جاوید میانداد کے چھکے نے میری شادی برباد کردی، عامر خان کا انکشاف
اشاعت کی تاریخ: 1st, July 2025 GMT
بولی وڈ کے مسٹر پرفیکشنسٹ عامر خان نے اپنی جوانی کے دنوں کی یادیں تازہ کرتے ہوئے انکشاف کیا ہے کہ ان کی پہلی شادی کے دن جاوید میانداد کے تاریخی چھکے نے ان کی خوشی کو مایوسی میں بدل دیا تھا۔
عامر خان نے حال ہی میں ایک انٹرویو میں شرکت کی، جہاں انہوں نے مختلف معاملات پر کھل کر گفتگو کی۔
ایک سوال کے جواب میں عامر خان نے کہا کہ ان کی سابقہ بیوی رینا دتا سے ملاقات 20 سال کی عمر میں ہوئی تھی۔
اداکار نے بتایا کہ دراصل رینا ان کے سامنے والی بلڈنگ میں رہتی تھیں اور دونوں کی بلڈنگز کے درمیان تقریباً 100 میٹر کا فاصلہ تھا، وہ جب بھی انہیں دیکھتے تو وہ انہیں بہت اچھی لگتیں اور ان کا زیادہ وقت اپنے کمرے کی کھڑکی کے سامنے گزرنے لگا، ان کی والدہ کو لگتا تھا کہ شاید وہ پڑھائی کر رہے ہیں، لیکن حقیقت میں وہ رینا کو دیکھا کرتے تھے۔
ان کا کہنا تھا کہ اسی دوران انہیں شک ہوا کہ شاید وہ (رینا) بھی کھڑکی کے سامنے زیادہ وقت گزار رہی ہیں، جس سے انہیں لگا کہ شاید رینا کو بھی ان میں دلچسپی ہے، لیکن اس دوران دونوں کی باضابطہ ملاقات نہیں ہوئی تھی۔
عامر خان کے مطابق، ان کی دوست شلپا نے رینا کے ساتھ ان کی ملاقات طے کی، لیکن اس ملاقات میں رینا نے انہیں انکار کر دیا، عامر خان کو شک ہوا کہ اگر انہیں دلچسپی نہیں تھی تو پھر وہ کھڑکی میں اتنی دیر کیوں بیٹھتی تھیں؟
بعد ازاں دونوں کی دوبارہ ملاقات ہوئی اور پھر ان کے درمیان تعلقات قائم ہو گئے، لیکن یہ تعلقات زیادہ دیر نہ چل سکے، چار ماہ بعد رینا کے والدین کو اس تعلق کا علم ہو گیا، جس کے بعد دونوں نے اپنا رشتہ ختم کر دیا۔
عامر خان نے بتایا کہ وہ دونوں اس فیصلے سے خوش نہیں تھے، چنانچہ انہوں نے چھپ کر شادی کرنے کا فیصلہ کیا اور ٹھیک 21 سال کی عمر میں دونوں نے سب سے چھپ کر شادی کر لی۔
ان کا مزید کہنا تھا کہ جب وہ شادی کر کے گھر واپس آئے تو اس دن پاکستان اور بھارت کا میچ تھا، اسی لیے دونوں کے گھر والے میچ میں مصروف تھے اور کسی نے ان کی غیر موجودگی کو نوٹس نہیں کیا۔
اداکار نے کہا کہ یہ وہی مشہور میچ تھا جس میں جاوید میانداد نے شارجہ میں آخری گیند پر چھکا مار کر بھارت کو شکست دی تھی۔
عامر خان نے کہا کہ چونکہ بھارت وہ میچ جیت رہا تھا، تو وہ بہت خوش تھے کہ ان کی شادی کے دن بھارت میچ جیتے گا، لیکن ان کی خوشی اس وقت مایوسی میں بدل گئی جب جاوید میانداد نے آخری بال پر چھکا مار دیا اور بھارت میچ ہار گیا۔
عامر خان نے بتایا کہ اس کے بعد وہ بہت افسردہ ہو گئے تھے اور ایک ملاقات میں انہوں نے جاوید میانداد کو بھی اس بارے میں بتایا تھا۔
انہوں نے کہا کہ جاوید بھائی! آپ نے ٹھیک نہیں کیا، جس پر جاوید میانداد نے حیرت سے پوچھا کہ کیا؟ تو اداکار نے جواب دیا کہ آپ نے میری شادی برباد کر دی، کیونکہ اسی دن آپ نے آخری گیند پر چھکا مارا تھا، جس کی وجہ سے میں شدید مایوسی کا شکار ہو گیا تھا۔
واضح رہے کہ یہ میچ 10 اپریل 1986 کو شارجہ میں کھیلا گیا تھا، جہاں پاکستان اور بھارت آمنے سامنے تھے، آخری اوور میں پاکستان کو جیت کے لیے چار گیندوں پر 10 رنز درکار تھے اور آخری گیند پر جب صرف ایک گیند باقی تھی، پاکستان کو جیت کے لیے چار رنز درکار تھے۔
ایسے میں جاوید میانداد نے بھارتی باؤلر چیتن شرما کی گیند پر شاندار چھکا لگا کر نہ صرف میچ جتوایا بلکہ اسے کرکٹ کی تاریخ کے یادگار ترین لمحات میں تبدیل کر دیا۔
Post Views: 3.
ذریعہ
ذریعہ: Daily Mumtaz
کلیدی لفظ: جاوید میانداد نے گیند پر
پڑھیں:
آج کہاں کہاں بادل برسیں گے ،محکمہ موسمیات نے بڑی پیشگوئی کردی
ملک کے بیشتر علاقوں میں آج بھی مون سون بارشوں کا سلسلہ جاری رہنے کا امکان ہے، جبکہ محکمہ موسمیات نے کئی علاقوں میں موسلادھار بارش(Rain)، شہری سیلاب، لینڈ سلائیڈنگ، ندی نالوں میں طغیانی اور تیز آندھی کے باعث کمزور تعمیرات کو نقصان پہنچنے کا انتباہ جاری کر دیا ہے۔
محکمہ موسمیات کے مطابق آج خیبرپختونخوا، آزاد کشمیر، اسلام آباد، پنجاب، شمال مشرقی بلوچستان، جنوب مشرقی سندھ اور گلگت بلتستان میں تیز ہواؤں اور گرج چمک کے ساتھ بیشتر مقامات پر وقفے وقفے سے بارش متوقع ہے، جبکہ کئی علاقوں میں موسلادھار بارش بھی ہو سکتی ہے۔ ، جبکہ خیبرپختونخوا، پنجاب، سندھ، شمال مشرقی بلوچستان، کشمیر اور گلگت بلتستان میں بارشوں کا سلسلہ جاری رہنے کی پیش گوئی کی گئی ہے۔
محکمہ موسمیات نے خبردار کیا ہے کہ مسلسل اور شدید بارشوں کے باعث خیبرپختونخوا، گلگت بلتستان، مری، گلیات اور آزاد کشمیر کے پہاڑی علاقوں میں لینڈ سلائیڈنگ کا خطرہ موجود ہے، جبکہ کشمیر، مری، گلیات، شمال مشرقی پنجاب، اسلام آباد، خیبرپختونخوا، گلگت بلتستان، ڈیرہ غازی خان کے پہاڑی ندی نالوں اور شمال مشرقی بلوچستان کے برساتی نالوں میں طغیانی آ سکتی ہے۔
محکمہ کے مطابق گوجرانوالہ، لاہور، سیالکوٹ، اسلام آباد، راولپنڈی، پشاور، نوشہرہ، گجرات، ساہیوال، خانیوال، ملتان اور فیصل آباد کے نشیبی علاقوں میں شہری سیلاب اور پانی جمع ہونے کا خدشہ ہے، جبکہ تیز آندھی، موسلادھار بارش اور آسمانی بجلی کے باعث سولر پینلز، بجلی کے کھمبوں، بل بورڈز اور دیگر کمزور تعمیرات کو نقصان پہنچ سکتا ہے۔
اسلام آباد اور گردونواح میں مطلع جزوی ابر آلود رہنے کے ساتھ تیز ہواؤں، گرج چمک اور بارش کی پیش گوئی کی گئی ہے، جبکہ چند مقامات پر موسلادھار بارش کا بھی امکان ظاہر کیا گیا ہے۔
خیبرپختونخوا میں دیر، چترال، سوات، کوہستان، شانگلہ، بٹگرام، مانسہرہ، ایبٹ آباد، ہری پور، بونیر، مالاکنڈ، باجوڑ، مہمند، خیبر، اورکزئی، پشاور، مردان، نوشہرہ، چارسدہ، صوابی، کوہاٹ، کرم، ہنگو، کرک، لکی مروت، بنوں، ٹانک، ڈیرہ اسماعیل خان اور وزیرستان میں تیز ہواؤں اور گرج چمک کے ساتھ بارش جبکہ بعض علاقوں میں موسلادھار بارش متوقع ہے۔
مزیدپڑھیں:پیٹرولیم مصنوعات کی قیمتوں میں ایک بار پھر اضافہ، حکومت نے نوٹیفکیشن جاری کر دیا
پنجاب میں راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد، وزیرآباد، لاہور، ننکانہ صاحب، قصور، اوکاڑہ، شیخوپورہ، سیالکوٹ، نارووال، فیصل آباد، خوشاب، سرگودھا، ساہیوال، جھنگ، ٹوبہ ٹیک سنگھ، چنیوٹ، نورپور تھل، بھکر، میانوالی، لیہ، بہاولپور، بہاولنگر، ڈیرہ غازی خان، تونسہ، ملتان، خانیوال، لودھراں، مظفرگڑھ، کوٹ ادو، رحیم یار خان اور راجن پور میں بارش کا امکان ہے، جبکہ خطہ پوٹھوہار اور شمال مشرقی و جنوبی پنجاب کے بعض علاقوں میں شدید بارش ہو سکتی ہے۔
سندھ میں تھرپارکر، مٹھی، اسلام کوٹ، نگرپارکر، سکھر، گھوٹکی، سانگھڑ، لاڑکانہ، جیکب آباد، حیدرآباد، شہید بینظیر آباد، جامشورو، شہدادکوٹ، ٹھٹھہ، بدین، میرپورخاص اور دادو میں تیز ہواؤں اور گرج چمک کے ساتھ بارش جبکہ بعض مقامات پر موسلادھار بارش کی پیش گوئی کی گئی ہے۔ دیگر ساحلی علاقوں میں ہلکی بارش یا بوندا باندی ہو سکتی ہے۔
بلوچستان میں ژوب، موسیٰ خیل، شیرانی، لورالائی، بارکھان، کوہلو، قلعہ عبداللہ، قلعہ سیف اللہ، پشین، چمن، کوئٹہ، زیارت، قلات، خضدار، آواران اور لسبیلہ سمیت مختلف علاقوں میں بارش اور چند مقامات پر شدید بارش کا امکان ظاہر کیا گیا ہے۔
آزاد کشمیر میں وقفے وقفے سے گرج چمک کے ساتھ بارش اور کئی علاقوں میں موسلادھار بارش جبکہ گلگت بلتستان میں بھی گرج چمک کے ساتھ بارش اور چند مقامات پر تیز بارش متوقع ہے۔
گزشتہ 24 گھنٹوں کے دوران پنجاب، اسلام آباد، خیبرپختونخوا، شمال مشرقی بلوچستان، گلگت بلتستان، آزاد کشمیر اور بالائی سندھ میں بارش ریکارڈ کی گئی۔ سب سے زیادہ بارش لاہور میں ہوئی، جہاں ایئرپورٹ پر 229 ملی میٹر، تاجپورہ میں 146، کاہنہ میں 135، شادی پورہ میں 124، مغل پورہ میں 122، اپر مال میں 107، مناواں میں 94 اور جوہر ٹاؤن میں 76 ملی میٹر بارش ریکارڈ کی گئی۔ نارووال میں 76، شیخوپورہ میں 66، سیالکوٹ شہر میں 42، گوجرانوالہ میں 36، مری میں 18، قصور میں 15 اور اسلام آباد کے سیدپور میں 20 ملی میٹر بارش ہوئی۔
خیبرپختونخوا میں مالم جبہ میں 28، پٹن میں 13، پاراچنار میں 12، تخت بھائی میں 10 ملی میٹر جبکہ بلوچستان کے بارکھان میں 22 ملی میٹر بارش ریکارڈ کی گئی۔ گلگت بلتستان میں بونجی میں 8، گلگت میں 6 اور کشمیر کے مظفرآباد ایئرپورٹ پر 7 ملی میٹر بارش ہوئی، جبکہ سندھ میں جیکب آباد میں 5 ملی میٹر بارش ریکارڈ کی گئی۔
محکمہ موسمیات کے مطابق بارشوں کے باعث ملک کے بیشتر علاقوں میں درجہ حرارت میں نمایاں کمی آئی ہے۔ آج ریکارڈ کیے گئے زیادہ سے زیادہ درجہ حرارت کے مطابق دالبندین میں 45 جبکہ تربت اور نوکنڈی میں 43 ڈگری سینٹی گریڈ درجہ حرارت ریکارڈ کیا گیا۔ اسلام آباد میں زیادہ سے زیادہ درجہ حرارت 31، لاہور 30، کراچی 36، پشاور 33، کوئٹہ 37، گلگت 29، مظفرآباد 31، مری 21، فیصل آباد 35 اور ملتان میں 36 ڈگری سینٹی گریڈ ریکارڈ کیا گیا۔
محکمہ موسمیات نے شہریوں کو ہدایت کی ہے کہ شدید بارشوں، لینڈ سلائیڈنگ، ندی نالوں میں طغیانی اور شہری سیلاب کے خدشات کے پیش نظر غیر ضروری سفر سے گریز کریں، مقامی انتظامیہ کی ہدایات پر عمل کریں اور خراب موسم کے دوران احتیاطی تدابیر اختیار کریں۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار