عوام، پارلیمان کو اعتماد میں لئے بغیر ایک بھی فیصلہ نہیں مانیں گے: سہیل آفریدی
اشاعت کی تاریخ: 25th, October 2025 GMT
پشاور (نوائے وقت رپورٹ) وزیراعلیٰ خیبر پی کے سہیل آفریدی نے چار سدہ میں جلسہ سے خطاب کرتے ہوئے کہا ہے کہ جس دن وزیراعلیٰ کیلئے میرا نام آیا تو کہا گیا کہ ہمیں قبول نہیں۔ مجھے ان قبول نہ کرنے والوں کی فکر نہیں۔ ثابت ہوا کہ میں قبول ہوں۔ میرے خلاف پاکستان بھر میں پراپیگنڈا کیا گیا۔ مجھے دہشتگرد بنانے کی ناکام کوشش کی گئی۔ مجھے اپنے لیڈر سے عدالتی احکامات کے باوجود ملنے نہیں دیا گیا۔ میں نے عوام کی عدالت میں جانے اور اپنا مقدمہ ان کے سامنے رکھنے کا فیصلہ کیا۔ مجھے کہا گیا چار سدہ، خیبر، کرک نہ جاؤ، جان کو خطرہ ہے، مارے جاؤ گے۔ ہمیں اعتماد میں لئے بغیر بند کمروں کے فیصلے نہیں مانیں گے۔ مایوس نہ ہوں، ملک میں حقیقی آزادی، آئین و قانون کی بالادستی لائیں گے۔ ملک اور قوم پر ظلم و جبر کرنے والوں کو انصاف کے کٹہرے میں لاؤں گا۔ حکومت، عوام، پارلیمان کو اعتماد میں لیے بغیر کیا گیا ایک بھی فیصلہ نہیں مانیں گے۔
.ذریعہ: Nawaiwaqt
پڑھیں:
نئے وزیراعلیٰ سہیل آفریدی کا عوامی تحریک کا آغاز، چارسدہ میں کتنا بڑا جلسہ ہوگا؟
وزیراعلیٰ خیبر پختونخوا سہیل آفریدی نے عہدہ سنبھالنے کے بعد عوام کے پاس جانے اور عوامی تحریک شروع کرنے کا اعلان کیا تھا، جس کا باقاعدہ آغاز آج ضلع چارسدہ سے کیا جا رہا ہے۔
ضلع چارسدہ کے علاقے رجڑ میں تیاریاں مکمل کر لی گئی ہیں، جبکہ گزشتہ 2 دنوں سے ضلعی انتظامیہ اور ٹی ایم اے کی نگرانی میں انتظامات کیے جا رہے ہیں۔ وزیراعلیٰ کے روٹ پر صفائی بھی جاری ہے۔
وزیراعلیٰ ہاؤس کے مطابق، سہیل آفریدی آج دوپہر 3 بجے چارسدہ کا دورہ کریں گے اور عوامی اجتماع سے خطاب کریں گے۔
’وزیراعلیٰ کا دورہ سیاسی ہے‘چارسدہ کے رہائشی سہیل آفریدی کے دورے اور جلسے سے کافی امیدیں لگائے بیٹھے ہیں کہ شاید وہ ترقیاتی منصوبوں کا اعلان کریں گے۔ رجڑ کے رہائشی عدنان خان نے بتایا کہ جس گراؤنڈ میں جلسے کی تیاری ہو رہی ہے، اسی علاقے میں کئی برس سے صفائی نہیں ہوئی تھی اور جگہ جگہ گندگی کے ڈھیر لگے تھے۔
مزید پڑھیں: سہیل آفریدی خیبرپختونخوا کے نئے وزیراعلیٰ منتخب، سوشل میڈیا پر جتنے منہ اتنی باتیں
انہوں نے کہا کہ وزیراعلیٰ کا شکریہ، ان کے دورے کی وجہ سے کم از کم برسوں بعد ٹی ایم اے والوں کو دیکھا، صفائی ہوئی۔
عدنان کے مطابق، گزشتہ کئی دنوں سے علاقے میں سرکاری حکام کی آمد کا سلسلہ جاری ہے۔ موٹروے انٹرچینج اور غنی خان روڈ سے جلسہ گاہ تک صفائی کی جا رہی ہے، جس سے علاقے میں واضح بہتری آئی ہے۔
انہوں نے مزید کہا کہ ہمیں امید ہے کہ وزیراعلیٰ اس پسماندہ علاقے کے لیے ترقیاتی کاموں کا اعلان کریں گے۔ ایک پل کئی برس سے زیرِ تعمیر ہے، امید ہے وہ اس کا نوٹس لیں گے۔ دیکھتے ہیں کیا کرتے ہیں۔
علاقہ مکین ترقیاتی منصوبوں کے منتظر ہیں، تاہم تجزیہ کاروں کے مطابق وزیراعلیٰ کا یہ دورہ زیادہ تر سیاسی نوعیت کا ہے۔ سہیل آفریدی کا مقصد پارٹی ورکرز کو دوبارہ سرگرم کرنا ہے۔
مزید پڑھیں: سہیل آفریدی کو بانی پی ٹی آئی سے ملنے دیا جائے، کوئی قیامت نہیں آئے گی، گورنر پنجاب
سہیل آفریدی کے ہاتھ میں کچھ نہیں، صحافی عارف حیاتصحافی عارف حیات نے بتایا کہ سہیل آفریدی اور علی امین کے درمیان فاصلے بڑھ گئے تھے، جنہیں کم کرنے کی کوشش کی جا رہی ہے۔ فی الحال سہیل آفریدی کے ہاتھ میں کچھ نہیں ہے۔ کابینہ بھی نہیں بنی۔ وہ وعدے تو کرسکتے ہیں، لیکن عملی اعلانات کے لیے حالات سازگار نہیں۔
عارف کے مطابق، سہیل آفریدی نے عوام اور ورکرز کو متحرک کرنے کے لیے اس مہم کا آغاز کیا ہے۔ وہ کل (ہفتہ) کو اپنے آبائی علاقے باڑہ میں امن جرگے میں شرکت کریں گے، جبکہ اتوار کو کرک میں جلسے سے خطاب کریں گے، جہاں وہ آئندہ کے لائحہ عمل کا اعلان کریں گے۔
مزید پڑھیں: خیبر پختونخوا: سہیل آفریدی کابینہ کی فہرست تیار، کون کون شامل ہوگا؟
انہوں نے بتایا کہ آج کا جلسہ چارسدہ کی حد تک محدود ہوگا اور بہت بڑا اجتماع متوقع نہیں، تاہم اسے کامیاب بنانے کے لیے پشاور اور خیبر سے بھی ورکرز شرکت کریں گے۔
انہوں نے مزید کہا کہ سہیل آفریدی حکومت کے ساتھ ساتھ پارٹی امور کو بھی دیکھ رہے ہیں اور ورکرز کی محرومیوں اور مایوسی کو ختم کرنے کے لیے پورے صوبے کا دورہ کرنے کا ارادہ رکھتے ہیں۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
جلسہ چارسدہ عوامی تحریک کا آغاز، وزیراعلیٰ خیبر پختونخوا سہیل آفریدی
اداکارہ فجر شیخ رشتہ ازدواج میں منسلک ہو گئیں