خیبر پختونخوا میں قیامِ امن کے لیے فوجی آپریشن کیا جائے یا نہیں؟
اشاعت کی تاریخ: 11th, August 2025 GMT
خیبرپختونخوا میں شدید بے امنی کے دوران رائے اس بات پر واضح طور پر منقسم ہے کہ قیامِ امن کے لیے فوجی آپریشن کیا جائے یا نہیں۔
ایک رائے یہ ہے کہ دہشت گردوں کے خلاف فوجی کارروائی کے سوا کوئی اور حل موجود نہیں، اور آپریشن ہی آخری راستہ ہے۔ ان کے مطابق، طاقت کا استعمال ہی وہ ذریعہ ہے جو دہشت گرد نیٹ ورکس کو توڑ سکتا ہے اور عوام کو فوری ریلیف دے سکتا ہے۔ لیکن دوسری جانب، فوجی آپریشنز کے خلاف مقامی سطح پر کیے جانے والے مظاہروں (امن مارچ) میں یہ مطالبہ بار بار دہرایا جاتا ہے کہ اگر آپریشن ہی آخری حل ہے تو یہ وضاحت دی جائے کہ اب تک کیے گئے بائیس بڑے فوجی آپریشنز کے باوجود امن کیوں قائم نہیں ہو سکا۔
مظاہرین کا کہنا ہے کہ طاقت کے استعمال کے باوجود اگر پائیدار امن حاصل نہ ہو تو اس کا مطلب ہے کہ حکمتِ عملی میں بنیادی خامی موجود ہے۔ خیبر پختونخوا کے بندوبستی اور قبائلی اضلاع میں موجودہ صورتحال کے تناظر میں اگر 7نکات پر عمل درآمد کیا جائے تو امن و امان کے قیام کی تمام کوششوں پر کافی حد تک اتفاق رائے پیدا کیا جاسکتا ہے۔
ملک کی سطح پر ایک جامع گرینڈ نیشنل ڈائیلاگ کا آغاز کیا جائے، جس میں تمام سیاسی جماعتوں، تمام فریقین اور جملہ شعبہ ہائے زندگی کے نمائندوں کی رائے کو مقدم رکھتے ہوئے ایک نیا نیشنل ایکشن پلان تشکیل دیا جائے۔ اس ڈائیلاگ میں صرف دہشت گردی کے خاتمے کی پالیسی نہیں بلکہ اس کے اسباب، خطے کی سماجی و معاشی صورتحال، اور پڑوسی ممالک سے تعلقات کے اثرات پر بھی کھل کر بحث کی جائے۔ فوج اور عوام کے درمیان بڑھتی ہوئی خلیج کو کم کرنے کے لیے یہ ثابت کرنا ہوگا کہ فوجی آپریشن کسی اور مقصد یا کسی کے ایما پر نہیں بلکہ خالصتاً دہشت گردوں کے خلاف ہورہا ہے، اور اس بار اس میں کسی بھی ’اچھے‘ یا ’بُرے‘ طالبان کی تمیز نہیں کی جائے گی۔ ماضی میں ’اچھے‘ اور ’برے‘ طالبان کی پالیسی نے عوام کے اعتماد کو شدید نقصان پہنچایا، اس لیے اس بار شفافیت کو یقینی بنانا ضروری ہے۔ جامع فوجی کارروائی (کائنیٹک ایکشن) کے ساتھ ساتھ متاثرہ علاقوں میں غیر فوجی اقدامات (نان کائنیٹک ایکشن) بھی ضروری ہیں۔ تمام قبائلی اضلاع میں 2008ء کے بعد فوجی آپریشنز تو باقاعدگی سے ہوئے، لیکن بحالی، بنیادی ڈھانچے کی بہتری، بہتر طرزِ حکومت کے نفاذ اور مقامی مسائل کے حل کے لیے سنجیدہ اقدامات نہیں کیے گئے، جس کے باعث مسائل حل ہونے کے بجائے مزید سنگین ہوگئے۔ مثال کے طور پر، بے گھر ہونے والے ہزاروں خاندان آج بھی مستقل رہائش اور روزگار کے مسائل کا سامنا کر رہے ہیں، جس سے مقامی ناراضگی میں اضافہ ہوا ہے۔ اگرچہ سیکورٹی فورسز کسی بھی طور اندرونی سلامتی کی براہِ راست ذمہ دار نہیں، لیکن یہ سوال اہم ہے کہ کیا پولیس اور دیگر قانون نافذ کرنے والے ادارے اس قابل ہیں کہ داخلی سلامتی کے مسائل مؤثر طریقے سے حل کرسکیں؟ فی الحال، پولیس فورس کی تربیت، وسائل اور ٹیکنالوجی کے معیار میں نمایاں کمی ہے، جو دہشت گردوں کے جدید نیٹ ورک سے نمٹنے میں رکاوٹ بن رہی ہے۔ داخلی سلامتی بہتر بنانے کے لیے پولیس اور کاؤنٹر ٹیررازم ڈیپارٹمنٹ میں سرمایہ کاری اور ان کی استعدادِ کار میں اضافہ ضروری ہے۔ سیاسی جماعتوں کو اب مکمل طور پر سامنے آنا ہوگا۔ خاص طور پر 3 بڑی جماعتوں، پاکستان تحریک انصاف، پاکستان مسلم لیگ (ن) اور پاکستان پیپلز پارٹی، کو باہمی اختلافات ختم کرکے اسٹریٹیجک نکات پر اتفاق کرنا ہوگا۔ انہیں سیکیورٹی فورسز کے پیچھے نہیں بلکہ فرنٹ پر آ کر، پالیسی کے مطابق، قیادت سنبھالنی ہوگی۔ اگر یہ سیاسی قوتیں سیکیورٹی ایجنڈے پر یکساں موقف اپنائیں تو نہ صرف عوام کا اعتماد بڑھے گا بلکہ دہشت گرد گروپوں کو بھی واضح پیغام ملے گا کہ ریاست ایک پیج پرہے۔ پچھلی 2دہائیوں سے جاری فوجی آپریشنز میں سب سے زیادہ جانی و مالی نقصان عوام نے اٹھایا ہے۔ اگر فوجی کارروائی کے دوران صرف دہشت گردوں کو نشانہ بنایا جائے تو عوام ان آپریشنز کی باقاعدہ حمایت کرسکتے ہیں۔ اس کے لیے شہری علاقوں میں انٹیلیجنس بیسڈ آپریشنز کو ترجیح دی جائے اور بے گناہ شہریوں کے نقصان کو ہرممکن حد تک روکا جائے۔ خیبر پختونخوا اور بلوچستان میں قیامِ امن کے لیے ریاستی کوششوں میں مقامی لوگوں کی رائے کو مقدم رکھا جائے، اور ریاستی فیصلوں میں ان دونوں صوبوں کے آئینی حقوق کی راہ میں حائل رکاوٹوں کو دور کیا جائے۔ گیس، بجلی اور دیگر قدرتی وسائل سے متعلق فیصلوں میں مقامی آبادی کو لازماً شامل کیا جائے۔ اس شمولیت سے نہ صرف عوامی اعتماد بڑھے گا بلکہ وسائل کے منصفانہ استعمال سے احساسِ محرومی میں بھی کمی آئے گی۔آخر میں، یہ تسلیم کرنا ہوگا کہ محض بندوق اور گولی سے امن قائم نہیں ہوتا۔ امن اس وقت پائیدار بنتا ہے جب طاقت کے ساتھ انصاف، معاشی ترقی اور عوامی شمولیت کا امتزاج پیش کیا جائے۔ اگر ریاست یہ جامع حکمتِ عملی اپنائے تو خیبر پختونخوا اور بلوچستان میں ایک نئے دور کے آغاز کی امید کی جا سکتی ہے۔
ادارے کا کالم نگار کی رائے کے ساتھ متفق ہونا ضروری نہیں ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
ذریعہ: WE News
کلیدی لفظ: خیبرپختونخوا سیاسی جماعتیں فوجی ا پریشن قیام امن خیبر پختونخوا فوجی آپریشنز فوجی آپریشن کیا جائے کے لیے
پڑھیں:
بلوچستان کا مسئلہ فوجی نہیں سیاسی طریقے سے حل کرنا ہوگا، بلاول بھٹو زرداری
میڈیا سے گفتگو کرتے ہوئے چیئرمین پیپلز پارٹی نے کہا کہ وفاق انا کی وجہ سے یا پتہ نہیں کیوں یہ بات نہیں مان رہا، الیکشن میں ن لیگ بے نظیر انکم سپورٹ پروگرام کی پوری اونرشپ لے رہی تھی، اب یوٹرن لیا ہے تو ان سے پوچھا جائے۔ اسلام ٹائمز۔ پاکستان پیپلز پارٹی کے چیئرمین (پی پی پی) بلاول بھٹو زرداری کا کہنا ہے کہ بلوچستان کا مسئلہ فوجی نہیں سیاسی طریقے سے حل کرنا ہوگا۔ کراچی میں میڈیا سے گفتگو کرتے ہوئے انہوں نے کہا کہ بلوچستان کے عوام کی شکایات اپنی جگہ ہیں، دہشت گردی کا مسئلہ سب سے بڑا مسئلہ ہے۔ بلاول بھٹو زرداری کا کہنا ہے کہ بلوچستان کا حل سیاسی ہے، سیاسی اتفاق رائے سے ایسے فیصلے لینے پڑیں گے کہ عوام کا فائدہ ہو، ماضی میں بھی دہشت گردی کے خلاف جنگ میں کامیاب ہوئے ہیں۔ انہوں نے کہا کہ سیلاب سے پنجاب خصوصاً جنوبی پنجاب میں تاریخی نقصان ہوا ہے۔ گلگت بلتستان اور خیبر پختونخوا میں بھی بہت نقصان ہوا ہے، بے نظیر انکم سپورٹ پروگرام کے ذریعے وفاقی حکومت متاثرہ علاقوں میں مدد فراہم کرے۔ ان کا کہنا ہے کہ متاثرہ لوگوں کو فوری ریلیف پہنچانے کے لیے بی آئی ایس پی واحد پروگرام ہے، بروقت عالمی اپیل کرتے تو متاثرین کی زیادہ مدد کر سکتے تھے، ایسا کیوں نہیں ہو رہا یہ ہم سے نہیں وفاق سے پوچھیں۔
چیئرمین پیپلز پارٹی نے کہا کہ وفاق انا کی وجہ سے یا پتہ نہیں کیوں یہ بات نہیں مان رہا، الیکشن میں ن لیگ بے نظیر انکم سپورٹ پروگرام کی پوری اونرشپ لے رہی تھی، اب یوٹرن لیا ہے تو ان سے پوچھا جائے۔ بلاول بھٹو زرداری کا کہنا ہے کہ گندم کی امدادی قیمت کے لیے آئی ایم ایف سے بات کی جائے، سندھ میں گندم کے کاشتکاروں کو ہاری کارڈ کے ذریعے سپورٹ کریں گے، تاکہ گندم درآمد نہ کرنا پڑے۔ انہوں نے کہا کہ ملک بھر میں زرعی شعبے مشکل میں رہے ہیں، سیلاب کے بعد زرعی شعبہ بہت متاثر ہوا، سیلاب کے بعد فوڈ سیکیورٹی کے مسائل ہو سکتے ہیں، وزیراعظم سے درخواست کی تھی کہ زرعی اور موسمیاتی ایمرجنسی نافذ کی جائے، وزیراعظم کے شکر گزار ہیں کہ انہوں نے زرعی ایمرجنسی نافذ کی اور متاثرین کے بجلی کے بل معاف کیے۔
ان کا کہنا ہے کہ اگر وفاقی حکومت سپورٹ کرتی ہے تو مزید سہولت دے سکیں گے، اگر وفاقی حکومت یہ کرلے تو زرعی شعبے کو مزید فائدہ ہوگا، ٹیکس کی پالیسیوں پر بات چیت کی جائے تاکہ کسانوں کو ٹیکس ریلیف فراہم کیا جاسکے۔ چیئرمین پیپلز پارٹی نے کہا کہ سیلاب کے اثرات اب بھی جاری ہیں، سیلاب سے پنجاب میں تاریخی نقصان ہوا،پنجاب حکومت نے اعلان کیا ہے کہ سیلاب متاثرین کو اکیلا نہیں چھوڑیں گے، ملتان، لودھراں، بہاولپور میں آج بھی پانی ہے، قدرتی آفت میں معاونت کی ذمے داری ایک حکومت کی ذمے داری نہیں، قدرتی آفت کی صورت وفاق صف اول کا کردار ادا کرتی ہے۔
ان کا کہنا تھا کہ میں وفاق پر تنقید نہیں کر رہا، وفاق سے درخواست کر رہے ہیں کہ عالمی سطح پر بات کی جائے، مطالبات وفاقی حکومت سے ہی ہیں، وفاق کی ذمے داری ہے وہ بینظیر انکم سپورٹ کے ذریعے لوگوں کی مدد کرے۔ بے نظیرانکم سپورٹ پروگرام کے خلاف بیانات دینے والوں کو اس پروگرام کے بارے میں معلوم بھی نہیں ہو گا، مسلم لیگ نے پروگرام سے متعلق کوئی ترمیم یا ڈرافٹ نہیں دیا۔ انہوں نے کہا کہ سعودی عرب کے ساتھ ہونے والے معاہدے پر سارے پاکستان نے سراہا، معاہدے سے متعلق ان کیمرا بریفنگ بھی ہوگی، ملک کو ایک ایکسپورٹر ملک بنا دیا گیا ہے۔ بلاول بھٹو زرداری کا کہنا تھا کہ میرے کزن کافی دیر سے سیاست میں متحرک رہے ہیں، انہیں ویلکم کرتے ہیں، ہمیشہ سے ان کے لیے نیک خواہشات رکھی ہیں، میری یا میری بہنوں کی طرف سے ان کے خلاف کوئی بیان نہیں آیا۔
پاکستان اورسعودی عرب کے مابین طے پانے والاتاریخی معاہدہ دونوں برادرممالک کے تاریخی تعلقات میں ایک نئے دورکا آغازہے ، شیخ آفتاب احمد