کرم میں آپریشن: 7 خوارج ہلاک، کیپٹن، 5 جوان شہید: بلوچستان، جعفر ایکسپریس پر راکٹوں سے حملہ
اشاعت کی تاریخ: 30th, October 2025 GMT
اسلام آباد‘ مستونگ‘ نصیر آباد‘ ڈیرہ مراد جمالی (خبرنگار خصوصی‘ نمائندہ خصوصی‘ اپنے سٹاف رپورٹر سے‘ نوائے وقت رپورٹ‘ نیٹ نیوز) سکیورٹی فورسز نے بھارتی پراکسی، فتنہ الخوارج سے تعلق رکھنے والے خوارج کی موجودگی کی اطلاع پر ضلع کرم کے علاقے ڈوگر میں انٹیلی جنس پر مبنی آپریشن کیا۔ مسلح افواج کے شعبہ تعلقات عامہ (آئی ایس پی آر) کے مطابق آپریشن کے دوران سات بھارتی سپانسرڈ خوارج کو جہنم واصل کر دیا گیا۔ تاہم شدید فائرنگ کے تبادلے کے دوران بہادر میڈیکل آفیسر کیپٹن نعمان سلیم (عمر: 24 سال، ساکن ڈسٹرکٹ میانوالی) جو طبی نگہداشت کے فرائض سرانجام دینے کے ساتھ ساتھ اپنے پانچ جوانوں کے ساتھ بہادری سے دہشتگردوں سے لڑے اور شہادت کو گلے لگا لیا۔ مادر وطن کے لئے جانوں کی قربانی دینے والے پانچ سپاہیوں میں حوالدار امجد علی (عمر: 39 سال، ساکن ڈسٹرکٹ صوابی)، نائیک وقاص احمد (عمر: 36 سال، ساکن ڈسٹرکٹ راولپنڈی)، سپاہی اعزاز علی (عمر: 23 سال، ساکن ڈسٹرکٹ شکارپور)، سپاہی محمد ولید (عمر: 23 سال، ساکن ضلع صوابی)، سپاہی محمد ولید (عمر: 23 سال، ساکن ضلع صوابی) شامل ہیں۔ آئی ایس پی آر کے مطابق پاکستان کی سکیورٹی فورسز اور قانون نافذ کرنے والے اداروں کی طرف سے "عزم استحکام" (جیسا کہ نیشنل ایکشن پلان پر اپیکس کمیٹی کی طرف سے منظور شدہ) وژن کے تحت انسداد دہشت گردی مہم جاری رکھی جائے گی اور علاقے میں پائے جانے والے کسی بھی دوسرے ہندوستانی سپانسر شدہ خارجی کو ختم کرنے کے لیے سینی ٹائزیشن آپریشن بھی جاری ہے۔ قانون نافذ کرنے والی ایجنسیوں کی طرف سے دہشت گردی کے خطرے اور بیرون ملک کی حمایت یافتہ دہشت گردی کو ختم کرنے کے لیے آپریشن پوری رفتار سے جاری رکھا جائے گا۔ ڈیرہ مراد جمالی میں پولیس موبائل پر دستی بم حملہ کیا گیا۔ پولیس کے مطابق حملے میں دو پولیس اہلکاروں سمیت 13 افراد زخمی ہو گئے۔ ایس ایس پی غلام سرور بھیو کے مطابق زخمیوں میں دو خواتین اور چار بچے شامل ہیں۔ نوتال نصیر آباد کے قریب جعفر ایکسپریس پر راکٹوں سے حملہ کیا گیا۔ پولیس کے مطابق جعفر ایکسپریس پر متعدد راکٹ داغے گئے۔ تاہم ٹرین محفوظ رہی۔ فورسز کی جوابی کارروائی میں حملہ آور فرار ہوگئے۔ جعفر ایکسپریس بلوچستان کی حدود سے نکل کر سندھ کی حدود میں داخل ہوگئی۔ صدرِ مملکت آصف علی زرداری‘وزیراعظم شہباز شریف اور وزیرداخلہ نے دہشتگردی کیخلاف آپریشن میں شہداء کو خراجِ عقیدت پیش کیا ہے۔ صدر مملکت نے کرم کے علاقے ڈوگر میں خوارج کے خلاف کارروائی میں شہید ہونے والے کیپٹن نعمان سلیم اور ان کے پانچ ساتھیوں کی قربانی کو خراجِ تحسین پیش کیا اور 7 خوارجیوں کو جہنم واصل کرنے پر سکیورٹی فورسز کی ستائش کی ہے۔ بلوچستان کے ضلع مستونگ کے علاقے دشت میں سکیورٹی فورسز کی کارروائی میں 4 دہشت گرد ہلاک ہوگئے۔ فائرنگ کے تبادلے کے دوران ایک راہگیر شہید اور 8 افراد زخمی ہوگئے۔ سکیورٹی ذرائع کے مطابق دہشت گردوں اور سکیورٹی فورسز کے درمیان فائرنگ کا تبادلہ ہوا جس کی زد میں راہگیر اور دیگر افراد بھی آئے۔ فائرنگ کی زد میں آکر ایک راہگیر جاں بحق ہوگیا جبکہ پکنک پر آئے 8 افراد زخمی ہوگئے۔
.ذریعہ: Nawaiwaqt
کلیدی لفظ: سکیورٹی فورسز جعفر ایکسپریس ساکن ڈسٹرکٹ کے مطابق
پڑھیں:
کوئٹہ میں بلدیاتی انتخابات نہیں کرانا چاہتے، مجبوری ہے، جعفر مندوخیل
نجی ٹی وی چینل سے گفتگو کرتے ہوئے جعفر مندوخیل نے کہا کہ بلدیاتی انتخابات کروانا انکی سمجھ سے باہر ہے، پچھلے پانچ سال میں انتخابات نہیں کرائے گئے۔ صرف پانچ مہینے باقی ہیں۔ اسلام ٹائمز۔ گورنر بلوچستان شیخ جعفر مندوخیل نے الیکشن کمیشن پر تنقید کرتے ہوئے کہا ہے کہ کوئٹہ میں بلدیاتی انتخابات کروانا ان کے لیے سمجھ سے باہر ہے، کیونکہ پچھلے پانچ سال میں انتخابات نہیں کرائے گئے، اور اب صرف آخری پانچ مہینے میں انتخابات کا انعقاد کیا جا رہا ہے۔ حکومت کی مجبوری ہے کہ بلوچستان ہائی کورٹ کے حکم کے مطابق انتخابات کرائے جائیں گے۔ انہوں نے نجی ٹی وی سے گفتگو کرتے ہوئے دعویٰ کیا کہ پاکستان پیپلز پارٹی اور مسلم لیگ (ن) کوئٹہ کے لیے متفقہ میئر کا انتخاب کریں گے، تاکہ شہر کے لیے مثبت قیادت فراہم ہو۔ گورنر مندوخیل نے کہا کہ حکومت کے لیے بلوچستان میں امن و امان برقرار رکھنا ایک بڑا چیلنج ہے۔ ماضی کے حالات اب موجود نہیں، اور صورتحال کو قابو میں لانے میں وقت لگے گا، لیکن جلد صوبے میں بہتری آئے گی۔ انہوں نے ایک سوال کے جواب میں کہا کہ بلوچستان حکومت کے اڑھائی اڑھائی سال کے معاہدے پر کافی باتیں ہو چکی ہیں اور اس پر دوبارہ تبصرہ کرنا مناسب نہیں ہے۔
پی ٹی آئی ورکرز کے حقوق پر ایک اور ڈاکا منظور نہیں: اکبر ایس بابر