بھارتی حملے کے بعد واہگہ بارڈر میں مشترکہ پریڈ، بھارتی اسٹیڈیم میں سناٹا
اشاعت کی تاریخ: 7th, May 2025 GMT
لاہور:
بھارت رات کے اندھیرے میں پاکستان پر حملہ کرنے کے بعد دن کی روشنی میں واہگہ بارڈر پر ہونے والی پریڈ سے بھاگ گیا اور اپنے شہریوں کو مشترکہ پریڈ دیکھنے کی اجازت نہیں دی، جس کے باعث بھارتی اسٹیڈیم میں سناٹا چھایا رہا۔
بھارت کو پاکستان رینجرز پنجاب نے واہگہ بارڈر پر ہونے والی جوش اور جذبوں کی جنگ میں بھی شکست سے دوچار کر دیا، پاکستان پر مشن سندور کے نام سے حملے کرنے والے بھارت کا اسٹیڈیم دن کی روشنی میں سونا نظر آیا جبکہ پاکستان رینجرز پنجاب کے شیر دل جوان اپنی سرحد پر سینہ تانے کھڑے رہے اور سرحدوں کی نگہبانی کا فریضہ ادا کررہے ہیں۔
گورنر سندھ کامران ٹیسوری بھی پاک فوج اور پاکستان رینجرز پنجاب کا حوصلہ بڑھانے کے لیے واہگہ بارڈر پہنچے اور انہوں نے پاکستان رینجرز پنجاب کے جوانوں کی شان دار پریڈ دیکھی۔
اس موقع پر گفتگو کرتے ہوئے گورنر سندھ کامران خان ٹیسوری نے بھارت کی جانب سے کی گئی جارحیت کی شدید مذمت کی اور کہا کہ پاکستانی افواج نے بروقت اور مؤثر جواب دے کر دشمن کو واضح پیغام دیا ہے۔
انہوں نے کہا کہ میں آج واہگہ بارڈر پر اپنے بہادر جوانوں کے ساتھ ان کے جذبے کو سلام پیش کرنے آیا ہوں، گزشتہ رات بھارت نے حملہ آور ہو کر ہماری سرحدوں پر نہیں بلکہ ہمارے معصوم شہریوں، مساجد اور بچوں کو نشانہ بنایا، ایک پانچ سالہ معصوم بچے کی شہادت نے دنیا کو بھارت کا اصل چہرہ دکھا دیا ہے۔
کامران ٹیسوری نے عالمی برادری، اقوام متحدہ اور سلامتی کونسل سے مطالبہ کیا کہ وہ بھارت کی طرف سے شہری آبادی پر حملے کا نوٹس لیں۔
ان کا کہنا تھا کہ "بھارت نے دعویٰ کیا کہ اس نے 9 مقامات پر میزائل داغے لیکن ان جگہوں پر نہ کوئی دہشت گرد تھا اور نہ ہی کوئی عسکری ہدف، صرف عام شہری بستیاں تھیں۔"
انہوں نے چیف آف آرمی اسٹاف جنرل حافظ عاصم منیر کو خراج تحسین پیش کیا کہ انہوں نے فوری کارروائی کرتے ہوئے بھارت کو منہ توڑ جواب دیا اور پاک فضائیہ کے ان پائلٹس کو سلام پیش کیا جنہوں نے بھارتی فضائیہ کے پانچ طیارے مار گرائے۔
گورنر نے کہا کہ واہگہ پر آج کی پریڈ کے موقع پر پاکستانی عوام کا جوش و خروش قابل دید تھا جبکہ بھارتی جانب خالی کرسیاں اس بات کا ثبوت تھیں کہ بھارتی عوام اپنی حکومت کی پالیسیوں سے نالاں ہے۔
انہوں نے بھارتی مسلمانوں، سکھوں اور دیگر اقلیتوں کو پیغام دیا کہ وہ نریندر مودی کے فسطائی نظریات سے ہوشیار رہیں، مودی، جو گجرات کا قصاب ہے، نے پاکستان میں مساجد کو نشانہ بنا کر کروڑوں بھارتی مسلمانوں کو ایک نئی سوچ پر مجبور کر دیا ہے۔
کامران ٹیسوری نے 7 مئی 2025 کو 1965 کی جنگ کے بعد دوسرا یادگار دن قرار دیتے ہوئے کہا کہ جیسے ہم نے 1965 میں دشمن کو شکست دی تھی، ویسے ہی اس بار بھی بھارت کو سبق سکھایا ہے۔
انہوں نے کہا کہ ہم نے پہلے چائے پلا کر واپس بھیجا تھا، اس بار اگر دوبارہ آئے تو چائے کے ساتھ کراچی کے پان بھی کھلا کر بھیجیں گے۔
گورنر سندھ نے کہا کہ وہ اپنی اہلیہ اور بیٹی کے ساتھ واہگہ بارڈر پر موجود ہیں تاکہ دنیا کو یہ پیغام دیا جا سکے کہ پاکستانی قوم اپنے فوجی جوانوں کے ساتھ چٹان کی طرح کھڑی ہے، ہمارا اصل سرمایہ ہمارا ایمان، ہمارے جذبے اور 'لا الہ الا اللہ محمد رسول اللہ' کا نعرہ ہے۔
.ذریعہ: Express News
کلیدی لفظ: پاکستان رینجرز پنجاب واہگہ بارڈر پر نے کہا کہ انہوں نے کے ساتھ
پڑھیں:
بھارتی حملے نے خطے میں امن و استحکام کو نقصان پہنچایا، وزیراعظم سے قطری ہم منصب کی گفتگو
اسلام آباد:وزیر اعظم محمد شہباز شریف کو قطر کے وزیر اعظم و وزیر برائے خارجہ امور عزت مآب محمد بن عبدالرحمٰن بن جاسم بن جابر الثانی کی ٹیلیفون کال موصول ہوئی۔
وزیر اعظم شہباز شریف نے اس مشکل وقت میں پاکستان کے ساتھ یکجہتی اور حمایت پر قطر کا شکریہ ادا کرتے ہوئے بھارت کی جانب سے پاکستان میں چھ مقامات پر میزائل حملوں کو بلا اشتعال کارروائی قرار دیتے ہوئے اس کی شدید مذمت کی۔
انہوں نے کہا کہ پاکستان کی خودمختاری اور علاقائی سالمیت پر بھارت نے بزدلانہ حملے کیا جس کے نتیجے میں بے گناہ 26 مرد، خواتین اور بچے شہید ہوئے اور چند مساجد کو نقصان پہنچا۔ انہوں نے کہا کہ بھارت کی اس جارحانہ کارروائی نے جنوبی ایشیاء میں امن و استحکام کو نقصان پہنچایا ہے۔
وزیراعظم نے کہا کہ جہاں پاکستان خطے میں امن کا خواہاں ہے، وہیں پاکستان اپنی خودمختاری اور علاقائی سالمیت کا پوری جانفشانی اور طاقت کے ساتھ دفاع کرے گا۔ وزیر اعظم نے کہا کہ پہلگام واقعے کے بعد، انہوں نے بھارت کے الزامات کی غیر جانبدار اور شفاف بین الاقوامی تحقیقات کی پیشکش کی تھی۔
انہوں نے کہا کہ ہمیں خوشی ہوتی اگر قطر اس کوشش میں شامل ہوتا تاہم، بھارت نے جارحیت کا خطرناک راستہ چنا جس سے اس کے غیر ذمہ دارانہ ریاستی رویے کا اظہار ہوتا ہے جس سے خطے میں امن اور امان کی صورتحال خراب ہوئی۔
قطر کے وزیراعظم نے قیمتی جانوں کے ضیاع پر اظہار افسوس کیا۔ انہوں نے جنوبی ایشیاء میں قیام امن کے لیے پاکستان کے عزم کو سراہتے ہوئے کہا کہ قطر خطے میں موجودہ کشیدگی کو کم کرنے کے لیے اپنا کردار ادا کرنا چاہتا ہے۔
بھارتی ماہرین نے بھی مودی سرکار کے پاکستان مخالف پروپیگنڈے کی قلعی کھول دی