وزیراعظم نے ٹرمپ کی چاپلوسی میں تمام حدیں پار کردیں ،حافظ نعیم
اشاعت کی تاریخ: 16th, October 2025 GMT
حکومت کو تعلیم کے علاوہ ہر میدان میں ریاست کی رِٹ قائم کرنے کی فکر ہے، امیر جماعت اسلامی
گھریلو خواتین کے لیے بھی بنو قابل مفت آئی ٹی کورسز کا آغاز کرینگے،بنوقابل تقریب سے خطاب
امیر جماعت اسلامی پاکستان حافظ نعیم الرحمن نے کہا ہے کہ حکومت کو ریاست کی ہرجگہ رِٹ قائم کرنے کی فکر ہے مگر نوجوانوں کو تعلیم کی فراہمی کی رِٹ قائم نہیں کی جاتی۔ وزیراعظم شہباز شریف نے ٹرمپ کی خوشامد اور چاپلوسی کی تمام حدیں پار کردیں۔ گھریلو خواتین کے لیے بھی بنو قابل مفت آئی ٹی کورسز کا اہتمام کریں گے۔ ان خیالات کا اظہار انہوں نے قلعہ کہنہ قاسم باغ اسٹیڈیم ملتان میں بنوقابل تقریب سے خطاب کرتے ہوئے کیا۔ حافظ نعیم الرحمن نے اس امر پر افسوس کا اظہار کیا کہ ملک میں پونے تین کروڑ بچے سکولوں سے باہر ہیں، صرف پنجاب میں ایک کروڑ بچے سکول نہیں جاتے، صلاحیت ہونے کے باوجود نوجوانوں کو آٹی ٹی کے میدان میں آگے بڑھنے کے مواقع دستیاب نہیں، حکمران جلسے روکتے ہیں، آپریشن کرنے پر بضد ہیں اور کہا جاتا ہے کہ ریاست کی رِٹ قائم کرنی ہے مگر نوجوانوں کو مواقع اور تعلیم فراہم کرنے کی رِٹ قائم کیوں نہیں کی جاتی۔ وزیراعظم نے ٹرمپ کی تعریف میں وہ سب کچھ کہہ دیا جو شاید امریکی صدر کو خود بھی اپنے بارے میں معلوم نہ ہو، ایک طرف ٹرمپ کہہ رہے تھے کہ انہوں نے اسرائیلی وزیراعظم کو جو اسلحہ فراہم کیا اس کا بالکل درست استعمال ہوا دوسری طرف وزیراعظم ٹرمپ کی چاپلوسی کررہے تھے، شہباز شریف کے اقدام سے پاکستانیوں کے سرشرم سے جھک گئے۔ امیر جماعت اسلامی نے کہا کہ نوجوانوں کو آئی ٹی میں تمام مواقع فراہم کیے جائیں تو پاکستان کی آئی ٹی برآمدات اربوں ڈالر تک پہنچ سکتی ہیں اور ملک کا قرضہ اتر سکتا ہے، شہباز شریف نوجوانوں پر توجہ دیں۔ حافظ نعیم الرحمن نے کہا کہ مفت اور معیاری تعلیم ہر شہری کا حق ہے، نوجوانوں کو اپنے حق کے لیے آواز بلند کرنا ہوگی، نوجوان فرسودہ نظام کے خلاف اٹھ کھڑے ہوں۔ ملک کی نام نہاد بڑی سیاسی پارٹیاں مافیا کے نرغے میں ہیں، ہر پارٹی میں اے ٹی ایم موجود ہیں، یہ چہرے بدل بدل کر نظام پر مسلط ہیں، جماعت اسلامی چہرے نہیں نظام بدلنے کے لیے جدوجہد کررہی ہے، ہم احتجاج کرتے ہیں تو حکمرانوں کو گھٹنے ٹیکنے پر مجبور کردیتے ہیں، ہم نظام کو بدلنے کی جدوجہد کے ساتھ ساتھ خدمت کے میدان میں بھی سب سے آگے ہیں، الخدمت اتنے بڑے پیمانے پر نوجوانوں کو مفت آئی ٹی تربیت فراہم کرہی ہے تو ریاست یا حکومت ایسا کیوں نہیں کرسکتی؟ انہوں نے اعلان کیا کہ جماعت اسلامی گھریلو خواتین کے لیے بھی مفت آئی ٹی کورسز کا آغاز کررہی ہے۔ حافظ نعیم الرحمن نے نوجوانوں کو نومبر کے اجتماع عام میں شرکت کی دعوت دی۔
.ذریعہ: Juraat
کلیدی لفظ: حافظ نعیم الرحمن نے جماعت اسلامی نوجوانوں کو کی ر ٹ قائم مفت ا ئی ٹی ٹرمپ کی کے لیے
پڑھیں:
ہمارا مطالبہ ہے کہ ICCBS کو جامعہ کراچی سے الگ کرنے کا بل واپس لیا جائے، منعم ظفر
ادارہ نور حق میں پریس کانفرنس سے خطاب کرتے ہوئے امیر جماعت اسلامی کراچی نے کہا کہ کراچی کی عوام کو بیدار رہنا ہوگا، جماعت اسلامی نے ہزاروں کی تعداد میں عوامی کمیٹیاں تشکیل دی ہیں، ہم لوگوں کی املاک پر قبضے کرنے کی کوششوں پر مزاحمت کریں گے۔ اسلام ٹائمز۔ امیر جماعت اسلامی کراچی منعم ظفر خان نے کہا ہے کہ جہالت سب کے لیے پیپلز پارٹی کا تعلیمی منشور ہے، جمہوریت کا راگ الاپنے والی پیپلز پارٹی جمہوریت کی نفی اور آمریت و فسطائیت کا مظاہرہ کر رہی ہے، پہلے صوبائی اسمبلی سے بل پاس کرواکے جامعات کی خود مختاری پر حملہ کیا گیا، اب ICCBS کو جامعہ کراچی سے الگ کر کے صرف طلبہ کے مستقبل سے کھیلنے بلکہ من پسند افراد کو نوازنے اور چند ڈونرز کی خواہش کو پورا کرنے کی کوشش کی جارہی ہے، 70ء کی دہائی میں ذوالفقار علی بھٹو نے اداروں کو قومیایا لیکن آج پیپلز پارٹی پر اداروں کو پبلک پرائیویٹ پاٹنرشپ کے حوالے کرنے کا جنون سنوار ہے اور تعلیمی اداروں سے جان چھڑا کر نجکاری کے نام پر ان کا سودا کر رہی ہے، ہمارا مطالبہ ہے کہ ICCBS کو جامعہ کراچی سے الگ کرنے کا بل واپس لیا جائے، 2019ء میں سندھ اسمبلی کی منظور کردہ قرارداد اور 2022ء کے اسٹوڈنٹس یونین ایکٹ کے تحت تعلیمی اداروں میں فوری طور پر طلبہ یونین کے انتخابات کی تاریخ کا اعلان کیا جائے۔ ان خیالات کا اظہار انہوں نے ادارہ نور حق میں پریس کانفرنس سے خطاب کرتے ہوئے کیا۔
منعم ظفر خان نے مزید کہا کہ جامعہ کراچی کا اپنا ایک قاعدہ ضابطہ ہے، اس کے رولز ریگولیشن موجود ہیں، سینیٹ، سینڈیکیٹ موجود ہے، ہائیر ایجوکیشن کمیشن سے منظوری لی جاتی ہے لیکن کسی مشاورتی فورم سے کوئی ڈسکشن کی گئی نہ کوئی بات کرنا گوارہ نہیں کیا، یہ غیر جمہوری طرز عمل ہے، ہم اس کی شدید مذمت کرتے ہیں، پہلے جامعات کی خود مختاری پر حملہ کیا گیا، صوبائی اسمبلی سے بل پاس کروا کے جامعات میں کوئی بھی 19 یا 20 گریڈ کا بیوروکریٹ جس کا تعلیمی یا تحقیقی تجربہ نہ بھی ہو اسے جامعات کا وائس چانسلر بننے کی راہ ہموار کی گئی، عالمی سطح پر ایک باوقار ادارے کو چند لوگوں کی خواہشات کی بھینٹ چڑھایا جارہا ہے، یہ ادارہ 1967ء میں مشہور سائنسدان سلیم الزماں صدیقی نے قائم کیا تھا جو آج ایک تناور درخت بن چکا ہے، پوری دنیا میں ICCBS ایک تسلیم شدہ تحقیقی مرکز کے طور تسلیم کیا جاتا ہے جو کراچی یونیورسٹی کی بھی ایک شناخت ہے۔
انہوں نے کہا کہ کلفٹن میں پارکس کی دیواریں گرائی جارہی ہیں اور کہتے ہیں کہ اندر کا منظر نظر آئے اندر تو کچرا کنڈیاں بنی ہوئی ہیں، عمر شریف پارک کی دیواریں بلند کی جارہی ہیں، فٹ سول بنا کر کروڑوں روپے کمائے جا رہے ہیں، پبلک پرائیویٹ پارٹنر شپ کے نام پر پارکوں پر قبضے کیے جارہے ہیں جبکہ عدالتوں کے فیصلے موجود ہیں۔ انہوں نے کہا کہ گلشن اقبال میں 2 دن پہلے وکلا کے بھیس میں کچھ عناصر پولیس کے ساتھ آئے اور گھروں پر قبضہ کرنے کی کوشش کی گئی، ہم خراج تحسین پیش کرتے ہیں جماعت اسلامی کے کارکنان اور اہل محلہ کو جن کی مزاحمت کے نتیجے میں وہ بھاگنے پر مجبور ہوئے، کراچی کی عوام کو بیدار رہنا ہوگا، جماعت اسلامی نے ہزاروں کی تعداد میں عوامی کمیٹیاں تشکیل دی ہیں، ہم لوگوں کی املاک پر قبضے کرنے کی کوششوں پر مزاحمت کریں گے۔
مریم نواز کا ضمنی الیکشن میں (ن) لیگ کی شاندار کامیابی پر اظہار تشکر