کراچی: جشن آزادی پر ہوائی فائرنگ سے 7 سالہ بچی کے قتل میں ملوث 3 ملزمان گرفتار
اشاعت کی تاریخ: 15th, August 2025 GMT
کراچی:
عزیزآباد پولیس نے جشن آزادی پر ہوائی فائرنگ سے 7 سالہ بچی کے قتل میں ملوث 3 ملزمان کو گرفتار کرکے نائن ایم ایم پستولیں برآمد کرلیں۔
برآمد کی جانے والی پستول اور بچی کو لگنے والی نائن ایم ایم پستول کی گولی کا خول فارنزک رپورٹ کے لیے بھیج دیا گیا، رپورٹ سے معلوم ہو سکے گا بچی کو گولی کس اسلحہ سے چلنے والی گولی سے لگی تھی۔
جشن آزادی کے موقع پرعزیزآباد تھانے کی حدود مکان نمبر 1146 بلاک 8 ایف بی ایریا میں ہوائی فائرنگ کی زد میں آکر 7 سالہ بچی مرہا عرف نیہا دختر وقاص جاں بحق ہوگئی تھی۔
واقعے کا مقدمہ عزیزآباد تھانہ میں درج کیا گیا، ترجمان ایس ایس پی ڈسٹرکٹ سینٹرل ذیشان شفیق صدیقی نے واقعے کا نوٹس لیتے ہوئے فائرنگ میں ملوث ملزمان کی فوری گرفتاری کے احکامات جاری کیے تھے۔
پولیس نے جدید CCTV فوٹیج اور ہیومن انٹیلیجنس بیسڈ کارروائی کے ذریعے مقتولہ کی رہائشی گلی میں ہوائی فائرنگ کرنے والے 3 مبینہ ملزمان کو گرفتار کرلیا۔
گرفتار ملزمان میں سلمان سعید ولد سعید احمد، جہانزیب خان عرف کاکا ولد نسیم الرحمٰن اور رانا محمد دانش ولد محمد امین راجپوت شامل ہیں۔
گرفتار ملزمان سے 3 نائن ایم ایم پستولیں بمعہ لوڈ میگزین برآمد کرلیے گئے، جاں بحق بچی کو بھی نائن ایم ایم پستول کی گولی لگی تھی۔
برآمد شدہ اسلحہ اور بچی کو لگنے والا گولی کا خول فارنزک ٹیسٹ کے لیے روانہ کردیا گیا ہے تاکہ میچنگ کی تصدیق ہوسکے۔
ایس ایس پی ذیشان شفیق صدیقی نے کہا کہ ہوائی فائرنگ میں ملوث عناصر کے خلاف زیرو ٹالرنس پالیسی کے تحت کریک ڈاؤن جاری ہے تاکہ شہریوں کی جانوں کا تحفظ یقینی بنایا جاسکے۔
واضح رہے کہ 14 اگست کی شب 12 بجتے ہی شہر فائرنگ اور پٹاخوں سے گونج اٹھا تھا، شرپسندوں کی فائرنگ سے مذکورہ بچی اور ضعیف الممر شخص سمیت 3 افراد جاں بحق اور 114 زخمی ہوئے تھے۔
.ذریعہ: Express News
کلیدی لفظ: ہوائی فائرنگ نائن ایم ایم بچی کو
پڑھیں:
جشن یوم آزادی، ہوائی فائرنگ سے کمسن بچی سمیت 3 افراد جاں بحق، 114 افراد زخمی
کراچی:شہر میں یوم جشن آزادی کے موقع پر 13 اگست کی شب رات بارہ بجتے ہی شہر میں اسلحے کے بے دریغ استعمال اور اس کے نتیجے میں 114 شہریوں کے زخمی اور بچی اور بزرگ شہری سمیت 3 افراد زندگی سے محروم ہوگئے۔
پولیس سرجن ڈاکٹر سمیعہ کی جانب سے جاری اعداد و شمار کے مطابق یوم جشن آزادی کے موقع پر شہر میں کی گئی ہوائی فائرنگ سے زخمی ہونے والے سب سے زیادہ 43 افراد کو عباسی شہید اسپتال لایا گیا، عزیز آباد سے ایک کمسن بچی جاں بحق ہوئی۔
انہوں نے بتایا کہ جناح اسپتال میں مجموعی طور پر 41 زخمیوں کو لایا گیا، کورنگی میں شہری اسٹیفن فائرنگ سے جاں بحق ہوا، سول اسپتال میں مجموعی طور پر 30 زخمیوں کو لایا گیا، کلری کے علاقے آگرہ تاج میں بھی نامعلوم سمت سے آنے والی گولی لگنے سے 70 سالہ شہری جمعہ جاں بحق ہوئے۔
ترجمان کراچی پولیس کی جانب سے جاری اعلامیے میں دعویٰ کیا گیا ہے کہ گزشتہ رات شہر میں کی جانے والی ہوائی فائرنگ کے واقعات میں 67 افراد زخمی ہوئے اور 3 قیمتی جانیں ضائع ہوئیں۔
انہوں نے بتایا کہ پولیس نے ہوائی فائرنگ کے الزام میں 86 شرپسند عناصر کو گرفتار کرلیا، 68 غیر قانونی اسلحہ برآمد کر کے مجموعی طور پر 111 مقدمات درج کیے ہیں۔
ترجمان نے بتایا کہ معصوم شہریوں کی ہلاکت اور زخمی ہونے پر قتل اور اقدام قتل کے مزید مقدمات بھی درج کیے جا رہے ہیں۔
پہلی بار پاکستانی کمپنی کا یو اے ای کے بڑے گروپ کو گوشت سپلائی کرنے کا معاہدہ