خشکی میں گھرے ترقی پذیر ممالک کی تیسری کانفرنس کی تیاریاں مکمل
اشاعت کی تاریخ: 4th, August 2025 GMT
اسلام آباد (اُردو پوائنٹ ۔ UN اردو۔ 04 اگست 2025ء) خشکی میں گھرے ترقی پذیر ممالک کی تیسری کانفرنس (ایل ایل ڈی سی 3) 5 اگست سے ترکمانستان کے شہر آوازا میں شروع ہو رہی ہے جہاں صحرا بحیرہ کیپسین سے ملتا ہے۔
8 اگست تک جاری رہنے والی اس کانفرنس میں 200 سے زیادہ سربراہان مملکت اور بین الاقوامی اداروں، سول سوسائٹی اور نجی شعبے کے نمائندے، نوجوان اور ماہرین تعلیم سمیت 3,000 مندوبین دنیا کے ایسے ممالک میں ترقی کو فروغ دینے کے لیے اعلیٰ سطحی بات چیت کریں گے جو سمندر سے دوری کی وجہ سے تجارتی میدان میں بہت سے فوائد سے محروم رہتے ہیں۔
یو این نیوز آوازا سے اس کانفرنس کی تفصیلات سے براہ راست آگاہی دے گا۔
آج کانفرنس کی تقریب پرچم کشائی میں ترکمانستان کے وزیر خارجہ راشد میریدوو نے شرکا کو خوش آمدید کہتے ہوئے امید ظاہر کی کہ کانفرنس کامیاب رہے گی۔
(جاری ہے)
اس موقع پر اقوام متحدہ کی اعلیٰ سطحی نمائندہ رباب فاطمہ نے اس توقع کا اظہار کیا کہ کانفرنس سے رکن ممالک کے مابین شراکتوں کو مضبوط بنانے اور انہیں وسعت دینے میں مدد ملے گی۔
منگل کو کانفرنس کی افتتاحی تقریب میں اقوام متحدہ کے سیکرٹری جنرل انتونیو گوتیرش بھی شرکت کریں گے جو قازقستان کے دارالحکومت الماتے سے آ رہے ہیں جہاں انہوں نے وسطی ایشیا اور افغانستان کی پائیدار ترقی کے لیے قائم کردہ نئے مرکز میں خطاب کیا۔
اس موقع پر ان کا کہنا تھا کہ یہ مرکز وسطی ایشیا میں مشترکہ ترجیحات اور مسائل کے حل کی بنیاد پر تعاون کا نیا دور شروع ہونے کی علامت ہے۔
انہوں نے پیچیدہ اور باہم منسلک مسائل بشمول غربت کے خاتمے کی جانب پیش رفت میں جمود، بڑھتی ہوئی بھوک اور شدت اختیار کرتے موسمیاتی اثرات کے بارے میں خبردار کرتے ہوئے کہا کہ وسطی ایشیا کو پہلے ہی گلیشیئروں کے پگھلاؤ، سکڑتے آبی وسائل اور بڑھتی تجارتی رکاوٹوں کا سامنا ہے۔
سیکرٹری جنرل نے کہا کہ یہ مرکز جغرافیائی رکاوٹوں کو علاقائی تعاون کے ذریعے مواقع میں بدل کر خشکی میں گھرے ترقی پذیر ممالک کے لیے ترقی کے پروگراموں کو عملی جامہ پہنانے میں اہم پیشرو ثابت ہو سکتا ہے۔
آوازا ترکمانستان میں بحیرہ کیسپین کے ساحل پر سیاحتی علاقہ ہے جو ان دنوں ایک عالمی فورم میں تبدیل ہو چکا ہے۔ گزشتہ روز یہاں کھیلوں کے ایک بڑے مرکز میں کانفرنس کی تیاریوں کو حتمی شکل دی جاتی رہی۔
کانفرنس میں شریک ممالک نے متعدد نمائشوں کا انعقاد بھی کیا ہے جن میں نقل و حمل، توانائی اور مواصلات کے میدان میں ہونے والی پیش رفت کو اجاگر کیا جائے گا۔
قازقستان۔ترکمانستان۔ایران ریلوے اور ترکمانستان۔ افغانستان۔پاکستان۔ انڈیا گیس پائپ لائن ایسے نمایاں منصوبوں میں شامل ہیں۔دنیا میں 32 ممالک مکمل طور پر خشکی سے گھرے ہیں جن کی مجموعی آبادی 50 کروڑ سے زیادہ ہے۔ ان میں متعدد کا شمار کم ترین ترقی یافتہ ممالک میں ہوتا ہے جنہیں نقل و حمل کے بھاری اخراجات، منڈیوں تک محدود رسائی اور موسمیاتی تبدیلی کے بدترین اثرات جیسے مسائل کا سامنا ہے۔
ان رکاوٹوں کو عبور کرنے کے لیے مضبوط بنیادی ڈھانچہ اور بہتر ربط کی خاص اہمیت ہے جس سے تجارت اور ان ممالک کو عالمی منڈیوں سے جڑنے میں سہولت ملے گی۔ 'ایل ایل ڈی سی 3' کا مقصد مشمولہ اور پائیدار ترقی کی رفتار کو تیز کرنے کے لیے عالمگیر شراکتوں کو فروغ دینا ہے۔
.ذریعہ: UrduPoint
کلیدی لفظ: تلاش کیجئے کانفرنس کی کے لیے
پڑھیں:
بلدیاتی انتخابات، استحکام پاکستان پارٹی نے تیاریاں شروع کر دیں
استحکام پاکستان پارٹی کے صدر عبدالعلیم خان کی ہدایات کے مطابق پنجاب میں بلدیاتی انتخابات کی تیاریوں کی نگرانی مرکزی جنرل سیکرٹری میاں خالد محمود، رکن پنجاب اسمبلی شعیب صدیقی اور مرکزی سیکرٹری اطلاعات سید صمصام بخاری، صدر پنجاب رانا نذیر احمد خان کریں گے۔ اسلام ٹائمز۔ پنجاب میں بلدیاتی انتخابات کے حوالے سے استحکام پاکستان پارٹی نے تیاریاں شروع کر دی ہیں۔ مرکزی صدر عبدالعلیم خان نے بلدیاتی انتخابات کیلئے لاہور سمیت پنجاب کی قیادت کو ٹاسک سونپ دیئے ہیں۔ استحکام پاکستان پارٹی کے صدر عبدالعلیم خان کی ہدایات کے مطابق پنجاب میں بلدیاتی انتخابات کی تیاریوں کی نگرانی مرکزی جنرل سیکرٹری میاں خالد محمود، رکن پنجاب اسمبلی شعیب صدیقی اور مرکزی سیکرٹری اطلاعات سید صمصام بخاری، صدر پنجاب رانا نذیر احمد خان کریں گے۔
لاہور ڈویژن میں بلدیاتی انتخابات کی تیاریوں کی نگرانی آئی پی پی لاہور کے صدر ملک زمان نصیب کریں گے۔ ہدایات کے مطابق کے ہر ڈویژن کے مرکزی عہدیدار اپنے اپنے اضلاع کی نگرانی کریں گے، جبکہ لاہور سمیت پنجاب بھر کے عہدیدار بلدیاتی انتخابات کیلئے امیدواروں کی فہرستیں تیار کر کے پارٹی کی مرکزی قیادت کو پیش کریں گے، امیدواروں کا حتمی فیصلہ مرکزی قیادت کرے گی۔
عبدالعلیم خان اور دیگر مرکزی قائدین ڈویژنل اور ضلع کے عہدیداروں کی سفارش پر امیدواروں کا حتمی فیصلہ کریں گے۔ عبدالعلیم خان کی جانب سے جاری کردہ ہدایات میں کہا گیا ہے کہ ایسے امیدوار سامنے لائے جائیں جو ایماندار اور سیاسی اثر و رسوخ رکھتے ہوں، جبکہ ہر یونین کونسل میں سیاسی طور پر مضبوط شخصیات کو پارٹی میں فوری شامل کیا جائے اور تنظیم سازی کے عمل کو بھی تیز کیا جائے۔
ہم طالبان کو دوبارہ غاروں میں دھکیلنے کی صلاحیت رکھتے ہیں: وزیر دفاع خواجہ آصف