کراچی کے دیہی علاقے، ترقی کے منتظر
اشاعت کی تاریخ: 19th, June 2025 GMT
کراچی، جو ملک کا معاشی حب ہے، اس کی چمکتی روشنیوں اور فلائی اوورزکے پیچھے ایک تاریک تصویر چھپی ہوئی ہے، وہ تصویر جسے ہم ’’ کراچی کے دیہی علاقے‘‘ کہتے ہیں۔ ان دیہی علاقوں میں شہرکی قدیم آبادی بس رہی ہے۔ ان قدیم آبادیوں میں مبارک ولیج، ریڑھی گوٹھ، ابراہیم حیدری، گابو پٹ، لعل بکھر،گڈاپ، منگھوپیر،گڈاپ، لٹھ بستی اور دیگر علاقے شامل ہیں۔
ان علاقوں میں رہنے والی آبادی کو آج بھی نلکے کے پانی، نکاسی آب اور صفائی ستھرائی جیسی بنیادی سہولیات میسر نہیں۔ اکثرگاؤں میں پانی کی ضروریات صرف واٹر ٹینکرز کے ذریعے پوری کی جاتی ہیں۔ زیادہ تر علاقوں میں بجلی اور ٹیلی فون کی سہولت بھی موجود نہیں، جب کہ سڑکوں کی حالت نہایت خراب ہے۔ کچھ ہی سڑکیں ہیں جو کارپٹڈ ہیں، باقی صرف کچی یا ٹوٹی پھوٹی ہیں۔ دیہی علاقوں کی اکثریتی آبادی سندھی اور بلوچی بولنے والے افراد پر مشتمل ہے، جو کچے پکے گھروں میں رہائش پذیر ہیں۔ اکثر لوگ زراعت سے منسلک ہیں، جب کہ ساحلی علاقوں میں ماہی گیری ذریعہ معاش ہے۔
تعلیم کی صورتحال بھی تشویشناک ہے، جہاں شرح خواندگی قومی اوسط سے کہیں کم ہے۔ اکثریتی لوگ یا تو محنت کش مزدور ہیں یا کسان۔ صحت کی سہولیات نہ ہونے کے باعث درجنوں خواتین اور بچے معمولی بیماریوں میں ہی جان کی بازی ہار جاتے ہیں۔ دیہی علاقوں میں موجود کئی ڈسپنسریاں بغیر عملے کے ہیں، جب کہ ان کے نام پر تنخواہیں باقاعدگی سے جاری کی جاتی ہیں۔ بخار،گٹھیا، ملیریا اور پیٹ کے امراض یہاں عام ہیں، جب کہ خوراک کی کمی اور غربت نے عوام کو مزید کمزور بنا دیا ہے۔ کراچی کے نواح میں واقع پسماندہ مگر خوبصورت ماہی گیر بستی مبارک ولیج طویل عرصے سے بنیادی سہولیات سے محروم ہے۔
ساحلِ سمندر سے قریب واقع اس گاؤں کے مکینوں کا گزر بسر مچھلی کے شکار پر ہے، مگر علاج و معالجہ جیسی بنیادی سہولت آج بھی ان کے لیے خواب بنی ہوئی ہے۔ مبارک ولیج میں ایک عالیشان میٹرنٹی ہوم کی عمارت تعمیرکی گئی تھی جسے سابق ناظم کراچی سید مصطفیٰ کمال کے دورِ نظامت میں مکمل کیا گیا۔ جدید طرزِ تعمیر سے آراستہ اس عمارت کو ماہی گیروں کی خواتین اور بچوں کی صحت کے لیے ایک انقلابی قدم تصورکیا جا رہا تھا، مگر افسوس کہ منصوبہ مکمل ہونے کے باوجود یہ اسپتال کبھی فعال نہ ہو سکا، جب مصطفیٰ کمال کی مدت ختم ہوئی تو یہ منصوبہ انتظامی توجہ سے محروم ہوگیا۔ عمارت اگرچہ مکمل ہے، لیکن اس میں نہ ڈاکٹرز تعینات ہیں اور نہ ہی میڈیکل اسٹاف موجود ہے۔
آلات، سہولیات اور بنیادی عملے کی عدم دستیابی کے سبب یہ میٹرنٹی ہوم برسوں سے بند پڑا ہے اور اس کے در و دیوار خاموشی سے سرکاری غفلت کا ماتم کررہے ہیں۔ ان معاملات پر رپورٹنگ کرنے والے صحافیوں کا کہنا ہے کہ یہ مسئلہ موجودہ میئرکراچی، بیرسٹر مرتضیٰ وہاب کے علم میں بھی لایا گیا ہے، مگر تاحال کوئی عملی اقدام دیکھنے میں نہیں آیا۔ صرف زبانی یقین دہانیاں کی گئی ہیں، جب کہ زمینی صورتحال جوں کی توں ہے۔
اس غفلت کا سب سے بڑا نقصان مبارک ولیج کے غریب ماہی گیر خاندانوں کو ہو رہا ہے، جنھیں معمولی بیماری یا زچگی کے دوران کراچی شہرکا طویل اور مہنگا سفر کرنا پڑتا ہے، اکثر خواتین بروقت طبی امداد نہ ملنے کی وجہ سے پیچیدگیوں کا شکار ہو جاتی ہیں اور کئی قیمتی جانیں ضایع ہو چکی ہیں۔ یہ صورتحال صرف صحت عامہ کا مسئلہ نہیں بلکہ گورننس کی ناکامی کا منہ بولتا ثبوت بھی ہے۔ جب ایک مکمل تیار سرکاری ادارہ برسوں سے بند پڑا ہو، تو اس کا مطلب یہ ہے کہ ترجیحات کا تعین عوامی ضرورت کے بجائے کسی اور بنیاد پرکیا جا رہا ہے۔
کراچی، پاکستان کا سب سے بڑا اور معاشی مرکز کہلانے والا شہر، ایک طویل عرصے سے شہری اور دیہی تقسیم کا شکار رہا ہے۔ 2023 میں ایک بڑی انتظامی تبدیلی کے تحت کراچی میونسپل کارپوریشن (KMC) اور ڈسٹرکٹ کونسل کراچی کو ضم کردیا گیا، جس کا بنیادی مقصد یہ بتایا گیا کہ دیہی اور شہری علاقوں کے درمیان ترقیاتی تفاوت کو ختم کیا جائے۔ اس انضمام کے نتیجے میں تقریباً 25 یونین کونسلز، جو پہلے ڈسٹرکٹ کونسل کا حصہ تھیں، اب کے ایم سی میں شامل کردی گئیں۔ اس اقدام کو اُس وقت ایک ’’ انقلابی فیصلہ‘‘ قرار دیا گیا، جس سے توقع تھی کہ کراچی کے مضافاتی اور دیہی علاقوں کو بھی شہری سہولیات اور ترقیاتی بجٹ کا حصہ بنایا جائے گا۔
تاہم، منتخب عوامی نمایندوں اور مقامی باسیوں کا کہنا ہے کہ یہ فیصلہ محض کاغذی کارروائی تک محدود رہا۔ سندھ حکومت ہو یا کے ایم سی، کسی نے بھی ان علاقوں کی ترقی کے لیے کوئی جامع منصوبہ بندی یا ترقیاتی پیکیج کا اعلان نہیں کیا۔ ہر سال بجٹ آتے اور گزرتے رہے، مگر کراچی کے دیہی علاقے، جنھیں انتظامی طور پر ’’ شہری دائرہ کار‘‘ میں لایا گیا تھا، آج بھی پسماندگی کا شکار ہیں۔ نہ سڑکیں تعمیر ہوئیں، نہ نکاسی آب کا نظام بہتر ہوا، نہ اسپتالوں یا اسکولوں کی حالت بدلی۔ اس صورتِ حال نے مقامی آبادی میں شدید مایوسی کو جنم دیا ہے۔ مقامی لوگوں نے سندھ حکومت اور کے ایم سی پر کڑی تنقید کرتے ہوئے کہا ہے کہ ہر بجٹ میں ہمیں مکمل طور پر نظر اندازکیا جاتا ہے۔ دیہی علاقوں کو صرف مردم شماری اور ووٹ کے وقت یاد رکھا جاتا ہے، مگر جب ترقیاتی فنڈزکی بات ہو تو ہمیں شہری کراچی کا حصہ ماننے سے انکارکردیا جاتا ہے۔
یہ بات قابلِ غور ہے کہ اگر ان علاقوں کو کے ایم سی کا حصہ بنایا گیا ہے تو انھیں برابر کی ترقیاتی ترجیحات دینا حکومت کی آئینی و اخلاقی ذمے داری ہے، مگر اب تک کی صورتحال یہ ہے کہ نہ تو کے ایم سی کی سطح پر کوئی ترقیاتی اسکیم ان علاقوں میں شروع کی گئی اور نہ ہی سندھ حکومت کی جانب سے کوئی اضافی فنڈز مختص کیے گئے۔ یہ صورتحال کئی اہم سوالات کو جنم دیتی ہے۔
کیا انضمام کا فیصلہ صرف سیاسی نوعیت کا تھا؟ اگر دیہی علاقوں کو شہری حدود میں شامل کرنا ایک ترقیاتی فیصلہ تھا، تو اس پر عملدرآمد کیوں نہیں کیا گیا؟ کیا اس پورے عمل کا مقصد صرف اختیارات کا مرکزیت کی طرف منتقلی تھا، نہ کہ عوامی فلاح؟ آج بھی کراچی کے دیہی علاقے جیسے مبارک ولیج، مراد میمن گوٹھ، گڈاپ یا ابراہیم حیدری صاف پانی، صحت کی سہولیات، معیاری تعلیم اور بنیادی انفرا اسٹرکچر سے محروم ہیں۔
یہ وقت ہے کہ سندھ حکومت اور بلدیہ عظمیٰ کراچی اپنی ذمے داریوں کا ادراک کریں اور کراچی کے ان علاقوں کو ترقی کے اس دھارے میں شامل کریں جس کا وعدہ 2023 کے انضمام کے وقت کیا گیا تھا، اگر یہ محرومی یونہی جاری رہی، تو شہری و دیہی خلیج مزید گہری ہوگی اور اس کا نتیجہ صرف عوامی بے چینی ہی نہیں، بلکہ انتظامی ناکامی کی صورت میں بھی سامنے آسکتا ہے۔
.
ذریعہ
ذریعہ: Express News
کلیدی لفظ: دیہی علاقوں علاقوں میں مبارک ولیج سندھ حکومت ان علاقوں علاقوں کو کے ایم سی ا ج بھی کا حصہ
پڑھیں:
اٹلی میں چار پاکستانی زرعی مزدوروں کا قتل، دو پاکستانی شہری گرفتار
اسلام آباد (اُردو پوائنٹ ۔ DW اردو۔ 02 جون 2026ء) اخبار کے مطابق جلی ہوئی گاڑی امینڈولارا نامی گاؤں کے قریب ایک پٹرول پمپ پر ملی، جو کالابریا کے وسیع زرعی علاقے میں واقع ہے۔
اخبار کے مطابق پٹرول پمپ کے سی سی ٹی وی کیمروں کی فوٹیج میں دو افراد کو منی وین کے دروازے باہر سے بند کرتے اور اس کے اندر آتش گیر مائع پھینکتے ہوئے دیکھا گیا۔
رپورٹ کے مطابق اس کے بعد گاڑی میں آگ بھڑک اٹھی اور دونوں مشتبہ افراد موقع سے فرار ہو گئے۔
فائر بریگیڈ نے آگ بجھانے کے بعد گاڑی کے اندر سے چار لاشیں برآمد کیں۔
مقامی پولیس چیف نے اس اطالوی اخبار سے گفتگو کرتے ہوئے کہا، ’’یہ یقینی طور پر قتل کا واقعہ ہے، اب ہمیں صرف اس کی تفصیلات معلوم کرنا ہیں۔
(جاری ہے)
‘‘
اخبار نے مزید لکھا کہ گزشتہ چند مہینوں کے دوران اس علاقے میں پاکستانیوں کی گاڑیوں اور منی وینز کے نذر آتش کیے جانے کے 14 واقعات پیش آ چکے ہیں۔
رپورٹ کے مطابق علاقے میں تارکین وطن کے مختلف گروہوں کے درمیان زرعی کام کی تقسیم، رہائشی دستاویزات (ریذیڈنسی پیپرز)، اور رہائش کے مسائل پر کشیدگی پائی جاتی ہے، جسے ممکنہ طور پر اس واقعے کے پس منظر سے جوڑا جا رہا ہے۔
اطالوی حکام اس واقعے کی تحقیقات جاری رکھے ہوئے ہیں تاکہ اکٹھے چار افراد کے اس قتل کے محرکات اور اس کے ذمہ دار افراد کے اس جرم میں کردار کی مکمل طور پر وضاحت ہو سکے۔
ادارت: مقبول ملک
منشیات و اسلحہ برآمدگی کیس: صحافی مطیع اللہ جان پر فرد جرم عائد کرنے کا فیصلہ