اپنی اساس سے ہٹنے اور بدعہدی کی سزا
اشاعت کی تاریخ: 30th, January 2025 GMT
ہر پاکستانی کی طرح میں بھی پاکستان کے معاشی مسائل، معاشرتی اقدار کی پامالی اور سیاسی عدم استحکام کی وجہ سے پریشان ہو کر سوچتا رہتا ہوں کہ آخر کیوں قدرتی وسائل سے مالا مال پاکستان ان حالات سے دوچار ہوا؟ یہی سوال اپنے مرشد و مربی باباجان ڈاگئی باباجی رحمہ اللہ سے ہمیشہ پوچھتا رہتا تھا اور آج بھی اہل علم و نظر رجال اللہ سے پوچھتا رہتا ہوں۔
باباجانؒ سمیت تقریباً تمام کے جوابات کا خلاصہ ہے کہ "ہم بحیثیت قوم نظریہ پاکستان سے غداری اور اللہ رب العزت سے بدعہدی کے جرم کی سزا کاٹ رہے ہیں"۔ مگر یہاں داعی قرآن، مبلغ اسلام ڈاکٹر اسرار احمدؒ کے نقطۂ نظر پر بات مناسب ہوگی کیونکہ ان کا کہا سب کچھ ان کی زبانی ریکارڈیڈ ہے اس لیے مزید کسی سند کی ضرورت نہیں۔ ڈاکٹر اسرار احمدؒ کے انتقال کو 14 برس بیت چکے ہیں مگر وہ اپنی زندگی میں جتنے مقبول تھے وفات کے بعد اس میں کئی گنا اضافہ ہو چکا ہے۔ یہ قرآن کا اعجاز ہے کہ جو اس سے جڑجاتا ہے قرآن اسے زندگی کے علاوہ مرنے کے بعد بھی بلندیوں پر لے جاتاہے۔
سوشل میڈیا پر ڈاکٹر اسرار احمدؒ کے بیانات خصوصاً ان کی پیش گوئیوں پر مبنی کلپ سچ ثابت ہونے پر بہت تیزی سے وائرل ہورہے ہیں۔ گزشتہ دنوں ایسا ہی ایک کلپ میرے سامنے آیا جسے سن کر مجھے اس میں میرے مرشد و مربی باباجان حضرت ڈاگئی باباجیؒ، مفتی زر ولی خان صاحبؒ، شامنصور کے شیخ شمس الہادیؒ اور پیر ذوالفقار صاحب دامت برکاتہم کے نقطۂ نظر کی جھلک نظر آئی۔
اس 20 سال پرانے کلپ میں ڈاکٹر اسرار احمدؒ بتا رہے ہیں کہ " 4سال قبل کسی نے سوال کیا کہ کیا پاکستان کے خاتمے کی الٹی گنتی شروع ہوچکی ہے؟ جس پر میرا جواب تھا، ہاں الٹی گنتی شروع ہو چکی ہے اس کی ایک وجہ یہ ہے کہ پاکستان اپنے قیام کی بنیادی وجہ کھو چکا ہے، پاکستان کسی نسلیت، کسی لسانیت اور کسی قومیت کی بنیاد پر نہیں بنا تھا، یہ تو اسلام کے نام پر بنا تھا۔ تقسیم ہند تاریخ انسانی کی عظیم تقسیموں میں سے ایک تقسیم تھی۔
لاکھوں انسان مارے گئے تھے، کروڑوں انسانوں نے ہجرت کی ، اِدھر سے لوگ اْدھر گئے، اْدھر سے لوگ اِدھر آئے۔ یہ سب کچھ کس لیے تھا؟ صرف اسلام کے لیے۔ ظاہر ہے یہ ایک نظریاتی ریاست تھی لیکن یہاں وہ نظریہ آیا نہ اس کو تقویت دی گئی اور نہ اسے نافذ کیا گیا، درحقیقت پاکستان اپنی وجہ تخلیق کھو چکا ہے، اس اعتبار سے کئی سال پہلے یہ ملک ایک ناکام ریاست ثابت ہوچکا ہے۔ بس میں آپ کو یاد کرارہا ہوں کہ پاکستان کی وجہ تخلیق ختم ہوچکی ہے۔
دوسری بات یہ کہ ہم نے اللہ سے جو بدعہدی کی اس کی سزا ہمارے اوپر مسلط ہوچکی ہے۔ ایک معنوی سزا ہے، وہ فیزیکل نہیں ہے،نفاق ہمارے دلوں کے اندر پھیلا دیا گیا ہے، مسلمانان پاکستان دنیا کی منافق ترین قوم ہے۔ اللہ کا قاعدہ ہے جو اللہ نے قرآن کریم میں بیان فرما دیا کہ "جب کوئی قوم اللہ سے عہد کرتی ہے اور اس کے بعد وہ قوم وعدہ خلافی کرتی ہے تو ان کے دلوں میں اللہ تعالیٰ نفاق پیدا کر دیتا ہے"۔ ہمارے درمیان اس نفاق کی وجہ سے باہمی مخالفتیں ہوگئیں اب ہم قوم نہیں، قومیتوں میں بٹ چکے ہیں۔ وہ قوم جو مسلم لیگ کے جھنڈے تلے ایک تھی، اب وہ قوم کہاں ہے؟
اب اْنہیں ڈھْونڈ چراغِ رْخِ زیبا لے کر
قوم کا تو کہیں وجود ہی نہیں ہے، قومیتوں اور عصبیتوں میں تقسیم ہوچکی ہے۔ علاقائیت ہے، نسلیت ہے، لسانیت ہے مگر قومیت نہیں اس اعتبار سے یہ نفاق باہمی، نفاق کی ایک شکل ہے۔ نفاق کے بعد دوسرا نمبر اخلاقیات کا ہے جس کا جنازہ اس ملک میں نکل چکا ہے۔ یہ بھی اسی نفاق کا نتیجہ ہے، سب سے بڑی منافقت کی علامت ہمارا دستور ہے، کہنے کو سارا اسلام اس میں لکھا ہوا ہے مگرحقیقت میں زیرو ہے۔ تمام اسلامی شقیں غیر موثر ہیں۔ ان کے موثر ہونے کی کوئی شکل دکھائی نہیں دیتی۔
اس میں لکھا ہے کہ کوئی قانون قرآن و سنت سے متصادم نہیں بنے گا، مگر اسے بھی اسلامی نظریاتی کونسل سے منسلک کر دیا گیا، وہ اپنی سفارشات دیتی رہے گی، رپورٹوں کے انبار لگ گئے، الماریاں بھر گئیں، مگر کوئی ایک رپورٹ بھی آج تک پارلیمنٹ میں پیش نہیں ہوئی۔ کسی ایک رپورٹ کی بنیاد پر قانون سازی نہیں ہوئی۔ معنوی سزا بھی ہم بھگت رہے ہیں اور اللہ کے عذاب کی صورت میں فیزیکل عذاب بھی بھگت رہے ہیں، ایک عذاب 1971ء میں آیا تھا جب ملک دو لخت ہوگیا تھا۔ میں دس پندرہ سال سے جھنجھوڑ رہا ہوں کہ ہوش میں آؤ، تباہی و بربادی تمہارے دروازے پر کھڑی ہے"۔
بلاشبہ ڈاکٹر اسرار احمدؒ ہمیں مسلسل جھنجھوڑتے رہے مگر ہم آج تک غفلت کی نیند سے بیدار ہونے کے لیے تیار نہیں۔ 1971ء میں پاکستان دولخت ہونے کا سانحہ ہوا تو ہمیں ہوش کے ناخن لینے چاہیے تھے مگر ہم نے کوئی سبق نہیں سیکھا اور خواب خرگوش کے مزے لوٹتے رہے۔
پاکستان کا مطلب کیا "لا الہ الا اللہ" کے نعرے پر پورے ہندوستان کے مسلمان یک جان و یک آواز ہوکر مسلم لیگ کے جھنڈے تلے جمع ہو کر حصول آزادی کے لیے بیک وقت انگریز اور ہندوؤں سے ٹکرا گئے اور صرف سات سال کے عرصے میں کلمہ طیبہ کی برکت سے منزل مقصود پا گئے اور منزل مقصود کیوں نہ پاتے جب اسلام ان کی منزل، ان کی جان، ان کی پہچان، ان کی شناخت اور نصب العین تھا۔ "لاالہ الا اللہ" کا نعرہ ہی نظریہ پاکستان تھا۔
اسی پر پاکستان بنا اور قائم ہوا۔ مشرقی پاکستان اور مغربی پاکستان دو حصوں پر مشتمل ملک اسلام کے نام پر معرض وجود میں آیا، دونوں ملکوں کے درمیان ایک ہزار میل کا فاصلہ اور درمیان میں ازلی و ابدی دشمن بھارت تھا، مشرقی پاکستان اور مغربی پاکستان کے مسلمانوں کے زبان و مزاج، طرز زندگی اور تہذیب و ثقافت ایک دوسرے سے مختلف، کھانا اور پہناوا مختلف تھا، صرف کلمہ طیبہ وہ قدر مشترک تھی جس نے اس قدر تفریق کے باوجود دونوں خطوں کے رہنے والوں کو ایک لڑی میں پرو دیا اور انھوں نے مل کر پاکستان کے حصول کے لیے جدوجہد کی۔ کلمہ طیبہ کے نام پر ملک تو حاصل ہوگیا لیکن جس مقصد کے لیے ملک لیا گیا تھا اسے مکمل نظر انداز کیا گیا اس لیے درست کہا ڈاکٹر اسرار احمدؒ نے کہ جب پاکستان اپنے تخلیق کی وجہ کھو بیٹھا تو 1971ء میں ملک دولخت ہوگیا۔
آدھا ملک گنوانے کے باوجود ہم ہوش میں نہ آئے۔ ڈاکٹر اسراراحمدؒ کی تشخیص سوفیصد درست تھی، انھوں نے صرف تشخیص پر ہی اکتفا نہیں کیا تھا، علاج بھی بتایا تھا۔ ان کی ایک کتاب"استحکام پاکستان" کے نام سے 1992ء میں شایع ہوئی تھی، اس کتاب میں انھوں نے پاکستان کے مستقبل کے حوالے سے کہا تھا کہ "امتِ مسلمہ اور پاکستانی قوم کو قومِ یونسؑ کی طرح توبہ کرنے کی توفیق ہوجائے تو عذاب ٹل جائے گا"، لیکن انھوں نے اس کتاب میں ساتھ ہی یہ بھی کہا تھا کہ "یہ ایک مشکل بلکہ ایک ناممکن کام ہے۔
ہم نے بہت سارا وقت اللہ سے کیے وعدے سے روگردانی میں گزار دیا، اب ہمیں توبہ کرنی اور اللہ سے کیا گیا وعدہ پورا کرکے اس ناممکن کو ممکن بنانا ہوگا جس کا ڈاکٹر اسرار احمدؒ بتا کر چلے گئے۔ آج بھی کلمہ طیبہ اور نظریہ پاکستان کی طرف صدق دل سے رجوع پاکستان کی بقا، تحفظ، استحکام، سلامتی کا ضامن اور اس کے ازلی دشمنوں سے مقابلے کے لیے بہترین ہتھیار ہے۔ کیا ہوا، اگر دشمن تعداد میں زیادہ اور طاقتور ہے، دشمن اُس وقت بھی زیادہ طاقتور اور مسلمانوں کو مٹانے اور جھکانے کا عزم کیے ہوئے تھے۔
وہ نہیں چاہتے تھے کہ ہندوستان تقسیم اور پاکستان قائم ہو مگر اللہ رب العزت کے فضل اور کلمہ طیبہ کی برکت سے پاکستان معرض وجود میں آیا۔ جب پاکستان بنا تو اس وقت پورے ہندوستان میں صرف آٹھ کروڑ مسلمان تھے اور آج صرف پاکستان میں مسلمانوں کی تعداد 25کروڑ ہے مگر دشمن آج بھی چاہتا ہے کہ پاکستان دنیا کے نقشے سے مٹ جائے مگر اگر ہم نے توبہ و استغفار سے رب کو راضی کیا تو پاکستان کو مٹانے کے خواب دیکھنے والے خود مٹ جائیں گے اور پاکستان تاقیامت قائم و دائم رہے گا۔ انشاء اللہ۔ نظریہ پاکستان یعنی "لاالہ الا اللہ" کی طرف رجوع ہمیں کامیابیوں، کامرانیوں اور رفعتوں کی طرف لے جائے گا۔ اس کے علاوہ ہر راستہ تباہی و بربادی کا راستہ ہے۔
.ذریعہ: Express News
کلیدی لفظ: ڈاکٹر اسرار احمد نظریہ پاکستان پاکستان کے کلمہ طیبہ انھوں نے رہے ہیں اللہ سے کے لیے کی وجہ کے نام ہے مگر چکا ہے کے بعد
پڑھیں:
پی ٹی آئی کی احتجاجی تحریک غیر مؤثر ہے، ان کے پاس تیاری ہے نہ عوامی حمایت،رانا ثنا
وزیر اعظم کے مشیر برائے سیاسی امور رانا ثنا اللہ نے پی ٹی آئی سمیت تمام سیاسی جماعتوں کو دعوت دی ہے کہ وہ ملک کی ترقی و خوشحالی کے لیے ایک میز پر بیٹھیں، چارٹر آف اکانومی پر متفق ہوں۔
عید الاضحٰی کی نماز کی ادائیگی کے بعد میڈیا سے گفتگو کرتے ہوئے انہوں نے کہا کہ پاکستان معاشی استحکام اور ترقی کی راہ پر گامزن ہوچکا ہے تاہم اسے درپیش چیلنجز سے نکالنے کے لیے قومی یکجہتی، سیاسی اتفاق اور معاشی ایجنڈے پر ہم آہنگی وقت کی اہم ترین ضرورت ہے۔
انہوں نے کہا کہ پاکستان اس وقت معاشی بدحالی سے نکل کر معاشی استحکام کی طرف بڑھ رہا ہے جو ہمارے بزرگوں کا خواب تھا۔
انہوں نے کہا کہ قوم کی یکجہتی اور سیاسی قیادت کے دلیرانہ فیصلوں کے باعث پاکستان ایک مرتبہ پھر ترقی کی راہ پر گامزن ہے۔
انہوں نے بتایا کہ گزشتہ ماہ بھارت نے بلا جواز اور تکبر میں آ کر پاکستان پر حملہ کرنے کی کوشش کی مگر پاکستانی مسلح افواج نے عوام کی حمایت سے دشمن کو منہ توڑ جواب دیا اور اس کا غرور خاک میں ملا دیا۔
انہوں نے کہا کہ معرکہ حق کے نام سے جاری آپریشن بنیان مرصوص میں تاریخی کامیابی حاصل ہوئی اور پاکستان دنیا کے سامنے ایک مضبوط ایٹمی طاقت کے طور پر ابھرا۔
انہوں نے کہا کہ اس کامیابی پر فیلڈ مارشل سید عاصم منیر اور سپاہی تک سب مبارک باد کے مستحق ہیں۔
رانا ثناء اللہ نے کہا کہ وزیر اعظم شہباز شریف کی قیادت میں پاکستان نے معاشی ترقی کی راہ پر قدم رکھ دیا ہے۔
انہوں نے پاکستان تحریک انصاف (پی ٹی آئی) سمیت تمام سیاسی جماعتوں کو دعوت دی کہ وہ ملک کی ترقی و خوشحالی کے لیے ایک میز پر بیٹھیں اورچارٹر آف اکانومی پر متفق ہوں جیسا کہ 6 سے 10 مئی کے دوران پوری قوم نے اتفاق و یکجہتی کا مظاہرہ کیا تھا۔
انہوں نے واضح کیا کہ سیاست بعد کا کام ہے، سب سے پہلے معیشت کو سنوارنا ضروری ہے کیونکہ 24 کروڑ عوام مہنگائی اور افراط زر کے چیلنجز کا سامنا کر رہے ہیں۔
رانا ثناء اللہ نے اپوزیشن رہنماؤں سے اپیل کی کہ وہ وزیراعظم کی دعوت قبول کرتے ہوئے ایک غیر جانبدار الیکشن کمیشن کی تشکیل پر اتفاق کریں تاکہ آئندہ انتخابات شفاف ہوں اور کسی کو اعتراض نہ ہو۔
وزیر اعظم کے مشیر نے کہا کہ عالمی سطح پر پاکستان کو عزت و وقار حاصل ہوا ہے، وہ ممالک جو پہلے پاکستان سے روگردانی کرتے تھے، آج اس کی بات سننے پر مجبور ہیں۔
انہوں نے خبردار کیا کہ اگر ہم ذاتی اور گروہی مفادات میں الجھے رہے تو یہ قومی مفاد کے خلاف ہوگا۔ عوام کو چاہیے کہ وہ سیاسی جماعتوں پر دباؤ ڈالیں کہ وہ قومی مفادات کو ترجیح دیں۔
پی ٹی آئی کی احتجاجی تحریک پر تبصرہ کرتے ہوئے رانا ثناء اللہ نے کہا کہ ان کی تحریک غیر مؤثر ہے کیونکہ نہ ان کے پاس تیاری ہے اور نہ ہی انہیں عوامی حمایت حاصل ہے۔
انہوں نے کہا کہ عمران خان اگر اپنی رہائی کو ملک کی معاشی ترقی سے مشروط کریں گے تو یہ ملک کے ساتھ زیادتی ہوگی۔
ہندوستانی عزائم پر بات کرتے ہوئے ایک سوال کے جواب میں انہوں نے کہا کہ مودی حکومت آر ایس ایس کے شدت پسندانہ ایجنڈے پر عمل پیرا ہے اوروہ پاکستان اور مسلمانوں کی دشمن ہے۔
انہوں نے یقین دہانی کرائی کہ بھارت اب دوبارہ حملے کی جرات نہیں کرے گا، تاہم پاکستان میں دہشت گردی کے ذریعے عدم استحکام پیدا کرنے کی سازشیں جاری رہیں گی۔
انہوں نے کہا کہ فوج نے اپنا کام بخوبی انجام دیا ہے، اب سیاسی قیادت کی ذمہ داری ہے کہ وہ ملکی ترقی کے لیے متحد ہوجائیں۔
انہوں نے کہا کہ مسلم لیگ (ن) بلدیاتی انتخابات کو سنجیدگی سے لے رہی ہے اور نئے بلدیاتی ایکٹ کے بعد انتخابات میں بھرپور حصہ لے گی، انہوں نے کہا کہ بلدیاتی انتخابات جماعتی بنیادوں پر ہوں گے۔
رانا ثناء اللہ نے بتایا کہ پنجاب حکومت کسان کارڈ، مزدورکارڈ اور معذور کارڈ جیسے فلاحی منصوبوں پر کام کر رہی ہے تاکہ عام آدمی کی زندگی میں بہتری لائی جا سکے۔
انہوں نے کہا کہ مسلم لیگ (ن) کے دور میں ہی ایٹمی دھماکے سمیت بڑے قومی منصوبے مکمل ہوئے اوروزیر اعلیٰ پنجاب مریم نواز ایک نئی سوچ کے ساتھ عوامی خدمت کے لیے میدان میں ہیں۔
نواز شریف طبی معائنے کے لئے لندن روانہ، شام 6 بجے پہنچیں گے