات کرنا زیادہ ضروری ہے۔
اپر کوہستان مالیاتی اسکینڈل: گرفتار پولیس اہلکار 13 روزہ جسمانی ریمانڈ پر نیب کے حوالے