عثمان طارق ٹی 20 انٹرنیشنلز میں ہیٹ ٹرک کرنے والے چوتھے پاکستانی بن گئے
اشاعت کی تاریخ: 24th, November 2025 GMT
پاکستانی اسپنر عثمان طارق ٹی ٹوئنٹی انٹرنیشنلز میں شاندار ہیٹ ٹرک کے بعد ایلیٹ کلب میں شامل ہوگئے۔
راولپنڈی کرکٹ اسٹیڈیم میں کھیلے گئے سہ فریقی سیریز کے زمبابوے کے خلاف میچ میں پاکستان کے آف اسپنر عثمان طارق نے کیریئر کی پہلی ٹی ٹوئنٹی انٹرنیشنل ہیٹ ٹرک کرتے ہوئے زمبابوے کی بیٹنگ لائن کو تہس نہس کردیا۔
عثمان طارق نے اپنی ہیٹ ٹرک 10ویں اوور میں مکمل کی جب زمبابوے کی ٹیم صرف 60 رنز پر 7 وکٹوں سے محروم ہوچکی تھی۔
30 سالہ اسپنر نے پہلے ٹونی منیونگا کو ایل بی ڈبلیو کیا، اگلی ہی گیند پر تاشینگا موسیقیوا کو بولڈ کردیا، جبکہ ہیٹ ٹرک مکمل کرنے کے لیے ویلنگٹن مساکڈزا کو پویلین کی راہ دکھائی۔
اس کارنامے کے ساتھ ہی عثمان طارق ٹی ٹوئنٹی انٹرنیشنلز میں ہیٹ ٹرک کرنے والے چوتھے پاکستانی بالر بن گئے۔
پاکستانی بولرز کی ٹی ٹوئنٹی ہیٹ ٹرکس کی فہرست میں فہیم اشرف، محمد حسنین اور محمد نواز بھی شامل ہیں۔
.
ذریعہ
ذریعہ: Daily Mumtaz
پڑھیں:
کوئٹہ: سرکاری دستاویزات میں شہریوں کو غیرقانونی سہولت دینے والے 14 ایجنٹ گرفتار
فیڈرل انویسٹی گیشن ایجنسی (ایف آئی اے) بلوچستان نے کوئٹہ شہر میں مختلف وفاقی اداروں کے مبینہ ایجنٹس کے خلاف بڑے پیمانے پر کریک ڈاؤن کرتے ہوئے 14 افراد کو گرفتار کرلیا۔
ڈائریکٹر ایف آئی اے بلوچستان بہرام مندوخیل کے مطابق کارروائی کے دوران نادرا، سوئی سدرن گیس کمپنی، پاسپورٹ آفس اور میٹروپولیٹن کارپوریشن سے متعلق مبینہ ایجنٹس کو حراست میں لیا گیا ہے، جو شہریوں کو مختلف سرکاری امور میں غیر قانونی سہولت کاری فراہم کرنے میں ملوث تھے۔
انہوں نے بتایا کہ گرفتار ملزمان مبینہ طور پر برتھ سرٹیفکیٹس، قومی شناختی کارڈز، پاسپورٹس اور دیگر سرکاری دستاویزات کے حصول کے لیے غیر قانونی طریقے سے سہولت فراہم کرتے اور شہریوں سے رقوم وصول کرتے تھے۔
ڈائریکٹر ایف آئی اے کا کہنا تھا کہ گرفتار ملزمان سے تفتیش جاری ہے اور ابتدائی تحقیقات کی روشنی میں ان کے نیٹ ورک میں شامل دیگر افراد کی نشاندہی کی جا رہی ہے۔ امید ہے کہ مزید گرفتاریاں بھی عمل میں آئیں گی۔
بہرام مندوخیل نے کہا کہ ایف آئی اے سرکاری اداروں میں بدعنوانی، جعلسازی اور غیر قانونی سہولت کاری کے خاتمے کے لیے کارروائیاں جاری رکھے گی اور قانون شکنی میں ملوث عناصر کے خلاف بلاامتیاز کارروائی کی جائے گی۔
سپریم کورٹ کا تاریخی فیصلہ، پولیس ریکارڈ سے ذات برادری کا خاتمہ لازم قرار