وزیر اعظم کا ویڈیو لنک پر حالیہ سیلابی صورتحال اور جاری امدادی و بحالی کارروائیوں پر جائزہ اجلاس
اشاعت کی تاریخ: 27th, September 2025 GMT
وزیراعظم محمد شہباز شریف نے نیویارک میں اقوام متحدہ کی جنرل اسمبلی کے خطاب کے فوراً بعد ویڈیو لنک کے ذریعے حالیہ سیلابی صورتحال اور جاری امدادی و بحالی کارروائیوں پر جائزہ اجلاس کی صدارت کی۔ اجلاس میں گلگت بلتستان، آزاد کشمیر اور چاروں صوبوں کے چیف سیکریٹریز نے بھی شرکت کی۔اجلاس میں چیئرمین این ڈی ایم نے وزیرِ اعظم کو سیلاب سے متاثرہ علاقوں کی صورتحال اور بحالی کے لائحہ عمل پر بریفنگ دی۔ وزیراعظم نے متاثرین کے لیے ریلیف اور بحالی کے عمل کو تیز کرنے کی ہدایت کی اور کہا کہ سیلاب زدہ علاقوں میں لوگوں کی بحالی تک حکومت چین سے نہیں بیٹھے گی۔ اجلاس کو بریفنگ میں بتایا گیا کہ تقریباً ساڑھے تین لاکھ افراد امدادی کیمپس سے واپس اپنے گھروں کو جا چکے ہیں جبکہ سندھ کے کچھ کیمپ میں لوگ ابھی بھی مقیم ہیں، جہاں سیلابی پانی تیزی سے کم ہو رہا ہے،جس کے بعد جلد ان لوگوں کی بھی اپنے گھروں میں واپسی ہوجائے گی۔ اجلاس کو مزید بتایا گیا کہ متاثرین کو راشن و امداد کی فراہمی جاری ہے۔ وزیراعظم نے وزیر منصوبہ بندی احسن اقبال کو امداد و بحالی کے آپریشنز کی کڑی نگرانی اور باقاعدہ جائزہ اجلاس بلانے کی ہدایت کی۔ انہوں نے این ڈی ایم اے کو بھی صوبوں اور پی ڈی ایم ایز کے ساتھ مکمل تعاون فراہم کرنے کا حکم دیا۔وزیراعظم نے ہنگامی بنیادوں پر متاثرہ علاقوں میں نقصانات کے تخمینے کو جلد مکمل کرنے کی ہدایت کی تاکہ فصلوں اور بنیادی ڈھانچے کے نقصان کا جامع تخمینہ بنا کر امدادی اور بحالی منصوبہ بندی کی جا سکے۔ موٹروے ایم-5 کے دریائے ستلج میں سیلاب سے متاثرہ حصے کی فوری بحالی کے لیے این ایچ اے کو اقدامات تیز کرنے کی بھی ہدایت کی گئی، خاص طور پر جلال پور پیر والا کے مقام پر پڑنے والے شگاف کی فوری مرمت پر زور دیا گیا۔وزیراعظم نے پانی سے پھیلنے والی بیماریوں کی روک تھام کے لیے تمام ضروری اقدامات اٹھانے اور سیلاب زدہ علاقوں میں موزوں فصلوں کی کاشت کے لیے بھی خصوصی حکمت عملی اپنانے کی ہدایت کی۔ اجلاس کو بتایا گیا کہ حکومت پنجاب سیلاب متاثرین کی بحالی کے لیے مثالی اقدامات کر رہی ہے اور فصلوں کے نقصانات اور کسانوں کی بحالی کے حوالے سے بھی تجاویز پیش کی گئیں۔ وزیر اعظم نے آئندہ ایک ہفتے میں نقصانات کے جائزے کی جامع رپورٹ مرتب کرکے پیش کرنے کی بھی ہدایت دی۔
.ذریعہ: Nawaiwaqt
کلیدی لفظ: کی ہدایت کی بحالی کے کرنے کی کے لیے
پڑھیں:
دریائے سندھ میں کوٹری بیراج پر پانی میں اضافہ
فائل فوٹودریائے سندھ میں کوٹری بیراج پر پانی کی آمد میں اضافہ جاری، 24 گھنٹے میں 12 ہزار کیوسک کا اضافہ ہوا، بہاؤ بڑھ کر 4 لاکھ 20 ہزار کیوسک تک پہنچ گیا۔
فلڈ فور کاسٹنگ ڈویژن لاہور کے مطابق کوٹری بیراج پر درمیانے درجے کا سیلاب ہے، باقی دریا معمول پر آگئے ہیں جبکہ منگلا ڈیم بھرنے کے قریب ہے۔
کوٹری بیراج پر سیلانی صورت حال سے ٹھٹہ میں کچے کے مزید کئی دیہات زیرِ آب آگئے جس کے نتیجے میں سیکڑوں ایکڑ پر چاول، کپاس، کیلے اور پپیتے سمیت کئی فصلیں شدید متاثر ہوگئیں۔
ضلع سجاول ميں دریائے سندھ کے حفاظتی پشتوں پر سیلابی صورت حال برقرارہے، حفاظتی بندوں پر پانی کا بہاؤ بڑھ گیا،ضلعی انتظامیہ کی جانب سے خیمہ بستیاں قائم کردی گئیں۔
سیلابی صورتحال کے باعث مکینوں کی حفاظتی بند اور محفوظ مقامات پر منتقلی جاری ہے، جام شورو میں انڑ پور، یونین کونسل شاہ اویس اور کچے کے دیہات میں پانی کا دباؤ بڑھنے لگا۔
نواب شاہ سکرنڈ مڈ منگلی حفاظتی بند کے مقام پر سیلابی صورتِ حال ہے جس کے باعث دیہات پانی میں گھِر گئے۔
دوسری جانب دریائے چناب اور ستلج سے متاثرہ جلال پور پیر والا میں سیلابی پانی کم نہ ہوسکا، درجنوں بستیاں اب بھی زیرِ آب ہیں۔ اُچ شریف روڈ پر سیلاب متاثرین گھر واپسی کے لیے پانی اترنے کے منتظر ہیں۔
نوراجہ بھٹہ بند کے شگاف کی مرمت کا کام جاری ہے، ایم 5 موٹر وے ملتان سے جھانگڑا انٹر چینج تک 14ویں روز بھی بند ہے۔
سیلاب سے متاثر سوئی گیس پائپ لائن کی مرمت کا کام بھی جاری ہے، رحیم یار خان، بہاول نگر اور بہاول پور کا وسیع رقبہ متاثرہوگیا جس کے بعد نقصانات کے سروے کا آغاز کردیا گیا ۔
24ستمبر بلدیاتی ضمنی انتخابات میں عوام کرین پر مہر لگائیں، تحریک لبیک