لاہور، دریائے راوی میں سیلابی صورتحال، ریسکیو 1122 ہائی الرٹ
اشاعت کی تاریخ: 29th, August 2025 GMT
لاہور:
دریائے راوی میں ممکنہ سیلابی صورتحال کے پیش نظر ریسکیو 1122 نے ہائی الرٹ جاری کر دیا ہے، جبکہ دریا سے متصل علاقوں میں ریسکیو آپریشن جاری ہے۔
ترجمان ریسکیو پنجاب، فاروق احمد کے مطابق متاثرہ علاقوں سے لوگوں کے انخلا اور انہیں محفوظ مقامات تک پہنچانے کے لیے ریسکیو اہلکار ہمہ وقت متحرک ہیں۔
ترجمان کے مطابق لاہور کے علاقے فرخا آباد میں سیلابی پانی داخل ہونے کے بعد 72 افراد کو بروقت انخلا کے ذریعے محفوظ مقام پر منتقل کیا گیا۔
مانگا منڈی سے بھی ریسکیو بوٹ کے ذریعے 40 افراد کو ریسکیو کیا گیا ہے جب کہ تھیم پارک کے قریب سے 7 افراد کو محفوظ مقام پر منتقل کیا گیا۔
علاوہ ازیں پارک ویو سٹی کے علاقے سے بھی 5 سے 6 افراد کے انخلا کی کال موصول ہوئی ہے جس پر ریسکیو ٹیمیں فوری حرکت میں آ چکی ہیں اور امدادی کارروائیاں جاری ہیں۔
ترجمان ریسکیو نے شہریوں سے اپیل کی ہے کہ وہ ایمرجنسی کی صورت میں فوری طور پر ریسکیو 1122 پر کال کریں اور اپنی مکمل لوکیشن شیئر کریں تاکہ بروقت مدد فراہم کی جا سکے۔
ریسکیو 1122 کی جانب سے دریا کے ساتھ ملحقہ علاقوں میں مسلسل گشت کیا جا رہا ہے اور ہر ممکن کوشش کی جا رہی ہے کہ کسی بھی جانی نقصان سے بچا جا سکے۔
ریسکیو اہلکاروں کو مکمل حفاظتی ساز و سامان کے ساتھ تعینات کیا گیا ہے اور ریسکیو بوٹس و دیگر سامان الرٹ حالت میں موجود ہے تاکہ کسی بھی ہنگامی صورتحال سے فوری نمٹا جا سکے۔
.ذریعہ: Express News
کلیدی لفظ: ریسکیو 1122 کیا گیا
پڑھیں:
وزیر دفاع سے برطانوی ہائی کمشنر کی ملاقات، دفاعی اور اسٹریٹجک امور میں تعاون پر تبادلہ خیال
اسلام آباد:وزیردفاع خواجہ آصف اور برطانوی ہائی کمشنر جین میریٹ ملاقات میں دو طرفہ تعلقات مزید گہرے کرنے، علاقائی سلامتی، دفاعی اور اسٹریٹجک امور میں جاری تعاون پر تبادلہ خیال کیا گیا ہے۔
وزارت دفاع سے جاری بیان کے مطابق وزیر دفاع خواجہ آصف سے پاکستان میں برطانیہ کی ہائی کمشنر جین میریٹ نے اسلام آباد میں ملاقات کی جہاں وزیر دفاع نے برطانوی ہائی کمشنر کا پرتپاک خیرمقدم کیا اور دونوں ممالک کے درمیان دوطرفہ تعلقات کو مزید گہرا کرنے کی پاکستان کی خواہش کا اظہار کیا۔
اعلامیے کے مطابق ملاقات میں دونوں رہنماؤں کو باہمی دلچسپی کے امور، علاقائی سلامتی، دفاعی اور اسٹریٹجک امور میں جاری تعاون پر تبادلہ خیال کا موقع ملا اور دونوں اطراف نے متعدد شعبوں میں تعاون مضبوط بنانے کے اپنے عزم کا اعادہ کیا۔
ملاقات کے دوران پاکستان انٹرنیشنل ایئرلائنز (پی آئی اے) کی برطانیہ کے لیے پروازوں میں اضافے کے ساتھ ساتھ دونوں ممالک کے درمیان فضائی رابطے بڑھانے کے لیے اضافی ایئرلائنز شامل کرنے کے معاملے پر بھی تبادلہ خیال کیا گیا۔
بیان میں کہا گیا کہ ملاقات کے آ خر میں تعمیری بات چیت جاری رکھنے اور پاکستان اور برطانیہ کے درمیان دیرینہ شراکت داری کو مزید مستحکم کرنے کے لیے مشترکہ مفاہمت ہوئی۔
سعودی عرب پاکستان کے لیے ایک ارب ڈالر کی آئل فیسیلٹی فراہم کرے گا