سرمایہ کاری تجارت بڑھانے کیلئے منصوبوں پر کام کیا جائے وزیراعظم
اشاعت کی تاریخ: 23rd, September 2025 GMT
اسلام آباد+لندن (خبر نگار خصوصی +آئی این پی) وزیراعظم شہباز شریف نے کہا ہے کہ زراعت، آئی ٹی، معدنیات، ٹورزم اور قابل تجدید توانائی اہم شعبے ہیں جن میں بیرون ممالک سے سرمایہ کاری آ سکتی ہے، تمام اہم شعبوں میں سرمایہ کاری اور تجارت کو فروغ دینے کے لئے قابل عمل منصوبوں پر کام کیا جائے۔ وزیر اعظم کی زیر صدارت لندن سے زوم پر پاکستان میں سرمایہ کاری کے حجم، اقتصادی اور تجارتی سرگرمیوں کو بڑھانے کے لیے اعلیٰ سطح اجلاس ہوا۔ اجلاس سے خطاب کرتے ہوئے وزیراعظم کہا کہ زراعت، آئی ٹی، معدنیات، ٹورزم اور قابل تجدید توانائی اہم شعبے ہیں جن میں بیرون ممالک سے سرمایہ کاری آ سکتی ہے، سرمایہ کاری کے ساتھ تجارت کو بھی فروغ دینا ہماری پالیسی کا حصہ ہے، تاکہ برآمدات میں خاطر خواہ اضافہ ہو سکے۔ شہباز شریف نے کہا کہ وزارتوں کو ٹارگٹ دئیے ہیں اور تمام زیر تکمیل منصوبوں کو بروقت مکمل کرنے کے لئے تمام تر وسائل بروئے کار لانے کی ہدایت کی ہے۔ قابل عمل منصوبوں کی نشاندہی کر کے ان کو عملی شکل دینے کے لئے فوری اقدامات کئے جائیں۔ انہوں نے کہا کہ اس مقصد کے لئے مستقبل کو مد نظر رکھتے ہوئے ایک روڈ میپ اور تبدیلی کا ایجنڈا بنایا جائے تاکہ اپنے اہداف کی حصولی کے لئے ایک منظم انداز میں آگے بڑھا جا سکے۔ وزیراعظم نے کہا کہ اقتصادی سرگرمیوں کے روڈ میپ میں نجی شعبے کا کلیدی کردار ہو گا اور انکی شمولیت کو یقینی بنایا جائے گا۔ ہماری جاری معاشی اور اقتصادی اصلاحات کی پالیسی نے معیشت کو ایک نئی سمت دی ہے اور اس جدت اور شفافیت کی بدولت ملک ترقی کی راہ پر گامزن ہے۔ اجلاس میں وفاقی وزرا مصدق ملک، علی پرویز ملک، محمد جہانزیب، جام کمال، عطاء اللہ تارڑ اور احد خان چیمہ شریک تھے۔ جبکہ وزیراعظم شہبازشریف اقوام متحدہ کی جنرل اسمبلی کے 80 ویں اجلاس میں شرکت کے لئے لندن سے نیویارک پہنچ گئے۔ سرکاری میڈیا کے مطابق لندن کے لیوٹن ایئرپورٹ پر برطانیہ میں تعینات پاکستان کے ہائی کمشنر ڈاکٹر محمد فیصل اور سفارتی عملے نے وزیراعظم کو الوداع کہا۔ اسحاق ڈار جنرل اسمبلی اجلاس میں شرکت کے لئے نیویارک پہنچ گئے۔ اس اجلاس میں فلسطین اور غزہ کے مسائل ایجنڈے میں نمایاں رہیں گے۔ اجلاس شروع ہو گیا، 26 ستمبر کو ختم ہو گا۔ وزیراعظم نے سعودی عرب کے ساتھ دیرپا شراکت داری کو مزید مستحکم بنانے کے پاکستان کے عزم کا اعادہ کرتے ہوئے کہا ہے کہ پاکستان اور سعودی عرب کے مابین دین اسلام، تاریخ، بھائی چارے اور اعتماد کی بنیاد پر استوار تعلقات ہمیشہ قائم و دائم رہیں گے۔ وزیر اعظم آفس کے میڈیا ونگ کی طرف سے جاری بیان کے مطابق شہباز شریف نے سعودی عرب کے قومی دن کے موقع پر اپنے پیغام میں کہا کہ پاکستان کے عوام اور حکومت کی جانب سے وہ خادم الحرمین الشریفین شاہ سلمان بن عبدالعزیز آل سعود، ولی عہد و وزیراعظم شہزادہ محمد بن سلمان بن عبد العزیز آل سعود اور اپنے عزیز سعودی بھائیوں اور بہنوں کو سعودی عرب کے قومی دن کے موقع پر نہایت گرم جوشی کے ساتھ مبارکباد پیش کرتے ہیں۔ پاکستان اور سعودی عرب کے مابین تعلقات دین اسلام، تاریخ، بھائی چارے اور اعتماد کی بنیاد پر قائم ہیں جو ہمیشہ قائم و دائم رہیں گے۔ ہم اپنے سعودی بھائیوں اور بہنوں کے ساتھ مل کر سعودی عرب کے عظیم الشان ترقیاتی سفر پر فخر کرتے ہیں جو شہزادہ محمد بن سلمان کی بصیرت افروز قیادت میں جاری ہے۔ وزیر اعظم نے کہا کہ مئی 2025ء میں بھارت کے ساتھ کشیدگی کے دوران سعودی قیادت اور عوام کی طرف سے اظہار یکجہتی کو پاکستانی قوم ہمیشہ یاد رکھے گی۔ پاکستانی عوام سعودی عرب کے معاشی تعاون کو بھی فراموش نہیں کر سکتے جس کی وجہ سے ہماری معیشت کو سہارا ملا۔
.ذریعہ: Nawaiwaqt
کلیدی لفظ: سعودی عرب کے سرمایہ کاری اجلاس میں نے کہا کہ کے ساتھ کے لئے
پڑھیں:
پاکستان سرمایہ کاری کیلئے موزوں‘ حکومت نے بہت مراعات دی ہیں: گورنر
لاہور(کامرس رپورٹر )گورنر پنجاب سردار سلیم حیدر خان نے کہا ہے کہ پاکستان سرمایہ کاری کے لئے موزوں ترین ملک ہے۔ موجودہ حکومت نے ملک میں سرمایہ کاری کے فروغ کے لئے آسانیاں پیدا کیں ہیں اور بہت سی مراعات دی ہیں۔انہوں نے اس امر کا اظہار معروف کاروباری اور سماجی شخصیت رضوان فرید کو ویتنام کا اعزازی قونصل مقرر کئے جانے کی تقریب سے خطاب میں کیا ہے۔ تقریب میں پاکستان میں ویتنام کے سفیر فام انہ توام ،معروف بزنسمین قاضی ہمایوں فرید،لاہور چیمبر آف کامرس اینڈ انڈسٹری کے صدر میاں ابو ذر شاد،لا ہور چیمبر آف کامرس اینڈ انڈسٹری کے سابق صدر میاں مصباح الرحمان سمیت کاروباری برادی نے بڑی تعداد میں شرکت کی۔ سردار سلیم حیدر خان نے کہا کہ ویتنام نے حالیہ برسوں میں بہت اقتصادی ترقی کی ہے اور اس کی سالانہ ایکسپورٹ کا حجم 400 ارب ڈالر تک پہنچ گیا ہے، اس میں پاکستان کے لئے بھی مواقع ہونے چاہیئے۔انہوں نے ویتنام کے سرمایہ کاروں کو پاکستان کی جانب متوجہ کرنے کی ضرورت پر زور دیا، انہوں نے کہا کہ پاکستان کی حکومت نے سرمایہ کاری کے فروغ کیلئے بہت سی مراعات دی ہیں۔انہوں نے امید ظاہر کی کہ ویتنام اور پاکستان کے مابین ٹریڈ کے فروغ کے لئے رضوان فرید کا کردار پل کی حیثیت سے ہو گا۔انہوں نے توقع ظاہر کی کہ پاکستان اور ویتنام کے درمیان دوستانہ تعلقات نئی بلندیوں تک جائیں گے۔ ویتنام کے سفیر فام انہ توام نے کہا کہ ویتنام کے سفیر کے طور پر میں رضوان فرید کو لایور میں ویتنام کا اعزازی قونصل بننے پر دلی مبارک باد دیتا ہوں۔پاکستان اور ویتنام کے درمیان سالوں پر محیط دوستانہ تعلقات ہیں ہماری کمٹمنٹ ہے کہ ان تعلقات کو مزید مضبوط بنایا جائے۔ رضوان فرید لاہور کے ایک نامور کاروباری شخصیت ہیں بلکہ کینام کے قابل اعتبار دوست اور پارٹنر ہیں۔ان کی دونوں ملکوں کے مابین تعلقات کو فروغ دینے کی کاوشیں قابل تحسین ہیں اورمجھے یقین ہے کہ وہ ویتنام کے اعزازی قونصل کے طور پر دونوں ملکوں کے مابین دوستی ،تجارت اور کلچرل انڈر سٹینڈنگ کو فروغ دینے کے لئے پل کا کردار ادا کریں گے اور تجارت اور سرمایہ کاری کے فروغ کے لیے پاکستانی اور ویتنام کی بزنس کمیونٹی کو سہولتیں فراہم کریں گے۔ رضوان فرید نے کہا کہ ٹیکسٹائل ،زراعت ،فٹ وئیر سمیت دیگر سیکٹرز میں باہمی سرمایہ کاری کے بہت سے مواقع ہیں ویتنام کی ایکسپورٹ کا حجم 400 ارب ڈالر تک پہنچ گیا ہے میں دونوں ملکوں کے درمیان دوستانہ تعلقات اور تجارت کے فروغ کے لئے ہرممکن کوشش کروں گا۔
اسلام آباد: 26 نومبر احتجاج کیس میں 11 گرفتار ملزمان پر فردِ جرم عائد