360 سال پرانا معمہ حل، گرل ود دا پرل ایئررنگ میں دکھائی دینے والی لڑکی کون تھی؟
اشاعت کی تاریخ: 17th, October 2025 GMT
3 صدیوں سے زائد عرصے بعد مشہور ڈچ مصور یوہانس ورمیر کی شہرہ آفاق پینٹنگ ’گرل ود دا پرل ایئررنگ‘ میں موجود لڑکی کی شناخت سے متعلق معمہ حل ہونے کا دعویٰ سامنے آیا ہے۔
برطانوی آرٹ مورخ اینڈریو گراہم ڈکسن نے اپنی نئی کتاب ورمیر اے لائف لاسٹ اینڈ فاؤنڈ میں انکشاف کیا ہے کہ 1665 میں بنائی گئی اس پینٹنگ میں دکھائی دینے والی لڑکی دراصل ڈچ جوڑے پیٹر کلاززون وین رویفن اور ان کی اہلیہ ماریا ڈی کنائٹ کی بیٹی میگڈالینا تھی۔
گراہم ڈکسن کے مطابق ورمیر کے زیادہ تر فن پارے اسی جوڑے کے لیے بنائے گئے تھے جو نیدرلینڈز کے شہر ڈلفٹ میں مقیم اور ایک مذہبی اصلاحی فرقے ریمانسٹرنٹس سے وابستہ تھے۔ اس فرقے کے ماننے والے حضرت مریم مگدلینی کی پیروی کرتے تھے، اسی مناسبت سے پینٹنگ میں لڑکی کو مگدلینی کے روپ میں نیلے اور سنہری رنگ کے پگڑی نما اسکارف اور نمایاں موتی والی بالی کے ساتھ دکھایا گیا.
مورخ کے مطابق میگڈالینا اس وقت تقریباً 10 سے 12 برس کی عمر میں تھی اور اپنے والدین کی طرح کولیجیئنٹس فرقے سے وابستہ تھی۔ اس فرقے کے لوگ بلوغت میں مذہبی عہد کا اعلان کرتے تھے اور غالباً اسی موقع پر یہ فن پارہ تخلیق کیا گیا۔
دوسری جانب ماہرین فن کی ایک بڑی تعداد اس نئے دعوے سے اتفاق نہیں کرتی، آرٹ مصنفہ روتھ ملنگٹن کے مطابق یہ پینٹنگ کسی حقیقی کردار کی نہیں بلکہ ایک ٹرونی ہے، یعنی فرضی یا علامتی چہرہ۔ ان کے بقول اس پینٹنگ کا اصل حسن اس کی گتھی میں پوشیدہ ہے اور اسے کسی شناخت یافتہ لڑکی سے جوڑنا درست نہیں۔
ناول گرل ود دا پرل ایئررنگ کی مصنفہ ٹریسی چیویلیئر جن کے ناول پر 2003 میں اسکارلٹ جوہانسن کی فلم بنی کہتی ہیں کہ یہ تصویر اس لیے دل کو چھو جاتی ہے کیونکہ اس میں خاموشی اور راز پوشیدہ ہے۔ جیسے ہی آپ اس کے معنی جان لیں، وہ کشش ختم ہوجاتی ہے۔
یوں 360 سال بعد بھی یہ شاہکار فن پارہ اب بھی سوال چھوڑتا ہے، کیا موتی والی لڑکی واقعی میگڈالینا تھی یا صرف ورمیر کی تخلیقی سوچ کا ایک پراسرار روپ ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
ذریعہ: WE News
پڑھیں:
محبت میں دیوانی لڑکی نے اپنے عاشق کی لاش سے شادی کر کے سب کو حیران کر دیا
بھارتی ریاست مہاراشٹر کے ضلع ناندیڑ سے تعلق رکھنے والی ایک لڑکی نے اپنے عاشق کی لاش سے شادی کر کے سب کو حیران کر دیا۔
بھارتی میڈیا کے مطابق لڑکی جس کا نام انچل ہے اور اس کا مقتول عاشق سکشم تھا، دونوں گزشتہ تین سال سے ریلیشن میں تھےاور شادی کرنا چاہتے تھے لیکن انچل کے گھر والے اس رشتے کے خلاف تھے۔
بھارتی میڈیا کے مطابق محبت کرنے والے اس جوڑے کی زندگی اس وقت المناک موڑ پر پہنچی جب لڑکی کے گھر والوں نے رشتے کی مخالفت میں لڑکی کے عاشق کو بے دردی سے قتل کر دیا۔
عاشق قتل کیے جانے کے بعد انچل نامی لڑکی اپنے مقتول عاشق کے گھر پہنچی اور آخری رسومات سے کچھ دیر قبل اپنے ماتھے پر سندور لگا کر خود کو اس کی دلہن بنا لیا۔
رپورٹ کے مطابق لڑکی کے والد نے اپنے ایک ساتھی کے ہمراہ سکشم کے سر میں گولی مار کر قتل کیا جبکہ مقتول سکشم لڑکی کے بھائی کا دوست تھا اور حال ہی میں جیل سے رہا ہوا تھا۔
پولیس نے چند گھنٹوں میں ملزم اور اس کے ساتھی کو گرفتار کر لیا، پولیس کے مطابق ملزم اور سکشم دونوں کا مجرمانہ پس منظر ہے جبکہ قتل سے تقریباً دو گھنٹے پہلے لڑکی کی ماں جے شری مرنے والے کے گھر گئی تھی اور اسے دھمکیاں دی تھیں۔
انچل نے میڈیا کو بتایا کہ میں تین سال سے سکشم سے تعلق میں تھی اور میری فیملی اس رشتے کے خلاف تھی، اگرچہ سکشم اب اس دنیا میں نہیں رہا لیکن میں زندگی بھر اس کی بیوی رہوں گی۔
یہ واقعہ معاشرتی اور انسانی جذبے کی ایک انتہائی منفرد اور دردناک مثال ہے ایک عورت نے اپنے جذبۂ محبت کو معاشرتی دباؤ، خاندانی مخالفت اور عادی حقائق کی نفی کے باوجود ایسی صورت میں ثابت کیا جس نے تمام سماج کو جھنجوڑ کر رکھ دیا۔
ضمنی انتخابات میں ٹرن آؤٹ کتنا رہا؟ اعداد و شمار جاری