ریلوے کی پٹڑی ترقی کی طرف موڑ دی گئی ہے، شہباز شریف
اشاعت کی تاریخ: 4th, June 2025 GMT
وزیراعظم محمد شہباز شریف نے کہا ہے کہ ریلوے کسی بھی ملک کی معیشت میں ریڑھ کی ہڈی کی حیثیت رکھتا ہے، پاکستان میں معاشی و صنعتی ترقی کے لیے ریلوے انفراسٹرکچر کی پائیدار بنیادوں پر تعمیر نو ضروری ہے۔ انہوں نے کہا کہ علاقائی تجارت اور ہمسایہ ممالک سے روابط بڑھانے کے لیے ریلوے کا جدید خطوط پر استوار ہونا قومی پالیسی کا اہم جزو ہے۔
وزیراعظم کی زیر صدارت پاکستان ریلویز سے متعلق اعلیٰ سطح اجلاس وزیراعظم ہاؤس میں منعقد ہوا، جس میں ریلوے نظام کی بحالی، سرمایہ کاری، ڈیجیٹل اصلاحات، اور بین الاقوامی روابط کو فروغ دینے کے امور زیر غور آئے۔
وزیراعظم نے وسطی ایشیائی ممالک سے تجارتی روابط کو وسعت دینے کے لیے ریلوے نیٹ ورک میں توسیع کی حکمت عملی مرتب کرنے کی ہدایت دی۔ انہوں نے گوادر کو پاکستان ریلویز کے نیٹ ورک سے جلد از جلد منسلک کرنے کا کام تیز کرنے کا حکم بھی دیا۔
وفاقی وزیر ریلوے حنیف عباسی نے پاکستان ریلویز میں جاری اصلاحات سے متعلق بریفنگ دی اور بتایا کہ محکمہ ریلوے میں سرمایہ کاری کی وسیع گنجائش موجود ہے۔ لاہور، راولپنڈی، اور ملتان کے ریلوے اسٹیشنز پر صفائی کا نظام آؤٹ سورس کیا گیا ہے جبکہ جدید انفارمیشن ڈیسک بھی قائم کیے جا رہے ہیں۔
مزید پڑھیں: پاکستان ریلویز مزید 7 ٹرینیں نجی شعبے کو آؤٹ سورس کرے گا
بریفنگ میں بتایا گیا کہ خوراک کے معیار کی نگرانی کے لیے صوبائی فوڈ اتھارٹیز سے اشتراک جاری ہے۔ بند کی گئی کئی سروسز بحال کی گئی ہیں جن میں بولان میل، خوشحال خان خٹک ایکسپریس اور ڈیرہ غازی خان ایکسپریس شامل ہیں۔
ریلوے کی سکھر، خانیوال، اور کوہاٹ میں واقع کنکریٹ سلیپر فیکٹریاں آؤٹ سورس کی جا رہی ہیں جبکہ کراچی، لاہور، کوئٹہ، پشاور، ملتان اور سکھر کے ریلوے اسپتال، اسکول، کالج، اور ریسٹ ہاؤسز کو ریونیو شیئرنگ کی بنیاد پر نجی شعبے کے حوالے کیا جائے گا۔
رائل پام گالف اینڈ کنٹری کلب لاہور کو نیلام کیا جا رہا ہے جہاں فائیو اسٹار ہوٹل قائم کرنے کی صلاحیت موجود ہے۔ ریلوے نظام میں ڈیجیٹائزیشن کا عمل تیزی سے جاری ہے، جس میں آئی ٹی ڈائریکٹوریٹ کی ری اسٹرکچرنگ، موبائل ایپ کی اپ گریڈیشن، اور مفت وائی فائی کی فراہمی شامل ہے۔
بریفنگ کے مطابق 155 ریلوے اسٹیشنز کو شمسی توانائی پر منتقل کیا جا رہا ہے، جس سے حکومت کو لاکھوں روپے کی بچت ہوگی۔ رائٹ سائزنگ پالیسی کے تحت 17101 آسامیاں ختم کی جا چکی ہیں جبکہ مزید 5695 آسامیاں بھی آئندہ ختم کی جائیں گی۔
مزید پڑھیں: عیدالفطر: پاکستان ریلویز کی جانب سے عید اسپیشل ٹرینیں چلائی جائیں گی
اجلاس کو بتایا گیا کہ حکومت پنجاب کے اشتراک سے لاہور سے راولپنڈی ہائی اسپیڈ ٹرین سروس، دونوں اسٹیشنز کی اپ گریڈیشن، اور پنجاب میں آٹھ برانچ لائنز پر سب اربن ٹرین سروسز کا منصوبہ زیر تکمیل ہے۔
مزید بتایا گیا کہ شاہدرہ باغ سے کوٹ لکھپت تک ریلوے لائن کے اطراف گرین بیلٹ بنائی جائے گی جبکہ مین لائنز کے ساتھ ساتھ محکمہ جنگلات کے تعاون سے پھل دار درخت لگائے جائیں گے۔
بلوچستان میں سریاب-کچلاک اور کوئٹہ-چمن ریلوے لائن سیکشنز کی اپ گریڈیشن کا منصوبہ بھی حکومت بلوچستان کے اشتراک سے شروع کیا جا رہا ہے۔
وزیراعظم نے پاکستان ریلویز میں جاری اصلاحات اور منصوبوں کی رفتار پر وفاقی وزیر حنیف عباسی کی کاوشوں کو سراہا۔ اجلاس میں وزیراعظم کے مشیر ڈاکٹر توقیر شاہ، وزیر مملکت برائے ریلوے بلال اظہر کیانی، اور متعلقہ اعلیٰ سرکاری افسران شریک ہوئے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
پاکستان ریلویز پاکستان ریلوے وزیراعظم محمد شہباز شریف وفاقی وزیر ریلوے حنیف عباسی.ذریعہ: WE News
کلیدی لفظ: پاکستان ریلویز پاکستان ریلوے وزیراعظم محمد شہباز شریف وفاقی وزیر ریلوے حنیف عباسی پاکستان ریلویز کے لیے کیا جا
پڑھیں:
شہباز شریف کی ایرانی صدر سے ملاقات
وزیراعظم پاکستان شہباز شریف اور ایرانی صدر نے قطر کے ساتھ اپنی یکجہتی اور حمایت کا اظہار کیا جبکہ اسرائیلی جارحیت کے مقابلے میں امت مسلمہ کے اتحاد پر زور دیا۔ اسلام ٹائمز۔ وزیراعظم محمد شہباز شریف کی دوحہ میں ہنگامی عرب اسلامی سربراہی اجلاس کے موقع پر ایران کے صدر ڈاکٹر مسعود پزشکیان سے ملاقات ہوئی۔ اجلاس اسرائیل کے حالیہ قطر پر حملے کے بعد طلب کیا گیا تھا۔ اس موقع پر نائب وزیراعظم و وزیر خارجہ سینیٹر محمد اسحاق ڈار، چیف آف آرمی اسٹاف فیلڈ مارشل سید عاصم منیر، وزیر دفاع خواجہ محمد آصف اور وزیر اطلاعات و نشریات عطا اللہ تارڑ بھی موجود تھے۔ ملاقات کے دوران وزیراعظم نے 9 ستمبر کو قطر پر اسرائیلی جارحیت کی شدید ترین مذمت کی۔ وزیراعظم شہباز شریف اور ایرانی صدر نے قطر کے ساتھ اپنی یکجہتی اور حمایت کا اظہار کیا جبکہ اسرائیلی جارحیت کے مقابلے میں امت مسلمہ کے اتحاد پر زور دیا۔ اس موقع پر وزیراعظم کا کہنا تھا کہ دوحہ عرب اسلامی سربراہی اجلاس نے مسلم دنیا کی طرف سے ایک مضبوط اور یکجہتی پر مبنی پیغام دیا ہے کہ اسرائیل کی جارحیت اب مزید برداشت نہیں کی جا سکتی۔ وزیر اعظم شہباز شریف نے کہا کہ پاکستان ایران کے ساتھ باہمی دلچسپی کے تمام شعبوں میں تعلقات کو مزید فروغ دینا چاہتا ہے۔ انہوں نے ایران کے سپریم لیڈر آیت اللہ علی خامنہ ای کے لیے اپنی دلی عقیدت اور نیک خواہشات بھی پہنچائیں۔ صدر پزشکیان نے فلسطین کے مسئلے پر پاکستان کے مؤقف کو سراہا اور وزیراعظم کے ساتھ قریبی تعاون جاری رکھنے اور پاکستان ایران تعلقات کو مزید مستحکم بنانے کی خواہش ظاہر کی۔ دونوں رہنماؤں نے تیزی سے بدلتی ہوئی علاقائی صورتحال کے تناظر میں رابطے میں رہنے پر اتفاق کیا۔
ٹی 20 ورلڈ کپ 2026 کب کھیلا جائے گا؟ ممکنہ تاریخیں سامنے آگئیں