پاکستان کی نگاہیں فائنل میں سیٹ بک کرانے پر مرکوز
اشاعت کی تاریخ: 2nd, September 2025 GMT
پاکستان اور افغانستان کے درمیان ٹی 20 ٹرائنگولر سیریز کا اہم معرکہ آج شارجہ کرکٹ اسٹیڈیم میں کھیلا جائے گا۔
گرین شرٹس کی نگاہیں فائنل میں سیٹ بک کرانے پر مرکوز ہیں، شائقین کرکٹ ایک بار پھر سنسنی خیز اور یادگار مقابلہ دیکھنے کے منتظر ہیں، اب تک ناقابل شکست رہنے والی پاکستانی ٹیم فتوحات کا سلسلہ برقرار رکھنے کے لیے پرعزم ہے۔
ٹاپ آرڈر پر صائم ایوب ایک بار پھر توجہ کا مرکز ہوں گے، حسن نواز سے ہارڈ ہٹنگ کی توقع ہے، بولرز بھی ڈیتھ اوورز میں اپنی افادیت ثابت کرنے کی کوشش کریں گے۔
دوسری جانب افغان سائیڈ بھی گرین شرٹس کے ہوتھوں ابتدائی شکست کا داغ دھونے کی کوشش کریں گے، ان کا انحصار اپنے اسپن ہتھیاروں پر ہوگا۔
یواے ای میں جاری ٹی 20 ٹرائنگولر میں پاکستان نے اب تک کھیلے گئے اپنے دونوں میچوں میں کامیابی حاصل کی ہے، پہلے میچ میں افغانستان کو 39 رنز سے زیر کیا گیا جبکہ دوسرے میچ میں میزبان متحدہ عرب امارات کو 31 رنز سے مات دے کر پوائنٹس ٹیبل پر اپنی برتری مستحکم کر لی۔
اس شاندار کارکردگی نے ٹیم کے مورال کو بلند کر دیا اور کھلاڑی ایک بار پھر فتح کا پرچم بلند کرنے کے لیے پرجوش ہیں۔
دوسری جانب افغانستان نے ابتدائی میچ میں بیٹنگ لائن کی ناقص کارکردگی کے باعث شکست کھائی تاہم اس مقابلے میں کپتان راشد خان کی قیادت میں افغان کھلاڑی بھرپور واپسی کے عزم کے ساتھ میدان میں اتریں گے۔
افغان ٹیم کے لیے آج کا میچ کسی امتحان سے کم نہیں ہوگا، ابتدائی شکست نے ٹیم مینجمنٹ کو پریشان کر رکھا ہے اور اب تمام نگاہیں بیٹنگ میں بہتری پر مرکوز ہیں، رحمان اللہ گرباز، ابراہیم زدران اور محمد نبی جیسے کھلاڑیوں پر بڑی اننگز کھیلنے کی بھاری ذمہ داری ہوگی تاکہ ٹیم کو مقابلے میں واپس لایا جا سکے۔
افغان بولنگ لائن میں مجیب الرحمان، نوین الحق اور فضل الحق فاروقی جیسے بولرز پاکستان کے بیٹرز کے لیے چیلنج بن سکتے ہیں، کپتان راشد خان کی اسپن بولنگ بھی کسی بھی وقت میچ کا پانسہ پلٹنے کی صلاحیت رکھتی ہے۔
پاکستانی ٹیم کی قیادت بدستور سلمان علی آغا کریں گے دیگر کھلاڑیوں میں فخر زمان، حسن نواز، محمد حارث (وکٹ کیپر)، صاحبزادہ فرحان،صائم ایوب، فہیم اشرف، حسین طلعت، خوشدل شاہ، محمد نواز، ابرار احمد، حارث رئوف، حسن علی، محمد وسیم، سلمان مرزا، شاہین شاہ آفریدی اور صفیان مقیم شامل ہیں۔
افغانستان ٹیم کی قیادت راشد خان کے سپرد ہے جبکہ اسکواڈ میں درویش رسولی، ابراہیم زدران، محمد اسحاق، رحمان اللہ گرباز (وکٹ کیپر)، صدیق اللہ اتل، عظمت اللہ عمرزئی، گلبدین نائب، کریم جنت، محمد نبی، شرف الدین اشرف، فرید احمد، فضل الحق فاروقی، اے ایم غضنفر، مجیب الرحمن، نوین الحق اور نور احمد شامل ہیں۔
شارجہ کرکٹ اسٹیڈیم ہمیشہ سے پاکستان کرکٹ کے لیے یادگار میدان رہا ہے۔ یہاں قومی ٹیم نے اب تک 126 ون ڈے انٹرنیشنل کھیلے جن میں سے 83 میں کامیابی حاصل کی۔ اسی طرح 10 ٹی ٹوئنٹی میچز میں قومی ٹیم نے 7 میں کامیابی سمیٹی، 2 میں ناکامی ہوئی جبکہ ایک میچ برابر رہا۔
پاکستان اور افغانستان کے درمیان اب تک مجموعی طور پر 8 ٹی ٹوئنٹی کھیلے گئے ہیں جن میں پاکستان نے 5 میں کامیابی حاصل کی جبکہ 3 افغانستان کے حصے میں آئے۔ صرف شارجہ میں دونوں ٹیموں کے درمیان 6 مقابلے ہو چکے ہیں جہاں پاکستان نے 4 میں فتح حاصل کی اور 2 افغانستان نے جیتے، یہ ریکارڈ بھی آج کے میچ کی اہمیت اور دلچسپی کو بڑھا رہا ہے۔
افغانستان کے لیے یہ سیریز ایشیا کپ 2025 کی براہ راست تیاری ہے کیونکہ یہ ان کی چیمپئنز ٹرافی 2025 کے بعد پہلی وائٹ بال کرکٹ سیریز ہے۔ پاکستان کے لیے بھی یہ سیریز ایشیا کپ سے قبل کھلاڑیوں کی کارکردگی کو جانچنے کا بہترین موقع ہے۔
شارجہ میں پاکستان اور افغانستان کے درمیان ہونے والے میچز ہمیشہ جوش و خروش اور جذبات سے بھرپور رہے ہیں، شائقین کرکٹ ایک بار پھر پرجوش ہیں اور توقع کی جا رہی ہے کہ اس بار بھی میدان کھچا کھچ بھرا ہوگا، کرکٹ کے دیوانے اپنی پسندیدہ ٹیم کو سپورٹ کرنے کے لیے بے تاب ہیں اور دونوں ٹیموں کے کھلاڑی بھی اپنی صلاحیتوں کے بھرپور اظہار کے لیے پرعزم ہیں۔
.
ذریعہ
ذریعہ: Express News
کلیدی لفظ: افغانستان کے میں کامیابی ایک بار پھر کے درمیان حاصل کی کے لیے
پڑھیں:
پاکستان اور اٹلی کے درمیان سفارتی پاسپورٹ پر ویزے کی شرط ختم
روم: پاکستان اور اٹلی کے درمیان سفارتی پاسپورٹ پر ویزے کی شرط ختم کر دی گئی۔پاکستان کے سفیر علی جاوید اور اٹلی کی وزارتِ خارجہ کے سیکرٹری جنرل، عزت مآب سفیر ریکارڈو گوارِیلیا نے حال ہی میں ایک ایسے معاہدے پر دستخط کئے ہیں. جس کے تحت سفارتی پاسپورٹ رکھنے والے افراد کیلئے ویزا کی شرط ختم کر دی گئی ہے. معاہدے پر دستخط کی پُروقار تقریب اٹلی کی وزارتِ خارجہ میں روم میں منعقد ہوئی۔تقریب سے قبل دونوں اعلیٰ حکام کے درمیان ون آن ون ملاقات ہوئی. دونوں فریقوں نے پاکستان اور اٹلی کے درمیان تزویراتی تعاون کی مضبوطی، وسعت اور مسلسل ترقی پر اطمینان کا اظہار کیا۔اس موقع پر دونوں ممالک کے درمیان روایتی طور پر دوستانہ اور تعمیری دوطرفہ تعلقات کا جامع جائزہ لیا گیا، جبکہ اقوامِ متحدہ اور یورپی یونین سمیت مختلف بین الاقوامی فورمز پر جاری تعاون پر بھی تبادلۂ خیال کیا گیا۔دونوں جانب سے اس معاہدے کو باہمی اعتماد اور دوستی کی عکاسی قرار دیا گیا اور اسے موجودہ دوطرفہ تعاون کے نظام میں ایک اہم اضافہ قرار دیا گیا. معاہدے سے سفارتی وفود کے تبادلوں میں آسانی پیدا ہوگی اور دونوں ممالک کے درمیان روابط مزید مستحکم ہوں گے۔پاکستان اور اٹلی کے درمیان اس وقت متعدد نئے معاہدوں پر غور جاری ہے. اس کے علاوہ دونوں ممالک کی جامعات اور تحقیقی اداروں کے درمیان 21 مفاہمتی یادداشتیں (MoUs) موجود ہیں، جبکہ سیاحت، ثقافت، سائنس و ٹیکنالوجی، کھیل، اعلیٰ دفاعی مطالعات اور منشیات کی سمگلنگ کے خلاف تعاون سمیت مختلف شعبوں میں دونوں حکومتوں کے درمیان 15 معاہدے طے پا چکے ہیں۔دفاعی تعاون کا معاہدہ 2009 میں طے پایا، جبکہ 2013 میں دونوں ممالک کے وزرائے خارجہ کے درمیان سٹریٹجک انگیجمنٹ پلان قائم کیا گیا، اسی طرح مشترکہ اقتصادی کمیشن 2005 میں تشکیل دیا گیا، سرمایہ کاری کے تحفظ کا معاہدہ 1997 میں طے پایا، دوہری شہریت کا معاہدہ 1983 میں جبکہ حوالگیِ ملزمان (Extradition) کا معاہدہ 1972 میں دستخط کیا گیا تھا۔اس سے قبل 7 مئی 2025 کو اسلام آباد میں پاکستان اور اٹلی کے درمیان ’’لیبر موبیلٹی اینڈ مائیگریشن‘‘ کے موضوع پر ایک مفاہمتی یادداشت پر دستخط ہوئے تھے، جو کسی یورپی ملک کے ساتھ پاکستان کا پہلا باقاعدہ لیبر معاہدہ ہے، اس معاہدے کے تحت پاکستانی افرادی قوت کو اٹلی میں پاکستانی شہریوں کیلئے مختص 10,500 ملازمتوں کے کوٹے سے فائدہ اٹھانے کا موقع حاصل ہوگا۔پاکستانی سفیر نے سیکرٹری خارجہ کی جانب سے سیکرٹری جنرل کو ساتویں دورِ دوطرفہ سیاسی مشاورت میں شرکت کیلئے پاکستان کے دورے کی دعوت بھی دی، انہوں نے 2026 کی آخری سہ ماہی میں اس اجلاس کے انعقاد کیلئے پاکستان کی آمادگی سے آگاہ کیا اور اسلام آباد میں اٹلی کے نئے سفارت خانے کے افتتاح کی خواہش کا اظہار کیا، جو اٹلی کا بیرونِ ملک سب سے بڑا سفارتی مشن ہوگا. اس موقع پر دونوں ممالک کے درمیان تعلقات کی اہمیت کو بھی اجاگر کیا گیا۔
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ