اسرائیلی حملوں کے بعد غزہ میں جنگ بندی بحال، امدادی سامان پر پابندی بھی ختم ہونے کا امکان
اشاعت کی تاریخ: 20th, October 2025 GMT
غزہ میں جاری نازک جنگ بندی اس وقت بڑے امتحان سے دوچار ہوگئی، جب اسرائیلی افواج نے یہ الزام لگاتے ہوئے فضائی حملوں کی نئی لہر شروع کردی کہ حماس کے جنگجوؤں نے 2 اسرائیلی فوجیوں کو ہلاک کردیا ہے۔ اس کے بعد ایک اسرائیلی سیکیورٹی اہلکار نے تصدیق کی کہ غزہ میں امدادی سامان کی ترسیل عارضی طور پر روک دی گئی ہے۔
عرب میڈیا کے مطابق بعد ازاں اسرائیلی فوج نے کہاکہ وہ دوبارہ جنگ بندی پر عملدرآمد کر رہی ہے، جب کہ مذکورہ اہلکار کے مطابق امدادی ترسیل پیر سے بحال کردی جائے گی۔
یہ بھی پڑھیں: اسرائیل کی جانب سے غزہ جنگ بندی معاہدے کی خلاف ورزی پر حماس کا ردعمل آگیا
امریکا کی تجویز کردہ اس جنگ بندی کو ایک ہفتے سے کچھ زیادہ عرصہ گزر چکا ہے، جس کا مقصد 2 سال سے جاری جنگ کا خاتمہ ہے۔ امریکی صدر ڈونلڈ ٹرمپ نے کہا کہ جنگ بندی برقرار ہے اور ہم چاہتے ہیں کہ یہ مکمل طور پر پُرامن ثابت ہو۔
ایئر فورس ون میں صحافیوں سے گفتگو کرتے ہوئے ٹرمپ نے کہاکہ حماس کچھ زیادہ ہی چُست و چالاک ثابت ہو رہی ہے، وہ کچھ فائرنگ کر رہے ہیں۔
انہوں نے اشارہ دیاکہ یہ کارروائیاں شاید تنظیم کے اندر موجود باغی عناصر کی جانب سے ہو رہی ہیں، نہ کہ اس کی قیادت کے احکامات پر ایسا ہو رہا ہے۔
ڈونلڈ ٹرمپ نے کہاکہ اس معاملے سے سخت مگر درست طریقے سے نمٹایا جائے گا۔ تاہم انہوں نے یہ نہیں بتایا کہ آیا وہ اسرائیلی حملوں کو جائز سمجھتے ہیں یا نہیں، صرف یہ کہاکہ یہ معاملہ زیرِ جائزہ ہے۔
امریکی نائب صدر جے ڈی وینس نے کہاکہ وہ آئندہ چند روز میں اسرائیل کا دورہ کر سکتے ہیں تاکہ جنگ بندی کی صورتحال کا قریب سے جائزہ لیا جا سکے۔
ادھر غزہ کے محکمہ صحت کے مطابق اسرائیلی حملوں میں کم از کم 36 فلسطینی شہید ہوئے، جن میں بچے بھی شامل ہیں۔ اسرائیلی فوج نے کہاکہ اس نے اپنے فوجیوں پر فائرنگ کے بعد حماس کے درجنوں ٹھکانوں کو نشانہ بنایا۔
ایک مصری عہدیدار جو جنگ بندی مذاکرات میں شامل ہیں، نے بتایا کہ صورتحال کو قابو میں رکھنے کے لیے مسلسل رابطے کیے جا رہے ہیں۔
اسرائیلی وزیراعظم بنیامین نیتن یاہو نے فوج کو ہدایت دی ہے کہ وہ جنگ بندی کی کسی بھی خلاف ورزی پر سخت کارروائی کرے، تاہم انہوں نے دوبارہ جنگ شروع کرنے کی کوئی دھمکی نہیں دی۔
اسرائیلی فوج کے مطابق جنگجوؤں نے رفح کے ان علاقوں میں فائرنگ کی جو طے شدہ جنگ بندی لائن کے تحت اسرائیلی کنٹرول میں ہیں۔
دوسری جانب حماس نے اسرائیل پر متعدد بار جنگ بندی توڑنے کا الزام لگایا اور کہاکہ رفح میں باقی ماندہ یونٹس سے رابطہ کئی ماہ سے منقطع ہے، لہٰذا وہاں پیش آنے والے واقعات کی ذمہ داری ہم پر عائد نہیں ہوتی۔
فلسطینی عوام اس خوف میں مبتلا ہیں کہ اگر جنگ بندی ٹوٹ گئی تو بھوک اور تباہی سے دوچار یہ علاقہ ایک بار پھر مکمل جنگ کی لپیٹ میں آ جائےگا۔
یرغمالیوں کی باقیات کی شناختادھر حماس کی جانب سے حوالے کیے گئے مزید 2 یرغمالیوں کی لاشوں کی شناخت کرلی گئی ہے۔
دونوں افراد 7 اکتوبر 2023 کو حماس کے حملے میں مارے گئے تھے۔ گزشتہ ایک ہفتے میں حماس نے 12 یرغمالیوں کی لاشیں واپس کی ہیں۔
اسرائیل نے حماس پر دباؤ ڈالا ہے کہ وہ تمام 28 ہلاک شدہ یرغمالیوں کی باقیات واپس کرے، بصورتِ دیگر رفح کراسنگ تا حکمِ ثانی بند رہے گی۔
دوسری جانب اسرائیل نے 150 فلسطینیوں کی لاشیں غزہ کو واپس کی ہیں، جن میں 15 اتوار کو دی گئیں۔ غزہ کی وزارتِ صحت کے مطابق صرف 25 لاشوں کی شناخت ممکن ہو سکی ہے۔
جنگ بندی کا دوسرا مرحلہحماس کا ایک وفد جس کی قیادت خالد الحیہ کررہے ہیں، قاہرہ پہنچ چکا ہے تاکہ ثالثوں اور دیگر فلسطینی دھڑوں کے ساتھ جنگ بندی کے اگلے مراحل پر بات چیت کر سکے۔
یہ بھی پڑھیں: اسرائیل نے غزہ میں امداد کا داخلہ روک دیا، قابض فوجیوں پر حملے میں 2 اہلکار ہلاک
اگلے مرحلے میں حماس کا غیر مسلح کیا جانا، اسرائیلی فوج کا مزید علاقوں سے انخلا اور جنگ کے بعد غزہ کی حکمرانی کا نظام طے کرنا شامل ہے۔ امریکی منصوبے کے مطابق ایک بین الاقوامی حمایت یافتہ عبوری اتھارٹی کے قیام کی تجویز ہے۔
حماس کے ترجمان حازم قاسم نے کہاکہ تنظیم کسی نئی حکومت کا حصہ نہیں بننا چاہتی اور ایک ٹیکنوکریٹ انتظامیہ کے قیام کی حمایت کرتی ہے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
wenews اسرائیل اسرائیل حماس جنگ حماس غزہ جنگ بندی فلسطین وی نیوز.ذریعہ: WE News
کلیدی لفظ: اسرائیل اسرائیل حماس جنگ فلسطین وی نیوز اسرائیلی فوج یرغمالیوں کی کے مطابق نے کہاکہ حماس کے کے بعد
پڑھیں:
غزہ میں 42 فلسطینیوں کا خون بہانے کے بعد اسرائیل نے جنگ بندی معاہدہ بحال کر دیا
غزہ:اسرائیل نے بڑے فضائی حملے میں 42 فلسطینیوں کی شہادت کے بعد غزہ میں جنگ بندی کا معاہدہ دوبارہ بحال کر دیا گیا ہے۔
فلسطینی حکام نے عرب میڈیا کو جنگ بندی کی بحالی کی تصدیق کر دی ہے جبکہ معاہدے کی خلاف ورزیوں سے بچنے کے لیے ایک منظم طریقہ کار طے کرنے پر بات چیت جاری ہے۔
ذرائع کے مطابق جنگ بندی کی بحالی میں مصر، ترکی، قطر اور امریکا نے ثالثی کا کردار ادا کیا۔
اسرائیلی افواج کی جانب سے جنوبی غزہ پر شدید فضائی حملے کیے گئے جن میں 42 فلسطینی شہید ہوئے جبکہ مجموعی طور پر کل صبح سے اب تک 45 افراد جام شہادت نوش کر چکے ہیں۔
اسرائیلی فوج نے غزہ میں حماس کے مبینہ اہداف پر 120 راکٹ داغے، لیکن اس کارروائی میں عام شہریوں، بے گھر افراد کے خیموں اور نصیرات کیمپ کو بھی نشانہ بنایا گیا۔ خاص طور پر خان یونس کے شمال مغربی علاقے میں شہری آبادی کو شدید نقصان پہنچا۔
حماس نے اسرائیل کے ان دعووں کو سختی سے مسترد کیا ہے کہ حملے اس کے اہلکاروں کے خلاف کیے گئے اور کہا کہ اسرائیل دانستہ طور پر جنگ دوبارہ شروع کرنے کے لیے بہانے تراش رہا ہے۔
فلسطینی حکام کے مطابق 10 اکتوبر سے اب تک اسرائیلی حملوں میں غزہ میں شہید ہونے والوں کی تعداد 98 تک پہنچ چکی ہے، حالانکہ اس تاریخ کو جنگ بندی کا اعلان کیا گیا تھا۔
تازہ ترین اسرائیلی فضائی حملوں کے بعد قابض فوج نے اعلان کیا کہ اب غزہ میں دوبارہ جنگ بندی نافذ کر دی گئی ہے۔
آئی ایم ایف اور پاکستان کے درمیان سٹاف لیول معاہدہ طے پاگیا