پاکستان دہشتگردی کیخلاف جنگ میں غیر معمولی شراکت دار رہا؛ امریکی کمانڈر کا اعتراف
اشاعت کی تاریخ: 12th, June 2025 GMT
یونائیٹڈ اسٹیٹس سینٹرل کمانڈ (سینٹ کام) کے کمانڈر جنرل مائیکل ایرک کوریلا نے دہشت گردی کے خلاف جنگ میں پاکستان کے کردار کو سراہا ہے۔
عالمی خبر رساں ادارے کے مطابق جنرل مائیکل ایرک نے ان خیالات کا اظہار امریکی سینیٹ کی آرمڈ سروسز کمیٹی میں دہشت گردی کے خلاف جنگ سے متعلق اجلاس میں کیا۔
امریکی سینیٹ کی آرمڈ سروسز کمیٹی میں بیان دیتے ہوئے جنرل مائیکل ایرک کوریلا نے انسداد دہشت گرد میں پاکستان کو امریکا کا اہم شراکت دار قرار دیا۔
انھوں نے کمیٹی کو بتایا کہ عالمی سطح پر سب سے بڑا خطرہ دہشت گرد تنظیم داعش خراساں ہے۔ پاکستان کی غیر معمولی شراکت داری اور تعاون سے اس گروپ کی سرکوبی میں مدد ملی۔
امریکی جنرل نے مزید کہا کہ پاکستان کے قریبی انٹیلی جنس تعاون سے داعش خراساں کے متعدد دہشت گردوں کو ہلاک اور 5 مطلوب رہنماؤں کو گرفتار کیا گیا۔
جنرل کوریلا کا کہنا تھا کہ پاکستان نے ایبے گیٹ بم دھماکے کے ماسٹر مائنڈ جعفر کی گرفتاری سمیت انٹیلی جنس شیئرنگ کے ذریعے امریکا کو کئی اہم کامیابیاں دلائیں۔
خیال رہے کہ داعش خراسان افغانستان میں تشکیل پانے والا گروہ ہے جو امریکی فوجیوں، طالبان اہلکاروں اور عبادت گاہوں پر حملے میں ملوث ہے۔
اس گروپ کے کئی جنگجو امریکی فوج کی انتہائی مطلوب ملزمان کی فہرست میں شامل ہیں جن کی تلاش میں امریکا کو دوست ممالک کی مدد بھی درکار ہوتی ہے۔
.
ذریعہ: Express News
پڑھیں:
صدر مملکت نے امریکی سینٹکام کے کمانڈر جنرل کوریلا کو نشانِ امتیاز ملٹری عطا کردیا
صدر مملکت آصف زرداری نے امریکی سینٹکام کے کمانڈر جنرل کوریلا کو نشانِ امتیاز ملٹری اعزاز عطا کردیا۔
پاک فوج کے شعبہ تعلقات عامہ (آئی ایس پی آر) کے مطابق ایوان صدر میں ہونے والی پروقار تقریب میں جنرل مائیکل کوریلا کو پاک امریکا عسکری تعاون کو فروغ دینے میں مثالی خدمات پر اعزاز سے نوازا گیا۔
آئی ایس پی آر کے مطابق صدر زرداری نے علاقائی سلامتی کیلئے جنرل کوریلا کی غیر معمولی خدمات کو سراہا، صدر پاکستان نے جنرل کوریلا کی دونوں ممالک کے درمیان اسٹریٹجک دفاعی روابط مضبوط بنانے کی کوششوں کو سراہا۔
جنرل کوریلا نے اپنے دورے کے دوران پاکستان کی اعلیٰ سیاسی و عسکری قیادت سے تفصیلی ملاقاتیں کیں، جنرل کوریلا نے صدرِ پاکستان اور آرمی چیف فیلڈ مارشل سید عاصم منیر سے ملاقات کی، ملاقاتوں میں علاقائی سلامتی، عسکری تعاون، دہشت گردی، ابھرتے بین الاقوامی خطرات سے مشترکہ طور پر نمٹنے کے امور پر تبادلہ خیال کیا گیا۔
آئی ایس پی آر کے مطابق ایوانِ صدر آمد پر جنرل کوریلا کو تینوں مسلح افواج کے چاق و چوبند دستے نے گارڈ آف آنر پیش کیا، جنرل کوریلا کی بصیرت افروز قیادت نے باہمی افہام و تفہیم کو فروغ اور دفاعی تعاون کو وسعت دینے میں کردار ادا کیا۔
جنرل کوریلا نے مسلح افواج اور سینٹکام کے درمیان انسدادِ دہشت گردی کے اشتراک کو گہرا کرنے میں اہم کردار ادا کیا، جنرل کوریلا کی مستقل وابستگی پاکستان کے خطے میں امن و استحکام میں مرکزی کردار کیلئے گہرے احترام کی عکاس ہے۔
آئی ایس پی آر کا کہنا ہے کہ یہ اعزاز جنرل کوریلا کی غیر متزلزل حمایت پر پاکستان کے گہرے شکریہ کا اظہار ہے، جنرل کوریلا کیلئے یہ اعزاز دو طرفہ عسکری شراکت داری میں بڑھتی ہوئی گہرائی کی توثیق کرتا ہے، اعلیٰ سطح کی پذیرائی پاکستان اور امریکا کے درمیان دیرپا تذویراتی تعلقات کو اجاگر کرتی ہے، یہ علاقائی امن، سلامتی اور طویل المدتی دفاعی تعاون کیلئے دونوں ممالک کے مشترکہ عزم کی تصدیق کرتی ہے۔
یروشلم میں امریکی سفارتخانے کے باہر مظاہرہ، اسرائیل کی حمایت پر امریکا کے خلاف نعرے