کعبے کس منہ سے جاؤ گے غالبؔ
اشاعت کی تاریخ: 17th, January 2025 GMT
بہت پرانی بات ہوگئی کہ مملکت خداداد پاکستان کو رشوت کے سرطان کا عارضہ لاحق ہو چکا ہے۔ ایسا لگتا ہے جیسے یہ بیماری اب اپنے آخری اسٹیج پر ہے۔ سبھی جانتے ہیں کہ سرطان کا علاج مکمل طور پر آج تک دریافت نہیں ہوا۔ رشوت کی کارفرمائیاں آپ کو پاکستانی معاشرے کے ہر شعبے میں نظر آئیں گی، کوئی خوش نصیب محکمہ ایسا نہیں جہاں اس نے پنجے نہ گاڑے ہوں۔ دلچسپ بات یہ ہے کہ یہ عارضہ صرف سرکاری اداروں کو لاحق ہے۔
کراچی کو عروس البلاد، میٹروپولیٹن سٹی اور میگاسٹی جیسے خطابات سے نوازا گیا ہے لیکن کوئی اس کی طویل و عریض سڑکوں کی شکستہ حالی، پامالی اور درماندگی کو دیکھے۔ صرف ایک شاہراہ فیصل کو چھوڑ کر کہ اس پر سربراہان مملکت کا گزر ہوتا ہے اور ہمارے صدر و وزیر اعظم کی جلوہ گری بھی اسی سڑک تک محدود ہے۔ بقیہ سڑکوں کی حالت زار دیکھ کر یوں لگتا ہے کہ جیسے ہلاکو خاں کا لشکر ابھی ابھی یہاں سے گزرا ہے۔
ہر سڑک ٹوٹی پھوٹی، گڑھوں سے مزین، گٹر بہتے ہوئے، موئن جو ڈارو بھی اس سے بہتر حالت میں ہوگا۔ طویل عرصے سے سندھ پر پی پی کی حکومت ہے لیکن یوں لگتا ہے جیسے کسی سے بدلہ لینے کے لیے، اس شہر کو جان بوجھ کر کھنڈر بنا دیا گیا ہو۔ ان سڑکوں پہ چل کر صرف رکشہ اور ٹیکسی کے ہی انجر پنجر ڈھیلے نہیں ہوتے بلکہ انسان کا اندرونی نظام بھی تباہ ہو جاتا ہے۔ لاہور کو شہباز شریف نے ایسا صاف ستھرا کر دیا ہے کہ اس کی سڑکیں پاکستان کی نہیں لگتیں۔ جب ان سے درخواست کی جاتی ہے کہ کچھ نظر کرم کراچی پر بھی کر دیجیے تو جواب ملتا ہے ’’کراچی میں ہماری حکومت نہیں۔‘‘ اس موقع پر ایک شعر یاد آتا ہے:
ایک ہم ہیں کہ لیا اپنی ہی صورت کو بگاڑ
ایک وہ ہیں جنھیں تصویر بنا آتی ہے
اس صورت حال کی ذمے دار ہے، رشوت۔۔۔۔ اور صرف رشوت۔ جہاں ٹینڈر کھلنے سے لے کر سڑک کے افتتاح تک میں سب میں رشوت کا عمل دخل۔ ٹھیکیدار متعلقہ ایگزیکٹیو انجینئر کو نوٹوں کی گڈیاں پیش کرے ریتی اور بجری میں سیمنٹ ’’ بقدر اشک بلبل‘‘ ڈال کر سڑک کو مکمل کر دیتا ہے۔ آج کل صرف دو دن میں ’’ پکی سڑک‘‘ بن جاتی ہے۔
پہلے کئی کئی دن لگتے تھے، پتھر توڑ کر بچھایا جاتا تھا پھر پتھریلے چھوٹے چھوٹے پتھر ڈلتے تھے جنھیں ٹریکٹر کے ذریعے دبایا جاتا تھا اور بعد میں ریتی بجری میں تارکول ملا کر بچھایا جاتا تھا، بعض سڑکوں پہ سیمنٹ بھی ڈالا جاتا ہے لیکن اب سب ناپید ہے۔ کوئی سڑک ایک بارش کی مار نہیں سہہ سکتی۔ پہلی ہی بارش میں تمام اندرونی غلاظت باہر نکل آتی ہے۔ آپ کتنا بھی چلائیے، کالم لکھیے، ٹی وی ٹاک شوز میں توجہ دلائیے، نتیجہ صفر،صفر،صفر۔
اب آئیے بجلی کی طرف۔ بجلی کی چوری اورکنڈا سسٹم اس کی اصل وجوہات ہیں جن سے ہر ذی شعور واقف ہے۔ کے الیکٹرک کے افسران اتنے سادہ ہیں کہ انھیں پتا ہی نہیں کہ کنڈا سسٹم کون چلا رہا ہے۔ تمام کچی بستیوں میں کے الیکٹرک کے کارندے خود کنڈا دیتے ہیں اور مہینے پر آ کر اپنی ’’روزی روٹی‘‘ لے جاتے ہیں۔ بڑی بڑی مارکیٹوں میں بھی کنڈا سسٹم زور شور سے جاری ہے۔
عوام قطار میں لگ کر بجلی کا بل ادا کرتے ہیں اور بدلے میں کئی کئی گھنٹوں کی لوڈ شیڈنگ ملتی ہے۔ کے الیکٹرک کے افسران کی ملی بھگت سے دو کمروں کے گھر میں رہنے والے کا بل آ رہا ہے آٹھ سے دس ہزار کا۔ اور چار چار اے سی چلانے والوں کا بل چار ہزار کا۔ بجلی کے میٹروں میں کاری گری بجلی کمپنی کے کارندے ہی دکھاتے ہیں ۔ سنا ہے میٹروں میں ایکسرے کی شیٹ لگا دی جاتی ہے جس سے میٹر سست ہو جاتا ہے۔ اس کو کہتے ہیں ’’ ہاتھ کی صفائی، کنڈا سسٹم کی کمائی۔‘‘ افسران کی میز پر ’’کارندے‘‘ بڑی ایمانداری سے پہنچا دیتے ہیں۔
اب آتے ہیں گاڑیوں کے ڈرائیونگ لائسنس کی طرف۔ یہاں بھی رشوت نے پنجے گاڑے ہوئے ہیں۔ من پسند افراد کو یا انھیں جو رشوت دے کر لائسنس حاصل کرتے ہیں گھر پر بغیر ٹیسٹ کے لائسنس مل جاتا ہے اور جو جائز طریقے سے لائسنس حاصل کرنا چاہیں انھیں ’’8‘‘ کا ہندسہ بنانے میں فیل کر دیا جاتا ہے۔ ڈرائیونگ اسکول والے بہت آسانی سے لائسنس بنوا دیتے ہیں، کیونکہ ان کی سلام دعا ڈرائیونگ لائسنس والوں سے بہت اچھی ہوتی ہے۔
اس کے علاوہ کراچی کی سڑکوں پہ دھواں چھوڑنے والی گاڑیاں دن رات دندناتی پھرتی ہیں۔ پریشر ہارن اور چنگھاڑتی ہوئی ریکارڈنگ سے کان پھٹے جاتے ہیں، لیکن پولیس ان کا چالان نہیں کرتی، کیونکہ ہر رکشہ اور ویگن سے وہ اپنا روزانہ کا بھتہ وصول کرنے میں مصروف رہتے ہیں۔ اسی لیے آئے دن ٹریفک کے حادثات ہوتے رہتے ہیں، کوئی دن ایسا نہیں جاتا جب ایکسیڈنٹ نہ ہوں۔ روزانہ صبح اور شام پانچ بجے سے آٹھ بجے تک مسلسل ٹریفک جام رہنا معمول کی بات ہے۔ ٹریفک پولیس اپنی ’’پیداگیری‘‘ میں مصروف رہتی ہے۔
رشوت کے سرطان کے ایک اور مریض سے ملیے۔ آپ میں سے بہت سوں کا واسطہ پڑ چکا ہوگا اس سے۔ زمین، جائیداد، فلیٹ اور مکان خریدنا ہر شہری کا حق ہے۔ اس کے لیے باقاعدہ دستاویز اور کاغذات تیار کیے جاتے ہیں جس کے بعد خریدار اور فروخت کنندہ دونوں کو سب رجسٹرار کے سامنے پیش ہونا پڑتا ہے، جس کے لیے کسی وکیل کی خدمات حاصل کی جاتی ہیں جس کی قانونی فیس تو اپنی جگہ ہے لیکن سب رجسٹرار کے پیش کار کو الگ سے نذرانہ بھی دینا پڑتا ہے جو وہ اپنا قانونی حق سمجھ کر وصول کرتا ہے۔
اگر آپ پیش کار اور سب رجسٹرار کو ’’نذرانہ‘‘ دینے کے قائل نہیں تو سمجھ لیجیے آپ کی خریدی ہوئی جائیداد کی قانونی رجسٹری اس وقت تک مکمل نہیں ہوگی جب تک آپ نذرانے کی طے شدہ رقم اپنے وکیل یا پیش کار کے ذریعے سب رجسٹرار تک نہیں پہنچاتے۔ اچھا ہی ہوا کہ ابھی تک پاکستان کے قبرستانوں میں قبروں کی رجسٹری کا قانون لاگو نہیں ہے، ورنہ یہ ستم ظریف ان سے بھی نذرانہ وصول کر لیتے۔
اور اب ملیے ایک اور سرطان کے کیس سے۔ سرکاری دفاتر میں آپ کا کوئی کام بغیر رشوت دیے نہیں ہو سکتا۔ آپ ہزار بار دھکے کھائیں لیکن جب تک مطلوبہ رقم محکمے کے کلرک یا افسران کو نہیں ملتی آپ بے نیل و مرام دھکے کھاتے پھریں گے۔ نہ اپائنمنٹ بغیر رشوت دیے ہو سکتا ہے اور نہ ریٹائرمنٹ کے بعد گریجویٹی اور دیگر فنڈز آپ کو ملیں گے اور نہ ہی پنشن جاری ہوگی۔
اسی لیے اب لوگ ریٹائرمنٹ سے ایک دو ماہ قبل ہی ایسے لوگوں سے رابطہ کرکے رقم طے کر لیتے ہیں جو ’’مڈل مین‘‘ کہلاتا ہے۔ اس کا اپنا بھی حصہ ہوتا ہے۔ جامعہ ملیہ ڈگری کالج ملیر کے سابق پروفیسر جاکھرانی صاحب اے جی سندھ کے چکر لگاتے لگاتے تھک گئے، مگر انھوں نے ’’نذرانہ‘‘ دینے سے منع کر دیا، نتیجہ یہ ہوا کہ ایک دن اپنے گھر میں مردہ پائے گئے۔
بڑے بڑے دعوے کیے جاتے ہیں کہ رشوت کو جڑ سے اکھاڑ پھینکیں گے، یہ کریں گے، وہ کر دیں گے لیکن: ’’وہی رفتار بے ڈھنگی جو پہلے تھی سو اب بھی ہے‘‘ والا معاملہ ہے ۔
یہ ملک بنا ہی رشوت خوروں کے لیے ہے۔ پہلے اگر کسی افسر کے خلاف اخبار میں کوئی خبر لگ جاتی تھی تو اس کے چودہ طبق روشن ہو جاتے تھے، لوگ چھپ چھپا کر رشوت لیا کرتے تھے، رشوت اور بدعنوانی سے کمائے ہوئے پیسے سے بنائے ہوئے گھر کی پیشانی پر ’’ہٰذا من فضل ربی‘‘ لکھوا لیا کرتے تھے، لیکن اب ان تکلفات کی کوئی ضرورت نہیں رہی۔ سب سے زیادہ کرپٹ سیاستدان ہیں، جو منہ مانگی رقم کے عوض برسوں سے رکے کام کروا دیتے ہیں۔ اب وزیروں کے گھروں سے ڈالر بوریوں میں بھرے نکلتے ہیں، لیکن ان کے خلاف کوئی ایکشن نہیں لیا جاتا اور بعد میں انھیں دوبارہ وزیر بنا دیا جاتا ہے۔
کبھی کبھی میں سوچتی ہوں کہ کیا ان لوگوں کو آخرت کی کوئی فکر نہیں؟ یہ چور، اسمگلر، رشوت خور اور بدعنوان افسران، وزیر اور سیاستدان کس منہ سے خدا کا سامنا کریں گے؟ شاید انھیں وہاں بھی کسی رشوت کا انتظار ہوگا۔ کعبے کس منہ سے جائیں گے؟
.ذریعہ: Express News
کلیدی لفظ: کنڈا سسٹم جاتے ہیں دیتے ہیں جاتا ہے ہے لیکن نہیں ہو ہیں کہ کے لیے
پڑھیں:
پاکستانی سیاست… چائے کی پیالی میں طوفان
data-id="863a0a8" data-element_type="widget" data-widget_type="theme-post-content.default">
251102-09-6
متین فکری
بظاہر سطح آب پر کوئی زیرو بم نظر نہیں آتا، حالات معمول کے مطابق چل رہے ہیں۔ وزیراعظم شہباز شریف ملکی حالات سے مطمئن مسلسل بیرونی دوروں میں مصروف ہیں اور سنا ہے کہ انہوں نے برادر بزرگ میاں نواز شریف کے بیرونی دوروں کا ریکارڈ بھی توڑ دیا ہے۔ ان دوروں کے نتیجے میں بڑی حوصلہ افزا باتیں سامنے آرہی ہیں لیکن رزلٹ بالکل الٹ نکل رہا ہے۔ بتایا گیا ہے کہ ملٹی نیشنل کمپنیاں سرمایہ کاری کے لیے حالات ناساز پا کر دھڑا دھڑا پاکستان چھوڑ رہی ہیں اور اب تک سترہ بڑی کمپنیاں اپنا کاروبار سمیٹ کر پاکستان سے رخصت ہوچکی ہیں۔ تاہم وزیراعظم شہباز شریف مطمئن ہیں کہ حالات قابو میں ہیں اور معیشت ترقی کررہی ہے۔ سب سے اہم بات یہ کہ شہباز حکومت اور اسٹیبلشمنٹ ایک پیج پر ہیں۔ شہباز شریف ہر بات مقتدرہ سے پوچھ کر کرتے ہیں اس لیے ان کی جانب سے غلطی کا کوئی امکان نہیں ہے اور ان کی حکومت کو کوئی خطرہ لاحق نہیں ہے۔ انہوں نے امریکا سے بھی بنا کر رکھی ہوئی ہے جس کے بارے میں مشہور ہے کہ وہ پاکستان میں کسی امریکا مخالف حکومت کو برداشت نہیں کرتا۔ اگر وہ حکومت سیدھے طریقے سے رخصت نہ ہو تو وہ پاکستانی حکمران کی جان لینے سے بھی گریز نہیں کرتا جیسا کہ اس نے لیاقت علی خان اور جنرل ضیا الحق کے معاملے میں کیا۔ عمران خان خوش قسمت ہیں کہ ’’تحریک عدم اعتماد‘‘ سے رخصت ہوگئے اور انہیں جانی نقصان نہیں اٹھانا پڑا۔
بات لمبی ہوگئی ہم پھر اپنے اصل موضوع یعنی پاکستانی سیاست کی طرف آتے ہیں۔ ان دنوں پختون خوا کی سیاست نے چائے کی پیالی میں طوفان برپا کررکھا ہے۔ اس صوبے کی سیاست پر تحریک انصاف کا غلبہ ہے۔ پختون خوا اسمبلی میں تحریک انصاف کی قطعی اکثریت ہے اس لیے 8 فروری 2024ء کے انتخابات کے بعد بھی صوبے میں اس کی حکومت چلی آرہی ہے حالانکہ دوسرے صوبوں خاص طور پر پنجاب میں فارم 47 کا جادو ایسا چلا کہ سب کچھ الٹ پلٹ کر رہ گیا۔ ہارنے والے جیت گئے اور جیتنے والے ہار گئے۔ بتایا جاتا ہے کہ مسلم لیگ (ن) نے قومی اسمبلی میں صرف سترہ سیٹیں حاصل کی تھیں لیکن فارم 47 کے بَل پردہ اسمبلی کی اکثریتی پارٹی بن گئی اور وفاق میں اقتدار اسے مل گیا۔ یہی معاملہ پنجاب کی صوبائی اسمبلی میں بھی پیش آیا۔ مسلم لیگ (ن) نے یہاں بھی فارم 47 کے طفیل اکثریت حاصل کرلی اور مریم نواز ہار کر بھی صوبے کی وزیراعلیٰ بن گئیں۔ سندھ کو سمجھوتے کے تحت پیپلز پارٹی کے سپرد کردیا گیا، بلوچستان میں بھی ملا جلا معاملہ رہا۔ البتہ پختون خوا میں فارم 47 کا جادو نہ چل سکا۔ عوام نے جسے ووٹ دیا وہی کامیاب قرار پایا۔ اسی طرح پی ٹی آئی نے پختون خوا اسمبلی میں اپنی اکثریت برقرار رکھی اور حکومت بھی اس کی قائم رہی۔ واضح رہے کہ 8 فروری 2024ء کے انتخابات سے پہلے بھی خیبر پختون خوا میں پی ٹی آئی کی حکومت تھی۔ بانی پی ٹی آئی عمران خان تو جیل میں تھے لیکن اس کے باوجود پی ٹی آئی نے خیبر پختون خوا میں معرکہ سر کرلیا۔ نئی حکومت علی امین گنڈا پور کی قیادت میں تشکیل دی گئی لیکن اسٹیبلشمنٹ نے ان سے معاملات طے کرلیے اور گنڈا پور وکٹ کے دونوں طرف کھیلنے لگے۔ جب پانی سر سے اونچا ہوگیا اور عمران خان نے محسوس کیا کہ اب گنڈاپور کو تبدیل کیے بغیر کوئی چارہ نہیں ہے تو انہوں نے گنڈا پور سے استعفا طلب کرلیا۔
ڈی جی آئی ایس پی آر اپنی پریس کانفرنسوں میں بالعموم یہ بات شدت سے باور کراتے ہیں کہ فوج کا سیاست سے کوئی تعلق نہیں ہے اگر کوئی صحافی کوئی سیاسی سوال کر بیٹھے تو وہ ’’نو پالیٹکس‘‘ کہہ کر اس کا جواب دینے سے انکار کردیتے ہیں لیکن جب خیبر پختون خوا میں گنڈاپور کے استعفے کے بعد نئی حکومت کی تشکیل کا مرحلہ آیا تو ڈی جی آئی ایس پی آر فوراً پشاور پہنچے اور وہاں ایک عدد پریس کانفرنس سے خطاب کرتے ہوئے فرمایا کہ ’’خیبر پختون خوا میں کوئی مخالف حکومت برداشت نہیں کی جائے گی‘‘۔ شاید یہ بھی فوج کو سیات سے دور رکھنے کی قابل تحسین کاوش تھی۔ الیکشن کمیشن تو ہمیشہ مقتدرہ کے اشارے کا منتظر رہتا ہے۔ اشارہ ملتے ہی اس نے خیبر پختون خوا اسمبلی میں ارکان پی ٹی آئی سے ان کی سیاسی شناخت چھین کر انہیں آزاد ارکان قرار دے دیا۔ اس طرح انہیں ووٹوں کی خریدو فروخت کی منڈی میں زبردستی دھکیل دیا گیا اور حکومت کا دھندا کرنے والوں کو دعوت دی گئی کہ منڈی میں مال موجود ہے جو چاہے خریدے۔ اِدھر مولانا فضل الرحمن بھی خیبر پختون خوا میں وزارتِ علیہ کے اُمیدوار تھے اور اپنے بھائی کو وزیراعلیٰ بنانا چاہتے تھے ان کی خواہش تھی کہ اسٹیبلشمنٹ انہیں بیس ووٹ خرید کر دے دے تا کہ وہ اپنی حکومت بناسکیں۔ اسٹیبلشمنٹ کے ساتھ اگرچہ ان کے تعلقات ہمیشہ اُتار چڑھائو کا شکار رہتے ہیں لیکن آخری مرحلے میں ہمیشہ اسٹیبلشمنٹ ہی جیتتی ہے اور مولانا فضل الرحمن ہمیشہ پانی بھرتے نظر آتے ہیں۔ یہ اسٹیبلشمنٹ کے لیے نہایت اچھا موقع تھا وہ مولانا فضل الرحمن کو بیس ووٹ دے کر اپنا ممنونِ احسان بنا سکتی تھی۔ اگر پنجاب ہوتا تو اسٹیبلشمنٹ کے لیے بیس کیا سو پچاس ووٹ بھی حاصل کرنا دشوار نہ تھا لیکن خیبر پختون خوا کا معاملہ مختلف ہے یہاں جو ووٹ خریدتا اس کی جان کے لالے پڑجاتے اس لیے ووٹوں کی خریدو فروخت کی کوشش ناکام رہی اور بانی پی ٹی آئی عمران خان کے نامزد امیدوار سہیل آفریدی کثرت رائے سے پختون خوا کے وزیراعلیٰ بن گئے۔ شکر ہے ڈی جی آئی ایس پی آر نے اس موقع پر کوئی پریس کانفرنس نہیں کی۔
اب سنا ہے کہ نومنتخب وزیراعلیٰ سہیل آفریدی کے خلاف الیکشن کمیشن میں نااہلی کی درخواست دائر کردی گئی ہے الیکشن کمیشن بہت ڈھیٹ ہے ممکن ہے کہ وہ یہ درخواست منظور کرلے اور سہیل آفریدی کو نااہل قرار دے دیا جائے لیکن اس سے کیا فرق پڑتا ہے۔ اسمبلی میں تو پی ٹی آئی کی اکثریت برقرار ہے وہ نیا وزیراعلیٰ لے آئے گی۔ اسے کہتے ہیں ’’چائے کی پیالی میں طوفان‘‘ برپا کرنا۔ لیکن اس کا اسٹیبلشمنٹ سے کوئی تعلق نہیں، فوج کے لیے سیاست شجر ممنوع ہے۔ اس کا ثبوت یہ ہے کہ کورکمانڈر پشاور نے نومنتخب وزیراعلیٰ سے وزیراعلیٰ ہائوس میں ملاقات کرکے انہیں اپنی وفاداری کا یقین دلایا ہے۔ نئے وزیراعلیٰ بڑے دبنگ فیصلے کررہے ہیں، انہوں نے عمران خان سے ملاقات کی درخواست دی تھی عدالت نے بھی ان کے حق میں فیصلہ دے دیا تھا چونکہ اسٹیبلشمنٹ کا سیاست سے کوئی تعلق نہیں اور یہ سیاسی معاملہ تھا اس لیے وزیراعلیٰ کی اپنے قائد سے ملاقات نہیں کرائی گئی حالانکہ اسے ملاقات میں کوئی حرج نہ تھا جس کمرے میں ملاقات کرائی جاتی اس میں کیمرے لگے ہوئے ہیں اور آواز ریکارڈ کرنے والے آلات نصب ہیں پھر ڈر کس بات کا تھا۔ یہ بھی چائے کی پیالی میں طوفان برپا کرنے کی کوشش کے سوا اور کچھ نہ تھا۔ حکومت ہو، اسٹیبلشمنٹ ہو یا مخالف سیاستدان سب اس کام میں بہت ماہر ہیں۔
دوسری شادی سے اپنے شوہر کو کیوں روکا، نکاح کی خواہش مند خاتون کا ساتھیوں کے ہمراہ پہلی بیوی پر تشدد