غریب عوام ایک وقت کی روٹی کے لیے ترس رہے ہیں، علامہ احمد اقبال رضوی
اشاعت کی تاریخ: 2nd, July 2025 GMT
ایم ڈبلیو ایم کے وائس چئیرمین کا ایک بیان میں کہنا تھا کہ حالیہ پٹرول اور ڈیزل کی قیمتوں میں بے رحمانہ اضافہ، اشیائے خوردونوش کی آسمان سے باتیں کرتی قیمتیں، اور مہنگائی کا طوفان اس بات کا ثبوت ہے کہ یہ نظام صرف اور صرف اشرافیہ کے تحفظ اور غریب عوام کی بربادی کے لیے قائم ہے۔ اسلام ٹائمز۔ وائس چیئرمین مجلس وحدت مسلمین پاکستان علامہ سید احمد اقبال رضوی نے میڈیا سیل سے جاری اپنے ایک بیان میں کہا ہے کہ پاکستان اس وقت اپنی تاریخ کے بدترین دور سے گزر رہا ہے۔ حالیہ پٹرول اور ڈیزل کی قیمتوں میں بے رحمانہ اضافہ، اشیائے خوردونوش کی آسمان سے باتیں کرتی قیمتیں، اور مہنگائی کا طوفان اس بات کا ثبوت ہے کہ یہ نظام صرف اور صرف اشرافیہ کے تحفظ اور غریب عوام کی بربادی کے لیے قائم ہے۔ غریب عوام ایک وقت کی روٹی کے لیے ترس رہے ہیں، فاقہ کشی اور خودکشیاں بڑھ چکی ہیں، کسان کچلا جا رہا ہے، اور متوسط طبقہ مسلسل زندہ درگور ہو رہا ہے۔ علاج معالجہ، تعلیم اور روزگار عام انسان کی پہنچ سے دور ہو چکے ہیں۔اشرافیہ کی مراعات، پروٹوکول، اور عیاشیوں میں کوئی کمی نہیں، قربانی ہمیشہ غریب کی ہوتی ہے۔
انہوں نے کہا کہ آئین، قانون اور عدلیہ عوام کے تحفظ کے بجائے اس کرپٹ اور مسلط ٹولے کے محافظ بنے ہوئے ہیں۔ یہ اقدامات ملک کی معیشت، سالمیت اور مستقبل پر کھلا حملہ ہیں، اور یہ نظام اب اس حد تک سڑ چکا ہے کہ اس کی اصلاح ممکن نہیں رہی۔ اب وقت آ گیا ہے کہ عوام اس ظالمانہ نظام، کرپٹ حکمران طبقے اور ان کے سہولت کاروں کو پہچانیں اور ان کے خلاف فیصلہ کن جدوجہد کا آغاز کریں۔ عوام پر یہ فرض ہے کہ وہ اس ظالمانہ، ناانصاف اور استحصالی ڈھانچے کو مسترد کر کے اپنے حق کے لیے کھڑے ہوں۔ تاریخ گواہ ہے کہ جب قومیں ظلم کے آگے خاموش ہو جائیں تو ان کا مقدر غلامی اور تباہی کے سوا کچھ نہیں ہوتا۔
ذریعہ: Islam Times
پڑھیں:
فلسطین پر صہیونیوں کا ناپاک قبضہ قابل قبول نہیں، علامہ شبیر حسن میثمی
اجتماع سے خطاب کرتے ہوئے رہنما ایس یو سی نے کہا کہ ہمارے حکمرانوں کی جانب سے 21 نکاتی غیر منصفانہ امن منصوبے کی حمایت بانی پاکستان حضرت قائد اعظم محمد علی جناح رح کے پاکستان کے لیے طے کردہ بنیادی اصولوں اور پاکستانی عوام کے جذبات و احسات اور خواہشات کے سراسر منافی ہے۔ اسلام ٹائمز۔ شیعہ علماء کونسل پاکستان کے مرکزی سیکرٹری جنرل علامہ شبیر حسن میثمی نے گلوبل صمود فلوٹیلا کے امدادی کاروان پر اسرائیلی فوج کے دہشتگردانہ حملے کی مذمت کرتے ہوئے کہا ہے کہ فلسطین امت مسلمہ کا قبلہ اول ہے جس پر صہیونیوں کے ناپاک اور ناجائز قبضے کو کبھی قبول نہیں کیا جائے گا، غزہ کی مظلوم فلسطینی عوام نے قبلہ اول کے تحفظ اور مسلم فلسطینی ریاست کی بقاء کے لیے جو قربانیاں دیں وہ تاریخ مقاومت و حق خوداردیت کی تحریکوں کا سنہری باب ہے اور یہ قربانیاں فلسطین کی بقاء میں کلیدی کردار ادا کرے گا۔ گلوبل صمود فلوٹیلا کے امدادی کاروان پر اسرائیلی حملے کے خلاف نماز جمعہ کے بعد قرآن سینٹر کے مقام پر ایک بڑے اجتماع سے خطاب کرتے ہوئے شیعہ علماء کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی کا کہنا تھا کہ حکمرانوں کی جانب سے کسی بھی دو ریاستی منصوبے کی حمایت دراصل مسلہ فلسطین اور غزہ کے مسلمانوں کے قربانیوں کو رائیگاں کرنے کے مترادف ہوگا۔
علامہ شبیر میثمی کا کہنا تھا کہ ایسے وقت میں کہ جب غزہ کی سرزمین تاریخی نسل کشی، بربریت اور قتل و غارت گری کے باعث قحط سالی سے دوچار ہے، دنیا بھر کے آزاد انسان اور حکومتی نمائندے اسرائیلی مظالم کے خلاف سراپا احتجاج ہیں، اہل مغرب غیر مسلم ہوتے ہوئے یورپ اور امریکہ کے گلی کوچوں سے لے کر مرکزی شاہراہوں پر غزہ کی مظلوم عوام کے حق میں آواز بلند کر رہے ہیں اور امریکہ اور اسرائیل پر دباؤ ڈال رہے ہیں، جنگ بندی کے مطالبات زور پکڑ رہے ہیں، ایسے وقت میں ہمارے حکمرانوں کی جانب سے 21 نکاتی غیر منصفانہ امن منصوبے کی حمایت بانی پاکستان حضرت قائد اعظم محمد علی جناح رح کے پاکستان کے لیے طے کردہ بنیادی اصولوں اور پاکستانی عوام کے جذبات و احسات اور خواہشات کے سراسر منافی ہے۔
افغانستان کی سرزمین کسی دوسرے ملک کیخلاف استعمال نہیں ہونے دی جائے گی، عبوری حکومت