مئی میں 85 دہشتگردانہ حملوں میں 102 شہری شہید اور 11 دہشتگرد ہلاک ہوئے، رپورٹ
اشاعت کی تاریخ: 2nd, June 2025 GMT
اسلام آباد(نیوز ڈیسک)اسلام آباد میں قائم تھنک ٹینک، پاکستان انسٹی ٹیوٹ فار کانفلکٹ اینڈ سیکیورٹی اسٹڈیز (پی آئی سی ایس ایس ) کی جانب سے جاری کردہ اعداد و شمار کے مطابق، مئی میں پاکستان اور بھارت کے درمیان بڑھتی ہوئی فوجی کشیدگی کے باوجود، عسکریت پسند گروہ پاکستان میں اپنی سرگرمیوں کو نمایاں طور پر بڑھانے میں ناکام رہے۔
پی آئی سی ایس ایس کے ماہانہ سیکیورٹی جائزے میں مئی میں 85 دہشتگردانہ حملے ریکارڈ کیے گئے، جن میں 113 افراد لقمہ اجل بنے، ان میں 52 سیکیورٹی اہلکار اور 46 عام شہری شہید جبکہ 11 عسکریت پسند ہلاک ہوئے۔ ان حملوں میں چار امن کمیٹی کے ارکان بھی شہید ہوئے، واضح رہے کہ اپریل میں 85 حملے ہوئے تھے۔
ان حملوں میں مجموعی طور پر 182 افراد زخمی ہوئے، جن میں 130 عام شہری، 47 سیکیورٹی اہلکار، چار عسکریت پسند اور ایک امن کمیٹی کا رکن شامل تھے۔
اپریل کے مقابلے میں مئی میں دہشت گردانہ حملوں میں پانچ فیصد اضافہ ہوا ہے، خاص طور پر، سیکیورٹی اہلکاروں کی شہادتوں میں 73 فیصد اضافہ ہوا، اور عام شہریوں کے زخمی ہونے میں ڈرامائی طور پر 145 فیصد اضافہ ہوا۔
تاہم، سیکیورٹی اہلکاروں کے زخمی ہونے کی تعداد میں 20 فیصد کمی آئی، جو 59 سے کم ہوکر 47 ہوگئی۔
مئی کے دوران سیکیورٹی فورسز کی جانب سے شروع کیے گئے آپریشنز میں کم از کم 59 عسکریت پسند ہلاک ہوئے، جبکہ پانچ سیکیورٹی اہلکاروں نے اپنی جانیں گنوائیں، اس کے علاوہ، سات سیکیورٹی اہلکار اور پانچ عسکریت پسند زخمی ہوئے۔ سیکیورٹی فورسز نے مختلف انٹیلی جنس بیسڈ آپریشنز کے دوران 52 مشتبہ عسکریت پسندوں کو گرفتار بھی کیا۔
مئی 2025 میں دہشت گردانہ حملوں اور سیکیورٹی آپریشنز کو ملا کر مجموعی طور پر 172 ہلاکتیں ریکارڈ کی گئیں، جن میں 57 سیکیورٹی اہلکار، 65 عسکریت پسند، 46 عام شہری اور چار امن کمیٹی کے ارکان شامل تھے۔
اس عرصے کے دوران کل 194 افراد زخمی ہوئے، جن میں 130 عام شہری، 54 سیکیورٹی اہلکار، نو عسکریت پسند اور ایک امن کمیٹی کا رکن شامل تھا، عسکریت پسندوں نے اس ماہ کم از کم 19 افراد کو اغوا بھی کیا۔
مئی کی سیکیورٹی صورتحال کا ایک نمایاں پہلو سیکیورٹی اہلکاروں کی شہادتوں میں 78 فیصد اضافہ تھا، جبکہ اپریل کے مقابلے میں عسکریت پسندوں کی ہلاکتوں میں 68 فیصد کمی دیکھی گئی۔
خاص طور پر، مئی اکتوبر 2024 کے بعد پہلا مہینہ تھا جس میں عسکریت پسندوں کی ہلاکتیں دہرے ہندسوں (65) میں ریکارڈ کی گئیں، جو اپریل میں 203 سے نمایاں کم ہے۔
صوبائی صورتحال کا جائزہ
بلوچستان اور خیبر پختونخوا ملک بھر میں سب سے زیادہ متاثرہ صوبے رہے، جہاں ملک بھر میں ہونےو الے 85 دہشت گردانہ حملوں میں سے 82 حملے ہوئے۔
بلوچستان میں تشدد کی سب سے زیادہ شدت دیکھی گئی، جہاں 35 دہشتگردانہ حملوں میں 51 افراد لقمہ اجل بنے، جن میں 30 عام شہری، 18 سیکیورٹی اہلکار اور تین عسکریت پسند شامل تھے۔
ان حملوں میں 100 افراد زخمی ہوئے جن میں 94 عام شہری، پانچ سیکیورٹی اہلکار اور ایک عسکریت پسند شامل تھا، صوبے میں عسکریت پسندوں نے نو افراد کو اغوا بھی کیا۔
خضدار میں ایک خاص طور پر افسوسناک واقعہ پیش آیا، جہاں آرمی پبلک اسکول کی بس کو خود کش حملے کا نشانہ بنایا گیا، جس میں 8 بچے (جن میں زیادہ تر لڑکیاں تھیں) اور دو عملے کے ارکان شہید اور 35 دیگر زخمی ہوئے۔
خیبر پختونخوا کے ضم شدہ قبائلی اضلاع میں، 22 دہشتگردانہ حملوں کے نتیجے میں 45 شہادتیں ہوئیں، جن میں 23 سیکیورٹی اہلکار، 12 عام شہری، چھ عسکریت پسند اور چار امن کمیٹی کے ارکان شامل تھے۔
اس کے علاوہ، 58 افراد زخمی ہوئے، جن میں 30 سیکیورٹی اہلکار، 27 عام شہری اور ایک امن کمیٹی کا رکن شامل تھا۔
قبائلی اضلاع کے علاوہ، مرکزی خیبر پختونخوا میں 25 دہشتگردانہ حملوں کے نتیجے میں 14 افراد لقمہ اجل بنے، جن میں 10 سیکیورٹی اہلکار ، دو عام شہری اور دو دہشتگرد شامل تھے، اس کے علاوہ، 24 افراد زخمی ہوئے، جن میں 12 سیکیورٹی اہلکار، نو عام شہری اور تین دہشتگرد شامل تھے۔
سندھ میں تین دہشتگردانہ حملے ہوئے، جن کے نتیجے میں دو عام شہری اور ایک سیکیورٹی اہلکار شہید ہوئے۔
پنجاب، آزاد جموں و کشمیر ، اور گلگت بلتستان سے کسی دہشتگردانہ حملے کی اطلاع نہیں ملی۔
تاہم، پنجاب میں دہشتگردوں کی گرفتاریوں کی سب سے زیادہ تعداد ریکارڈ کی گئی، جہاں انٹیلی جنس بیسڈ آپریشنز میں 39 مشتبہ افراد کو حراست میں لیا گیا۔
آزاد کشمیر میں، سیکیورٹی فورسز نے راولاکوٹ میں ایک چھاپہ مارا، جس میں مبینہ طور پر تحریک طالبان پاکستان سے وابستہ چار عسکریت پسندوں کو ہلاک کیا۔
.ذریعہ: Daily Ausaf
کلیدی لفظ: سیکیورٹی اہلکار اور سیکیورٹی اہلکاروں دہشتگردانہ حملوں افراد زخمی ہوئے عسکریت پسندوں عام شہری اور عسکریت پسند فیصد اضافہ سیکیورٹی ا حملوں میں امن کمیٹی ریکارڈ کی کے علاوہ شامل تھے کے ارکان اور ایک
پڑھیں:
بلوچستان میں سکیورٹی فورسز کی گاڑی پر حملہ؛ 5 جوان شہید‘ جوابی کارروائی میں 5 دہشتگرد ہلاک
راولپنڈی ( اُردو پوائنٹ اخبارتازہ ترین۔ 16 ستمبر2025ء ) صوبہ بلوچستان کے ضلع کیچ میں سکیورٹی فورسز کی گاڑی پر حمے میں 5 جوان شہید ہوئے جس کے بعد جوابی کارروائی میں 5 دہشت گرد مارے گئے۔ مسلح افواج کے شعبہ تعلقات عامہ (آئی ایس پی آر) کے مطابق بلوچستان کے ضلع کیچ کے علاقے شیر بندی میں سکیورٹی فورسز کی گاڑی کو آئی ای ڈی کے ذریعے نشانہ بنایا گیا، دھماکے کے نتیجے میں 5 جوان جامِ شہادت نوش کرگئے، شہداء میں کیپٹن وقار احمد ، نائیک اسمت اللہ، لانس نائیک جنید احمد، خان محمد اور سپاہی محمد ظہور شامل ہیں۔ فوج کے ترجمان ادارے نے بتایا کہ کلیئرنس آپریشن کے دوران بھارتی پراکسی نیٹ ورک فتنہ الہندستان کے 5 دہشت گردوں کو جہنم واصل کر دیا گیا اور علاقے میں سرچ اور سینیٹائزیشن آپریشن جاری ہے تاکہ کسی بھی دیگر بھارتی سرپرست دہشت گرد کو بھی انجام تک پہنچایا جا سکے، سکیورٹی فورسز، پوری قوم کے ساتھ شانہ بشانہ، ملک کو بھارتی سرپرستی میں ہونے والی دہشت گردی سے مکمل طور پر پاک کرنے تک اپنی جدوجہد جاری رکھیں گی، شہداء کی عظیم قربانیاں ہمارے عزم کو مزید مضبوط کرتی ہیں۔(جاری ہے)
علاوہ ازیں خیبرپختونخواہ میں فورسز نے فتنہ الخوارج کے خلاف 2 کارروائیاں کیں، سکیورٹی فورسز کی جانب سے بنوں اور لکی مروت میں کارروائیاں کی گئیں جن کے نتیجے میں بھارتی پراکسی فتنہ الخوارج کے 31 دہشت گرد مارے گئے، لکی مروت میں انٹیلی جنس اطلاعات کی بنیاد پر کیے گئے آپریشن کے دوران فائرنگ کے تبادلے میں 14 دہشت گرد ہلاک ہوئے، جب کہ بنوں میں ہونے والی دوسری کارروائی میں 17 دہشت گرد مارے گئے، ان آپریشنز کے دوران دہشتگردوں کے ٹھکانے بھی مؤثر انداز میں نشانہ بنائے گئے۔
غزہ: اسرائیلی بمباری سے گزشتہ 24 گھنٹوں کے دوران 67 فلسطینی شہید