چمکنی پھاٹک کے قریب 50 دیہاتوں کو جوڑنے والا روڈ کھنڈرات میں تبدیل
اشاعت کی تاریخ: 18th, October 2025 GMT
بشاور میں چمکنی پھاٹک کے قریب 50 دیہاتوں کو جوڑنے والا روڈ کھنڈرات میں تبدیل ہوگیا ہے۔
تفصیلات کے مطابق روڈ کی دگرگوں حالت کی وجہ سے بچوں، خواتین اور رکشہ ڈرائیورز کی مشکلات بڑھ گئی ہیں۔
سڑک کی یہ حالت کیوجہ سے آئے روز پلازوں کی تعمیر اور نکاسی سسٹم بھی تباہ ہورہا ہے جبکہ آئے روز حادثات کا باعث بھی بن رہا ہے۔
ٹوٹی سڑک کے باعث اسکول جانے والے بچے روزانہ گندے پانی میں گر کر زخمی ہو رہے ہیں، جبکہ خواتین کو بھی آمدورفت میں شدید مشکلات کا سامنا ہے۔ ٹی ایم اے دفتر کے بالکل قریب موجود یہ خستہ حال سڑک حکام کی نظروں سے مسلسل اوجھل ہے۔
مقامی رہائشیوں کے مطابق علاقے کے قریبی روڈز کئی بار دوبارہ تعمیر کیے گئے مگر یہ مرکزی لنک روڈ گزشتہ کئی برسوں سے حکومتی توجہ کا منتظر ہے۔ اہل علاقہ کا کہنا ہے کہ 2013 سے 2025 تک حکومتیں بدل گئیں مگر اس سڑک کی حالت زار نہ بدل سکی۔ کبھی پی اے فنڈ نہ ہونے کا بہانہ کیا جاتا ہے تو کبھی ایم این اے کو ووٹ کم ملنے کا شکوہ سنا جاتا ہے، مگر عوام کے مسائل اپنی جگہ جوں کے توں ہیں۔
روزانہ تقریباً 6 سے 7 ہزار گاڑیاں اس سڑک سے گزرتی ہیں، جن میں زیادہ تر رکشے، چنگچی اور چھوٹی گاڑیاں شامل ہیں۔ ڈرائیورز کے مطابق گڑھوں اور کھڈوں کے باعث ان کی گاڑیاں آئے روز خراب ہو جاتی ہیں جس سے روزگار بری طرح متاثر ہو رہا ہے۔
علاقہ مکین مشرف خان نے ایکسپریس کو بتایا کہ رات کے وقت موبائل اسنیچنگ اور چھین جھپٹ کی وارداتیں اکثر اسی ٹوٹی سڑک پر ہوتی ہیں کیونکہ گاڑیاں آہستہ چلتی ہیں اور ملزمان پہلے سے گھات لگائے بیٹھے ہوتے ہیں۔ کئی بار حکام کو درخواستیں دے چکے ہیں لیکن اس مسئلے کو حل کرنے کی سنجیدہ کوششیں نہیں کی جا رہیں۔
اہل علاقہ نے وزیر اعلیٰ خیبرپختونخوا، کمشنر پشاور اور ڈی جی پی ڈی اے سے مطالبہ کیا ہے کہ چمکنی پھاٹک سے ملحقہ اس لنک روڈ کی فوری مرمت و تعمیر کے احکامات جاری کیے جائیں تاکہ عوامی مشکلات کا ازالہ ہو اور علاقے میں امن و سکون بحال ہو سکے۔
.ذریعہ: Express News
پڑھیں:
پاکستان غزہ کی تعمیرِ نو میں مرکزی کردار ادا کرے، مصر کا بڑا مطالبہ
اسلام آباد کے دورے پر آئے ہوئے مصری وزیرِ خارجہ بدر عبدالعاطی نے کہا ہے کہ غزہ کے لیے تجویز کردہ عالمی استحکام فورس (ISF) کا کردار صرف جنگ بندی کی نگرانی اور غزہ کی سرحدوں کے تحفظ تک محدود ہونا چاہیے۔
انہوں نے پاکستان پر زور دیتے ہوئے کہا کہ وہ غزہ کی تعمیرِ نو اور بحالی میں مزید نمایاں کردار ادا کرے۔
نجی نیوز ویب سائٹ سے خصوصی گفتگو میں انہوں نے کہا کہ استحکام فورس کا مقصد امن نافذ کرنا نہیں بلکہ موجودہ جنگ بندی کو برقرار رکھنا ہے۔
ان کے مطابق فورس کی تفصیلات، مینڈیٹ اور دستوں کی فراہمی کے معاملات ابھی عالمی شراکت داروں، خصوصاً امریکا کے ساتھ مشاورت میں ہیں۔
بدر عبدالعاطی نے بتایا کہ مصر جلد غزہ کی تعمیرِ نو سے متعلق ایک بین الاقوامی کانفرنس کی میزبانی کر رہا ہے، اور پاکستان سے نہ صرف مالی مدد بلکہ نجی شعبے، تکنیکی معاونت اور طبی خدمات کی فراہمی میں بھی زیادہ کردار کی توقع کرتا ہے۔ ان کے مطابق غزہ میں تقریباً 50 ہزار ایسے مریض ہیں جنہیں فوری طبی امداد درکار ہے۔
مصری وزیرِ خارجہ نے کہا کہ پاکستان اور مصر اس بات پر متفق ہیں کہ خطے میں پائیدار امن کا واحد راستہ ایک آزاد فلسطینی ریاست کا قیام ہے۔ انہوں نے سوڈان، ایران اور دیگر علاقائی تنازعات پر بھی سیاسی حل، مکالمے اور کشیدگی میں کمی کی ضرورت پر زور دیا۔
دو طرفہ تعلقات کے حوالے سے انہوں نے تجارت، سرمایہ کاری، ٹیکنالوجی کی منتقلی اور دفاعی تعاون بڑھانے کی ضرورت پر زور دیتے ہوئے کہا کہ دونوں ممالک کے درمیان تجارتی حجم دوگنا کیا جانا چاہیے۔
اے پی پی کے 10 ملازمین و افسروں عدالت سے بری